2 Soopu, sǝŋ pǝcɔ nɑ mɑ́ sɛɣɛsɩ-ŋ.

Mpi tɔ, mɑ tɑ yɔɣɔtɩ Ɩsɔ nyǝntʋ tǝnɑ.

3 Hɑtoo pooluŋ kɛ mɑɑ hiki mɑ nyǝm

mpi mɑɑ hɑnɑ mɑ ŋmɑlʋ kɛ tɑmpɑnɑ tɔ.

4 Tɑmpɑnɑ mɑ kʋyɔɣɔtʋtʋ tɑɑ fɛɩ pɔpɔtʋ.

Mɑ wei mɑ yɔɣɔtǝɣǝnɑ-ŋ ɩsǝntɔ tɔ,

mɑ wɛnɑ nɑɑni kɛ́ mɑ nyǝmtʋ tɔɔ kɛ́.

5 Ɩsɔ kɛ́ pǝsǝlʋ kɛ́, ɩlɛ ɩɩ lɔɔkɩ tɑmpɑnɑ tǝŋlʋ.

Ɩ lɑɣɑtʋ tomɑ tɔɔ kɛ́ ɩ wɛnɑ pǝsʋɣʋ ŋkʋ.

6 Ɩɩ yeki ɩsɑɣɑʋ nɑ ɩ weesuɣu.

Amɑ ɩ siɣisiɣi kʋnyɔntʋnɑɑ tɔm.

7 Ɩɩ yeki siɣisilɑɑ kɛ́ nyǝnʋɣʋ.

Hɑlɩ ɩ cɑɣɑsǝɣɩ-wɛɣɛ ɑwulɑɑ kumlee tɔɔ kɛ́,

nɑ ɩ́ kʋsǝɣɩ pɑ nyɔɔŋ kɛ tɑm tɔɔ.

8 Ɩsɔ tʋɣɩ ɑsɑɣɑɑ kɛ ɑlukpɑlɑ kɛ́ nɑ wɑhɑlɑ tɔkɩ-wɛ.

9 Ɩ hʋlǝɣɩ-wɛɣɛ pɑ tǝmɑ, nɑ pɑ kɑwɑlɑɣɑ.

Kɛ wɑɑtʋ wei pɑ lɑkɩ kɑlɑmpɑɑnɩ tɔ.

10 Isɔ yeki nɑ pɑ́ nɩɩkɩ kʋkpɑɑlǝtʋ

kɛ pɑ ŋkpɑŋŋ tɑɑ, nɑ ɩ́ tʋɣɩ-wɛ sɩ

pɑ́ cɔlɔ mpi pǝ tɑ́ siɣisi tɔ.

11 Ye pɑ kemɑ ŋkpɑŋŋ nɑ pɑ́ pɛtɩ pɑ tǝɣɩ

Ɩsɔ, ɩlɛ pǝ cɑɣɑnɑ-wɛ nɑ pɑ́ nɩɩ leleŋ kɛ

pɑ weesuɣu kʋyɛɛŋ nɑ pǝ pɩɩsɩ tɑɑ.

12 Ye pɑ kisɑ nɩɩʋ,

ɩlɛ ŋmɑntɑɑɣɑ sɔ-wɛ nɑ pɑ́ sɩ́ pɑ nyǝm lɑŋʋɣʋ tɔɔ.

13 Yǝlɑɑ ɑsɑɣɑɑ hɑ pɑ tǝɣɩ pɑ́ɑ́nɑ́ tɑɑ kɛ́.

Pɑɑ wiikinɑ Ɩsɔ sɩ ɩ́ wɑɑsɩ-wɛɣɛ

sɑɑ wei ɩ tʋɣɩ-wɛɣɛ ɑlukpɑlɑ tɔ.

14 Pɑ sǝkǝnɑ pɑ ɩfepile

nɑ pǝ́ sɔɔsǝɣɩ-wɛɣɛ wɑsɑŋkɑlǝnɑɑ*fɑ* tɔɔ. ɑwɑsɑŋkɑlǝnɑɑ: Wɑsɑŋkɑlǝtʋ nti tǝ tɛlǝsɑ cǝnɛ tɔ. Hepǝlɑ tɑɑ ɩlɛ pǝ kɛ́ ɑpɑlɑɑ nɑ ɑlɑɑ mpɑ pɑ lɑɑkɩ tɩɩŋ nɑ pɑ lɑkɩ pǝ wɑsɑŋkɑlǝtʋ tɔɣɔ.

15 Amɑ Ɩsɔ yɑkɩ wɑhɑlɑ tʋ, nɑ ɩ wɑhɑlɑ kɛ́,

ɩlɛnɑ ɩ́ kpɑɑlɩ-ɩ nɑ ɩ wʋsɑsɩ.

16 Wɑɑtʋ nɔɣɔlʋ Ɩsɔ kɑ lǝsɑ-ŋ wɑhɑlɑ tɑɑ kɛ́,

nɑ ɩ́ sɩɩ-ŋ timpi pɩɩ cɑɣɑnɑ-ŋ nɑ ń wɛɛ nyɑ́ tɩ tɔɔ

nɑ ń tɔkɩ tɔɣɔnɑsɩ kʋpɑmpɑnsɩ tɔ.

17 Amɑ ye n hʋʋkɩ nyɑ́ hʋʋlɛ ɩsɩɩ ɑsɑɣɑɑ nyǝntɛ,

ɩlɛ hʋʋlɛ nɑ pǝ ŋkpɑŋʋɣʋ hɔm kɑ́ kpɑ-ŋ kɛ́.

18 Tɑɑ yele nɑ pɑ́ɑ́nɑ́ sʋsɩ-ŋ Ɩsɔ woŋɑ tɑɑ,

nɑ ń puɣusi nyɑ́ tɩ sɩ n kɑ́ yɑ Ɩsɔ nɑ kʋhɑʋ sɔsɔɔʋ.

19 Nyɑ́ kɑkiisɑɣɑ, yɑɑ pɑɑ nyɑ́ toŋ sɔsɔɔŋ

tɑ tɑlɑ sɩ pǝ́ lǝsɩ-ŋ lɑŋwɑkǝllɛ tɑɑ.

20 Tɑɑ ŋmɑkǝlɩ mʋʋlɑɑ nɑ ń lɛɛtɩ

pɑ lonɑ tɑɑ kɛ́ nyɑ́ lʋlʋɣʋ nyǝ́mɑ.

21 Lɑ lɑɑkɑlɩ, tɑɑ kɛɛsǝnɑ ɩsɑɣɑtʋ tɔɔ.

Pǝ mɑɣɑmɑɣɑ pǝ tɔɔ kɛ́ n wɛ wɑhɑlɑ tɑɑ.

22 Ɩsɔ hʋlǝɣɩ ɩ sɔsɔɔntʋ nɑ ɩ toŋ tɑɑ kɛ́.

Nɔɣɔlʋ tɑ nyɩ sɛɣɛsʋɣʋ ɩsɩɩ ɩnɩ.

23 Awe hʋlǝnɑ-ɩ mpɑɑʋ ŋku ɩ kɑ tǝŋ tɔ,

nɑ ɑwe kɑ́ mɑnɑ ɩ lɑŋlɛ tɑɑ,

nɑ ɩ́ heeli-ɩ sɩ: N lɑpɑ mpi pǝ tɑ́ siɣisi tɔ?

24 Tɔɔsɩ nɑ ń sɑ ɩ tǝmɑ nnɑ yǝlɑɑ sɑŋ

pɑ yontunɑɑ tɑɑ, nɑ pɑ́ pʋɣʋlǝɣɩ-yɛ tɔ.

25 Yǝlɑɑ tǝnɑ loosiɣi-yɛɣɛ pooluŋ kɛ́

nɑ pɑ́ nyǝnǝɣɩ-yɛɣɛ teu.

26 Ɩsɔ tɔɔwɑ kɑtɑtǝlɑɣɑ kɛ́

nɑ pǝ́ tɛɛ tɑ nyǝmtʋ tɔɔ.

Ɩ pɩɩsɩ fɛɩ kɑlʋɣʋ.

27 Ɩnɩ ɩ cosiɣinɑ lʋm nɑ ɩ́ yele

nɑ heelim nyɔɔ-wɩ,

nɑ ɩ́ pǝsɩ-wǝɣɩ tɛʋ.

28 Ɩlɛnɑ ɩsɔŋmʋntʋ nɑ́ɑ́ yele nɑ tɛʋ nɩɩ yǝlɑɑ tɔɔ.

29 Awe nyǝŋnɑ ɩsɔŋmʋntʋ tɔntɛ,

nɑ tɛʋ holɑ kɛ ɩsɔtɔnʋɣʋ tɑɑ?

30 Ɩnɩ ɩ kɛɛlǝɣǝnɑ ɩ nyɑɑlǝm tɔɔ

nɑ pǝ́ nɑ́ nɑ pǝ́ cɔɔnɑ-ɩ.

Ɩlɛnɑ ɩ́ tɑɣɑnɩ tɑkʋɣʋ kɛ teŋkunɑɑ lumɑŋ tɔɔ.

31 Yɑɑsinɑɑ mpɛɣɛ ɩ hʋʋkǝnɑ yǝlɑɑ

nɑ ɩ́ cɛlǝɣɩ-wɛɣɛ tɔɣɔnɑɣɑ kɛ tuutuumɑ.

32 Ɩ kpɑkǝɣɩ tɛʋ cɑlɑ kɛ ɩ niŋ tɑɑ kɛ́,

nɑ ɩ́ lɔɣɔ-ɩ timpi ɩ cɑɑkɩ tɔ.

33 Tɛʋ holɑ kɛ ɩ hʋlǝɣǝnɑ sɩ kʋ kɔŋ,

nɑ kɑlǝkǝŋ mɑɣɑmɑɣɑ nɩɩkɩ kʋ tɑŋ.