1 Ḿpʋ́ɣʋ́ pǝlɛ pǝ wɑɑlɩ wulɑʋ Aselusi kʋsɑ Akɑkɩ tʋ Hɑmetɑtɑ pǝyɑlʋ Hɑmɑŋ nyʋɣʋ nɑ ɩ́ kpɑ-ɩ ɩ wɑɑlɩ tʋ. 2 Ɩlɛnɑ wulɑʋ sɩɩ sɩ ɩ kɑwulɑɣɑ tɑɑ ɑkewenɑɑ tǝnɑ ɩ́ hǝntɩ Hɑmɑŋ kɛ ɑtɛ nɑ pɑ́ sɛɛ-ɩ. Amɑ Mɑɑtosee nɑ́ kisɑ mpʋ ɩnɩ pǝ lɑpʋ. 3 Ḿpʋ́ɣʋ́ ɑkewenɑɑ lɛlɑɑ pɔɔsɑ-ɩ sɩ: Pepe tɔɔ kɛ́ nn lɑkɩ ɩsɩɩ wulɑʋ sɩɩwɑ tɔ? 4 Pɑɑ kʋyɑkʋ ŋkuɣu pɑ pɔɔsɑɣɑ-ɩ mpʋ. Ɩlɛnɑ ɩ́ cɔ-wɛ sɩ: Mɑ kɛ́ Yutɑ tʋ. Ntɛnɑ pɑ́ tɑɣɑsɩ-tǝɣɩ Hɑmɑŋ sɩ pɑ nɑɑkɩ sɩ ɩ kɑ́ lɑ ɩsǝnɑ. 5 Hɑmɑŋ cɛkǝnɑɑ sɩ Mɑɑtosee ɩɩ hǝntǝɣɩ-ɩ ɑtɛ, ɩlɛnɑ ɩ pɑ́ɑ́nɑ́ huu. 6 Hɑmɑŋ nɩɩwɑ sɩ Mɑɑtosee kɛ́ Yutɑ tʋ, pǝ tɔɔ kɛ́ ɩ cɑɑkɑɣɑ sɩ ɩ́ kpiisi ɩ́ nɑ ɩ yǝlɑɑ Yutɑ nyǝ́mɑ lɛlɑɑ mpɑ pɑ wɛ Aselusi kɑwulɑɣɑ tǝnɑ tɑɑ tɔ. Sɩ ɩ́ kʋ Mɑɑtosee tike tɔ, tǝlɛ tǝ tɑ mɑɣɑ-ɩ. 7 Ḿpʋ́ɣʋ́ Aselusi kɑwulɑɣɑ pǝnɑɣɑ nɑɑnʋwɑ nɑ nɑɑlɛ nyǝŋkɑ ɩsɔtʋ kɑncɑɑlɑɣɑ nyǝŋ wei pɑ yɑɑ sɩ Nisɑŋ tɔ ɩ tɑɑ Hɑmɑŋ mɑɣɑsɑ pǝle nte pɑ yɑɑ sɩ pulim tɔ, sɩ ɩ nyǝŋ kʋyɑkʋ ŋku ɩ kɑ́ kpiisi Yutɑ nyǝ́mɑ ɩsɩɩ ɩ mɑɣɑsʋɣʋ ɩ tɑɑ tɔ. Ɩlɛnɑ pǝ́ tɔɣɔ pɑ ɩsɔtʋ nɑɑnʋwɑ nɑ nɑɑlɛ nyǝŋ wei pɑ yɑɑ sɩ Atɑɑ tɔ.

8 Ḿpʋ́ɣʋ́ Hɑmɑŋ tɔmɑ wulɑʋ sɩ: Yǝlɑɑ nɑpǝlɩ pɑ wɛnnɑ nyɑ́ tɛtʋ hɔɣɔlǝŋ tǝnɑ tɑɑ. Pɑ wɛnɑ pɑ mpɑɑ kɛ́, pɑ yɑɑsi tɑ nǝɣǝsǝnɑ yǝlɑɑ lɛlɑɑ. Pǝyele pɑɑ tǝŋǝɣɩ nyɑ́ kiiŋ. Ɩlɛ pǝ tɑ mʋnɑ sɩ ń yele-wɛ. 9 Ye pǝ mɑɣɑ-ŋ ɩlɛ n hɑ nɔɣɔ nɑ pɑ́ kpiisi-wɛ. Ɩlɛ mɑ kɑɑ lɑŋ pǝ liɣitee nyǝɣǝtʋ kɛ tɔɔnǝnɑɑ ŋmʋnʋɣʋ nɩɩnʋwɑ (300) nɑ mɑ́ cɛlɑ kɑwulɑɣɑ liɣitee pɑɑsǝnlɑɑ nɑ pɑ́ tʋ kpɑncoou tɑɑ.

10 Ḿpʋ́ɣʋ́ wulɑʋ lǝsɑ ɩ kukuule nte ɩ yʋsǝɣǝnɑ tɔ nɑ ɩ́ cɛlɑ Yutɑ nyǝ́mɑ kolontu Hɑmɑŋ. 11 Ɩlɛnɑ ɩ́ tɔmɩ-ɩ sɩ: Mɑ hɑ-ŋ yǝlɑɑ mpɛ nɑ pɑ liɣitee, lɑnɑ-wɛɣɛ ɩsǝnɑ n cɑɑ tɔ.

12 Ḿpʋ́ɣʋ́ Hɑmɑŋ kotɑ wulɑʋ tɑkǝlɑsɩ ŋmɑɑlɑɑ kɛ ɩsɔtʋ kɑncɑɑlɑɣɑ nyǝŋ kʋyɛɛŋ nɑɑnʋwɑ nɑ tooso wule. Ɩlɛnɑ pɑ́ ŋmɑɑ tɑkǝlɑsɩ kɛ tɛtʋ feŋlɑɑ nɑ kʋmɑtɑŋnɑɑ sɔsɑɑ nɑ nyʋɣʋ nyǝ́mɑ. Ḿpʋ́ɣʋ́ pɑ tɛlǝsǝnɑ pɑɑ piitim mpi pǝ tɑɑ, nɑ pɑ́ tʋ wulɑʋ hǝtɛ nɑ ɩ kʋyʋsʋm. 13 Ḿpʋ́ɣʋ́ pɑ tilinɑ lɛɛtǝlǝnɑɑ mpɛɣɛ tillɑɑ kɛ pɑ tɛtʋ tǝnɑ tɑɑ sɩ pɑ́ kpiisi Yutɑ nyǝ́mɑ tǝnɑ tǝpɑɩ. Pǝ kpɑɣɑʋ kʋkpɑtǝlɑɑ nɑ piyɑ tɔ. Ɩlɛnɑ pɑ́ kuu pɑ wɛnɑʋ tǝnɑɣɑ kʋyɑkʋ kʋlʋmʋɣʋ tɑɑ kɛ́ pɑ ɩsɔtʋ nɑɑnʋwɑ nɑ nɑɑlɛ nyǝŋ Atɑɑ kʋyɛɛŋ nɑɑnʋwɑ nɑ tooso wule. 14 Pɩɩ wɛɛ sɩ pɑ́ tɛlǝsɩ lɛɛtǝlǝnɑɑ mpɛ pɑ tɔm kɛ pɑɑ tɛtʋ hɔɣɔlʋɣʋ ŋku kʋ yǝlɑɑ kɛ́, nɑ pɑɑ wei ɩ sɔɔlʋ pɩɩ kʋyɑkʋ ŋkʋ kʋ wule. 15 Ḿpʋ́ɣʋ́ tillɑɑ tɛɛnɑ ɑsewɑ ɩsɩɩ wulɑʋ kɑ heeluɣu-wɛ tɔ nɑ pɑ́ kpɑɑlɩ tɔm ntǝɣɩ Susi ɩcɑtɛ tɑɑ. Wulɑʋ nɑ Hɑmɑŋ pɑ cɑɣɑɑ nɑ pɑ́ nyɔɔkɩ, ɩlɛnɑ tɔm ntɩ tǝ cʋkɩ ɩcɑtɛ.