1 Tɑfiiti kpɑtǝlɑ teu, ɩlɛnɑ ɩ́ kpɑ ɩ pǝyɑlʋ Sɑlʋmɔŋ kɛ Ɩsɛɣɛlɩ wulɑʋ. 2 Nɑ ɩ́ koti Ɩsɛɣɛlɩ nyʋɣʋ nyǝ́mɑ tǝnɑ nɑ kɔtǝlɑɑ nɑ Lefii nyǝ́mɑ.

3 Ḿpʋ́ɣʋ́ pɑ kɑlɑ Lefii nyǝ́mɑ ɑpɑlɑɑ mpɑ pɑ pɩɩsɩ wɛ hiu nɑ nɑɑnʋwɑ nɑ wɑɑlɩ tɔ. Pɑ wɛ yǝlɑɑ iyisi pǝlefɛɩ nɩɩlɛ (38000). 4 Ɩlɛnɑ Tɑfiiti lǝsɩ pɑ tɑɑ kɛ́ yǝlɑɑ iyisi hiu nɑ liɣiti (24000) sɩ pɑ́ feŋiɣi Ɩsɔ tǝsɛɛlɛ ŋmɑʋ nɑ yǝlɑɑ iyisi nɑɑtoso (6000) kɛ nyʋɣʋ nyǝ́mɑ nɑ tɔm hʋʋlɑɑ. 5 Yǝlɑɑ iyisi liɣiti (4000) kɛ́ nɔnɔɔsɩ tɑŋlɑɑ. Yǝlɑɑ iyisi liɣiti (4000) nɑ́ɑ́ sɑŋ Ɩsɔ nɑ cǝmǝŋ wei Tɑfiiti yelɑɑ nɑ pɑ́ lu tɔ. 6 Ɩlɛnɑ pɑ́ fɑɣɑ Lefii nyǝ́mɑ kɛ kpekɑ nɑ pǝ́ kɛɛsǝnɑ pɑ lʋlʋŋ nyʋɣʋ nyǝ́mɑ, ɩsɩɩ Lefii pǝyɑlɑɑ Kɛɛsɔŋ nɑ Kehɑtɩ nɑ Melɑli.

7 Kɛɛsɔŋ piyɑ ntɛ́ Lɑtɑŋ nɑ Simeyi. 8 Lɑtɑŋ nɑ́ lʋlɑ piyɑ tooso kɛ́. Yehiyɛlɩ nɑ Setɑm nɑ Sowɛɛlɩ. 9 Simeyi kɛ piyɑ tooso, Selomitɩ nɑ Hɑsiyɛlɩ nɑ Hɑlɑŋ. Lɑtɑŋ pǝyɑlɑɑ lʋlʋŋ nyɔɔŋ nyǝ́mɑ ntɛ́. 10 Simeyi ɩ́lɛ́ ɩ piyɑ wɛ liɣiti tɔtɔ, Yɑhɑtɩ, nɑ Sisɑ nɑ Yewusi nɑ Peliyɑ. 11 Yɑhɑtɩ kɛlɛ kɑncɑɑlɑɣɑ nyǝŋ, nɑ Sisɑ kɛ nɑɑlɛ nyǝŋ. Yewusi nɑ Peliyɑ pɑ tɑ hiki piyɑ kɛ sɔsɔm. Ɩlɛnɑ pɑ́ kpɛntɩ-wɛ ɩsɩɩ lʋlʋɣʋ kʋlʋmʋɣʋ.

12 Kehɑtɩ lʋlɑ piyɑ liɣiti kɛ́. Amǝlɑm nɑ Ɩsɑɑ nɑ Hepǝlɔŋ nɑ Wusiyɛlɩ. 13 Amǝlɑm piyɑ ntɛ́ Alɔŋ nɑ Moisi. Ḿpʋ́ɣʋ́ pɑ lǝsɑ Alɔŋ nɑ ɩ lʋlʋɣʋ nyǝ́mɑ kɛ tɑm tɔɔ sɩ pɑ tike pɑ́ pɑɑsǝnɑ kɑtɛ tɑɑ kɑtɛ tǝcɑɣɑlɛ nɑ pɑ́ lɑkɩ Tɑcɑɑ kɛ tulɑɑlʋnɑɑ kɔtɑsɩ nɑ ɩ tǝmlɛ nɑ pɑ́ kooliɣi yǝlɑɑ kɛ nɔɔsɩ kʋpɑŋsɩ nɑ Tɑcɑɑ hǝtɛ tɑɑ. 14 Moisi kɛ́ Ɩsɔ yʋlʋ kɛ́, pɑɑ nɑ mpʋ ɩ piyɑ wɛ Lefii lʋlʋɣʋ nyǝ́mɑ tɑɑ kɛ́ ɩsɩɩ yǝlɑɑ kɛ yem. 15 Ɩ pǝyɑlɑɑ ntɛ́ Kɛɛsɔm nɑ Iliyesɛɛ. 16 Kɛɛsɔm pǝyɑlʋ kɛlɛ Sepuwɛlɩ. 17 Pǝyɑɣɑ kʋlʋmɑɣɑ kɛ Iliyesɛɛ lʋlɑɑ ɩ tɑ tɑsɑ nɑkǝlɩ. Pɑ yɑɑ-kɛ sɩ Lehɑpiyɑ. Amɑ Lehɑpiyɑ pǝyɑlɑɑ wɛnnɑ pɑɣɑlɛ. 18 Ɩsɑɑ pǝyɑɣɑ ntɛ́ Selomitɩ. 19 Hepǝlɔŋ pǝyɑlʋ kɑncɑɑlɑɣɑ nyǝŋ ntɛ́ Yeliyɑ. Nɑɑlɛ nyǝŋ ntɛ́ Amɑliyɑ, tooso nyǝŋ ntɛ́ Yɑsiyɛlɩ, nɑ liɣiti nyǝŋ kɛ Yekɑmɑm. 20 Usiyɛlɩ pǝyɑɣɑ kɑncɑɑlɑɣɑ nyǝŋkɑ ntɛ́ Mikɑ, nɑ nɑɑlɛ nyǝŋkɑ kɛ Isiyɑ.

21 Melɑli piyɑ ntɛ́ Mɑlii nɑ Musi. Ɩlɛnɑ Mɑlii nɑ́ɑ́ lʋlɩ piyɑ nɑɑlɛ, Ɩlɑsɑɑ nɑ Kisi. 22 Ḿpʋ́ɣʋ́ Ɩlɑsɑɑ nɑ́ sǝpɑ ɩ tɑ hiki ɑpɑlʋpǝyɑɣɑ. Alʋpiyɑ tike kɛ ɩ hikɑɑ. Ɩlɛnɑ ɩ cɑɑ newɑɑ pǝyɑlɑɑ nɑ́ɑ́ kpɑɣɑ-wɛ. 23 Piyɑ toosoɣo Musi nɑ Lʋlɑɑ. Mpɛɣɛlɛ Mɑlii nɑ Ɩtɛɛ nɑ Yelemɔtɩ.

24 Lefii lʋlʋɣʋ nyǝ́mɑ ntɛ́ nɑ mpɛɣɛlɛ pɑ nyɔɔŋ nyǝ́mɑ nɑ pǝ́ kɛɛsǝnɑ ɩsǝnɑ pɑ tʋ pɑ hǝlɑ kɛ kʋkɑlʋɣʋ tɑkǝlɑɣɑ tɑɑ tɔ. Pɑ pɩɩsɩ tɑkɩ hiu hiu tɔɣɔ pɑ cɑɑlǝɣɩ Tɑcɑɑ tǝmlɛ kɛ Ɩsɔ tǝsɛɛlɛ tɑɑ. 25 Tɑfiiti kɑ yɔɣɔtɑ mpʋ sɩ Ɩsɛɣɛlɩ Ɩsɔ Tɑcɑɑ yelɑɑ nɑ yǝlɑɑ hɛɛsɩ nɑ ɩ mɑɣɑmɑɣɑ ɩ wɛ Yosɑlɛm tɑɑ kɛ́ tɑm. 26 Ɩlɛ Lefii nyǝ́mɑ kɑɑ tɑsɑ Ɩsɔ cokǝle nɑ ɩsɔ sɛɛʋ wontu tǝnɑɣɑ lonɑ lɑɣɑsʋɣʋ. 27 Ɩlɛnɑ pɑ́ ŋmɑɑkɩ pɑ hǝlɑ kɛ wɑɑtʋ wei pɑ tɑkɩ pɩɩsɩ hiu hiu tɔ. Ɩsɩɩ Tɑfiiti kɑ sɩɩʋ tɔ. 28 Nɑ Alɔŋ lʋlʋɣʋ nyǝ́mɑ nɑ́ɑ́ tʋɣʋ-wɛɣɛ tǝmlɛ kɛ Ɩsɔ tǝsɛɛlɛ tɑɑ nɑ pǝ pɑtǝmɑ tɑɑ nɑ pɑ́ tɑɣɑnǝɣɩ kɔtɑɣɑ wontu nɑ pɑ́ lɑkɩ pǝ ɩsɔ sɛɛʋ tǝmɑ lɛnnɑ. 29 Ɩsɩɩ Ɩsɔ potopotonɑɑ tʋɣʋ, nɑ kʋtɔɣɔʋ ŋku pɑ lɑkɩ kɔtɑɣɑ tɔ pǝ mʋlʋm mpi pɑ tʋɣɩ kʋkʋsʋm fɛɩ kɑkɑlɑsɩ nɑ kɑkɑlɑsɩ nsi pɑ tʋɣɩ nim tɑɑ tɔ, nɑ tinte pǝ mʋlʋm tɑɣɑnʋɣʋ. Nɑ pɑ́ feŋiɣi sɑnǝyɑnɑɑ nɑ mɑɣɑsǝlɑsɩ pǝ tɔɔ. 30 Pǝ wɛɛ sɩ yonyoolɑɑ ɩ́ wɛɛ tɑm kɛ́ tɑnɑŋ nɑ tɑɑnɑɣɑ, nɑ pɑ́ sɑŋ Tɑcɑɑ nɑ pɑ́ kʋsɩ ɩ nyʋɣʋ. 31 Nɑ kɔtǝlɑɑ lɑkɩ-ɩ kɔtɑsɩ nsi kɔkɔ lusɑ sɩ tǝnɑ tɔɣɔ kʋyɑkʋ kʋhɛɛsʋɣʋ wule, nɑ ɩsɔtʋ kʋyɑkʋ kɑncɑɑlɑɣɑ nyǝŋkʋ, nɑ ɑcimɑ lɛnnɑ wule. Ḿpʋ́ɣʋ́ Lefii nyǝ́mɑ kɑ́ lɑkɩ pɑ tǝmɑ kɛ tɑm kɛ́ Tɑcɑɑ ɩsɛntɑɑ ɩsɩɩ pɑ tʋ-wɛ tɔ. 32 Pɑɑ pɑɑsǝnɑ Ɩsɔ cokǝle nɑ kɑtɛ tɑɑ kɑtɛ nɑŋ. Ɩlɛnɑ pɑ tɛɛtʋnɑɑ Alɔŋ pǝyɑlɑɑ nɑ́ɑ́ lɑkɩ Ɩsɔ tǝyɑɣɑ tɑɑ tǝmɑ.