1 Yutɑ wulɑʋ Ɩsekiyɑsɩ kɑwulɑɣɑ pǝnɑɣɑ nɑɑnʋwɑ nɑ liɣiti nyǝŋkɑ tɑɑ, Asilii wulɑʋ Senɑkelipi kʋlɑ Yutɑ koloosi ɑcɑlɛɛ tɔɔ nɑ ɩ́ lɛɛkɩ-yɛ. 2 Ḿpʋ́ɣʋ́ Asilii wulɑʋ kʋsɑ Lɑkisi ɩcɑtɛ tɑɑ kɛ́ ɩ yoolɑɑ nyʋɣʋ tʋ, nɑ yoolɑɑ tɑɑ yoolɑɑ, nɑ ɩ́ tili-wɛɣɛ Yosɑlɛm kɛ Yutɑ wulɑʋ Ɩsekiyɑsɩ kiŋ. Pɑ tɑlɑɑ ɩlɛnɑ pɑ́ ŋmɛlɩ lɩɩlɛ ɩsɔtɑɑ nyǝntɛ lɔɔʋ kiŋ kɛ cɔtǝlɑɑ mpɑɑʋ tɑɑ. 3 Ɩlɛnɑ Hilikiyɑ pǝyɑlʋ Iliyɑkim, wei ɩ pɑɑsǝɣǝnɑ kɑwulɑɣɑ tǝyɑɣɑ tɔ. Nɑ tɑkǝlɑsɩ ŋmɑɑlʋ Sepǝnɑ, nɑ Asɑfɩ pǝyɑlʋ Yowɑ, wei ɩ pɑɑsǝɣǝnɑ tɑkǝlɑsɩ tɔ, pɑ́ polo pɑ kiŋ. 4 Mpʋɣʋlɛ yoolɑɑ nyʋɣʋ tʋ tɔmɑ-wɛ sɩ: Ɩ́ polo ɩ́ heeli Yutɑ wulɑʋ Ɩsekiyɑsɩ sɩ, Asilii wulɑʋ sɔsɔ pɔɔsǝɣɩ-ɩ sɩ pepeɣe n lɑkɩ nɑ ń tɑɑkɩ? 5 N mɑɣɑsǝɣɩ nyɑ́ tɑɑ sɩ nɔɣɔ tɑɑ tɔm tɑɣɑnǝɣǝnɑ yoou nɑ kʋ́ tʋ́ yʋlʋ kɛ tǝyoole ɑpɑlʋtʋ nɑ? Mpʋ tɔ, ɑweɣe n lɑkɩ nɑ ń tɑɑkɩ, nɑ ń kʋlǝɣɩ mɑ tɔɔ? 6 Icipiti kɛ n tɛɛlǝɣɩ, ɩ́lɛ́ ɩ wɛ kɛ́ ɩsɩɩ sǝsǝncɑŋɑ kʋpɛlɑɣɑ ŋkɑ kɑ kʋɣɩ tɔ. Wei ɩ́ lɑpɑ-kɛɣɛ nɑɑni kɑ hɛɛ-ɩ. Ḿpʋ́ɣʋ́ Icipiti wulɑʋ lɑkɩ pɑ tǝnɑ mpɑ pɑ tisiɣi ɩ tɔɔ kɛ́ yuŋ tɔ. 7 Ntɑnyɩ n tɔŋ kɛlɛ sɩ mǝ Ɩsɔ Tɑcɑɑ kɛ n tʋwɑ nɑɑni. Pǝyele Ɩsɔ ɩnɩ ɩ tǝfɛɛnlɛnɑɑ nɑ ɩ kɔtɑɣɑ tǝlɑtɛnɑɑ kɛ Ɩsekiyɑsɩ kpiisɑɑ. Ɩlɛnɑ ɩ́ hʋ́lɩ́ Yosɑlɛm ɩcɑtɛ yǝlɑɑ nɑ Yutɑ tɛtʋ nyǝ́mɑ sɩ pɑ́ sɛɛ Ɩsɔ kɛ́ kɔtɑɣɑ tǝlɑtɛ tǝnɛ tǝ tɔɔ cǝnɛ.

8 Tɔʋ, pǝnɛntɛ nyɑnɑ mɑ cɑɑ Asilii wulɑʋ ɩ́ pɛɛlɩ nɔɣɔ. Mɑɑ hɑ-ŋ kpɑɣɑnǝŋ iyisi nɑɑlɛ (2000). Ye n kɑ pǝsɩ nɑ ń hiki mpɑ pɑɑ cɑɣɑ-ɩ tɔ. 9 N kɑ pǝsɩ nɑ n tɔɣɔnɩ Asilii wulɑʋ tǝmlɛ nyǝ́mɑ tɑɑ sǝkpelu nɑ? Icipiti nyǝ́mɑ kɛ n tʋwɑ nɑɑni. Mpi tɔ, pɛlɛ pɑ wɛnɑ yoou kɛɛkɛnɑɑ nɑ pɑ kpɑɣɑnǝŋ cɑɣɑlɑɑ tɔ pǝ tɔɔ. 10 N hʋʋ sɩ pǝ tɑɣɑ Ɩsɔ luɣu nyǝntʋ kɛ mɑ tǝŋɑɑ nɑ mɑ́ kɔɔ tɛtʋ tǝnɛ tǝ wɑkǝlʋɣʋ nɑ? Tɑcɑɑ heelinɑ-m sɩ mɑ́ kpɑ tɛtʋ tǝnɛ tǝ tɔɔ nɑ mɑ́ wɑkǝlɩ-tɩ.

11 Mpʋɣʋlɛ Ɩliyɑkim, nɑ Sepǝnɑ, nɑ Yowɑ, pɑ tɔmɑ Asilii yoolɑɑ nyʋɣʋ tʋ sɩ: Yɔɣɔtǝnɑ-tʋɣʋ Alɑɑmee tɔm tɑɑ. Mpi tɔ, tǝ nɩɩkɩ. Tɑɑ yɔɣɔtǝnɑ-tʋɣʋ Yutɑ nsǝmlɛ nɑ yǝlɑɑ mpɑ pɑ wɛ ɩcɑtɛ koluŋɑ tɔɔ tɔ pɑ́ nɩɩ.

12 Amɑ yoolɑɑ nyʋɣʋ tʋ cɔwɑ sɩ: Pǝ tɑɣɑ mǝ nɑ mǝ cɑɑ mǝ tike kɛ Asilii wulɑʋ tilɑɑ sɩ, pɑ́ heeli tɔm tǝnɛ. Amɑ pǝ kpɛnnɑ pɑ tǝnɑ mpɑ pɑ cɑɣɑ koluŋɑ tɔɔ, nɑ pɑɑ tɛ nɑ pɑ́ tɔɣɔ pɑ pʋntʋ nɑ pɑ́ nyɔɔ pɑ hǝm tɔɣɔ. 13 Mpʋɣʋlɛ yoolɑɑ nyʋɣʋ tʋ sǝŋɑɑ nɑ ɩ́ yɔɣɔtǝnɑ nɔɣɔ sɔsɑɣɑ kɛ Hepǝlɑ tɔm tɑɑ sɩ: Ɩ́ nɩɩ Asilii wulɑʋ sɔsɔ tɔm. 14 Asilii wulɑʋ yɔɣɔtɑɑ sɩ: Ɩ́ tɑɑ yele nɑ Ɩsekiyɑsɩ tʋsɩ-mɛ. Mpi tɔ, ɩ kɑɑ pǝsɩ nɑ ɩ́ wɑɑsɩ-mɛ. 15 Ɩsekiyɑsɩ tʋsǝɣɩ-mɛɣɛ sɩ, ɩ́ lɑ Tɑcɑɑ kɛ nɑɑni. Sɩ Ɩsɔ kɑ́ wɑɑsɩ-mɛ, sɩ Asilii wulɑʋ kɑɑ lɛɛkɩ mǝ ɩcɑtɛ. 16 Ɩ́ tɑɑ nɩɩnɑ Ɩsekiyɑsɩ. Mpi tɔ, Asilii wulɑʋ nɑ́ cɑɑ kɛ́ sɩ, mǝ nɑ-ɩ ɩ́ ciiki nɑ ɩ́ hɑ-ɩ mǝ tɩ. Wɑɑtʋ ɩnǝɣɩ pɑɑ wei ɩ kɑ tɔɣɔ tɩɩŋ wei pɑ yɑɑ sɩ, lɛsɛŋ nɑ fiki tɔ pǝ pee. Pɑɑ wei ɩ kɑ́ nyɔɔ ɩ lɔkɔ tɑɑ lʋm. 17 Hɑlǝnɑ mɑ́ kɔɔ nɑ mɑ́ ponɑ-mɛɣɛ tɛtʋ nti tǝ wɛ ɩsɩɩ mǝ nyǝntʋ tɔ tǝ tɑɑ. Tɛtʋ ntɩ tǝ tɑɑ wɛ tɔɣɔnɑɣɑ pee kɛ́ nɑ sʋlʋm. Tǝ tɑɑ wɛ kʋtɔɣɔʋ kɛ́ nɑ lɛsɛŋ tɩɩŋ. 18 Mpʋ tɔ, Ɩsekiyɑsɩ ɩ tɑɑ tʋsɩ-mɛɣɛ yem nɑ ɩ́ tɔŋ sɩ: Tɑcɑɑ kɑ wɑɑsɩ-mɛ. Piitimnɑɑ tɩɩŋ tɑ pǝsɩ nɑ ɩ́ wɑɑsɩ ɩ yǝlɑɑ kɛ Asilii wulɑʋ niŋ tɑɑ. 19 Hɑmɑtɩ nɑ Alǝpɑtɩ nɑ Sefɑfɑyim, pǝ ɑcɑlɛɛ nyǝ́mɑ tɩɩŋ mǝlɑ ɩsǝnɑ? Ɩ tɑ pǝsɩ nɑ ɩ́ tɑŋ Asilii wulɑʋ sɩ ɩ́ tɑɑ lɛɛkɩ Sɑmɑlii ɩcɑtɛ. 20 Tɛtʋnɑɑ mpɛ pɑ tǝnɑ, pɑ tɑɑ nti tǝ tɩɩŋ yɑpɑ-tǝɣɩ mɑ niŋ tɑɑ. Nɑ Tɑcɑɑ nɑ́ɑ́ yɑkɩ Yosɑlɛm kɛ mɑ niŋ tɑɑ?

21 Amɑ yǝlɑɑ mpɛ pɑ sumɑ pɑ tɑ cɔ-ɩ pɑɑ tɔmʋɣʋ kʋlʋmʋɣʋ. Mpi tɔ, wulɑʋ Ɩsekiyɑsɩ kɑ heelinɑ-wɛ sɩ pɑ́ tɑɑ cɔ-ɩ. 22 Ɩlɛnɑ Hilikiyɑ pǝyɑlʋ Ɩliyɑkim, wei ɩ kɛ́ wulɑʋ tǝyɑɣɑ nyʋɣʋ tʋ tɔ, nɑ tɑkǝlɑsɩ ŋmɑɑlʋ Sepǝnɑ nɑ sɩ sɩɩlʋ Asɑfɩ pǝyɑlʋ Yowɑ pɑ polo wulɑʋ Ɩsekiyɑsɩ kiŋ. Pɑɑ cǝlɑ pɑ wontu kɛ́, nɑ lɑŋwɑkǝllɛ. Ḿpʋ́ɣʋ́ pɑ kɛɛsɑ wulɑʋ kɛ yoolɑɑ nyʋɣʋ tʋ kʋyɔɣɔtʋtʋ.