1 Ḿpʋ́ɣʋ́ Sɑlʋmɔŋ cɑɑ wontu sǝɣǝllɑɑ kɛ yǝlɑɑ iyisi nɩɩtoso nɑ nɑɑnʋwɑ (70000), nɑ pɛɛ sɑɑkǝlɑɑ kɛ iyisi nɩɩnɑɑsɑ (80000) sɩ pɑ́ lɑ tǝmlɛ kɛ pʋɣʋ tɑɑ. Nɑ yǝlɑɑ iyisi tooso nɑ nɑsǝtoso (3600) feŋiɣi pɑ tɔɔ.

2 Ntɛnɑ Sɑlʋmɔŋ tili nɑ pɑ́ heeli Tiii wulɑʋ Hilɑm sɩ: Tilinɑ-m kpeŋkpelɑsɩ kʋpɑŋsɩ nsi n kɑ tilinɑ mɑ cɑɑ Tɑfiiti nɑ ɩ́ ŋmɑnɑ ɩ tǝyɑɣɑ tɔ. 3 Mɑ tɔŋɑ Ɩsɔ Tɑcɑɑ kɛ kutuluɣu ŋmɑʋ kɛ́ sɩ pɑɑ wɔkɩ-ɩ tulɑɑlʋnɑɑ nɑ pɑ́ hɑɑkɩ-ɩ potopotonɑɑ kɛ kʋtɑmsɑ. Nɑ pɑ́ lɑkɩ-ɩ kɔtɑsɩ nsi kɔkɔ lusɑ sɩ tǝnɑ tɔɣɔ tɑnɑŋ nɑ tɑɑnɑɣɑ, nɑ kʋyɛɛŋ kʋhɛɛsǝŋ, nɑ ɩsɔtʋnɑɑ kʋyɛɛŋ kɑncɑɑlɑɣɑ nyǝŋ, nɑ Tɑcɑɑ ɑcimɑ kʋyɛɛŋ lɛlǝŋ. Tǝmlɛ kɛ pǝ tʋ Ɩsɛɣɛlɩ nyǝ́mɑ kɛ tɑm tɔɔ. 4 Mpi tɔ, kutuluɣu ŋku mɑ cɑɑ ŋmɑʋ tɔ kʋ kɛ́ sɔsɔɔʋ kɛ́. Pǝ tɑɣɑ pʋlʋ, tɑ Ɩsɔ kǝlɑ tɩɩŋ tǝnɑɣɑ sɔsɔɔntʋ kɛ́. 5 Pɑɑ nɑ mpʋ tɔ, nɔɣɔlʋ ɩɩ pǝsǝɣɩ nɑ ɩ́ ŋmɑ-ɩ tǝcɑɣɑlɛ. Pǝ tɑɣɑ pʋlʋ, ɩsɔtɔnʋɣʋ nɑ kʋ tɔɔʋ tǝnɑ, kʋ tɑ tɑlɑ-ɩ. Pǝ tɔɔ kɛ́ mɑ mɑɣɑmɑɣɑ mɑɑ hɔŋ mɑ tɩ sɩ mɑ ŋmɑɑkɩ-ɩ tǝcɑɣɑlɛ. Amɑ timpi pɑɑ sɛɛkɩ-ɩ nɑ pɑ́ lɑkɩ-ɩ kɔtɑsɩ tɔɣɔ. 6 Mpʋ tɔ, Hilɑm tilinɑ-m wei ɩ nyǝmɑ́ wʋlɑ nɑ liɣitee nyǝɣǝlʋɣʋ nɑ kʋsɛɛmʋɣʋ nɑ nyǝɣǝlʋɣʋ mɑɣɑmɑɣɑ pǝ tɑɣɑnʋɣʋ tɔ. Nɑ ɩ́ nyǝmɑ́ tɔtɔɣɔ pɔɔŋ kʋsɛɛmǝŋ cǝŋcǝŋ, nɑ kʋsɛɛmǝŋ mɑɣɑmɑɣɑ, nɑ ɑkpɑɑyɑlɑ nyǝŋ tɑɣɑnʋɣʋ nɑ fotoonɑɑ lǝsʋɣʋ tɔ. Ɩlɛnɑ pʋntʋ nɑ yǝlɑɑ mpɑ mɑ cɑɑ Tɑfiiti lǝsɑɑ nɑ pɑ́ wɛ Yosɑlɛm nɑ Yutɑ tɛtʋ tɑɑ tɔ pɑ́ lɑ́ tǝmlɛ ńtɛ́. 7 Nyɑ́ tǝmlɛ nyǝ́mɑ ɩ́ sɛtɩ-m Lipɑŋ pʋɣʋ tɑɑ tɩɩŋ kʋpɑŋ. Mpi tɔ, pɑ nyǝmɑ́ pǝ tǝmlɛ kɛ teu kɛ́. Mɑ nyǝ́mɑ kɑ́ polo nɑ pɑ́ sǝnɑ-wɛ. 8 Ɩlɛnɑ pɑ́ kpɛntɩ nɑ pɑ́ sɛtɩ-m kpeŋkpelɑsɩ kɛ sɔsɔm. Mpi tɔ, Ɩsɔ tǝsɛɛlɛ nte mɑ ŋmɑɑkɩ tɔ tɩɩ tɔɔ sɔsɔm kɛ́ nɑ tǝ tewɑ. 9 Mɑɑ cɛlɑ tɩɩŋ sɛtǝlɑɑ mpɛɣɛ mʋlʋm tɔɔnǝnɑɑ iyisi nɑɑtoso (6000), nɑ tɔɣɔnɑɣɑ pee tɔɔnǝnɑɑ iyisi nɑɑtoso (6000), nɑ sʋlʋm kɛ liitilinɑɑ iyisi nɑsǝnɑɑsɑ (80000), nɑ nim kɛ mpʋ tɔtɔ.

10-11 Ḿpʋ́ɣʋ́ Tiii wulɑʋ Hilɑm cɔ Sɑlʋmɔŋ nɑ tɑkǝlɑɣɑ sɩ: Mɑ sɛɛ Ɩsɛɣɛlɩ Ɩsɔ Tɑcɑɑ wei ɩ lɑpɑ ɩsɔtɑɑ nɑ ɑtɛ, nɑ ɩ́ hɑ Tɑfiiti pǝyɑɣɑ nyɑɣɑ lǝmɑɣɑsɛɛ nɑ nyǝm nɑ lɑɣɑtʋ sɩ ń ŋmɑ-ɩ Ɩsɔ tǝsɛɛlɛ nɑ nyɑ́ kɑwulɑɣɑ tǝyɑɣɑ tɔ. Tɑcɑɑ sɔɔlɑ ɩ yǝlɑɑ tɔɣɔ ɩ kpɑ-ŋ pɑ wulɑʋ. 12 Mɑɑ tilinɑ-ŋ ɑpɑlʋ wei pɑ yɑɑ sɩ Hulɑm-Api tɔ. Apɑlʋ ɩnɩ ɩ nyǝmɑ́ niŋ tǝmɑ kɛ́ nɑ ɩ́ wɛnɑ lɑɣɑtʋ. 13 Ɩ too kɛ Tɑŋ kpekǝle tʋ kɛ́, nɑ ɩ cɑɑ kɛ Tiii tʋ. Mpi mpi pǝ tǝmlɛ ɩ nyǝmɑ́ tɔɣɔlɛ, wʋlɑ nɑ liɣitee nyǝɣǝlʋɣʋ, nɑ kʋsɛɛmʋɣʋ nɑ nyǝɣǝlʋɣʋ mɑɣɑmɑɣɑ, nɑ pɛɛ nɑ kpeŋkpelɑsɩ nɑ pɔɔŋ wei pɑ sɛɛsɑɑ tɔ, nɑ kʋsɛɛmǝŋ cǝŋcǝŋ nɑ wei pɑ lii ɑkpɑɑyɑlɑ tɔ, nɑ kpoŋkpontu toŋ nyǝntʋ pɔɔŋ pǝ tɑɣɑnʋɣʋ. Ɩ nyǝmɑ́ tɔtɔɣɔ lɛɛsǝŋ sɑɑkʋɣʋ tɔm. Pɑɑ tǝmlɛ nteɣe n tʋ-ɩ ɩ lɑkɩ kɛ́. Ɩ nɑ nyɑ́ nyǝ́mɑ nɑ mpɑ nyɑ́ cɑɑ wulɑʋ Tɑfiiti lǝsɑɑ tɔ pɑɑ lɑnɑ. 14 Pǝnɛntɛ tɑcɑɑ, tilinɑ-tʋɣʋ tɔɣɔnɑɣɑ pee nɑ sʋlʋm nɑ nim mpi pǝ tɔm n yɔɣɔtɑɑ tɔ. 15 Tɩɩ polo Lipɑŋ pʋɣʋ tɑɑ, nɑ tǝ́ sɛtɩ tɩɩŋ wei ɩ tǝnɑ n cɑɑ tɔ, nɑ tǝ́ hɔkɔ-ɩ nɑ tǝ́ tʋ teŋku tɑɑ nɑ pǝ́ tɑlɑ Sɑfɑ. Ɩlɛnɑ ń yele nɑ pɑ́ kpɑɣɑ nɑ pɑ́ ponɑ Yosɑlɛm.

16 Ḿpʋ́ɣʋ́ Sɑlʋmɔŋ kɑlɑ cɑɣɑlɑɑ tǝnɑ mpɑ pɑɑ wɛ Ɩsɛɣɛlɩ tɑɑ tɔ, nɑ pǝ́ kɛɛsǝnɑ kʋkɑlʋɣʋ ŋku ɩ cɑɑ Tɑfiiti kɑ lɑpɑ tɔ. Pɑɑ wɛ yǝlɑɑ iyisi nɩɩnʋwɑ nɑ nɩɩlɛ nɑ nɑɑnʋwɑ nɑ tooso nɑ nɑsǝtoso (153600). 17 Ḿpʋ́ɣʋ́ Sɑlʋmɔŋ lǝsɑ wontu sǝɣǝllɑɑ kɛ iyisi nɩɩtoso nɑ nɑɑnʋwɑ (70000), nɑ mpɑ pɑ sɑɑkǝɣɩ pɛɛ kɛ pʋɣʋ tɑɑ tɔɣɔ iyisi nɩɩnɑɑsɑ (80000), nɑ mpɑ pɑ tʋɣɩ lɛlɑɑ kɛ tǝmɑ nɑ pɑ́ feŋiɣi ɑ tɔɔ tɔɣɔ yǝlɑɑ iyisi tooso nɑ nɑsǝtoso (3600).