10
Yutɑ nyǝ́mɑ tɔɣɔnʋɣʋ kɛ kpɑɩ ɑlɑɑ
1 Wɑɑtʋ wei Ɩsǝtǝlɑsɩ nɑ́ luŋɑ Ɩsɔ tǝsɛɛlɛ ɩsɛntɑɑ nɑ ɩ́ sǝlǝmǝɣɩ nɑ ɩ́ wiikinɑ Ɩsɔ sɩ ɩ́ wɑɑsɩ-wɛ, ɩlɛnɑ Ɩsɛɣɛlɩ nyǝ́mɑ tuutuumɑ, ɑpɑlɑɑ nɑ ɑlɑɑ nɑ piyɑ pɑ́ kotinɑ-ɩ, nɑ pɑ́ wii tǝkpoo. 2 Ḿpʋ́ɣʋ́ Ɩlɑm lʋlʋɣʋ tʋ Yehiyɛlɩ pǝyɑlʋ Sekɑniyɑ tɔmɑ Ɩsǝtǝlɑsɩ sɩ: Tǝ pǝntǝnɑ Ɩsɔ kɛ́ sɔsɔm kɛ timpi tǝ kpɑɣɑ ɑlɑɑ kpɑɩ nyǝ́mɑ tɔɣɔ. Pɑɑ nɑ mpʋ tɔ Ɩsɛɣɛlɩ nyǝ́mɑ wɛɛ nɑ pɑ́ tɛɛlǝɣɩ. 3 Ɩlɛ pǝ wɛɛ sɩ tǝ́ sɩɩ nɔɔsɩ kɛ Ɩsɔ ɩsɛntɑɑ nɑ tǝ́ tɔɣɔnɩ ɑlɑɑ mpɛ pɑ tǝnɑ nɑ pɑ piyɑ. Tɩɩ tǝŋ lɑɣɑtʋ nti nyɑnɑ mpɑ ɩ́ tǝŋǝɣɩ Ɩsɔ kʋsǝsɩɩtʋ kɛ teu tɔ ɩ́ tɑsɑ-tʋ tɔɣɔ. Pǝ wɛɛ sɩ tǝ́ tɔkɩ Ɩsɔ kiiu kɛ́. 4 Mpʋ tɔ, kʋlɩ nɑ ń tɔkɩ tɔm ntǝɣɩ niŋ nɑɑlɛ. Tɑ sɔɔlʋ pɩɩwɑ sɩ tɩɩ wɛɛ nyɑ́ wɑɑlɩ, tɑɑ lɑ sikɑ.
5 Ḿpʋ́ɣʋ́ Ɩsǝtǝlɑsɩ kʋlɑɑ nɑ ɩ́ tɔ kɔtǝlɑɑ nyʋɣʋ nyǝ́mɑ nɑ Lefii nyǝ́mɑ nɑ Ɩsɛɣɛlɩ nyǝ́mɑ tǝnɑ sɩ: Ɩ́ sɩɩ nɔɔsɩ sɩ ɩ́ kɑ́ tǝŋ nti Sekɑniyɑ yɔɣɔtɑɑ tɔ. Ɩlɛnɑ pɑ tǝnɑ pɑ́ sɩɩ mpʋ. 6 Ḿpʋ́ɣʋ́ Ɩsǝtǝlɑsɩ kʋlɑ Ɩsɔ tǝsɛɛlɛ kɑtɑɣɑ tɑɑ nɑ ɩ́ polo Ɩliyɑsipɩ pǝyɑlʋ Yohɑnɑŋ tɛ nɑ ɩ́ cɑɣɑ. Ɩ lɑŋlɛ wɑkǝlǝnɑ ɩ tɑɑpɑlɑɑ ɩsɑɣɑtʋ sɔsɔɔntʋ kɛ kɑtɑtǝlɑɣɑ, hɑlǝnɑ ɩ́ kisi tɔɣɔnɑɣɑ nɑ lʋm.
7 Ɩlɛnɑ pɑ́ heeli Yosɑlɛm nɑ Yutɑ tɛtʋ tǝnɑ tɑɑ sɩ mpɑ pɑ lɩɩnɑ Pɑpiloni tɔ, pɑ́ koti Yosɑlɛm. 8 Ye kʋyɛɛŋ tooso tɛɛwɑ nɑ nɔɣɔlʋ tɑ polo ɩsɩɩ nyʋɣʋ nyǝ́mɑ nɑ sɔsɑɑ pɑ sɩɩʋ tɔ, ɩsɩɩ pɑ lɛɛkɑ pʋntʋ wɛnɑʋ tǝnɑ nɑ pɑ́ lǝsɩ-ɩ lɛlɑɑ tɑɑ.
9 Kʋyɛɛŋ tooso ɩnɩ ɩ tɑɑ kɛ́ Yutɑ nɑ Pɛncɑmɛɛ ɑpɑlɑɑ polɑ Yosɑlɛm kɛ ɩsɔtʋ pɔɣɔlɑɣɑfɛɩ nyǝŋ kʋyɑkʋ hiu nyǝŋkʋ wule, nɑ pɑ́ koti Ɩsɔ tǝsɛɛlɛ kɑtɑɣɑ tɑɑ nɑ pɑ tǝnɑ pɑ́ seliɣi tɔm ntɩ tǝ tɔɔ. Pǝ́cɔ́ pǝ kɑɑsɩ tɛʋ tɔŋɑ nɩɩʋ tɔtɔ. 10 Mpʋɣʋlɛ Ɩsǝtǝlɑsɩ kʋlɑɑ nɑ ɩ́ tɔ-wɛ sɩ: Ɩsɛɣɛlɩ nyǝ́mɑ mɛ, ɩ́ kpɑɣɑʋ kpɑɩ ɑlɑɑ mpɛ tɔ, ɩ́ lɑpɑ ɩsɑɣɑtʋ sɔsɔɔntʋ kɛ́. Ɩsɑɣɑtʋ kɛ ɩ́ sɔɔsǝɣɩ tɑ́ yǝlɑɑ nyǝntʋ tɔɔ. 11 Pǝnɛntɛ pǝ wɛɛ sɩ pɑɑ wei ɩ́ nɑ́ kɑwɑlɑɣɑ ŋkɑ ɩ lɑpɑ tɑ́ cɔsɔnɑɑ Ɩsɔ Tɑcɑɑ tɔ, nɑ ɩ́ tɔkɩ ɩ luɣu nyǝntʋ nɑ mǝnɑ tɛtʋ tǝnɛ tǝ nyǝ́mɑ ɩ́ tɑɑ kɑɑ pʋlʋ, nɑ ɩ́ kisi mǝ ɑlɑɑ mpɛ.
12 Ntɛnɑ kotilɑɑ tǝnɑ kpɛntɩ nɑ pɑ́ yɔɣɔtǝnɑ nɔɣɔ sɔsɑɣɑ sɩ: Tɑmpɑnɑ kɛ n yɔɣɔtɑɑ, tɩɩ lɑ ɩsɩɩ n yɔɣɔtʋɣʋ tɔ. 13 Pǝyele tǝ wɛ pɑɣɑlɛ, ɑnɩ pǝ kɛ́ yolumɑ ntɔ, pǝ fɛɩ sɩ tǝ́ sǝŋ ḿpʋ́ɣʋ́ ɑwɑlɩ. Pǝ kɑɑsɩ ɩlɛ pǝ tɑɣɑ kʋyɑkʋ kʋlʋmʋɣʋ yɑɑ nɑɑlɛ tɑɑ kɛ́ tɑ́ tɔm kɑ́ tɑɣɑnɩ. Mpi tɔ, tɑ́ pɑɣɑlɛ wɛnnɑ tǝ tɑɑ. 14 Mpʋ tɔ, tɑ́ nyʋɣʋ nyǝ́mɑ ɩ́ sǝŋnɑ Ɩsɛɣɛlɩ nyǝ́mɑ tǝnɑ nɔɣɔ nɑ pɑ́ sɩɩ mpɑ pɑ kpɑɣɑ kpɑɩ ɑlɑɑ mpɛ tɔɣɔ kʋyɑkʋ ŋku pɑɑ polo pɑ́ nɑ pɑ ɑcɑlɛɛ sɔsɑɑ nɑ pǝ hʋʋlɑɑ pɑ kiŋ tɔ. Ɩlɛnɑ tǝ́ pɑɑsǝnɑ tɔm ntɩ, hɑlǝnɑ Tɑcɑɑ hɛɛsɩ ɩ pɑ́ɑ́nɑ́ sɔsɔɔnɑ kɛ tɑ́ tɔɔ.
15 Ḿpʋ́ɣʋ́ pɑ tǝnɑ pɑ mʋ tɔm ntɩ. Amɑ Asɑyɛɛlɩ pǝyɑlʋ Yonɑtɑŋ nɑ Tikifɑ pǝyɑlʋ Yɑsiyɑ pɑ kisinɑ. Ɩlɛnɑ Mesulɑm nɑ Lefii tʋ Sɑpetɑyi pɑ́ sɛɛnɑ pɑ tɔɔ. 16 Pɑ tǝnɑ mpɑ pɑ lɩɩnɑ Pɑpiloni tɔ pɑ mʋ-tǝɣɩ mpʋ, ɩlɛnɑ kɔtʋlʋ Ɩsǝtǝlɑsɩ lǝsɩ pɑɑ lʋlʋɣʋ ŋku kʋ tɑɑ kɛ́ nyɔɔŋ nyǝ́mɑ, nɑ mpɛ ɩnɩ pɑ́ cɑɣɑ ɩsɔtʋ nɑɑnʋwɑ nyǝŋ kʋyɑkʋ kɑncɑɑlɑɣɑ nyǝŋkʋ wule sɩ pɑ tɑɣɑnǝɣɩ tɔm ntɩ tǝ tǝnɑ. 17 Ḿpʋ́ɣʋ́ pɑ tɛmɑ kpɑɩ ɑlɑɑ mpɛ pɑ tɔm hʋʋʋ kɛ pǝnɑɣɑ nɑɑlɛ nyǝŋkɑ ɩsɔtʋ kɑncɑɑlɑɣɑ nyǝŋ kʋyɑkʋ kɑncɑɑlɑɣɑ nyǝŋkʋ wule.
Yutɑ nyǝ́mɑ mpɑ pɑ kpɑɣɑ kpɑɩ ɑlɑɑ tɔ pɑ hǝlɑ
18 Kɔtǝlɑɑ mpɑ pɑ kpɑɣɑ cefelinɑɑ tɔɣɔlɛ Yesuwɑ lʋlʋɣʋ nyǝ́mɑ nɑ ɩ newɑɑ, Yosɑtɑkɩ pǝyɑlɑɑ, Mɑɑseyɑ, nɑ Ɩliyesɛɛ, nɑ Yɑlipɩ, nɑ Ketɑliyɑ. 19 Ḿpʋ́ɣʋ́ pɑ tisɑɑ nɑ pɑ́ kisi pɑ ɑlɑɑ mpɛ nɑ pɑ́ lɑ́ Ɩsɔ kɔtɑɣɑ kɛ ɩwɑɑʋ nɑ Ɩsɔ hɩɩsɩ pɑ ɩsɑɣɑtʋ.
20 Ɩmɛɛ lʋlʋɣʋ nyǝ́mɑ Hɑnɑni, nɑ Sepɑtiyɑ,
21 nɑ Hɑlim lʋlʋɣʋ nyǝ́mɑ Mɑɑseyɑ, Ɩliyɑ, nɑ Semɑyɑ, nɑ Yehiyɛlɩ, nɑ Usiyɑ,
22 nɑ Pɑsehuu lʋlʋɣʋ nyǝ́mɑ Ɩliyohenɑyi, nɑ Mɑɑseyɑ, nɑ Ɩsǝmɑyɛlɩ, nɑ Netɑneyɛlɩ, nɑ Yosɑpɑtɩ, nɑ Ɩlɑsɑɑ.
23 Lefii nyǝ́mɑ tɑɑ kɑ wɛ Yosɑpɑtɩ, nɑ Simeyi, nɑ Kelɑyɑ wei pɑ yɑɑ tɔtɔ sɩ Kelitɑ tɔ, nɑ Petɑhiyɑ, nɑ Yehutɑ nɑ Ɩliyesɛɛ.
24 Yonyoolɑɑ tɑɑ kɛ́ Ɩliyɑsipɩ. Nɔnɔɔsɩ tɑŋlɑɑ tɑɑ kɛ́ Sɑlum, nɑ Telɛm, nɑ Ulii.
25 Ɩsɛɣɛlɩ nyǝ́mɑ lɛlɑɑ tɑɑ kɑ wɛ Pɑlɔsɩ lʋlʋɣʋ nyǝ́mɑ, Lɑmiyɑ, nɑ Ɩsiyɑ, nɑ Mɑlǝkiyɑ, nɑ Miyɑmɛŋ, nɑ Ɩlɑsɑɑ, nɑ Mɑlǝkiyɑ, nɑ Penɑyɑ,
26 nɑ Ɩlɑm lʋlʋɣʋ nyǝ́mɑ, Mɑtɑniyɑ, nɑ Sɑkɑlɩ, nɑ Yehiyɛlɩ, nɑ Apǝti, nɑ Yelemɔtɩ, nɑ Ɩliyɑ,
27 nɑ Sɑtu lʋlʋɣʋ nyǝ́mɑ, Ɩliyohenɑyi, nɑ Ɩliyɑsipɩ, nɑ Mɑtɑniyɑ, nɑ Yelomɔtɩ, nɑ Sɑpɑtɩ, nɑ Asisɑ,
28 nɑ Pepɑyi lʋlʋɣʋ nyǝ́mɑ, Yohɑnɑŋ, nɑ Hɑnɑniyɑ, nɑ Sɑpɑyi, nɑ Atǝlɑyi,
29 nɑ Pɑni lʋlʋɣʋ nyǝ́mɑ, Mesulɑm, nɑ Mɑlukɩ, nɑ Atɑyɑ, nɑ Yɑsupi, nɑ Seyɑlɩ, nɑ Yelemɔtɩ,
30 nɑ Pɑhɑtɩ-Mowɑpʋ lʋlʋɣʋ nyǝ́mɑ, Atǝnɑ, nɑ Kelɑlɩ, nɑ Penɑyɑ, nɑ Mɑɑseyɑ, nɑ Mɑtɑniyɑ, nɑ Pǝsɑlɛlɩ, nɑ Pinuwi, nɑ Mɑnɑsee,
31 nɑ Hɑlim lʋlʋɣʋ nyǝ́mɑ, Ɩliyesɛɛ, nɑ Ɩsiyɑ, nɑ Mɑlǝkiyɑ, nɑ Semɑyɑ, nɑ Simoŋ,
32 nɑ Pɛncɑmɛɛ, nɑ Mɑlukɩ, nɑ Semɑliyɑ,
33 nɑ Hɑsum lʋlʋɣʋ nyǝ́mɑ, Mɑtenɑyi, nɑ Mɑtɑtɑ, nɑ Sɑpɑtɩ, nɑ Ɩlifelɛtɩ, nɑ Yelemɑyi, nɑ Mɑnɑsee, nɑ Simeyi,
34 nɑ Pɑni lʋlʋɣʋ nyǝ́mɑ, Mɑɑtɑyi, nɑ Amǝlɑm, nɑ Uwɛlɩ, 35 nɑ Penɑyɑ, nɑ Petiyɑ, nɑ Keluhu, 36 nɑ Fɑniyɑ, nɑ Melemɔtɩ, nɑ Ɩliyɑsipɩ, 37 nɑ Mɑtɑniyɑ, nɑ Mɑtenɑyi, nɑ Yɑsɑyi, 38 nɑ Pɑni, nɑ Pinuwi, nɑ Simeyi, 39 nɑ Selemiyɑ, nɑ Nɑtɑŋ, nɑ Atɑyɑ, 40 nɑ Mɑkǝnɑtepɑyi, nɑ Sɑsɑyi, Sɑlɑyi, 41 nɑ Asɑlɛlɩ, nɑ Selemiyɑ, nɑ Semɑliyɑ, 42 nɑ Sɑlum, nɑ Amɑliyɑ, nɑ Yosɛɛfʋ,
43 nɑ Nepo lʋlʋɣʋ nyǝ́mɑ, Yeiyɛlɩ, nɑ Mɑtɑtiyɑ, nɑ Sɑpɑtɩ nɑ Sepinɑ, nɑ Yɑtɑyi, nɑ Sowɛɛlɩ, nɑ Penɑyɑ.
44 Pɑnɛ ɩnɩ pɑ tǝnɑ pɑ kpɑɣɑnɑ ɑlɑɑ kpɑɩ nyǝ́mɑ, hɑlɩ pɑ tɑɑ lɛlɑɑ nɑ lʋlɑ piyɑ.