1 Ḿpʋ́ɣʋ́ Moisi pɔɔsɑ Ɩsɔ Tɑcɑɑ sɩ: Nɑ ye ɩsɩɩ Ɩsɛɣɛlɩ nyǝ́mɑ tɑ tʋnɑ mɑ tɔm nɑ pɑ́ kisi-m nɩɩnɑʋ nɑ pɑ́ tɔ-m sɩ Tɑcɑɑ tɑ lɩɩ mɑ tɔɔ kɛ́ tiili se? 2 Ntɛnɑ Tɑcɑɑ tɔmɩ-ɩ sɩ: Pepeɣe n tɔkɑ nyɑ́ niŋ tɑɑ? Mpʋɣʋlɛ sɩ: Kpɑ́tʋ́ɣʋ́. 3 Kɛlɛnɑ Ɩsɔ sɩ: Pɛtɩ-kʋɣʋ ɑtɛ. Moisi pɛtɑ-kʋ, ɩlɛnɑ kʋ́ pǝsɩ tʋm. Tǝnɑɣɑ ɩ ŋmɑɑwɑ tǝyɑɣɑʋ. 4 Ḿpʋ́ɣʋ́ Tɑcɑɑ heelɑ-ɩ sɩ: Siisi nɑ ń kpɑ ɩ sukɑ tɑɑ.

Moisi siisɑɑ nɑ ɩ kpɑ tʋm ɩnɩ tǝcɑʋ, ɩlɛnɑ tʋm tɑɣɑnɩ kpɑ́tʋ́ɣʋ́ kɛ pǝsʋɣʋ kɛ ɩ niŋ tɑɑ. 5 Ɩlɛnɑ Ɩsɔ sɩ: Mpi n kɑ́ hʋlǝnɑ Ɩsɛɣɛlɩ nyǝ́mɑ sɩ pɑ cɑɑnɑɑ Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ Tɑcɑɑ mɑ́ mɑ lɩɩ nyɑ́ tɔɔ tɔɣɔlɛ. 6 Ḿpʋ́ɣʋ́ Ɩsɔ tɑsɑ Moisi kɛ heeluɣu sɩ: Nyǝkɩ nyɑ́ niŋ kɛ nyɑ́ lɑŋlɛ tɑɑ kɛ́ nyɑ́ toko tɛɛ.

Moisi nyǝkɑ ɩ niŋ kɛ mpʋ nɑ ɩ́ kʋsɩ-ɩ, ɩlɛ ɩ tutɑ tɔnʋɣʋ tɔɔ ɑsilimɑ kʋtɔŋɑɑsilimɑ kʋtɔŋ: Mpi Lǝkpɑ tɑɑ pɑ yɑɑ sɩ kʋtɔŋ kʋsɛɛmʋɣʋ tɔɣɔ pɑ yɑɑ cǝnɛ sɩ tɔnʋɣʋ tɔɔ ɑsilimɑ kʋtɔŋ. wɑɑsɑ ɩ niŋ tǝnɑɣɑlɛ nɑ ɩ́ sɛɛwɑ tǝhɑii. 7 Kɛlɛnɑ Ɩsɔ sɩ: Mǝlǝnɑ nyɑ́ niŋ kɛ nyɑ́ lɑŋlɛ tɑɑ.

Moisi kɔmɑ nɑ ɩ́ kʋsɩ ɩ niŋ ɩlɛ ɩ mǝlɑɑ kɛlɛ tǝmɑmmɑm ɩsɩɩ ɩ kɑ wɛʋ tɔ. 8 Mpʋɣʋlɛ Tɑcɑɑ tɔmɑ sɩ: Ye Ɩsɛɣɛlɩ nyǝ́mɑ tɑ tʋnɑ-ŋ, nɑ ń kisi nɑ ń lɑ piti tǝmlɛ kɑncɑɑlɑɣɑ nyǝntɛ nɑ pɑ́ tɑ́ mʋ nyɑ́ tɔm. Ń lɑpɑ nɑɑlɛ nyǝntɛ tǝnɛ ɩsɩɩ pɑ mʋ-tɩ. 9 Ye pǝ kpɛŋnɑ piti tǝmɑ ɑnɛ ɑ nɑɑlɛ nɑ pɑ́ kɑ́ nyʋɣʋ nɑ pɑ́ kisiɣi nyɑ́ tɔm nɑ pɑɑ nɩɩkǝnɑ-ŋ, ɩlɛ ń cosi Nili pɔɣɔ lʋm nɑ ń pǝlɩ-wǝɣɩ tɛtʋ tɔɔ nɑ pǝ́ pǝsɩ cɑlǝm.

10 Ḿpʋ́ɣʋ́ Moisi sɩ: Pǝ kɑɑ lɑ, mɑ tɑ nyɩ yɔɣɔtɑɣɑ. Pɑɑ hɑtoo n cɑɑlɑ-m yɔɣɔtǝnɑʋ tɔ mɑ tɑɑ nyɩ yɔɣɔtʋɣʋ. Pɑɑ nɑ nɔɔnɔɔ ɩsǝntɔ kʋlʋmtʋ ntǝɣɩ, pǝ tɑ lɑɣɑsɩ.

11 Kɛlɛnɑ Ɩsɔ nɔɣɔ tǝkpɑʋ sɩ: Pǝ tɑɣɑ mɑ tʋnɑ yʋlʋ kɛ nɔɣɔ tɑɑ? Nɑ ye mɑ nɔkɑɑ mɑ lɑpɩ-ɩ kɑmumukɑ yɑɑ ntɑm. Pǝyele mɑ́ nɔkɑɑ mɑ yele nɑ ɩ́ nɑɑkɩ yɑɑ ɩ́ yʋlʋmɩ. 12 Mpʋ tɔ, tɛɛ nɔɔnɔɔ. Mɑɑ wɛɛ nyɑ́ wɑɑlɩ nɑ mɑɑ tʋ́ nyɑ́ nɔɣɔ tɑɑ kɛ́ tɔm pee wenɑ n kɑ́ yɔɣɔtɩ tɔ. 13 Mpʋɣʋlɛ Moisi sɩ: Hɑɩ, Tɑcɑɑ, mɑ kpɑ nyɑ́ yule, tili wei n cɑɑ tɔ, yele mɑ tɔm.

14 Tǝnɑɣɑlɛ Moisi tɔm lɑpɑ Tɑcɑɑ kɛ pɑ́ɑ́nɑ́ nɑ ɩ́ tɔmɩ-ɩ sɩ: Nyɑ́ tɑɑlʋ Lefii tʋ Alɔŋ wɛɛ. Hɑlɩ ɩ́lɛ́ ɩ tɩɩ lɩɩnɑ ntɛɣɛ nyɑ́ sǝŋʋɣʋ, nɑ ɩ́ loosɑ-ŋ ɩ lɑŋhʋlʋmlɛ kɑ́ wɛɛ sɔɣɔntʋ. 15 N kɑ́ tɛlǝsɩ-ɩ nti nti ɩ kɑ́ yɔɣɔtǝɣɩ tɔ. Nɑ mɑ́ɑ́ wɛɛ mǝ wɑɑlɩ nɑ mɑ́ hʋ́lɩ́-mɛɣɛ mǝ kʋlɑpǝlɛ. 16 Nyɑ́ pǝsɑ ɩsɩɩ Ɩsɔ kɛlɛ, nɑ ń tɛlǝsǝɣɩ-ɩ nti ɩ kɑ́ heeliɣi sɑmɑɑ nɑ nyɑ́ nɔɣɔ tɔ. 17 Tɔkɩ nyɑ́ kpɑ́tʋ́ɣʋ́ kɛ nyɑ́ niŋ tɑɑ nɑ ń lɑkǝnɑ-kʋɣʋ piti tǝmɑ.

18 Ḿpʋ́ɣʋ́ Moisi mǝlɑ ɩ yǝtɩ Yetulo cɔlɔ nɑ ɩ́ heeli-ɩ sɩ: Mɑ mǝlǝɣɩ Icipiti nɑ mɑ́ nɑ́ Ɩsɛɣɛlɩ nyǝ́mɑ ɑlɑɑfǝyɑ. Ntɛnɑ ɩ́lɛ́ sɩ pǝ wɛ teu, polo.

19 Ḿpʋ́ɣʋ́ Tɑcɑɑ heelɑ Moisi kɛ Mɑtiyɑŋ tɛtʋ tɑɑ tǝnɑ sɩ: Tɑɑ nyɑnɑ Icipiti mǝlʋɣʋ. Mpi tɔ, mpɑ pɑ lʋkɑɣɑ-ŋ kʋɣʋ tɔ pɑ sǝpɑ pɑ tǝnɑ.

20 Ɩlɛnɑ Moisi cɑɣɑsɩ ɩ ɑlʋ nɑ ɩ piyɑ kɛ kpɑŋɑsɩ nɑ pɑ́ tɛɛ Icipiti, nɑ ɩ́ tɔkɑ kpɑ́tʋ́ɣʋ́ ŋku Ɩsɔ kɑ heelɑ-ɩ sɩ ɩ́ kpɑɣɑ tɔɣɔ ɩ niŋ tɑɑ. 21 Ɩlɛnɑ Tɑcɑɑ tɑsɑ-ɩ heeluɣu sɩ: Mɑ hɑ-ŋ toŋ sɩ ye n tɑlɑ Icipiti, n lɑ piti tǝmɑ ɑnɩ ɑ tǝnɑ nɑ Icipiti wulɑʋ nɑ́. Amɑ mɑɑ tʋ-ɩ lɑŋkpɩɩsǝŋ nɑ ɩ kɑɑ yele Ɩsɛɣɛlɩ nyǝ́mɑ nɑ pɑ́ tɛɛ. 22 Nɑ ń heeli-ɩ sɩ mɑɣɑ Ɩsɔ Tɑcɑɑ kɛ́. Ɩsɛɣɛlɩ nyǝ́mɑ wɛ kɛ́ ɩsɩɩ mɑ ɑpɑlʋ pǝyɑɣɑ kɑncɑɑlɑɣɑ nyǝŋkɑ. 23 Timpi mɑ tɔmɑ sɩ ɩ́ yele mɑ kɑncɑɑlɑɣɑ pǝyɑɣɑ nɑ kɑ́ polo kɑ́ sɛɛ-m nɑ ɩ́ kisi tɔ, pǝ tɔɔ kɛ́ mɑɑ kʋ́ ɩnɩ ɩ ɑpɑlʋ pǝyɑɣɑ kɑncɑɑlɑɣɑ nyǝŋkɑ.

24 Ḿpʋ́ɣʋ́ Moisi pɑ sʋʋ tiiliɣi ɑhoo nɑɑlɩ. Ɩlɛnɑ Ɩsɔ kpipi-ɩ sɩ ɩ kʋɣɩ. 25-26 Tǝnɑɣɑlɛ ɩ ɑlʋ Sefolɑ kpɑɣɑ kpɑntɑnyɑɑlʋɣʋ nɑ ɩ́ pɛlɩ pǝyɑɣɑ hǝnnɔɣɔ nɑ ɩ́ tokinɑ-kɛɣɛ Moisi tɛɛ nɑ ɩ́ tɔ sɩ: N kɛ-m cɑlǝm ɑpɑlʋ kɛ́. Pɛlʋɣʋ tɔm kɛ Sefolɑ yɔɣɔtǝnɑ mpʋ. Ɩlɛnɑ Ɩsɔ yele Moisi.

27 Ḿpʋ́ɣʋ́ Ɩsɔ heelɑ Alɔŋ sɩ ɩ́ sǝŋ Moisi kɛ wʋlɑɣɑ tɛtʋ tɑɑ.

Alɔŋ tɛɛwɑ ɩlɛnɑ ɩ́ suli ɩ neu Moisi kɛ Ɩsɔ pʋɣʋ kiŋ, nɑ pɑ́ kpi tǝmɑ nɑ pɑ́ sɛɛ tǝmɑ. 28 Nɑ Moisi nɑ́ɑ́ kɛɛsɩ-ɩ tɔm nti Ɩsɔ heelɑ-ɩ nɑ piti tǝmɑ nnɑ ɩ kɑ hʋlɑ-ɩ tɔ. 29 Ntɛnɑ pɑ nɑɑlɛ pɑ́ tǝŋ tǝmɑ nɑ pɑ́ polo Icipiti nɑ pɑ́ koti Ɩsɛɣɛlɩ sɔsɑɑ. 30 Ḿpʋ́ɣʋ́ Alɔŋ kɛɛsɑ-wɛɣɛ nti nti Ɩsɔ kɑ heelɑ Moisi tɔ, nɑ pɑ́ lɑ́ piti tǝmɑ ɑnɩ nɑ Ɩsɛɣɛlɩ nyǝ́mɑ nɑ́. 31 Pɛlɛ pɑ nɑ́ mpʋ, ɩlɛnɑ pɑ́ tisi sɩ Ɩsɔ lɑkǝnɑ. Pɑ cɛkǝnɑɑ sɩ Ɩsɔ nɑwɑ pɑ kʋnyɔntɔɣɔlɛ kɛ́ nɑ ɩ́ kɔɔ sɩ ɩ́ wɑɑsɩ-wɛ. Ɩlɛnɑ pɑ́ hǝntɩ-ɩ ɑtɛ nɑ pɑ́ sɛɛ-ɩ.