2
Ɩlim tǝlɩɩlɛ nyǝntɑɑ kɔmɑ Yesu nɑʋ
1 Pɑ lʋlɑ Yesu kɛ́ Yutɑ Pɛtǝlɛhɛm tɑɑ kɛ́ wulɑʋ sɔsɔ Helɔtɩ pɔɔlɛ tɑɑ. Ḿpʋ́ɣʋ́ ɩsɔtʋlʋŋɑsɩ tɔm nyǝntɑɑ nɑpǝlɩ pɑ lɩɩnɑ ilim tǝlɩɩlɛ nɑ pɑ́ tɑlɑ Yosɑlɛm. 2 Nɑ pɑ́ pɔɔsɩ sɩ: Leɣe pǝyɑɣɑ ŋkɑ pɑ lʋlɑ nɔɔnɔɔ nɑ kɑ́ɑ́ lɑ Yutɑ nyǝ́mɑ wulɑʋ sɔsɔ tɔ kɑ wɛɛ? Tǝ nɑ kɑ ɩsɔtʋlʋŋɑ lɩɩ ilim tǝlɩɩlɛ kɛ́ nɑ tǝ́ kɔɔ sɩ tǝ sɛɛ-kɛ.
3 Wulɑʋ Helɔtɩ nɩɩ mpʋ, ɩlɛnɑ pǝ́ pɛkǝlɩ-ɩ sɔsɔm. Pǝ pɛkǝlɑ Yosɑlɛm nyǝ́mɑ tǝnɑɣɑ mpʋ tɔtɔ. 4 Ɩlɛnɑ ɩ́ koti kɔtǝlɑɑ sɔsɑɑ tǝnɑ, nɑ Ɩsɔ Tɔm sɛɣɛsǝlɑɑ nɑ ɩ́ pɔɔsɩ-wɛɣɛ timpi pǝ wɛɛ sɩ pɑɑ lʋlɩ Mesii tɔ. 5 Ḿpʋ́ɣʋ́ pɑ cɔ-ɩ sɩ, Yutɑ Pɛtǝlɛhɛm kɛ́. Mpi tɔ, Ɩsɔ kʋyɔɣɔtʋtʋ tɛlǝsǝlɑɑ ŋmɑɑwɑ sɩ:
6 Yutɑ tɑɑ Pɛtǝlɛhɛm nyɑ́,
tɑmpɑnɑ n tɑ kɛ Yutɑ ɑcɑlɛɛ sɔsɔɔnɑ tɑɑ sǝkpete pɑɑ pǝcɔ.
Mpi tɔ, nyɑ́ tɑɑ kɛ́ wulɑʋ kɑ́ lɩɩnɑ,
wei ɩ kɑ́ tɔkɩ mɑ Ɩsɛɣɛlɩ nyǝ́mɑ kɛ teu tɔ.
7 Tǝnɑɣɑ Helɔtɩ yɑɑ nyǝntɑɑ mpɛɣɛ kpeeŋɑ nɑ ɩ́ pɔɔsɩ-wɛɣɛ pǝ tǝnɑ sɩ ɩ nyǝŋ wɑɑtʋ wei mɑɣɑmɑɣɑ ɩsɔtʋlʋŋɑ lɩɩwɑ tɔ. 8 Ḿpʋ́ɣʋ́ ɩ hʋlɑ-wɛɣɛ Pɛtǝlɛhɛm mpɑɑʋ nɑ ɩ́ heeli-wɛ sɩ: Ɩ́ polo nɑ ɩ́ pɛɛkɩ pǝyɑɣɑ ŋkɛɣɛ teu. Wɑɑtʋ wei ɩ́ nɑ-kɛ ɩ́ heeli-m nɑ mɑ mɑɣɑmɑɣɑ mɑ́ polo nɑ mɑ́ sɛɛ-kɛ.
9 Nyǝntɑɑ tɛmɑ wulɑʋ tɔm ntǝɣɩ nɩɩʋ ɩlɛnɑ pɑ́ tɛɛ. Nɑ ɩsɔtʋlʋŋɑ ŋkɑ kɑɑ lɩɩwɑ ilim tǝlɩɩlɛ nɑ pɑ́ nɑ-kɛɣɛ mpʋ tɔ kɑ tɔŋɑɣɑ pɑ nɔɣɔ tɔɔ, hɑlǝnɑ kɑ́ tɑlɑ timpi pǝyɑɣɑ ŋkɛ kɑ wɛɛ tɔ, ɩlɛnɑ kɑ́ sǝŋ. 10 Nyǝntɑɑ loosɑ ɩsɔtʋlʋŋɑ ŋkɛ, ɩlɛnɑ pɑ lɑŋɑ hʋlʋmɩ pǝ tɩɩ fɛɩ. 11 Ḿpʋ́ɣʋ́ pɑ sʋʋ tǝyɑɣɑ tɑɑ nɑ pɑ́ nɑ́ pǝyɑɣɑ nɑ kɑ too Mɑlɩ. Ɩlɛnɑ pɑ́ hǝntɩ ɑtɛ nɑ pɑ́ sɛɛ-kɛ. Nɑ pɑ́ hɛtɩ pɑ wontu nɑ pɑ́ hɑ-kɛɣɛ wʋlɑ nɑ tulɑɑlʋ kʋfǝɣǝtʋ nɑ tulɑɑlʋ miili. 12 Pǝ wɑɑlɩ kɛ́ Ɩsɔ heelɑ nyǝntɑɑ mpɛɣɛ toosee tɑɑ sɩ pɑ́ tɑɑ mǝlɩ Helɔtɩ cɔlɔ. Ɩlɛnɑ pɑ́ cɔlɔ mpɑɑʋ nɑ pɑ́ kpe.
Yesu seenɑʋ
13 Nyǝntɑɑ tɛɛwɑ ɩlɛnɑ Tɑcɑɑ ɩsɔtɑɑ tillu nɔɣɔlʋ ɩ́ kɔɔ Yosɛɛfʋ kiŋ kɛ toosee tɑɑ nɑ ɩ́ heeli-ɩ sɩ: Kʋlɩ nɑ ń kpɑɣɑ pǝyɑɣɑ nɑ kɑ too, nɑ ń se nɑ ń polo Icipiti, nɑ ń cɑɣɑ tǝnɑ. Hɑlǝnɑ wɑɑtʋ wei mɑɑ heeli-ŋ sɩ ń mǝlɩ tɔ. Pǝ tɑɣɑ pʋlʋ, Helɔtɩ kɑ́ pɛɛkɩ pǝyɑɣɑ ŋkɛ sɩ ɩ kʋɣʋ-kɛ.
14 Tǝnɑɣɑ Yosɛɛfʋ kʋlɑɑ nɑ ɩ́ kpɑɣɑ pǝyɑɣɑ nɑ kɑ too, nɑ pɑ́ tɛɛ Icipiti kɛ ɑhoo ɑnɩ. 15 Ḿpʋ́ɣʋ́ ɩ cɑɣɑ tǝnɑ hɑlǝnɑ Helɔtɩ sɩ. Ɩlɛnɑ pǝ́ lɑ nti Tɑcɑɑ kɑ yɔɣɔtǝnɑ Ɩsɔ kʋyɔɣɔtʋtʋ tɛlǝsʋlʋ nɔɣɔ tɔ sɩ: Mɑ lǝsɑ mɑ pǝyɑɣɑ kɛ Icipiti.
Piyɑ sɑkɑsɑkɑ lɑpʋ
16 Helɔtɩ nɑwɑ sɩ nyǝntɑɑ puɣusɑ-ɩ, ɩlɛnɑ pǝ́ sɑlɩ-ɩ sɔsɔm. Ḿpʋ́ɣʋ́ ɩ tilɑɑ sɩ pɑ́ kʋ Pɛtǝlɛhɛm ɩcɑtɛ nɑ ɑcɑlɛɛ nnɑ ɑ cɔɔnɑ-tɛ tɔ pǝ ɑpɑlʋpiyɑ tǝnɑ. Hɑlǝnɑ nsi sɩ pɩɩsɩ tɑlɑ nɑɑlɛ nɑɑlɛ tɔ, nɑ ɩ́ kɛɛsǝnɑ sɑɑ wei nyǝntɑɑ heelɑ-ɩ sɩ ɩsɔtʋlʋŋɑ lɩɩwɑ tɔ. 17 Ḿpʋ́ɣʋ́ pǝ lɑpɑ ɩsɩɩ Ɩsɔ kʋyɔɣɔtʋtʋ tɛlǝsʋlʋ Selemii kɑ kpɑɑlɑɑ tɔ sɩ:
18 Pɑ nɩɩwɑ kɑpukɑ kɛ Lɑmɑ.
Wulɑ nɑ lɑŋwɑkǝllɛ sɔsɔɔlɛ mɔlɑ.
Lɑsɛɛlɩ wiinɑ ḿpʋ́ɣʋ́ ɩ piyɑ.
Ɩ tɑ tisi sɩ pɑ́ puɣusi-ɩ kɛ́ sɩ fɛɩ tɔ pǝ tɔɔ.
Yosɛɛfʋ pɑ lɩɩʋ kɛ Icipiti
19 Helɔtɩ sǝm wɑɑlɩ Tɑcɑɑ ɩsɔtɑɑ tillu nɔɣɔlʋ kɔmɑ Yosɛɛfʋ kiŋ kɛ toosee tɑɑ kɛ Icipiti, 20 nɑ ɩ́ heeli-ɩ sɩ: Kʋlɩ nɑ ń kpɑɣɑ pǝyɑɣɑ ŋkɛ nɑ kɑ too nɑ ɩ́ mǝlɩ Ɩsɛɣɛlɩ tɛtʋ tɑɑ. Mpɑ pɑ pɛɛkɑɣɑ sɩ pɑ́ kʋ pǝyɑɣɑ ŋkɛ tɔ pɑ sǝpɑ.
21 Tǝnɑɣɑ Yosɛɛfʋ kʋlɑɑ nɑ ɩ́ kpɑɣɑ pǝyɑɣɑ nɑ kɑ too nɑ pɑ́ mǝlɩ Ɩsɛɣɛlɩ tɛtʋ tɑɑ. 22 Amɑ Yosɛɛfʋ nɩɩwɑ sɩ Aɑselɑyusi tɔɣɔ kɑwulɑɣɑ kɛ Yutɑ kɛ ɩ cɑɑ Helɔtɩ lonte. Ɩlɛnɑ sɔɣɔntʋ kpɑ-ɩ nɑ tɛtʋ ntɩ tǝ tɑɑ pote. Ɩsɔ tɑsɑ-ɩ ḿpʋ́ɣʋ́ hʋlʋɣʋ kɛ ɩ toosee tɑɑ, ɩlɛnɑ ɩ́ lɔɣɔ ɩ tǝɣɩ Kɑlilee tɛtʋ tɑɑ, 23 nɑ ɩ́ cɑɣɑ ɩcɑtɛ nte pɑ yɑɑ sɩ Nɑsɑlɛtɩ tɔ tǝ tɑɑ. Ḿpʋ́ɣʋ́ pǝ lɑpɑ ɩsɩɩ Ɩsɔ kʋyɔɣɔtʋtʋ tɛlǝsǝlɑɑ kɑ yɔɣɔtɑɑ tɔ sɩ: Pɑɑ yɑɑ-ɩ sɩ Nɑsɑlɛtɩ tʋ.