3
Soopu wulɑ
1-2 Pǝ wɑɑlɩ kɛ́ Soopu tʋʋwɑ ɩ kʋyɑkʋ kʋlʋlʋɣʋ nɑ wulɑ sɩ:
3 Pǝ́ hɩɩsɩ mɑ kʋyɑkʋ kʋlʋlʋɣʋ,
nɑ ɑhoo nnɑ pɑ yɔɣɔtɑ mɑ lʋlʋɣʋ tɔm tɔ.
4 Pɑ́ nyǝnɩ-kʋɣʋ sǝkpɛtʋɣʋ nyǝŋkʋ.
Ɩsɔtɑɑ Ɩsɔ ɩ́ tɑɑ pɔɔsɩ kʋ tɔm.
Pǝyele nyɑɑlǝm nɑpǝlɩ pǝ́ tɑɑ nyɑɑlɩ-kʋ.
5 Ɩsotom nɑ ɑtɛtǝlɛ sǝkpɛtʋɣʋ ɩ́ pɔɔsɩ kʋ tɔɔ.
Nɑ ɩsɔŋmʋntʋɣʋ kʋkpɛɛtʋɣʋ wɑɑsɩ-kʋ́,
yɑɑ ilim sɩ́ nɑ pǝ́ yu ɩsɩɩ ɑhoo.
6 Ahoo ɑnɩ ɑ́ kǝlɩ lɛnnɑ kɛ sǝkpɛtʋɣʋ.
Pɑ́ tɑɑ tɑsɑ-yɛɣɛ kɑlǝnɑʋ kɛ ɩsɔtʋnɑɑ, yɑɑ pǝnɑɣɑ tɑɑ.
7 Ahoo ɑnɩ, ɑ́ sɑɑlɩ kɑɑlʋlɑɣɑ kɛ tɑm tɔɔ.
A tɑɑ nɩɩ lɑŋhʋlʋmlɛ kɑwilitɑɣɑ nɑkǝlɩ tɔtɔ.
8 Tʋwɑɑ mpɑ pɑ nyǝmɑ́ kʋyɛɛŋ kɛ mpusi tǝŋsʋɣʋ,
nɑ pɑ́ kpɑɑsǝɣɩ tʋm sɔsɔ*fɑ* pɑ́ɑ́nɑ́ tɔ.
Pɑ́ tǝŋsɩ ɑhoo ɑnǝɣɩ mpusi. ɑtʋm sɔsɔ: Piipili yɑɑwɑ wontuɣu kʋnɛ sɩ (Lefiyɑtɑŋ) nɑ Nɑsɑɑlɑ tɑɑ, yɑɑ (Tǝlɑɑkɔŋ) kɛnɑ tɑ́ɑ́ tɛlǝsɩ sɩ tʋm sɔsɔ.
9 Sǝkpɛtʋɣʋ ɩ́ wɑɑsɩ tʋlʋmɑlʋɣʋ tɔɔ,
nɑ ɑhoo ɑnɩ ɑ́ tɑŋ ilim nɑ ɑ́ wɩɩ.
Pǝ́cɔ́ ɑ́ tɑɑ loosi pǝ nyɑɑlǝm.
10 Mpi tɔ, ɑ tɑ kɑɣɑtɩ mɑ lʋlʋɣʋ,
nɑ sɑŋɑ mɑ́ nɑɑkɩ wɑhɑlɑ sɔsɔ ɩnɛ.
11 Pepe tɔɔ kɛ́ mɑ tɑɑ sɩ́ nɑ pǝ́cɔ́ pɑ́ lʋlɩ-m,
yɑɑ mɑ tɑɑ hɛɛ mɑ lɩɩʋ wɑɑtʋ?
12 Pepe tɔɔ kɛ́ pǝ hɑ-m too,
nɑ ɩ́ sɩɩ-m ɩ tɔɔ nɑ mɑ́ mʋsɩ-ɩ?
13 Ɩsǝntɔ tɔ, mɑɑ hǝntɑɑ tǝpɑmm kɛ pǝlɑɑʋ tɑɑ,
nɑ mɑ́ tooki, nɑ mɑ́ hɛɛsǝɣɩ.
14 Mɑ nɑ ɑwulɑɑ sɔsɑɑ nɑ tɛtʋ nyɔɔŋ nyǝ́mɑ,
mpɑ pɑ ŋmɑɑkɩ tɛɛsɩ sɔsɔɔnsɩ tɔ,
15 yɑɑ ɑwulumpiyɑ mpɑ pɑ wɛnɑ wʋlɑ
nɑ pɑ́ suuliɣi liɣitee kɛ tɛɛsɩ tɑɑ tɔ.
16 Mɑɑ wɛ ɩsɩɩ pǝ hɔlʋsʋɣʋ
pǝyɑɣɑ nɑ kɑ́ tɑ nɑ́ ilim tɔ.
17 Ɩsɑɣɑʋ yeki ɩ ɩsɑɣɑtʋ kɛ pǝlɑɑʋ tɑɑ.
Tǝnɑɣɑ mpɑ pɑ kɑwɑ kɑtɑtǝlɑɣɑ tɔ,
pɑ hɛɛsǝɣɩ tɑm tɔɔ.
18 Sɑlǝkɑtʋnɑɑ tǝnɑ wɛ hɛɛsʋɣʋ tɑɑ kɛ tǝnɑɣɑ.
Pɑɑ tɑsǝɣɩ ŋmɑkǝllɑɑ hólɑ kɛ nɩɩʋ.
19 Sǝkpelu nɑ sɔsɔ pɑ wɛ kʋlʋm kɛ tǝnɑɣɑ.
Pǝyele pǝ cɛkɩ yom nɑ ɩ cɑɑ.
20 Pepe tɔɔ kɛ́ Ɩsɔ yeki nɑ wɑhɑlɑ nyǝ́mɑ nɑɑkɩ ilim?
Nɑ ɩ́ hɑɑkɩ lɑŋwɑkǝllɛ nyǝ́mɑ kɛ weesuɣu?
21 Pɑ tɑŋɑ sǝm, nɑ pǝlɛ pɩɩ kɔŋ.
Nɑ pɑ́ pɛɛkǝɣɩ-wǝɣɩ teu ɩsɩɩ liɣitee.
22 Yʋlʋ wei ɩ lɑŋlɛ kɑ́ hʋlʋmǝnɑ
nɑ ɩ́ ŋmɑɑlɩ sɩ ɩ hikɑ pǝlɑɑʋ?
23 Wei ɩ mpɑɑʋ ŋmɛlɑɑ
nɑ Ɩsɔ tɑmɑ-ɩ kotɑɣɑ tɔ yɑ́ɑ́?
24 Mɑ tɔɣɔnɑɣɑ ntɛ́ feesiŋ tisuɣu,
nɑ mɑ́ mɔlǝɣɩ pǝ fɛɩ tǝnɑɣɑ,
ɩsɩɩ lʋm kpeŋuɣu tɔ.
25 Ye mɑ tʋ́ mɑ tɑɑ kɛ pʋlʋpʋ sɔɣɔntʋ pǝ kɔŋ kɛ́.
Mpi mɑ seeki tɔɣɔ mɑ nɑɑkɩ.
26 Mɑ tɑ nyɩ tǝpɑmm yɑɑ ɑlɑɑfǝyɑ
yɑɑ hɛɛsʋɣʋ tɔm.
Amɑ cɔɔsɛɛ wɑtǝɣǝnɑ-m.