1 Mɑ sɩɩ mɑ tǝɣɩ nɔɣɔ nɑ tuunɑʋ sɩ,

mɑ́ tɑɑ nyǝnɩ pɛɛlɔ nɔɣɔlʋ nɑ mɑ́ nyɩɩlɩ-ɩ.

2 Ye pǝ tɑɣɑ mpʋ, mɑ fɛɩnɑ kpɑncoou,

yɑɑ mɑ pɑɑ nyǝm nɑpǝlɩ.

Mɑɑ tɑŋ sɩ Tomɑ tǝnɑ tʋ ɩ́ tilinɑ-m nɑ ɩsɔtɑɑ?

3 Kʋtɑkɛɛsǝŋ kɛ pǝ wɑkǝlǝɣɩ,

nɑ wɑhɑlɑ nɑ́ɑ́ mɑɣɑnɑ wɑkǝllɑɑ.

4 Ɩsɔ nyǝmɑ́ mɑ mpɑɑŋ nɑ mɑ tɔntɛ tǝnɑ.

5 Mɑ tɑ tɔ mpɑɑʋ kʋlooluɣu tɑɑ.

Pǝyele mɑ tɑ lɑ ɑcilɑɣɑtʋ nɑtǝlɩ.

6 Ɩsɔ mɑɣɑsɩ-m nɑ nyɑ́ mɑɣɑsǝlɑɣɑ kʋsiɣisɑɣɑ.

N kɑ́ nɑ́ sɩ mɑ tɑ wɑkǝlɩ tiili.

7 Ye mɑ yelɑ mpɑɑʋ kʋsiɣisuɣu,

yɑɑ mɑ ɩsɛ yelɑɑ nɑ mɑ́ nyɩɩlɩ mɑ lotu tɑɑ,

nɑ mɑ́ pilisi mɑ tɩ nɑ ɩsɑɣɑtʋ nɑtǝlɩ.

8 Ɩlɛ nɔɣɔlʋ ɩ́ tɔɣɔ mɑ kʋhɑlǝm

nɑ pɑ́ kpɛsɩ mpi mɑ sɔwɑ tɔ.

9 Ye mɑ nyɩɩlɑ lɛlʋ ɑlʋ,

yɑɑ mɑ tɩɩ cɛŋɑ ɑlʋ kɛ mɑ tɔɣɔntǝlɛ nɔnɔɣɔ tɛɛ.

10 Ɩlɛ mɑ nyǝŋ ɩ́ pǝsɩ nɔɣɔlʋ tǝmlɛ tʋ,

nɑ pɑɑ ɑpɑlʋ wei ɩ́ lɑnɑ-ɩ ɩsǝnɑ ɩ cɑɑkɩ tɔ.

11 Pǝ tɑɣɑ pʋlʋ,

mpʋ ɩnɩ pǝ kɛ́ ɑcɑɑlǝtʋ sɔsɔɔntʋ kɛ́.

Pǝ wɛɛ sɩ pɑɑ hʋʋlʋ wei, ɩ́ hɔ pǝ lɑtʋ ŋkpɑŋʋɣʋ.

12 Ye ɩsɩɩ mɑɑ lɑpɑ mpʋ mɑ ɩsɑɣɑtʋ kɑ pǝsɑ kɔkɔ kɛ́

nɑ kɑ́ nyɑɣɑ mɑ wɛnɑʋ tǝnɑ.

13 Ye ɩsɩɩ mɑ nyǝnɑ mɑ tǝmlɛ tʋ ɑpɑlʋ yɑɑ

ɑlʋnyǝŋ kɛ yem kɛ́ hʋʋlɛ tɑɑ, nɑ mɑ́ tɑ́ hɑ-ɩ tɑmpɑnɑ.

14 Ɩlɛ wɑɑtʋ wei Ɩsɔ kɑ́ kɔɔ feŋuɣu nɑ ɩ́ pɔɔsɩ-m tɔ,

wentiɣi mɑɑ cɔ?

15 Mpi tɔ, Ɩsɔ kʋlʋm wei ɩnɩ

ɩ lɑpɑ-m mɑ too lotu tɑɑ tɔ,

ɩnɩ ɩ lɑpǝnɑ pɛlɛ tɔtɔ.

16 Mɑ tɑ pɛ ɑcɑmɑɑ kɛ mpi pɑ nyɩɩlǝɣɩ tɔ.

Pǝyele mɑ tɑ yele nɑ leelu ɩsɛ nyǝŋ.

17 Mɑ tɑ tɔɣɔtɑ mɑ mʋtiyɑ

kɛ mɑ tike nɑ mɑ́ pɛ́ sulɑʋ.

18 Hɑtoo mɑ pǝcɑɑtʋ kɛ mɑ nɑ sulɑʋ tǝ pɩɩwɑ,

ɩsɩɩ yʋlʋ nɑ ɩ cɑɑ.

Mɑ pɑɑsǝɣǝnɑ leelu kɛ too ɩ hɔɔʋ tɛɛ kɛ́.

19 Ye mɑ nɑwɑ nɔɣɔlʋ nɑ ɩ́ cɔɔkɩ,

nɑ ɩ́ fɛɩnɑ wontu,

yɑɑ kʋnyɔntʋ lɑŋɑ kʋtɑkʋɣʋ,

20 mɑ hɑɑkɩ-ɩ mɑ heeŋ hʋntʋ kunti kɛ́,

nɑ ɩ́ tɑkɩ nɑ pǝ́ hɑŋɩ-ɩ nɑ ɩ́ sɛɛ-m.

21 Ye ɩsɩɩ tɔm hʋʋlɑɑ sǝnɑ-m

nɑ mɑ́ nyɑɑsɩ sulɑʋ nɔɣɔlʋ,

22 ɩlɛ pǝ́ kpɛɛsɩ mɑ ŋkpɑlǝŋɑ

kɛ mɑ ɑsǝŋkpeku tɔɔ, nɑ kɑ́ pɛlɩ mɑ ŋkuluŋɑ tɑɑ.

23 Mpi tɔ, mɑ nyɑŋnɑ Ɩsɔ mpusi kɛ́,

mɑɑ pǝsǝɣɩ nɑ mɑ sǝŋ.

Mɑ fɛɩnɑ mɑ tǝɣɩ Ɩsɔ sɔsɔɔntʋ kiŋ.

24 Mɑ tɑ tʋ mɑ nɑɑni kɛ wʋlɑ tɔɔ.

Pǝyele mɑ tɑ pɛtɩ mɑ tǝɣɩ liɣitee nyǝɣǝlʋɣʋ.

25 Pǝ tɑɣɑ mɑ wɛnɑʋ sɔsɔɔm

yɑɑ mpi mɑ hikɑɑ tɔɣɔ mɑ tʋ nɑɑni.

26 Ye mɑ nɑwɑ ilim nɑ pǝ nyɑɑlǝm teu,

nɑ mɑ́ nyǝnɩ ɩsɔtʋ, nɑ ɩ́lɛ́ ɩ tɛɛkǝnɑ ɩ cɑŋǝm.

27 Pǝ́ puɣusi-m mɑ lotu tɑɑ

nɑ mɑ́ nyǝnɩ-wɛ, ɩsɩɩ Ɩsɔ, yɑɑ mɑ́ sɛɛ-wɛ.

28 Ye mɑ lɑpɑ mpʋ, pǝ kɛ́ ɩsɑɣɑtʋ sɔsɔɔntʋ kɛ́,

pǝ mʋnɑ hʋʋlɑɑ ɩ́ tʋ-m sɑlǝkɑ.

Mpi tɔ, mɑ lɩɩ Ɩsɔ wɑɑlǝɣɩ.

29 Mɑ lɑŋlɛ tɑ hɛɛnɑ mɑ kolontu wɑhɑlɑ.

Pǝyele mɑ tɑ ŋmɑɑlǝnɑ ɩ kʋnyɔntɔɣɔlɛ nte tǝ mɑɣɑnɑ-ɩ tɔ.

30 Mɑ tɑ tisi sɩ mɑ nsǝmlɛ ɩ́ sǝlǝmɩ

mɑ kolontu ɩnɩ ɩ sǝm nɑ tǝ́ pǝntɩ.

31 Mɑ tǝyɑɣɑ nyǝ́mɑ yɔɣɔtǝɣɩ sɩ

nɔɣɔlʋ fɛɩ wei ɩ tɑ tɔɣɔ mɑ tɛɣɛ nɑntʋ nɑ ɩ́ nyǝɣǝsɩ tɔ.

32 Mʋʋlʋ ɩɩ hǝntǝɣɩ ɑwɑlɩ kɛ́ mɑ tɛ.

Mɑ tʋlǝɣɩ mɑ nɔnɔɣɔ kɛ mpɑtɔntʋ kɛ́.

33 Mɑ tɑ ŋmɛsɩ mɑ kɑwɑlɑɣɑ, ɩsɩɩ lɛlɑɑ lɑkʋɣʋ tɔ.

Yɑɑ mɑ́ kisi mɑ tɑsǝkǝlɛ tisuɣu.

34 Mɑ tɑ nyɑnɑ sɑmɑɑ, yɑɑ yǝlɑɑ kʋtʋɣʋ

nɑ mɑ́ su nɑ mɑ́ yele nɔnɔɣɔ kɛ tǝŋnɑʋ.

35 Hɑɩ, ɑwe hikiɣi-m wei ɩ kɑ́ nɩɩnɑ-m tɔ?

Mɑ kɑntǝkɑɣɑ kʋyɔɣɔtʋtʋ ntɔ.

Tomɑ tǝnɑ tʋ ɩ́ cɔ-m nɑ ɩ́ hʋlɩ-m nti

mɑ kolontu ŋmɑɑwɑ mɑ tɔɔ tɔ.

36 Mɑɑ te mɑ nyʋɣʋ kɛ mɑ kolontu kʋŋmɑŋmɑɑtʋ ntǝɣɩ,

ɩsɩɩ ntenuɣu, nɑ mɑ́ lɑɣɑlɩ-tǝɣɩ mɑ ɑsǝŋkpekiŋ tɔɔ.

37 Mɑɑ heeli Ɩsɔ kɛ́ mɑ kʋlɑpǝlɛ tǝnɑ tɔm

nɑ mɑ́ polo ɩ kiŋ tǝkɑɑ, ɩsɩɩ ɑwulumpu.

38 Ye mɑ tɑɑlɛ wiiki sɩ pǝ́ lɛɛtɩ-m

nɑ tǝ tɑɑ ɑwɑsɑ pǝlǝɣɩ ɩsǝlʋm.

39 Ye mɑ tɔɣɔ ɑ kʋlʋlʋm kɛ fɑɑlɑɑ,

nɑ mɑ́ muɣuli ɑ nyǝ́mɑ kʋpǝmɑ.

40 Ɩlɛ mɑ kʋtutuum ɩ́ yele nyɔʋ,

nɑ sɔwɑ nɑ nyɩɩtʋ ɩsɑɣɑtʋ lɛɛtɩ.

Soopu kʋyɔɣɔtʋtʋ tǝnɑɣɑ ntɔ.