1 Pǝ tǝnɑɣɑ mpʋ ɩlɛ tɑ́ tɑɑpɑlɑɑ mɛ ɩ́ nɑ́ tɑ́ kiŋ kɛ ɩsǝnɑ pǝ wɛɛ sɩ ɩ́ kɑ́ tɔ nɑ pǝ́ mɑɣɑ Ɩsɔ tɔ, hɑlɩ ɩ́ tɔŋnɑ ḿpʋ́ɣʋ́ lɑpʋ mɛɛ. Amɑ nti nɔɔnɔɔ mɑ wiikinɑ-mɛ tɔɣɔlɛ sɩ, hɑɩ, Tɑcɑɑ Yesu tɔɔ ɩ́ sɔɔsɩ lʋpʋ kɛ pǝ tɑɑ. 2 Anɩ ɩ́ nyǝmɑ́ Tɑcɑɑ Yesu kʋsɛɣɛsǝtʋ nti tǝ sɛɣɛsɑ-mɛ sɩ ɩ́ tǝŋ tɔ. 3 Mpi Ɩsɔ cɑɑkɩ tɔɣɔlɛ sɩ ɩ́ pǝsɩ ɩ nyǝ́mɑ nɑ ɩ́ yele ɑsilimɑ kʋlɑpʋtʋ tǝkpɑtɑɑ. 4 Pɑɑ mǝ tɑɑ wei ɩ́ nyɩ ɩsǝnɑ ɩ kɑ́ kpɑɣɑ ɑlʋ nɑ pǝ́ wɛ tǝnɑŋŋ nɑ pǝ́ wɛnɑ nyʋɣʋ tɔ. 5 Pǝ́ tɑɑ wɛɛ kɔtɔɩnɑɑ tike tɔm ɩsɩɩ yǝlɑɑ mpɑ pɑ tɑ nyɩ Ɩsɔ tɔ pɛlɛ pɑ lɑkʋɣʋ tɔ. 6 Nɔɣɔlʋ ɩ́ tɑɑ pǝntǝnɑ ɩ tɔɣɔntǝlɛ kɛ tɔm tǝnɛ tǝ tɑɑ nɑ ɩ́ tɑɑ wɑkǝlɩ-ɩ pʋlʋ. Tǝ tɛmɑ-mɛɣɛ tɔm tǝnɛɣɛ heeluɣu nɑ tǝ kpɑɑlɑ-mɛɣɛ teu sɩ Tɑcɑɑ kɑ́ tʋ sɑlǝkɑ kɛ mpɑ pɑ lɑkɩ ɩsɑɣɑtʋ ntǝnɑɑ tɔ. 7 Ɩsɔ tɑ́ yɑɑ-tʋɣʋ ɩ mpɑɑʋ tɑɑ sɩ tǝ́ lɑkɩ ɑsilimɑ kʋlɑpʋtʋ, ɑmɑ sɩ tǝ́ lɑ tɑ́ tɩ tǝnɑŋŋ kɛ́. 8 Pǝ tɔɔ kɛ́ ye wei ɩ kpɑɣɑ tɔm tǝnɛ nɑ ɩ́ lɔɣɔnɑ lumɑɣɑ wɑɑlɩ, pǝ tɑɣɑ yʋlʋ kʋheelitu kɛ pʋntʋ lɔwɑ. Amɑ Ɩsɔ wei ɩ hɑ-tʋɣʋ ɩ Feesuɣu Nɑŋŋtʋ tɔ ɩ nyǝntʋ kɛ ɩ lɔwɑ.

9 Ye mǝ tɑɑ mǝ tike tǝmɑ sɔɔlʋɣʋ tɔm ɩlɛ, pɑɑ ŋmɑɑ-mɛ nɑ pɑ́ sɔɔsɩ-mɛɣɛ nti tɔtɔ? Ɩsɔ mɑɣɑmɑɣɑ tɔŋnɑ-mɛɣɛ pǝ tǝnɑɣɑ ḿpʋ́ɣʋ́ sɛɣɛsʋɣʋ ɩlɛ. 10 Hɑlɩ ntɩ ɩnɩ tǝ mɑɣɑmɑɣɑ kɛ ɩ́ tɔŋnɑ mǝ tɑɑpɑlɑɑ mpɑ pɑ tǝnɑ pɑ wɛ Mɑsetoni tǝnɑ tɑɑ tɔɣɔ lɑpʋ. Amɑ tɑ́ tɑɑpɑlɑɑ mɛ, tǝ tɑsǝɣɩ-mɛɣɛ wiinɑʋ sɩ ɩ́ sɔɔsɩ lʋpʋ kɛ pǝ tɑɑ. 11 Pɑɑ mǝ tɑɑ wei ɩ́ lʋ sɩ ɩ́ nɑ ɩ tɔɣɔntǝlɛ pɑ́ wɛɛnɑ tǝmɑ nɑ leleŋ, nɑ pɑɑ wei ɩ́ pɑɑsǝnɑ ɩ nyǝntɛ nɑ ɩ́ hiki ɩ mɑɣɑmɑɣɑ kɛ mpi ɩ kɑ́ suu ɩ nɔɣɔ tɔ. Ntɩ ɩnǝɣɩ tɩɩ tɛmɑ-mɛɣɛ heeluɣu. 12 Mpʋ ɩnɩ pɩɩ yelinɑ nɑ mɑ tɑ nyɩ ɩsɔnɑɑ tʋnɑ-mɛ, nɑ ɩ́ kɑɑ cɑɣɑ nɑ ɩ́ tɛɛlɩ nɔɣɔlʋɣʋ pʋlʋ tɑɑ.

13 Tɑ tɑɑpɑlɑɑ tǝ cɑɑ sɩ ɩ́ cɛkǝnɑ mpɑ pɑ sǝpɑ tɔ pɑ tɔm nɑ ɩ́ tɑɑ wɛɛ piti tɑɑ ɩsɩɩ mpɑ pɑ fɛɩnɑ tɛɛlʋɣʋ kɛ Ɩsɔ kiŋ tɔ. 14 Ɩsɩɩ tǝ tɛmɑ tɑ́ tɑɑ sɩ Yesu sǝpɑ nɑ ɩ́ tɑɣɑnɩ fem tɔ, mpʋ tɔtɔɣɔ tǝ tɛmɑ tɑ́ tɑɑ tɔtɔ sɩ Ɩsɔ kɑ́ kpɛnnɑ Yesu nɑ mpɑ pɑ sǝpɑ Yesu mpɑɑʋ tɑɑ tɔ nɑ ɩ́ mǝŋnɑ.

15 Tɑcɑɑ kʋheelitu mɑɣɑmɑɣɑ kɛ tǝ cɑɑ-mɛɣɛ sɔɔsʋɣʋ kɛ cǝnɛ, sɩ tɑ́ mpɑ tɩɩ wɛɛnɑ tɑ́ ɩsɛ kɛ Tɑcɑɑ kʋyɑkʋ kʋkɔmʋɣʋ wule tɔ tǝ kɑɑ tɛɛ nɔɣɔ kɛ mpɑ pɑ tɛmɑ sǝpʋ tɔ. 16 Pǝ kɔŋ pǝ́ kɛɛsɩ nɑ pǝ́ holi nɑ pɑ́ nɩɩ ɩsɔtɑɑ tillu sɔsɔ tɑŋ nɑ Ɩsɔ ɑkɑntǝlɛ, ɩlɛnɑ Tɑcɑɑ mɑɣɑmɑɣɑ lɩɩnɑ ɩsɔtɑɑ nɑ ɩ́ tiiki. Mpɑ pɑ sǝpɑ Kilisiti mpɑɑʋ tɑɑ tɔ pɛlɛ pɑɑ fe kɑncɑɑlɑɣɑ. 17 Pǝ wɑɑlɩ kɛ́ pɩɩ kɛlɩ ɩsɛ nyǝ́mɑ tɑ́, nɑ tɑ́ nɑ-wɛ tǝ́ kpɛntɩ nɑ tǝ́ sʋʋ ŋmʋntʋ tɛɛ nɑ tǝ́ suli Tɑcɑɑ kɛ ɩsɔtɑɑ. Nɑ tɑ́ nɑ-ɩ tɩɩ cɑɣɑ tɑm. 18 Ɩ́ hɛɛsǝɣɩ tǝmɑ lɑŋɑ nɑ tɔm tǝnɛ.