nɑ tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.

2 Hɑɩ, Tɑcɑɑ mɑɑ sɑ-ŋ nɑ mɑ lotu tənɑ,

nɑ mɑ́ yɔɣɔtɩ nyɑ́ təmɑ kʋpɑmpɑnɑ tənɑ tɔm.

3 Nyɑɣɑ mɑɑ yɔɔlənɑ nɑ lɑŋhʋlʋmlɛ nɑ mɑ́ wiliti,

nɑ mɑ́ yoo ɩsɔtɑɑ Ɩsɔ Sɔsɔ nyɑɣɑ yontu.

4 Mɑ kolontunɑɑ tulɑ tɑpəŋ

nɑ pɑ́ seliɣi nyɑ́ ɩsɛntɑɑ nɑ pɑ́ hotiɣi.

5 N tɑɣɑnɑ mɑ tɔm nɑ ń hɑ-m tɑmpɑnɑ.

Siɣisuɣu kɛ n təŋəɣɩ nɑ ń hʋʋkənɑ nyɑ́ kumte tɔɔ.

6 N hɔŋ piitimnɑɑ mɑ tɑ nyɩ ɩsɔnɑɑ mpɛ pɑ ŋkpɑŋŋ kɛ́,

nɑ ń wɑkələɣɩ ɑsɑɣɑɑ mpɛ,

nɑ ń hɩɩsəɣɩ pɑ həlɑ kɛ tɑm tɔɔ.

7 Pə kpiisɑ-wɛ nɑ pɑ́ lɑ́ yem kɛ́ tɑm tɔɔ,

nɑ pɑ ɑcɑlɛɛ pəsɩ kpɛntəlɑsɩ,

nɔɣɔlʋ ɩɩ tɔɔsəɣɩ ɑ tɔɔ.

8 Amɑ Tɑcɑɑ kɑ tɔɣɔnɑ kɑwulɑɣɑ kɛ tɑm tɔɔ.

Ɩ sɩɩwɑ ɩ hʋʋlɛ kumte.

9 Ɩnɩ ɩ hʋʋkənɑ ɑntulinyɑ yəlɑɑ nɑ siɣisuɣu,

nɑ ɩ́ təŋəɣɩ tɑmpɑnɑ ɩɩ fɑɣɑsəɣɩ piitimnɑɑ.

10 Tɑcɑɑ kentiɣinɑ mpɑ lɛlɑɑ muɣuliɣi tɔ

nɑ pɑ́ cɔɔsəɣɩ ɩ kiŋ kɛ pɑ lɑŋwɑkəllɛ wɑɑtʋnɑɑ.

11 Hɑɩ Tɑcɑɑ, mpɑ pɑ nyəmɑ́ nyɑ́ hətɛ tɔ,

pɑ tʋɣʋ-ŋ nɑɑni kɛ́.

Mpi tɔ, nn lɔɔkɩ mpɑ pɑ pɛɛkəɣɩ-ŋ tɔ.

12 Ɩ́ yoo Tɑcɑɑ wei ɩ kumte wɛ Siyɔŋ tɔɣɔ yontu,

ɩ́ kpɑɑlɩ ɩ kookɑlənɑɑ tɔm kɛ piitimnɑɑ tɑɑ.

13 Mpi tɔ, ɩ kɑ́ lɛɛtɩ yʋlʋkʋlɑɑ,

nɑ ɩ́ tɔɔsɩ wɑhɑlɑ nyə́mɑ tɔɔ,

ɩɩ sɔɔkɩ pɑ wiinɑʋ tɔm.

14 Hɑɩ Tɑcɑɑ, nyənɩ mɑ pətɔɔtəlɛ,

nɑ ń nɑ wɑhɑlɑ wei mɑ kolontunɑɑ tʋɣʋ-m tɔ.

Ləsɩ-m səm nɔɣɔ tɑɑ.

15 Wɑɑtʋ ɩnəɣɩ mɑɑ yoo nyɑ́ sɑmtʋ tənɑɣɑ Siyɔŋ nyə́mɑ tɑɑ.

Nɑ mɑ́ yɔɔlənɑ nyɑ́ wɑɑsʋɣʋ tɔm.

16 Piitimnɑɑ hotɑ pʋʋɣʋ ŋku pɑ hulɑɑ tɔ kʋ tɑɑ kɛ́.

Pɑ puluɣu ŋku pɑ mɑɣɑmɑɣɑ pɑ nyəpɑ tɔ ŋkʋ kʋ kpɑnɑ-wɛ.

17 Tɑcɑɑ hʋlɑ ɩ tɩ nɑ ɩ́ təŋəɣɩ tɑmpɑnɑ nɑ ɩ́ hʋʋkənɑ.

Yʋlʋ ɩsɑɣɑʋ kpɑ ɩ təɣɩ ɩ mɑɣɑmɑɣɑ ɩ kɑtɔkɑ tɑɑ.

18 Asɑɣɑɑ nɑ piitimnɑɑ mpɑ pɑ tənɑ pɑ sɔɔ Ɩsɔ tɔɔ tɔ,

pɑɑ məlɩ ɑtɛtəlɛ tɑɑ.

19 Amɑ Ɩsɔ nɑ́ kɑɑ sɔɔ wɑhɑlɑ nyə́mɑ tɔɔ.

Kʋnyɔntʋnɑɑ tɛɛlʋɣʋ nɑ́ kɑɑ sɑɑlɩ pɑɑ pəlee.

20 Hɑɩ, Tɑcɑɑ kʋlɩ,

yʋlʋ ɩ tɑɑ tɔɣɔ nyɑ́ tɔɔ.

Kɔnɑ mpɑ pɑ tɑ nyɩ-ŋ tɔɣɔ nyɑ́ ɩsɛntɑɑ nɑ ń hʋʋnɑ-wɛ.

21 Yele nɑ sɔɣɔntʋ kpɑ-wɛ,

nɑ ń hʋlɩ-wɛ sɩ pɑ kɛ́ yəlɑɑ kɛ yem.