38
Ɩsekiyɑsɩ kʋtɔŋ nɑ ɩ wɑɑʋ
(Awulɑɑ II 20:1-11)
1 Ḿpʋ́ɣʋ́ wʋsɑsɩ kpɑ wulɑʋ Ɩsekiyɑsɩ kɛ wɑɑtʋ ɩnɩ ɩ tɑɑ sɩ ɩ sǝkɩ. Ɩlɛnɑ Ɩsɔ kʋyɔɣɔtʋtʋ tɛlǝsʋlʋ Ɩsɑyii polo ɩ kiŋ nɑ Ɩ́ heeli-ɩ sɩ: Tɑcɑɑ tɔmɑ sɩ, ye nyɑ́ tɑɑ wɛ nti n heeli nyɑ́ tǝyɑɣɑ nyǝ́mɑ. Mpi tɔ, n kɑ́ sɩ kɛ́ n kɑɑ kʋlɩ.
2 Ntɛnɑ wulɑʋ kɛɛsɩ ɩsɛ nɑ koluŋɑ tɔɔ nɑ ɩ́ sǝlǝmɩ Tɑcɑɑ kɛ sǝlǝmʋɣʋ kʋnɛ sɩ: 3 Hɑɩ, Tɑcɑɑ, mɑ kpɑ nyɑ́ yule. Tɔɔsɩ sɩ mɑ tɔmɑ teu nɑ lotu kʋlʋmtʋ nɑ mɑ́ lɑ́ mpi pǝ wɛ-ŋ teu tɔ. Ɩ tɛmɑ mpʋ ɩlɛnɑ ɩ́ wii tǝkpoo nɑ ɩ́ pǝlɩ ɩsǝlʋm.
4 Pǝ wɑɑlɩ kɛ́ Tɑcɑɑ heelɑ Ɩsɑyii 5 sɩ ɩ́ tɛlǝsɩ wulɑʋ Ɩsekiyɑsɩ sɩ: Mɑɣɑ nyɑ́ cɔsɔ Tɑfiiti Ɩsɔ Tɑcɑɑ. Mɑ nɩɩwɑ nyɑ́ kʋsǝlǝmʋtʋ nɑ mɑ́ nɑ́ nyɑ́ ɩsǝlʋm. Ɩlɛ mɑɑ sɔɔsɩ-ŋ weesuɣu pɩɩsɩ kɛ nɑɑnʋwɑ nɑ kɑkpɑsɩ. 6 Mɑɑ yɑ nyɑ́ nɑ ɩcɑtɛ tǝnɛɣɛ Asilii wulɑʋ niŋ tɑɑ. Mɑɑ kenti tǝ tɔɔ*fɑ*. ɑPiipili wei pɑ yɑɑkǝnɑ nɑsɑɑlɑ tɑɑ sɩ fǝlɑŋsɛɛ kuulɑŋ tɔ ɩ́ tʋwɑ kʋkɑlʋtʋ 21-22 kɛ kʋkɑlʋtʋ 6 wɑɑlɩ sɩ, pǝ́ wɛɛ ɩsɩɩ pɑ kɛɛsʋɣʋ Awulɑɑ II 20:1-11 tɑɑ tɔ.
7 Yɑɑsi wei Tɑcɑɑ kɑ hʋlǝnɑ-ŋ sɩ ɩ kɑ́ lɑ ɩsɩɩ ɩ sɩɩʋ tɔɣɔlɛ sɩ, 8 ɩ kɑ́ yele nɑ ɩsotom wɑɑci mǝlɩ wɑɑlɩ wɑɑlǝɣɩ cɑcɑɑsɩ nɑɑnʋwɑ. Ɩlɛnɑ tɑmpɑnɑ, ɩsotom mǝlɩ wɑɑlɩ wɑɑlǝɣɩ timpi tɔɔ pɩɩ lɩɩnɑɑ tɔɣɔ cɑcɑɑsɩ nɑɑnʋwɑ.
Ɩsekiyɑsɩ kɑwǝyɑɣɑ kɛ ɩ kʋtɔŋ wɑɑlɩ
9 Wɑɑtʋ wei pǝ wɩɩwɑ wulɑʋ Ɩsekiyɑsɩ nɑ pǝ tɛmɩ-ɩ nɑ ɩ́ mɑ́ kɑwǝyɑɣɑ ŋkɑ tɔɣɔlɔ:
10 Mɑ hʋʋkɑɣɑ sɩ pɩɩ kɔɔlɩ-m kɛ́ nɑ toŋ.
Mɑ hʋʋkɑɣɑ sɩ mɑɑ sɩ nɑ hǝlǝm nɑ nɔɣɔ.
Pǝ wɛɛ sɩ mɑ́ tɛɛ.
Mɑɑ tǝŋnɑ sǝm nɔnɔɔsɩ.
Pǝ pɛmɑ-m mɑ pɩɩsɩ kʋkɑɑsɑsɩ.
11 Mɑ hʋʋkɑɣɑ sɩ mɑ kɑɑ tɑsɑ Tɑcɑɑ kɛ nɑʋ
kɛ weesuɣu nyǝ́mɑ tɛtʋ tɑɑ.
Mɑ kɑɑ tɑsɑ yʋlʋ nɔɣɔlʋɣʋ nɑʋ kɛ
ɑntulinyɑ yǝlɑɑ tɑɑ.
12 Pǝ lǝsɑ mɑ weesuɣu nɑ pǝ́ ponɑ pooluŋ
ɩsɩɩ tiikilu cokǝle.
Pǝ tɑmɑ mɑ weesuɣu tomle.
Pǝ kpilɑ mɑ weesuɣu kɛ́ ɩsɩɩ pǝlʋʋlʋ sɛtʋɣʋ
sɑɣɑtɑ kpoŋkpontu nɑ ɩ́ kpili-ɩ tɔ.
Pɩɩ tɑɑnǝɣɩ tɔ, n tɛmɑ mɑ tɔm.
13 Pɩɩ nyɑɑlǝɣɩ tɔ sǝm kpiisɑ-m.
Tɑcɑɑ n yɔkɑ mɑ mʋwɑ kɛ́ ɩsɩɩ tɔɣɔlɑɣɑ.
Pɩɩ tɑɑnǝɣɩ tɔ, Tɑcɑɑ n tɛmɑ mɑ tɔm.
14 Mɑ wiikɑɣɑ kɛ́ ɩsɩɩ kɑcɑɣɑlʋfǝyɑɣɑ
lɑkʋɣʋ nɑ kɑ́ cɔɔkɩ ɩsɔtɑɑ tɔ.
Mɑ mɔlǝɣɩ ɩsɩɩ ɑlukuku,
nɑ mɑ́ tekiɣi ɩsɔtɑɑ kɛ́ pǝtɔɔtǝlɛ.
Hɑɩ, Tɑcɑɑ, pǝ nɩɩ-m kɛ́, wɑɑsɩ-m.
15 Suweɣe mɑ tɑsǝɣɩ yɔɣɔtʋɣʋ tɔtɔ?
Tɑcɑɑ yɔɣɔtǝnɑ-m.
Nyɑ́ mɑɣɑmɑɣɑ n lɑkǝnɑ.
Mɑɑ tɔnɑ tǝpɑsʋɣʋ kɛ mɑ weesuɣu tǝnɑ
tɑɑ kɛ́ mɑ wɑhɑlɑ tɔɔ.
16 Tɑcɑɑ, nyɑ́ kʋpɑntʋnɑɑ tɔɔ kɛ́
yʋlʋ wɛnɑ weesuɣu.
Tǝ tɔɔ kɛ́ mɑ feesiɣi tɔtɔ.
N kɑ́ mǝlǝnɑ-m ɩsɩɩ mɑ wule tɑɑ,
n kɑ́ yele nɑ mɑ́ wɛɛnɑ weesuɣu.
17 Mɑ lɑŋwɑkǝllɛ pǝsǝnɑ ntɛɣɛ hɛɛsʋɣʋ.
Nyɑ́ sɔɔlǝnɑ nɑ ń lǝsɩ-m sǝm pʋ́ʋ́ɣʋ́ tɑɑ.
Ɩlɛnɑ ń lɔ mɑ ɩsɑɣɑtʋ tǝnɑ nɑ wɑɑlɩ.
18 Mpi tɔ, pǝ tɑɣɑ ɑtɛtǝlɛ tɑɑ nyǝ́mɑ sɑŋnɑ-ŋ.
Pǝyele pǝ tɑɣɑ sǝm kɑ́ tɑlǝnɑ-ŋ.
Mpɑ pɑ tiiwɑ pǝlɑɑʋ tɑɑ tɔ pɑɑ tɛɛlǝɣɩ nyɑ́ kʋpɑntʋ.
19 Weesuɣu nyǝ́mɑ tike pǝsǝɣǝnɑ nɑ pɑ́ sɑ-ŋ,
ɩsɩɩ mɑɣɑ sɑŋɑ ɩsǝntɔ.
Cɛcɛ hʋlǝɣǝnɑ ɩ piyɑ kɛ kʋpɑntʋ.
20 Tɑcɑɑ yɑpɑ-m kɛ́.
Tɩɩ mɑ tɑ́ cǝmǝŋ kɛ nyɑ́ tǝyɑɣɑ tɑɑ nɑ ɩ́ wii teu.
Hɑlǝnɑ tɑ́ weesiŋ tǝnɑɣɑ.
21 Ḿpʋ́ɣʋ́ Ɩsɑyii tɔmɑ sɩ:
Ɩ́ nɑŋ tʋɣʋ ŋku pɑ yɑɑ sɩ fiki tɔ kʋ pee
nɑ ɩ́ tɑɑ Ɩsekiyɑsɩ hiŋ tɑɑ nɑ pǝ́ wɑɑ-ɩ.
22 Ntɛnɑ Ɩsekiyɑsɩ sɩ:
Yɑɑsi wei kɛ́ Tɑcɑɑ n kɑ́ hʋlǝnɑ-m sɩ,
mɑɑ kpɑ nyɑ́ tǝyɑɣɑ tɑɑ?