1 Pǝlɛ pǝ wɑɑlɩ kɛ́ Yesu tɑɣɑnɑ Kɑlilee teŋku wɑɑlɩ kɛ́ tɛsʋɣʋ. (Lɛlɑɑ yɑɑ sɩ Tipeliyɑtɩ teŋku). 2 Nɑ yǝlɑɑ sɑmɑɑ hu ɩ wɑɑlɩ. Pǝ tɑɣɑ pʋlʋ tɔɔ, pɑ nɑ́ piti tǝmɑ nnɑ ɩ wɑɑkɑɣɑnɑ kʋtɔntʋnɑɑ tɔ. 3 Ḿpʋ́ɣʋ́ Yesu nɑ ɩ ɩfɑlɑɑ pɑ kpɑ pʋɣʋ tɔɔ nɑ pɑ́ cɑɣɑ tǝnɑ. 4 Nɑ Yutɑ nyǝ́mɑ ɑcimɑ wenɑ pɑ yɑɑ sɩ Tɛɛʋ ɑcimɑ tɔ ɑ wʋsɑɑ. 5 Ḿpʋ́ɣʋ́ Yesu nyǝnɑ ɩ tɑɑ nɑ ɩ wɑɑlɩ nɑ ɩ́ nɑ́ sɩ sɑmɑɑ sɔsɔ tɔŋnɑ ɩ kiŋ kɛ kɔntɛ. Tǝnɑɣɑ ɩ pɔɔsɑ Filipʋ sɩ: Leɣe tɩɩ yɑ kʋtɔɣɔʋ nɑ tǝ́ cɛlɑ sɑmɑɑ ɩnɛ ɩnɩ nɑ ɩ tǝnɑ ɩ́ tɔɣɔ? 6 Yesu yɔɣɔtɑ mpʋ sɩ ɩ́ nɩɩ nti Filipʋ kɑ́ cɔ tɔ. Tɔfɔ ɩ mɑɣɑmɑɣɑ ɩ tɛmɑ ɩsǝnɑ ɩ kɑ́ lɑ tɔɣɔ nyǝm.

7 Ḿpʋ́ɣʋ́ Filipʋ cɔwɑ Yesu sɩ: Pɑɑ liɣitee nyǝɣǝtʋ ŋmʋnʋɣʋ (200) mɑɣɑmɑɣɑ kɛ tǝ yɑpɑ kʋtɔɣɔʋ, kɩɩ hɑŋnɑ yǝlɑɑ pɑnɛ pɑ tiili?

8 Ɩlɛnɑ Yesu ɩfɑlɑɑ tɑɑ nɔɣɔlʋ wei pɑ yɑɑ sɩ Antǝlɩɩ nɑ ɩ́ kɛ́ Simɔŋ Piyɛɛ neu tɔ ɩ́ cɔ-ɩ sɩ: 9 Ɩwɑɑsǝlɛ nɑtǝlɩ tǝ wɛ cǝnɛ nɑ tǝ tɔkɑ potopotonɑɑ kɛ kɑkpɑsɩ nɑ tiinɑ kɛ nɑɑlɛ. Amɑ pǝlɛ pɩɩ lɑ-weɣe sɑmɑɑ tuutuumɑ ɩnɛ?

10 Tǝnɑɣɑ Yesu tɔmɑ sɩ: Ɩ́ heeli pɑ tǝnɑ sɩ pɑ́ cɑɣɑ ɑtɛ. (Pǝ pɑmnɑ nyɩɩtʋ kɑ pɔ ɑtɛɣɛ tǝnɑɣɑ sɔsɔm, ɩlɛnɑ pɑ́ cɑɣɑ.) Pɑ tɑɑ ɑpɑlɑɑ nyɔɔŋ tɑlɑ ɩsɩɩ iyisi kɑkpɑsɩ (5000). 11 Tǝnɑɣɑ Yesu kpɑɣɑ potopotonɑɑ mpɛ nɑ ɩ́ sɛɛ Ɩsɔ kɛ́ ɩ́ nɑ tǝmlɛ kɛ pɑ tɔɔ, ɩlɛnɑ ɩ́ tɑlɑ mpɑ pɑ cɑɣɑɑ tɔ. Nɑ ɩ́ tɑlɑ-wɛɣɛ tiinɑ kɛ mpʋ tɔtɔ, nɑ pɑɑ wei ɩ́ hɑɣɑ. 12 Wɑɑtʋ wei pɑ hɑɣɑɑ tɔ, ɩ tɔmɑ ɩ ɩfɑlɑɑ sɩ: Ɩ́ tɔɔsɩ potopotonɑɑ hɔɣɔlǝŋ wei ɩ kɑɑsɑɑ tɔ, nɑ pʋlʋpʋ ɩ́ tɑɑ le.

13 Ɩlɛnɑ ɩ ɩfɑlɑɑ tɔɔsɩ hɔɣɔlǝŋ ɩnɩ, nɑ pǝ́ su tɔkǝŋ nɑɑnʋwɑ nɑ nɑɑlɛ. Potopotonɑɑ kɑkpɑsɩ ɩnɩ ɩ kpisinɑ ḿpʋ́ɣʋ́ wɑɑtʋ wei pɑ tɛmɑ tɔɣɔʋ tɔ.

14 Wɑɑtʋ wei yǝlɑɑ nɑ́ Yesu piti tǝmlɛ ńtɛ́ tɔ, pɑ tɔmɑ sɩ: Tɑmpɑnɑ Yʋlʋ ɩnɛ ɩnǝɣǝlɛ Ɩsɔ kʋyɔɣɔtʋtʋ tɛlǝsʋlʋ wei ɩ tɔm pɑɑ yɔɣɔtɑɑ sɩ ɩ kɑ́ kɔɔ ɑntulinyɑ tɑɑ tɔ.

15 Yesu nyǝmɑ́ sɩ pɑ sɔɔlʋ pɩɩwɑ sɩ pɑɑ kpɑ-ɩ wulɑʋ nɑ toŋ kɛ tǝnɛ ɩnǝɣɩ kpɑkpɑɑ. Ɩlɛnɑ ɩ́ ŋmɛlɩ tǝkɛʋ nɑ ɩ́ kpɑ pɔ́ɔ́ŋ tɔɔ kɛ́ ɩ tike.

16 Pǝ kɔmɑ nɑ pǝ tɑɑnɩ, ɩlɛnɑ ɩ ɩfɑlɑɑ tii lʋm nɔɣɔ, 17 nɑ pɑ́ kpɑ kpɩɩlʋɣʋ tɑɑ sɩ pɑ tɛsǝɣɩ Kɑpǝnɑhum. Hɑlɩ pǝ́ cɑŋ pǝ́ yu Yesu tɑ kɔntɑ pɑ kiŋ. 18 Ḿpʋ́ɣʋ́ heelim sɔsɔɔm mɑpɑ nɑ pǝ lɑŋtǝɣɩ teŋku lʋm kɛ sɔsɔm. 19 Yesu ɩfɑlɑɑ tɔmɑ lʋm tɑɑ ɩsɩɩ kilomɛɛtǝlǝnɑɑ kɑkpɑsɩ yɑɑ nɑɑtoso, ɩlɛ pɑ nɑ Yesu kɛlɛ nɑ ɩ́ tɔŋ lʋm tɔɔ nɑ ɩ́ kɔŋnɑ pɑ tɔɔ tɔɔ. Tǝnɑɣɑ sɔɣɔntʋ kpɑ-wɛ. 20 Amɑ Yesu heelɑ-wɛ sɩ: Sɔɣɔntʋ ɩ́ tɑɑ lɑ-mɛ, mɑɣɑ.

21 Yesu ɩfɑlɑɑ luɣu lɑpɑ nɑ pɑ́ kpɑɣɑ Yesu kɛ kpɩɩlʋɣʋ tɑɑ. Tete ɩsɩɩ sɑŋɑ tɔ, pɑ tɛmɑ tɑtɛ kɛ timpi pɑ pukɑɣɑ tɔ.

22 Kʋ femɑ ɩlɛnɑ sɑmɑɑ wei pǝ yelɑ teŋku wɑɑlɩ tɔ, ɩ́ nɑ́ sɩ kpɩɩlʋɣʋ kʋlʋmʋɣʋ kɑ kɑɑsǝnɑ tǝnɑ. Pǝ́cɔ́ pɑ nyǝmɑ́ sɩ Yesu nɑ ɩ ɩfɑlɑɑ pɑ tɑ kɑɑ kpɩɩlʋɣʋ. Amɑ pɛlɛ pɑ tike pɑ tɛɛnɑ. 23 Pɑɑ nɑ mpʋ kpɩɩlǝŋ lɛlǝŋ wei ɩ lɩɩnɑ Tipeliyɑtɩ tɔ ɩ kɔmɑ, nɑ ɩ tɑ hɑtǝlǝnɑ timpi Tɑcɑɑ kɑ sɛɛ Ɩsɔ kɛ́ ɩ nɑ tǝmlɛ nɑ pǝ́cɔ́ pɑ́ tɔɣɔ potopotonɑɑ tɔ. 24 Sɑmɑɑ ɩnɩ ɩ nɑwɑ sɩ Yesu nɑ ɩ ɩfɑlɑɑ pɑ tɑɑ nɔɣɔlʋ fɛɩ tǝnɑ, ɩlɛnɑ pɑ́ kpɑ kpɩɩlǝŋ ɩnɩ ɩ tɑɑ nɑ pɑ́ tɛɛ Kɑpǝnɑhum kɛ Yesu pɛɛkʋɣʋ.

25 Sɑmɑɑ kɔmɑ nɑ pɑ́ nɑ-ɩ teŋku wɑɑlɩ ɩlɛnɑ pɑ́ pɔɔsɩ-ɩ sɩ: Tɑcɑɑ, pǝlee kɛ́ n kɔmɑ cǝnɛ?

26 Tǝnɑɣɑ Yesu cɔwɑ sɑmɑɑ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, pǝ tɑɣɑ ɩsɩɩ ɩ́ nɑ́ mɑ piti tǝmɑ tɔɣɔ ɩ́ pɛɛkǝɣɩ-m. Amɑ ɩ́ tɔɣɔ potopotonɑɑ nɑ ɩ́ hɑɣɑ tɔɣɔ. 27 Ɩ́ tɑɑ nɔkɩ nɑ ɩ́ kɑnɑ kʋtɔɣɔʋ ŋku kʋ tɛŋ tɔɣɔ pɛɛkʋɣʋ. Amɑ ɩ́ lʋ ŋku kʋ wɛ tɑm nɑ kʋ kɔŋnɑ weesuɣu ŋku kɩɩ tɛŋ tɔ kʋ tɔɔ. Yʋlʋ Pǝyɑɣɑ mɑ́ mɑɑ hɑnɑ-mɛɣɛ kʋtɔɣɔʋ ŋkʋ. Pǝ tɑɣɑ pʋlʋ, Tɑcɑɑ Ɩsɔ tɛmɑ-m ɩ toŋ cɑcɑɑlɑɣɑ tʋɣʋ.

28 Ḿpʋ́ɣʋ́ sɑmɑɑ pɔɔsɑ Yesu sɩ: Pepeɣe tɩɩ lɑ nɑ pǝ́cɔ́ tǝ́ lɑ tǝmɑ nnɑ Ɩsɔ cɑɑkɩ tɔ?

29 Ɩlɛnɑ Yesu cɔ sɑmɑɑ sɩ: Tǝmlɛ nte Ɩsɔ cɑɑ sɩ ɩ́ lɑpɩ-ɩ tɔɣɔlɛ sɩ ɩ́ mʋ ɩ tillu tɔm.

30 Ḿpʋ́ɣʋ́ sɑmɑɑ pɔɔsɑ Yesu tɔtɔ sɩ: Ɩlɛ n kɑɑ lɑ piti tǝmlɛ nɑtǝlɩ nɑ tǝ nɑ́ nɑ pǝ́cɔ́ tǝ mʋ nyɑ́ tɔm? Tɔʋ, tǝmlɛ nteɣe n kɑ lɑ? 31 Tɑ cɑɑnɑɑ cɑɑnɑɑ tɔɣɔnɑ mɑnnɑ kɛ wʋlɑɣɑ tɛtʋ tɑɑ, ɩsɩɩ pɑ ŋmɑɑʋ Ɩsɔ Tɔm tɑɑ tɔ sɩ: Ɩ tisɑ ɩsɔtɑɑ kʋtɔɣɔʋ nɑ ɩ́ cɛlɑ-wɛ nɑ pɑ́ tɔɣɔ.

32 Ḿpʋ́ɣʋ́ Yesu cɔ sɑmɑɑ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, mpi Moisi cɛlɑ-mɛ tɔ pǝ tɑ kɛ ɩsɔtɑɑ kʋtɔɣɔʋ kɛ tǝnɑ. Amɑ pǝnɛntɛ ɩsɔtɑɑ kʋtɔɣɔʋ mɑɣɑmɑɣɑ kɛ mɑ Cɑɑ cɛlǝɣɩ-mɛ. 33 Nɑ kʋtɔɣɔʋ ŋku Ɩsɔ cɛlǝɣɩ-mɛ tɔɣɔlɛ ŋku kʋ lɩɩnɑ ɩsɔtɑɑ nɑ kʋ tii nɑ kʋ hɑɑkɩ yǝlɑɑ tǝnɑɣɑ weesuɣu tɔ.

34 Tǝnɑɣɑ sɑmɑɑ cɔ Yesu sɩ: Tɑcɑɑ, hɑɑkɩ-tʋɣʋ kʋtɔɣɔʋ ŋkʋɣʋ tɑm.

35 Ɩlɛnɑ Yesu cɔ sɑmɑɑ ɩnɩ sɩ: Mɑ mɑɣɑmɑɣɑ kɛlɛ kʋtɔɣɔʋ ŋku kʋ hɑɑkɩ weesuɣu tɔ. Ye wei ɩ́ kɔmɑ mɑ kiŋ nyɔɣɔsɩ kɑɑ kpɑ pʋntʋ pɑɑ pǝcɔ. Pǝyele wei ɩ mʋ mɑ tɔm tɔ, lʋkɔtʋ kɑɑ kpɑ pʋntʋ tɔtɔ. 36 Amɑ mɑ tɛmɑ-mɛɣɛ-tǝɣɩ heeluɣu sɩ ɩ́ nɑ-m, pǝ́cɔ́ ɩ́ tɑ́ mʋ mɑ tɔm. 37 Pɑ tǝnɑ mpɑ mɑ Cɑɑ hɑɑ-m tɔ, pɑ kɔŋ mɑ kiŋ kɛ́. Mɑ kɑɑ tɔɣɔnɩ wei ɩ kɔŋ mɑ kiŋ tɔ. 38 Pǝ tɑɣɑ pʋlʋ, mɑ tiinɑ ɩsɔ kɛ́ sɩ mɑ lɑkɩ wei ɩ tilɑ-m tɔ ɩ luɣu nyǝntʋ, pǝ tɑɣɑ mɑ mɑɣɑmɑɣɑ mɑ nyǝntʋ. 39 Wei ɩ tilɑ-m tɔ ɩ luɣu nyǝntʋ ntɛ́ sɩ mɑ́ tɑɑ yele nɑ mpɑ ɩ cɛlɑ-m tɔ pɑ tɑɑ nɔɣɔlʋ le. Amɑ sɩ mɑ́ kʋsɩ pɑ tǝnɑɣɑ sǝtɑɑ tɑɑ kɛ́ kʋyɑkʋ kɑntǝkɑɣɑ nyǝŋkʋ wule kɛ́. 40 Mɑ Cɑɑ luɣu nyǝntʋ ntɛ́ sɩ mpɑ mpɑ pɑ nɑ́ Pǝyɑɣɑ mɑ́ nɑ pɑ́ mʋ mɑ tɔm tɔ, pʋntʋnɑɑ ɩ́ hiki weesuɣu ŋku kɩɩ tɛŋ tɔ, nɑ mɑɑ feesi-wɛɣɛ kɑntǝkɑɣɑ kʋyɑkʋ wule.

41 Ɩsɩɩ Yesu yɔɣɔtʋɣʋ mpʋ sɩ ɩnǝɣǝlɛ kʋtɔɣɔʋ ŋku kʋ tiinɑ ɩsɔtɑɑ tɔ, sɛsɛ pǝ tɑ mɑɣɑ Yutɑ nyǝ́mɑ ntɛ́. 42 Tǝnɑɣɑ pɑ tɔmɑ sɩ: Ɩsɩɩ Yosɛɛfʋ pǝyɑlʋ Yesu kɛlɛ? Tǝ nyǝmɑ́ ɩ cɑɑ nɑ ɩ too mɛɛ. Ɩlɛ ntiɣi ɩ yɔɣɔtǝɣɩ sɩ ɩnɩ ɩ tiinɑ ɩsɔtɑɑ?

43 Ḿpʋ́ɣʋ́ Yesu cɔ Yutɑ nyǝ́mɑ sɩ: Ɩ́ tɑɑ miitinɑ-m mpʋ. 44 Tɑcɑɑ wei ɩ tilɑ-m tɔ ɩ́ yɑɑ wei, pʋntʋ tike kɔŋnɑ mɑ kiŋ, nɑ mɑɑ feesi-ɩ kɑntǝkɑɣɑ kʋyɑkʋ wule. 45 Ɩsɔ kʋyɔɣɔtʋtʋ tɛlǝsǝlɑɑ ŋmɑɑ tɔm tǝnɛ sɩ: Yǝlɑɑ tǝnɑ kɑ́ wɛɛ Ɩsɔ kʋsɛɣɛsɑɑ. Pǝ tɔɔ kɛ́ yǝlɑɑ tǝnɑ mpɑ pɑ nɩɩkǝnɑ Tɑcɑɑ Ɩsɔ nɑ pɑ́ mʋ ɩ kʋsɛɣɛsǝtʋ tɔ, pɑ kɔŋ mɑ kiŋ. 46 Ɩlɛ pǝ tɑɣɑ ɩsɩɩ nɔɣɔlʋ tɛmɑ Tɑcɑɑ Ɩsɔ kɛ́ nɑʋ se. Ye pǝ tɑɣɑ wei ɩ lɩɩnɑ Ɩsɔ kiŋ tɔ ɩnɩ ɩ nɑnɑ-ɩ. 47 Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, wei ɩ mʋ mɑ tɔm, pʋntʋ tɛmɑ weesuɣu ŋku kɩɩ tɛŋ tɔɣɔ hikuɣu kɛ́. 48 Mɑɣɑlɛ kʋtɔɣɔʋ ŋku kʋ hɑɑkɩ weesuɣu tɔ. 49 Mǝ cɑɑnɑɑ cɑɑnɑɑ tɔɣɔnɑ mɑnnɑ kɛ wʋlɑɣɑ tɛtʋ tɑɑ, pǝyele pɑ sǝpɑ. 50 Amɑ kʋtɔɣɔʋ ŋku kʋ lɩɩnɑ ɩsɔtɑɑ tɔ, ŋkʋɣʋ yʋlʋ ɩ́ tɔɣɑɑ ɩ kɑɑ sɩ. 51 Mɑɣɑlɛ kʋtɔɣɔʋ ŋku kʋ tiinɑ ɩsɔtɑɑ nɑ kʋ hɑɑ weesuɣu tɔ. Ye wei ɩ tɔɣɔ kʋtɔɣɔʋ ŋkʋ, pʋntʋ kɑ́ wɛɛ tɑm kɛ́, ɩɩ tɑsǝɣɩ sǝpʋ. Kʋtɔɣɔʋ ŋku mɑɑ hɑ tɔɣɔlɛ mɑ mɑɣɑmɑɣɑ mɑ tɔnʋɣʋ nɑntʋ. Mɑ hɑɑkɩ-tǝɣɩ sɩ yǝlɑɑ tǝnɑ ɩ́ hiki weesuɣu.

52 Tǝnɑɣɑ Yutɑ nyǝ́mɑ sʋʋ tǝ tɔɔ kɛ́ hɔm nɑ ɩsǝlɛ kʋsɛɛmlɛ kɛ pɑ tɑɑ pɑ tike sɩ: Ɩsǝnɑɣɑ ɩnɩ ɩ kɑ́ kpɑɣɑ ɩ mɑɣɑmɑɣɑ ɩ tɔnʋɣʋ nɑntʋ nɑ ɩ́ hɑ-tʋ sɩ tǝ́ tɔɣɔ?

53 Ḿpʋ́ɣʋ́ Yesu cɔwɑ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye ɩ tɑ tɔɣɔ Yʋlʋ Pǝyɑɣɑ mɑ́ mɑ tɔnʋɣʋ nɑntʋ, nɑ ɩ́ tɑ nyɔɔ mɑ cɑlǝm, ɩ́ kɑɑ hiki weesuɣu kɛ mǝ mɑɣɑmɑɣɑ. 54 Ye wei ɩ tɔkɩ mɑ tɔnʋɣʋ nɑntʋ nɑ ɩ́ nyɔɔkɩ mɑ cɑlǝm, pʋntʋ tɛmɑ weesuɣu ŋku kɩɩ tɛŋ tɔɣɔ hikuɣu kɛ́, nɑ mɑɑ feesi-ɩ sǝtɑɑ tɑɑ kɛ́ kɑntǝkɑɣɑ kʋyɑkʋ wule. 55 Pǝ tɑɣɑ pʋlʋ, mɑ tɔnʋɣʋ nɑntʋ kɛ kʋtɔɣɔʋ kʋpɑŋkʋ kɛ́, nɑ mɑ cɑlǝm kɛ kʋnyɔnyɔɔm kʋpɑm tɔtɔ. 56 Ye wei ɩ́ tɔɣɔ mɑ tɔnʋɣʋ nɑntʋ, nɑ ɩ́ nyɔɔ mɑ cɑlǝm, mɑ nɑ pʋntʋ tɩɩ wɛɛ tǝmɑ tɑɑ kɛ́. 57 Tɑcɑɑ Ɩsɔ wei ɩ tilɑ-m tɔ, ɩ wɛnɑ ɩ weesuɣu, nɑ ɩ tɔɔ kɛ́ mɑ wɛnɑ mɑ weesuɣu tɔtɔ. Pǝ tɔɔ kɛ́ wei ɩ́ tɔɣɔ-m, pʋntʋ wɛɛnɑ weesuɣu kɛ mɑ tɔɔ tɔtɔ. 58 Tɔʋ, kʋtɔɣɔʋ ŋku kʋ lɩɩnɑ ɩsɔ tɔɣɔlɛ. Kʋ tɑ kɛ ŋku mǝ cɑɑnɑɑ cɑɑnɑɑ kɑ tɔɣɑɑ nɑ kɑɣɑnɑ pɑ fɛɩ tɔ. Amɑ ye wei ɩ tɔkɩ kʋtɔɣɔʋ kʋnɛ, pʋntʋ kɑ́ wɛɛnɑ ɩ weesuɣu kɛ tɑm.

59 Kɑpǝnɑhum kɛ Yesu sɛɣɛsɑ tɔm tǝnɛɣɛ Yutɑ nyǝ́mɑ tǝkotile tɑɑ.

60 Wɑɑtʋ wei Yesu ɩfɑlɑɑ nɩɩ tɔm tǝnɛ tɔ, pɑ tɑɑ pɑɣɑlɛ tɔmɑ sɩ: Tɔm tǝnɛ tǝ kǝlɑ kɑtɛ. Awe nɑ́ pǝsǝɣɩ tǝ nɩɩʋ?

61 Yesu nɑwɑ sɩ tɔm tǝnɛ tǝ tɑ mɑɣɑ ɩ ɩfɑlɑɑ, ɩlɛnɑ ɩ́ tɔ-wɛ sɩ: Ɩsɩɩ tɔm tǝnɛ tǝ kǝlɑ-mɛɣɛlɛ yɑɑ? 62 Nɑ ɩ́ kɑ́ kɔɔ nɑ ɩ́ nɑ Yʋlʋ Pǝyɑɣɑ mɑ́ nɑ mɑ́ kpɑɑ timpi mɑɑ wɛɛ tɔ, ɩlɛ ɩsǝnɑɣɑlɛ ɩ́ kɑ́ lɑ? 63 Ɩsɔ Feesuɣu hɑɑkǝnɑ weesuɣu, yʋlʋ tɔnʋɣʋ kʋnɛ kʋlɛ kɩɩ wɑɑsǝɣɩ pʋlʋ. Tɔm nti mɑ heelɑ-mɛ ɩsǝntɔ tɔɣɔlɛ Feesuɣu nyǝntʋ, nɑ ntɩ ɩnɩ tǝ hɑɑkǝnɑ weesuɣu. 64 Pɑɑ nɑ mpʋ, mǝ tɑɑ lɛlɑɑ ɩɩ tʋɣʋnɑ-tɩ. (Pǝ tɑɣɑ pʋlʋ, hɑtoo kɑncɑɑlɑɣɑ Yesu kɑ nyǝmɑ́ mpɑ pɑ kɑɑ tɔkɩ ɩ tɔm tɔ. Hɑlɩ ɩ nyǝmɑ́ wei ɩ kɑ́ lɑpɩ-ɩ kɔlɔmɔtɔ tɔ.)

65 Yesu sɔɔsɑ lɛntɩ sɩ: Pǝ mɑɣɑmɑɣɑ pǝ tɔɔ kɛ́ mɑɑ heelɑ-mɛ sɩ: Nɔɣɔlʋ kɑɑ pǝsɩ nɑ ɩ́ kɔɔ mɑ cɔlɔ, nɑ pǝ tɑ́ kɛnɑ sɩ Ɩsɔ hɑnɑ-ɩ pǝ mpɑɑʋ.

66 Pǝ kpɑɣɑʋ kʋyɑŋkʋ tɔɣɔ Yesu ɩfɑlɑɑ tɑɑ lɛlɑɑ yelɑ-ɩ, pɑ tɑ tɑsɑ-ɩ tǝŋʋɣʋ. 67 Ḿpʋ́ɣʋ́ Yesu pɔɔsɑ pɑ nɑɑnʋwɑ nɑ nɑɑlɛ wei ɩ kɑɑsɑɑ tɔ sɩ: Nɑ mɛ se, mɩɩ tɛɛ mǝ nyǝŋkʋ?

68 Tǝnɑɣɑ Simɔŋ Piyɛɛ cɔwɑ Yesu sɩ: Tɑcɑɑ, ɑwe kiŋ kɛ tɩɩ polo? Nyɑ́ tɔm pee hɑɑkǝnɑ weesuɣu ŋku kɩɩ tɛŋ tɔ ɩlɛ. 69 Nɑ pǝnɛntɛ tǝ mʋwɑ nɑ tǝ́ tɛ tɑ́ tɑɑ sɩ n kɛ́ Yʋlʋ Nɑŋŋtʋ ɩnɩ, nɑ n lɩɩnɑ Ɩsɔ kiŋ.

70 Ɩlɛnɑ Yesu nɑɑ tɔ ɩ ɩfɑlɑɑ sɩ: Mǝ nɑɑnʋwɑ nɑ nɑɑlɛ ɩnɛ pǝ tɑɣɑ mɑ́ lǝsǝnɑ-mɛ? Pǝ́cɔ́ mǝ tɑɑ lɛlʋ nɑ́ kɛ́ ɩlɔɣɔʋ.

71 Simɔŋ Ɩsǝkɑleeu pǝyɑlʋ Yutɑɑsɩ tɔm kɛ Yesu yɔɣɔtɑɣɑ mpʋ. Pɑɑ nɑ ɩ kɛ́ pɑ nɑɑnʋwɑ nɑ nɑɑlɛ tɑɑ lɛlʋ tɔ, kʋlʋm ɩnɩ ɩ kɔmnɑ nɑ ɩ́ lɑpɩ-ɩ kɔlɔmɔtɔ.