2 Ye pɩɩ wɛ pǝsʋɣʋ sɩ pɑ́ mɑɣɑsɩ

mɑ wʋsɑsɩ nɑ mɑ wɑhɑlɑ tɔɔʋ,

3 pɩɩ kǝlɑ lʋm nɔɣɔ kɑnyǝŋɑ kɛ yuŋ.

Pǝ tɔɔ kɛ́ pǝ yɔɣɔtǝɣɩ-m yem yem.

4 Tomɑ tǝnɑ tʋ yɑɣɑ-m nyǝmɑ́,

nɑ ɑ sɔtʋ sʋʋ-m.

Nɑ Ɩsɔ sɔɣɔntʋ pɩɩ-m.

5 Kpɑŋɑɣɑ ɩɩ wiiki kɑ tɔɣɔnɑɣɑ kʋpɑŋkɑ kiŋ.

Pǝyele nɑʋ ɩɩ mʋtǝɣɩ nyɩɩtʋ tǝtɔɣɔlɛ.

6 Yʋlʋ ɩɩ pǝsǝɣɩ nɑ ɩ́ tɔɣɔ ɑkpofu pʋlʋpʋ.

Pǝyele yɑtɛ lʋm kʋhʋlʋmǝm sǝpɑ yem kɛ́ tǝtɔtɔtɔ.

7 Mpi pɩɩ wɛ mɑɣɑ ɑcɑɑlǝtʋ nɑ mɑ tɑɑ kpǝtǝɣǝnɑ tɔ,

mpǝɣǝlɛ mɑ tɔɣɔnɑɣɑ*fɑ*. ɑHepǝlɑ tɑɑ looŋɑ kɑnɛ kɑ nɩɩʋ wɛ kɑtɛ.

8 Hɑɩ, ye Ɩsɔ kɑ mʋkɑɣɑ mɑ kʋsʋlʋmʋtʋ

nɑ ɩ́ lɑ-m mpi mɑ tɛɛlǝɣɩ tɔ.

9 Ye ɩ kɑ tisɑɣɑ sɩ ɩ́ tǝlǝkɩ-m,

nɑ ɩ́ kʋsɩ ɩ niŋ kʋkentiŋ kɛ mɑ tɔɔ.

10 Mɑɑ pɑɑnɑ lɑŋhʋlʋmlɛ,

nɑ mɑ́ nyɔɔ toŋ kɛ wɑhɑlɑnɑɑ pɑnɛ pɑ tɑɑ.

Mɑ tɑ cɔlǝsɩ Ɩsɔ Nɑŋŋtʋ kʋyɔɣɔtʋtʋ kɛ tiili.

11 Pepe tɔɔ kɛ́ mɑɑ tɛɛlɩ nɑ mɑ́ fɛɩnɑ toŋ?

Yɑɑ mɑ́ tɑsɑ tɑŋʋɣʋ nɑ mɑ tomle tɑmɑ?

12 Mɑ tomɑ tɑ kɛ pǝlɛ

yɑɑ nyǝɣǝlʋɣʋ kʋsɛɛmʋɣʋ nyǝnɑ.

13 Mɑ fɛɩnɑ toŋ nɩɩlɩ,

pǝ́cɔ́ mɑ fɛɩnɑ wei ɩ kɑ́ yɑ mɑ nyʋɣʋ tɔ.

14 Pǝ wɛɛ sɩ kʋnyɔntɔɣɔlʋ tɑɑpɑlʋ ɩ́ lɑpɩ-ɩ kʋpɑntʋ kɛ́.

Pǝ́ tɑɑ kɔɔ nɑ ɩ́ lɔ́ Tomɑ tǝnɑ tʋ.

15 Amɑ mɑ tɑɑpɑlɑɑ yɔɔlɑ mɑ ɑpɑlʋtʋ

kɛ́ ɩsɩɩ lɔɔʋ ŋku kɩɩ lɑɑ nyɔɔʋ tɔ.

16 Wɑɑtʋ wei tɛʋ tɔmpɛɛ

hooki ɩlɛnɑ lɔɔŋ ɩnɩ ɩ́ su.

17 Hɑŋɑɣɑ kɔŋ ɩlɛnɑ ɩ́ nyɔɔ.

Nɑ ilim nyɑɣɑ ɩlɛnɑ lɔɔŋ wʋlɩ.

18 Lʋkɔtʋ pɩɩkɩ mpɑtɔntɑɑ ɩlɛnɑ pɑ́ yele

pɑ mpɑɑʋ nɑ pɑ́ sʋʋ nyɩɩtʋ nɑ pɑ́ le nɑ pǝ́ sɑɑlɩ.

19 Temɑ tɔntɑɑ nɑ Sɑpɑ nyǝ́mɑ pɑ yɑsǝɣɩ ɩsɛ

nɑ pɑ́ pɛɛkǝɣɩ lʋm nɑ ɩsǝlɛ kʋsɛɛmlɛ.

20 Pɑ tɑlɑ lɔɔʋ, ɩlɛnɑ pǝ́ yeɣeti-wɛ,

nɑ fɛɛlɛ kpɑ-wɛɣɛ pɑ ɩsǝlɛ sɛɛsʋɣʋ tɔm.

21 Mɑ tɑɑpɑlɑɑ mɛ ɩ́ wɛ-m

teitei kɛ́ ɩsɩɩ lɔɔʋ ŋkʋ.

Ɩ́ nɑɑkɩ mɑ wɑhɑlɑ nɑ sɔɣɔntʋ pɩɩ-mɛ.

22 Mɑ tɑ sǝlǝmɩ-mɛɣɛ pʋlʋ,

yɑɑ sɩ ɩ́ hɑ-m kʋhɑʋ nɑkʋlɩ.

23 Yɑɑ ɩ́ fiti-m kolontunɑɑ niŋ tɑɑ,

yɑɑ ɩ́ wɑɑsɩ-m ŋmɑkǝllɑɑ niŋ tɑɑ.

24 Ɩ́ sɛɣɛsɩ-m, mɑɑ su nɑ mɑ́ nɩɩ.

Ɩ́ hʋlɩ-m timpi mɑ wɑkǝlɑɑ tɔ.

25 Yʋlʋ nɩɩkɩ tɑmpɑnɑ kʋyɔɣɔtʋtʋ kɛ́ nɑ ɩ́ tisi.

Amɑ mɑ tɑɑpɑlɑɑ kɑlǝnɑʋ nɑ́ɑ́ wɑɑsǝɣɩ pʋlʋ.

26 Ɩ́ mɑɣɑsǝɣɩ sɩ ɩ́ footi mɑ kʋyɔɣɔtʋtʋ

nɑ ɩ́ nyǝnɩ yem kɛ́ nɑɑni fɛɩ tʋ mɑ́ nɑ?

27 Hɑlɩ ɩ́ tɔɔkɩ tɛtɛ kɛ́ sulɑʋ tɔɔ

nɑ ɩ́ kpɛŋǝɣǝnɑ mǝ ceu mɑɣɑmɑɣɑ nɑ ɩ́ pɛɛtǝɣɩ.

28 Ɩ́ nyǝnɩ-m teu

nɑ ɩ́ nɑ́, mɑɑ looliɣi-mɛ.

29 Ɩ́ su, kʋtɑkɛɛsǝm ɩ́ tɑɑ kɔɔ,

Ɩ́ su, mpi tɔ, mɑ wɛ mɑ tɑmpɑnɑ tɑɑ kɛ́.

30 Mɑɑ yɔɣɔtǝɣɩ ɩsɑɣɑtʋ,

pǝyele kʋwɑkǝlǝtʋ ɩɩ lɩɩkǝnɑ mɑ nɔɣɔ.