Tɑcɑɑ nyɑɣɑ mɑ mɑkɩ kɑpusi nɑ mɑ́ yɑɑkɩ,

mɑ kentulu, tɑɑ təkɩ nyɑ́ ŋkpɑŋŋ.

Ye n tɑ cɔ-m, mɑ wɛ kɛ́ ɩsɩɩ wei pɑ tisiɣi pəlɑɑʋ tɑɑ tɔ.

2 Wɑɑtʋ wei mɑ mɑkɩ kɑpusi nɑ mɑ́ yɑɑkɩ-ŋ

nɑ mɑ́ hʋləɣɩ niŋ nɑ nyɑ́ təcɑɣɑlɛ

nɑŋŋ nyəntɛ tɔɔ tɔ, nɩɩ mɑ wiinɑʋ.

3 Tɑɑ kɑɑ mɑ́ nɑ kɑwɑlɑɣɑ nyə́mɑ

nɑ ɩsɑɣɑlɑtɑɑ kɛ kpɑ́tʋɣʋ kʋlʋmʋɣʋ.

Pɑ kʋyɔɣɔtʋtʋ wɛ leleŋ kɛ́,

nɑ pɑ tɑɑ nɑ sɛɛsɩ.

4 Fɛlɩ-wɛɣɛ pɑ ɩsɑɣɑtʋ fɔɔtɔ

nɑ ń kɛɛsənɑ pɑ ɑcilɑɣɑtʋ təmɑ.

Lɛɛtɩ-wɛɣɛ pɑ kʋlɑpəlɛ.

5 Pɑɑ lɑkɩ lɑɑkɑlɩ nɑ nyɑ́ kʋlɑpʋtʋ nɑ nyɑ́ təmɑ.

Wɑkəlɩ-wɛ tənɑŋnɑŋ, pɑ́ tɑɑ tɑsɑ kʋlʋɣʋ.

6 Tɑcɑɑ, mɑ sɛɛ-ŋ

ɩsənɑ n nɩɩ mɑ wulɑ tɔ.

7 Nyɑɣɑlɛ mɑ toŋ nɑ mɑ kʋkentuɣu.

Nyɑɣɑ mɑ tʋɣɩ nɑɑni nɑ ń wɑɑsəɣɩ-m,

nɑ mɑ wɛ lɑŋhʋlʋmlɛ tɑɑ nɑ mɑ́ sɑŋɩ-ŋ nɑ yontu.

8 Nyɑ́ kentiɣinɑ nyɑ́ yəlɑɑ nɑ toŋ,

nɑ ń wɑɑsəɣɩ nyɑ́ kʋləsʋ nɑ ɩɩ nyɑŋnɑ pʋlʋ.

9 Wɑɑsɩ nyɑ́ yəlɑɑ tɑ́ nɑ ń kooli-tʋɣʋ kʋpɑntʋ.

Tiiki-tʋ nɑ ń pɑɑsəɣənɑ-tʋɣʋ tɑm tɔɔ.

Mpi tɔ, nyɑ́ tənnɑ-tʋ.