1 Sɑlʋmɔŋ ɑtuwɑ lɛnnɑ nnɑ Yutɑ wulɑʋ Ɩsekiyɑsɩ yəlɑɑ kpeɣelɑɑ tɔɣɔlɔ.

2 Mpi pə tʋɣɩ Ɩsɔ kɛ́ teeli tɔɣɔlɛ timpi ɩ lɑkɩ ɩŋmɛsɑʋ tɔ, nɑ mpi pə tʋɣɩ ɑwulɑɑ kɛ teeli tɔɣɔlɛ timpi pɑ pɛɛkəɣɩ sɩ, pɑ́ cɛkənɑ kʋŋmɛsəm tɔ.

3 Ɩsɩɩ ɩsɔtɔnʋɣʋ kʋlɑɑ nɑ tɛtʋ lim tɔ, ḿpʋ́ɣʋ́ ɑwulɑɑ ləmɑɣɑsɛɛ wɛɛ.

4 Ye pɑ tɑɣɑnɑ liɣitee nyəɣəlʋɣʋ, koolu luki-kʋɣʋ pʋlʋ kʋpɑm kɛ́. 5 Mpʋ tɔtɔɣɔ ye pɑ tɔɣɔnɑ yəlɑɑ ɑsɑɣɑɑ mpɑ pɑ wɛ wulɑʋ kiŋ tɔ, ɩ təŋəɣɩ siɣisuɣu kɛ́ nɑ ɩ kɑwulɑɣɑ yóo toŋ.

6 Tɑɑ hɔ nyɑ́ təɣɩ wulɑʋ kiŋ. Pəyele tɑɑ cɑɣɑ sɔsɔ nɔɣɔlʋ ɩ təcɑɣɑlɛ. 7 Pə kəlɑ teu sɩ pɑ́ kpɑɑsɩ-ŋ təmlɛ sɔsɔɔlɛ tɑɑ, nɑ mpi pɑɑ tisi-ŋ nɑ sɔsɔ nɔɣɔlʋ ɩ́ cɑɣɑ tɔ.

8 Tɑɑ hulinɑ nyɑ́ tɔɣɔntəlɛ kɛ nɔnɔɣɔ yɑɑʋ. Pə́ tɑɑ kɔɔ nɑ ɩ́lɛ́ ɩ́ kʋlɩ nyɑ́ tɔɔ, ɩlɛ ɩsənɑɣɑ n kɑ́ lɑ?

9 Ye nyɑ́ nɑ nɔɣɔlʋ ɩ́ wɛnɑ tɔm, ɩ́ tɑɣɑnɩ-təɣɩ mə́ tɑɑ mə tike. Tɑɑ kuli lɛlʋ kʋheelitʋ kʋŋmɛsətʋ tɔɔ. 10 Ntɑnyɩ ɩ kɑ́ nɩɩ-tɩ nɑ ɩ́ kɑlənɑ-ŋ, nɑ pə́ tʋ-ŋ fɛɛlɛ tɑm nyəntɛ tɑɑ, nɑ pə́ kʋ́ nyɑ́ nyʋɣʋ.

11 Tɔm nti pɑ yɔɣɔtɑ teu tɔ, tə wɛ kɛ́ ɩsɩɩ wʋlɑ wontuɣu ŋku pɑ kɔwɑ liɣitee nyəɣətʋ tɔ.

12 Ye ləmɑɣɑsɛɛ tʋ kɑləɣənɑ yʋlʋ nɑ ɩ́ nɩɩkɩ, pə teu wɛ kɛ́ ɩsɩɩ wʋlɑ kukuule yɑɑ wʋlɑ lɩɩlʋɣʋ.

13 Ɩsənɑ lʋm kʋniɣitim hɛɛsəɣɩ yʋlʋ lɑŋlɛ kɛ hɑŋɑɣɑ wɑɑtʋ tɔ, mpʋ tɔtɔɣɔ tɔm kɔntʋ wei pɑ tʋ nɑɑni tɔ ɩ hɛɛsəɣɩ ɩ sɔsɔ lɑŋlɛ.

14 Wei ɩ kpɑɑləɣɩ kʋhɑʋ tɔm nɑ ɩ́ tɑ́ hɑ-kʋ tɔ, ɩ wɛ ɩsɩɩ tɛʋ piluɣu nɑ heelim yɑsɩ-kʋ tɔɣɔ.

15 Suulu tʋ pəsəɣɩ nɑ ɩ́ lɑɣɑsɩ wulɑʋ hʋwɛɛ. Mpʋ tɔtɔɣɔ tɔm leleŋ nyəntʋ pəsəɣɩ nɑ tə́ yɔkɩ toŋ.

16 Ye n hikɑ tɩɩŋ, tɑɑ suli tɔɣɔʋ, nyɑ́ tɑɑ kɑ́ kpɑ nɑ ń tɔ-ɩ. 17 Tɑɑ puki kʋtɑmsɑ kɛ́ nyɑ́ tɑɑpɑlʋ tɛ́, pə́ tɑɑ kɔɔ nɑ ɩ́ nyəɣəsɩ-ŋ nɑ ɩ tɑɑ kpɑnɑ-ŋ.

18 Wei ɩ́ ləsəɣɩ ɑseetɑ pɔpɔtʋ nyəŋ kɛ ɩ tɔɣɔntəlɛ tɔɔ tɔ, ɩ kʋɣɩ yʋlʋ tɔtɔɣɔ ɩsɩɩ ɑkɑlʋɣʋ yɑɑ lɑɣɑtɛ yɑɑ nyəmlɛ.

19 Sɩ ń lɑ tɛtɛlɑtʋ kɛ nɑɑni kɛ́ lɑŋwɑkəllɛ wule tɔ, pə wɛ ɑsolɑ kɛ́ ɩsɩɩ n tɔkənɑ kete kʋpɛllɛ, yɑɑ n tɔŋ tɑtɛ.

20 Sɩ ń yoo lɑŋwɑkəllɛ tʋ kɛ yontu tɔ, pə wɛ kʋmɛlɛntʋ kɛ́ ɩsɩɩ n lɛɛkʋɣʋ ɩ toko kɛ wɑtʋ wɑɑtʋ, yɑɑ n liisuɣu lɑɑmii kɛ ɩ hiŋ tɑɑ tɔ.

21 Ye nyɔɣɔsɩ ɩ́ kpɑ nyɑ́ kolontu hɑ-ɩ nɑ ɩ́ tɔɣɔ. Yɑɑ lʋkɔtʋ wɛnɑ-ɩ hɑ-ɩ lʋm nɑ ɩ́ nyɔɔ. 22 Pə tɑɣɑ pʋlʋ, n lɑkʋɣʋ mpʋ tɔ, pə wɛ kɛ́ ɩsɩɩ mɑmɑlɑ kɛ n pələɣɩ ɩ nyʋɣʋ tɑɑ. Pə́cɔ́ Tɑcɑɑ kɑ́ lɛɛtɩ-ŋ nyɑ́ kʋpɑntʋ.

23 Ɩsənɑ ilim ntɔɣɔŋ heelim kɔŋnɑ tɛʋ tɔ. Ḿpʋ́ɣʋ́ yɔɣɔtɑɣɑ kɑtɑtəlɑɣɑ kʋsəɣɩ lɛlɑɑ pɑ́ɑ́nɑ́.

24 Pə kəlɑ teu sɩ yʋlʋ ɩ́ həntɩ cokiyɑ tɑɑ, nɑ mpi ɩ́ nɑ ɑlʋ tɔmtʋ pɑɑ kɑɑ nɑŋ tɔ.

25 Ɩsənɑ lʋm kʋniɣitim kʋɣɩ lʋkɔtʋ tɔ, mpʋ tɔtɔɣɔ tɔm kʋpɑntʋ nti tə lɩɩnɑ tɛtʋ pooluŋ tɔ tə wɛɛ. 26 Ɩsənɑ hite lʋm cʋɣʋtəɣɩ nɑ pə́ wɑkəlɩ sɛɛlʋ tɔ, ḿpʋ́ɣʋ́ ɩsɑɣɑʋ wɑkələɣɩ siɣisilu.

27 Pə fɛɩ teu sɩ ń tɔɣɔ tɩɩŋ kɛ sɔsɔm, yɑɑ ń pɛɛkɩ teeli kɛ kɑtɑtəlɑɣɑ.

28 Ɩcɑtɛ nte tə fɛɩnɑ koluŋɑ tɔ, tə wɛ kɛ́ ɩsɩɩ yʋlʋ wei ɩ tɑ nyɩ ɩ tɩ kpɑʋ tɔ.