1 Leɣe yooŋ nɑ ntɔŋkpɛɛsɑɣɑ lɩɩnɑ mǝ hɛkʋ kɛ mpʋ? Mǝ kɔtɔɩnɑɑ mpɑ pɑ cɑɑlǝɣɩ-mɛɣɛ tɑm kɛ́ mǝ tɔnǝŋ tɑɑ tɔ mpɛ pɑ kɔŋnɑ nɑ yooŋ nɑ ntɔŋkpɛɛsɑsɩ nsɩ. 2 Ntɑnyɩ ɩ́ nyɩɩlǝɣɩ pʋlʋ pǝyele ɩ́ kɑɑ hiki-wɩ, ɩlɛnɑ ɩ́ sʋʋ yǝlɑɑ kʋɣʋ tɑɑ. Yɑɑ mǝ luuŋ sʋʋ pʋlʋ pǝyele ɩ́ kɑɑ hiki-wɩ, ɩlɛnɑ ntɔŋkpɛɛsɑsɩ nɑ yoou sʋʋ mǝ hɛkʋ. Pǝ tɑɣɑ pʋlʋ tɔɔ kɛ́ ɩɩ hikiɣi. Mpi ɩ́ cɑɑkɩ tɔ ɩɩ sǝlǝmǝɣɩ sɩ Ɩsɔ ɩ́ hɑ-mɛɣɛ-wɩ tɔɣɔ. 3 Yɑɑ ɩ́ tɩɩ sǝlǝmǝɣɩ ɩɩ hikiɣi-wǝɣɩ mǝ lǝmɑɣɑsɛɛ fɛɩ teu tɔ pǝ tɔɔ. Ɩ́ cɑɑ kɛ́ sɩ ɩ́ hikɑ-wɩ ɩlɛ ɩ́ lɑnɑ mpi mǝ mɑɣɑmɑɣɑ ɩ nɔkɑɑ tɔ. 4 Amɑ ɩ́ kɛ́ mɑ tɑ nyɩ ɩsɔnɑɑ kɛ́ yoo. Ɩ́ tɑ́ nyɩ sɩ ye n sɔɔlǝɣɩ ɑntulinyɑ nyǝm n kɛ́ Ɩsɔ kolontu tɑɑ? Wei ɩ cɑɑ ɩ́ sɔɔlɩ ɑntulinyɑ nyǝm tɔ pʋntʋ nɑ Ɩsɔ pɑ lɑpɑ koloŋɑ kɛ́. 5 Ɩ́ tɑɑ hʋʋ sɩ yem tɔɔ kɛ́ pɑ ŋmɑɑ Ɩsɔ Tɔm tɑɑ sɩ: Ɩsɔ pɔɔsǝɣǝnɑ ɩsǝsɛɛmlɛ kɛ weesuɣu ŋku ɩ tʋ tɑ́ tɑɑ tɔ. 6 Pǝ nɑ pǝ mpʋ tɔ ɩ lɑkɩ-tʋɣʋ kʋpɑntʋnɑɑ mpɑ pɑ kǝlɑ mpʋ tɔ. Nɑ pǝ tɔm kɛ pɑ ŋmɑɑ Ɩsɔ Tɔm tɑɑ sɩ: Ɩsɔ yoonɑ kɑlɑmpɑɑnɩ nyǝ́mɑ, nɑ ɩ́ lɑkɩ kʋpɑntʋ kɛ mpɑ pɑ pɑsǝɣɩ pɑ tɩ tɔ. 7 Mpʋ tɔ, ɩ́ pɑsɑ mǝ tɩ nɑ ɩ́ nɩɩnɑ Ɩsɔ kɛ́ teu, nɑ ɩ́ sǝŋ Ɩlɔɣɔʋ tɔɔ, ɩ kɑ́ se mǝ kiŋ nɑ ɩ́ polo pooluŋ. 8 Ɩ́ kpǝtǝnɑ Ɩsɔ, nɑ Ɩsɔ kɑ́ kpǝtǝnɑ-mɛ tɔtɔ. Asɑɣɑɑ mɛ ɩ́ sɑŋ mǝ niŋ, yɛlɛyɛlɛ nyǝ́mɑ mɛ ɩ́ tɑɣɑnɩ mǝ lotunɑɑ. 9 Mǝ lɑŋɑ ɩ́ wɑkǝlɩ, ɩ́ tʋlɩ nɔɔsɩ nɑ ɩ́ wii sɔsɔm. Ɩ́ yele nɑ mǝ woŋɑ pǝsɩ wulɑ, nɑ mǝ lɑŋhʋlʋmlɛ nɑ́ɑ́ pǝsɩ lɑŋwɑkǝllɛ. 10 Ɩ́ pɑsɑ mǝ tǝɣɩ Tɑcɑɑ ɩsɛntɑɑ nɑ ɩ kɑ́ kʋsɩ-mɛ.

11 Mɑ tɑɑpɑlɑɑ, ɩ́ tɑɑ cɑkǝnɑ tǝmɑ. Ye wei ɩ cɑkǝnɑ ɩ tɔɣɔntǝlɛ yɑɑ ɩ footiɣi-ɩ, Ɩsɔ kʋsǝsɩɩtʋ kɛ pʋntʋ cɑkǝnɑ yɑɑ ɩ footiɣi. Pǝyele ye n footiɣi Ɩsɔ kʋsǝsɩɩtʋ n tɑ kɛ tǝ tɔkǝlʋ tɔtɔ, n pǝsɑ tǝ hʋʋnlʋ kɛ́. 12 Ɩsɔ tike sɩɩkǝnɑ kʋsǝsɩɩtʋ, nɑ ɩnɩ ɩ tike ɩ kɛnɑ tɔm hʋʋlʋ. Nɑ ɩnɩ ɩ tike ɩ pǝsǝɣǝnɑ nɑ ɩ́ tɑɣɑnɩ yɑɑ ɩ́ wɑkǝlɩ. Nyɑ́ n kɛ́ we nɑ ń footiɣi nyɑ́ tɔɣɔntǝlɛ?

13 Mɛ mpɑ mǝ tɔŋ sɩ sɑŋɑ yɑɑ cele tɩɩ polo ɩcɑtɛ tǝnɛ nɑ tǝnɛ nɑ tǝ́ cɑɣɑ tǝnɑɣɑ pǝnɑɣɑ nɑ tǝ́ tɑɑtɩ nɑ tǝ́ hiki liɣitee tɔ, pǝnɛntɛ mɩɩ nɩɩ ɩlɛ. 14 Aɑɩ, ɩ́ tɑ́ nyɩ cele nyǝntʋ. Ɩ́ wɛɛ kɛ́ ɩsɩɩ ɩhunte nte tǝ kpɑɑ pǝcɔ nɑ pɩɩ lɑkɩ lɑɑsɑɣɑ ɩlɛnɑ tǝ́ cɛ tɔ. 15 Pɩɩ wɛɛ kɛ́ sɩ ɩ́ yɔɣɔtɩ sɩ: Ye Tɑcɑɑ ɩ́ tɑnɑ-tʋ, tɩɩ lɑ pǝnɛ nɑ pǝnɛ. 16 Amɑ mǝ mǝlɑɑ nɑ ɩ́ lɑkɩ kɑlɑmpɑɑnɩ nɑ ɩ́ hɔŋ mǝ tɩ. Kɑlɑmpɑɑnɩ ɩsɩɩ mpʋ pǝ tɑkɑ fɛɩ teu. 17 Pǝ tɔɔ kɛ́ ye wei ɩ́ nyǝmɑ́ kʋpɑntʋ lɑpʋ nɑ ɩ́ kisi tǝ lɑpʋ, pʋntʋ lɑpɑ ɩsɑɣɑtʋ kɛ́.