nyʋɣʋ tʋ yontunɑɑ tɑɑ tɔɣɔlɔ.

2 Ɩsɔtɔnʋɣʋ hʋləɣənɑ Ɩsɔ nyɑ́ teeli

nɑ kʋ kpɑɑləɣɩ nyɑ́ kʋlɑpəlɛ.

3 Wʋlɛ sɛɣɛsəɣənɑ lɛntɛ kɛ tə tɔm.

Nɑ ɑhoo nɑ́ɑ́ heeliɣi lɛnnɑ kɛ ɑ tɔm.

4 Pɩɩ yɔɣɔtəɣɩ sɩ yʋlʋ ɩ́ nɩɩ pə nɔɣɔ.

5 Pɑɑ nɑ mpʋ, pə tɔm cɔɔkɩ ɑntulinyɑ tənɑsɩ tənɑɣɑ.

Ɩsɔ sikɑ ilim kɛ cokəle kɛ ɩsɔtɑɑ kɛ́.

6 Pə wɛ kɛ́ ɩsɩɩ ɑkpɑɣɑlʋ lɩɩkʋɣʋnɑ ɩ nɑŋ tɑɑ tɔ,

nɑ ɩ́ tʋɣɩ mpɑɑʋ nɑ lɑŋhʋlʋmlɛ ɩsɩɩ ɑkɑ.

7 Pə lɩɩkənɑ ɑntulinyɑ tənɑɣɑ kɑnɛɣɛ,

nɑ pə́ tɔlənɑ lɛŋkɑ.

Pʋlʋpʋ ɩɩ fitiɣi pə hɑŋɑɣɑ.

8 Tɑcɑɑ nyɑ́ kiiŋ wɛ kɛ́ təcʋŋŋ,

nɑ ɩ́ hɑɑkɩ toŋ nɑ weesuɣu.

Tɑcɑɑ nyɑ́ kʋsəsɩɩtʋ tɑ siti tə wɛ kɛ́ təcʋŋŋ.

Tə kuliɣi mpɑ pɑ tɑ nyɩ pʋlʋ tɔ pɑ ɩsɛ.

9 Tɑcɑɑ nyɑ́ kʋtʋtʋtʋ siɣisɑɑ kɛ́ nɑ tə́

hɛɛsəɣɩ mpɑ pɑ nɩɩkənɑ-tɩ tɔ pɑ lɑŋɑ.

Nyɑ́ kiiŋ siɣisɑɑ kɛ́ təkpɑtɑɑ,

nɑ ɩ́ kuliɣi ɩsɛ.

10 Tɑcɑɑ nyɑmnɑʋ tewɑɣɑ,

yəlɑɑ kɑ nɩɩnɑ-ŋ ḿpʋɣʋ tɑm tɔɔ.

Nyɑ́ kʋsəsɩɩtʋ wɛ tɑmpɑnɑ kɛ́ nɑ tə siɣisɑɑ.

11 Tə kəlɑ wʋlɑnɑɑ kʋpɑmpɑmɑ kɛ teu.

Nɑ tə́ kəlɩ tɩɩŋ sɛtɑɣɑ nim nyəŋkɑ mɑɣɑmɑɣɑ kɛ leleŋ.

12 Ntɩ tə sɛɣɛsəɣənɑ nyɑ́ təmlɛ tʋ mɑ́.

Tə tɔkʋɣʋ tɑɑ mɑ wɑɑkɩ mɑ weesuɣu tɑɑ kɛ́.

13 Nɔɣɔlʋ ɩɩ cɛkəɣənɑ ɩ tɑsəkəlɛ.

Wii mɑɣɑ timpi mɑ tɑ cɛkənɑ tɔ.

14 Kenti-m kɑlɑmpɑɑnɩ nyə́mɑ,

pɑ tɑɑ ŋmɑkəlɩ-m.

Wɑɑtʋ ɩnəɣɩ mɑɑ te teu nɑ ń fiti-m kʋpəntʋɣʋ ɩsɑɣɑʋ.

15 Mʋ mɑ kʋyɔɣɔtʋtʋ nɑ nti mɑ mɑɣɑsəɣɩ mɑ lotu tɑɑ tɔ.

Hɑɩ, Tɑcɑɑ, nyɑɣɑlɛ mɑ wɑɑsʋlʋ

nɑ mɑ kʋkpɑmʋɣʋ ŋku kʋ kentiɣi-m tɔ.