6
Lɛlʋ kəmɑ cɔlʋɣʋ
1 Mɑ pəyɑlʋ, ye n mʋwɑ nyɑ́ tɔɣɔntəlɛ kəmlɛ, yɑɑ n səŋɑ nɔɣɔlʋ wɑɑlɩ kɛ́ pə tɔm tɑɑ. 2 Ye nyɑ́ kʋyɔɣɔtʋtʋ hɔkɑ-ŋ pə tɔm tɑɑ, yɑɑ nyɑ́ nɔɣɔ tɑɑ tɔm kpɑ-ŋ ɩsɩɩ kɑtɔkɑ. 3 Pə tɔɔ tɔ, mɑ pəyɑlʋ ləsɩ nyɑ́ təɣɩ pə tɑɑ. Mpi tɔ, n hotɑ nyɑ́ tɔɣɔntəlɛ niŋ tɑɑ kɛ́. Polo nɑ ń həntɩ-ɩ ɑtɛ nɑ ń wiinɑ-ɩ. 4 Tɑɑ too pə tom, yɑɑ ń tɩɩ kpəpʋ ɩsəlɛ. 5 Hɑlənɑ ń fiti ɩsɩɩ nɑm fituɣuu tɔtɔlʋ niŋ tɑɑ tɔ. Yɑɑ ɩsɩɩ sumɑɣɑ lɩɩkʋɣʋ kɑ kpɑlʋ niŋ tɑɑ tɔ.
Felentú cɔlʋɣʋ
6 Felentú nyɑ́, polo nɑ ń nyənɩ tɔɔlʋ kʋlɑpəlɛ nɑ ń wɛɛnɑ ləmɑɣɑsɛɛ. 7 Tɔɔlʋ fɛɩnɑ feŋlu yɑɑ nyʋɣʋ tʋ yɑɑ cɑɑ. 8 Pɑɑ nɑ mpʋ tɔ ɩ cɑləsəɣɩ tɔɣɔnɑɣɑ kɛ kʋmtʋ wɑɑtʋ nɑ ɩ́ nyəkəɣɩ. 9 Felentú nyɑ́, pəlee kɛ́ n kɑ́ nyəɣəsɩ həntʋɣʋ nɑ tom? 10 Nyɑ́ sɩ n kɑ́ tɔ́ɔ́lɩ nyɑ́ tɩ, nɑ ń tʋ nyɑ́ niŋ kɛ nyɑ́ nyʋɣʋ nɑ ń too pəcɔ nɑ ń hɛɛsɩ. 11 Wɑɑtʋ ɩnɩ kʋnyɔŋ kɑ́ tɑ-ŋ mɛlɛmɛlɛ, nɑ wɑhɑlɑ tutu-ŋ ɩsɩɩ yoolu nɑ ɩ wontu.
Mənɑɑfiki cɔlʋɣʋ
12 Yʋlʋ tɛtɛlɑtʋ ɩɩ təŋəɣɩ tɑmpɑnɑ. Ɩ tɔŋ kɛ́ nɑ ɩ nɔɣɔ tɑɑ nɑ kɑloolɑɣɑ. 13 Ɩsɛ kɛ ɩ cəpələɣɩ yəlɑɑ, nɑ ɩ́ yɔɣɔtəɣənɑ-wɛ nɑ ɩ nɔɔhɛɛ, nɑ ɩ́ hɑtəɣɩ-wɛ nɑ ɩ mpee. 14 Ɩsɑɣɑtʋ wɛnnɑ ɩ tɑɑ, nɑ ɩ́ mɑɣɑsəɣɩ kɑwɑlɑɣɑ tɔm kɛ tɑm, nɑ ɩ́ tilisiɣi yooŋ. 15 Pə tɔɔ kɛ́ wɑkəlʋɣʋ kɑ́ tuti-ɩ, nɑ pə́ wɑkəlɩ-ɩ tɔm kʋlʋm tɔɔ ɩ kɑɑ wɛɛ hiiu.
Yəlɑɑ mpɑ Ɩsɔ luɣu fɛɩ tɔ
16-19 Yəlɑɑ loosi nɑɑtoso kɛ Tɑcɑɑ tɑɑ kpɑɑkənɑ. Mpɛɣɛlɛ:
Ɩsətoosile nyə́mɑ, nɑ puɣusilɑɑ,
nɑ mpɑ pɑ kʋɣɩ yəlɑɑ kɛ mʋsʋŋ tɔ,
nɑ mpɑ pɑ mɑɣɑsəɣɩ pɑ lotu tɑɑ kɛ́ nti tə fɛɩ teu tɔ,
nɑ ɩsɑɣɑtʋ wɑɑlɩ təŋlɑɑ, nɑ pɔpɔtʋ ɑseetɑ nyə́mɑ.
Amɑ pə kɑɑsɑ nɑɑtosompɔɣɔlɑɣɑ nyə́mɑ.
Pɛlɛɣɛlɛ cewɑɑ yoosilɑɑ.
Wɑsɑŋkɑlətʋ cɔlʋɣʋ
20 Mɑ pəyɑlʋ tɔ́kɩ nyɑ́ cɑɑ kʋsəsɩɩtʋ. Tɑɑ lɔ nyɑ́ too kʋsɛɣɛsətʋ. 21 Sɩɩ-təɣɩ nyɑ́ lotu tɑɑ kɛ́ tɑm tɔɔ. Tʋ-təɣɩ nyɑ́ luɣu tɛɛ ɩsɩɩ kɑcɔkɑ wontuɣu. 22 Tɩɩ tiiki-ŋ nyɑ́ tɔntɛ tɑɑ, nɑ tə́ kenti-ŋ nyɑ́ təhəntəlɛ tɑɑ, nɑ tə́ yɔɣɔtənɑ-ŋ wɑɑtʋ wei n feŋ tɔ. 23 Mpi tɔ, kʋsəsɩɩtʋ wɛ kɛ́ ɩsɩɩ fətəlɑ. Nɑ sɛɣɛsʋɣʋ nɑ́ɑ́ wɛɛ ɩsɩɩ nyɑɑləm, nɑ kʋkpɑɑlətʋ nɑ́ɑ́ kɛ́ weesuɣu mpɑɑʋ. 24 Tɩɩ kisinɑ-ŋ ɑlʋ ɩsɑɣɑʋ, wei ɩ kɛ́ nɔɔleleŋ tʋ tɔ. 25 Tɑɑ nyɩɩlɩ ɑlʋ ɩnɩ ɩ teu kɛ nyɑ́ lotu tɑɑ. Pəyele tɑɑ yele nɑ ɩ ɩsihutu teu hɔ-ŋ. 26 Pə tɑɣɑ pʋlʋ, ye ɑpɑlɑɑ tənɑ ɑlʋ, tɔɣɔnɑɣɑ pəcɔ tike kɛ yʋlʋ lɔɔkɩ ɩ́lɛ́ ɩ tɔɔ. Amɑ ɑlʋ wei ɩ wɛnɑ pɑɑlʋ tɔ, yʋlʋ kʋpɑŋ kɛ ɩ nyəkɩ kɑtɔkɑ. 27 Yʋlʋ kɑ́ tʋ́ mɑmɑtɛ kɛ ɩ tɔɔ nɑ ɩ wontu yele nyɑɣɑʋ nɑ? 28 Yɑɑ ɩ kɑ́ tɔ mɑmɑlɑ tɔɔ nɑ pə tɑ́ nyɑɣɑ ɩ nɔntɑɑləŋ? 29 Mpʋ tɔtɔɣɔ pə wɛɛ nɑ wei ɩ puki ɩ tɔɣɔntəlɛ ɑlʋ kiŋ tɔ. Wei ɩ́ tokinɑ ɑlʋ ɩnɩ, ɩ kɑ́ nɑ́ pə nɑʋ. 30 Pɑɑ tʋɣɩ tɑnɑɑʋ nɑ nyɔɣɔtʋ wei ɩ ŋmɩɩlɑɑ sɩ ɩ tɔkɩ tɔ. 31 Pənɑ pə mpʋ tɔ, ye pɑ kpɑ-ɩ ɩ kɑ́ fɛlɩ pə tɔm nɑɑtosompɔɣɔlɑɣɑ. Hɑlənɑ ɩ́ cɛlɑ ɩ wɛnɑʋ tənɑ. 32 Yʋlʋ wei ɩ fɛɩnɑ nyʋɣʋ tɔ, ɩnɩ ɩ lɑkənɑ wɑsɑŋkɑlətʋ, nɑ ɑlʋ wei ɩ pɛɛkəɣɩ ɩ tɩ nɑ ɑsɑɑlɑ tɔ, ɩnɩ ɩ lɑkənɑ mpʋ. 33 Kɑtɑɑsɩ nɑ kʋtʋɣʋ kɛ ɩ tɛŋnɑ, ɩ fɛɛlɛ kɑɑ tɛ́. 34 Mpi tɔ, ɩsəsɛɛmlɛ kɑ́ kʋsɩ ɩ pɑɑlʋ pɑ́ɑ́nɑ́. Ɩ kɑɑ wɛɛnɑ pətɔɔtəlɛ kɛ lɛɛtʋɣʋ kʋyɑkʋ wule. 35 Ɩ kɑɑ tɛɛlɩ sɩ pɑ́ fɛlɩ-ɩ pʋlʋ, nɑ pɑɑ kʋcɔɔŋ kɛ pɑɑ kɑɑ-ɩ ɩ kɑɑ tisi.