Leleŋ nɩɩlʋ ntɛ́ wei ɩ ɩsɑɣɑtʋ Ɩsɔ hɩɩsɑɑ

nɑ ɩ́ wii-ɩ ɩ kʋpəntəŋ tɔ.

2 Leleŋ nɩɩlʋ ntɛ́ wei Tɑcɑɑ ɩɩ yeki sɩ

ɩ ɩsɑɣɑtʋ ɩ́ məlɩ ɩ nyʋɣʋ tɑɑ tɔ.

Pəyele cɛsʋɣʋ fɛɩ ɩ ləmɑɣɑsɛɛ tɑɑ.

3 Ye mɑ ŋmɛsɑ mɑ ɩsɑɣɑtʋ,

mɑɣɑ tə wɑkələɣɩ.

Nɑ mɑ́ mɔləɣɩ ilim nɑ pə tɛm.

4 Mpi tɔ, ilim nɑ ɑhoo kɛ

n hɔŋɑɣɑ mɑ ŋkpɑŋʋɣʋ nɑ pə́ nɩɩ-m.

Mɑ tomɑ tɛmɑ ɩsɩɩ tʋɣʋ kɛ wʋlɑɣɑ tɛtʋ tɑɑ kɛ́ lʋŋlɛ.

5 Mɑ mɑɣɑsɑɑ sɩ mɑɑ hʋlɩ-ŋ mɑ ɩsɑɣɑtʋ,

mɑ tɑ ŋmɛsɩ-ŋ mɑ kʋpəntəŋ.

Ɩlɛnɑ nyɑɑ hɩɩsɩ-m tə tənɑ.

6 Pə tɔɔ kɛ́ nyɑ́ yəlɑɑ tənɑ kɑ sələməɣɩ-ŋ

nɑ pɑɑ wɑɑtʋ wei wɑhɑlɑnɑɑ

wɑtɑ-wɛ ɩsɩɩ lʋm, pɩɩ tɑkɩ-wɛ.

7 Nyɑɣɑ mɑ cɔɔsəɣənɑ,

nɑ ń hɑtələɣənɑ-m lɑŋwɑkəllɛ.

Nɑ mɑ́ ŋmɑɑləɣənɑ mɑ nyʋɣʋ yɑpʋ.

8 Ḿpʋɣʋ Tɑcɑɑ cɔ-m sɩ: Mɑɑ sɛɣɛsɩ-ŋ

nɑ mɑ́ hʋlɩ-ŋ mpɑɑʋ ŋku n kɑ́ təŋ tɔ.

Nɑ mɑ́ pɑɑsəɣənɑ-ŋ nɑ mɑ́ tɑsəɣɩ-ŋ lɑɣɑtʋ.

9 Tɑɑ lɑ kʋmɛlɛntʋ ɩsɩɩ kpɑɣɑnʋ,

yɑɑ kpɑŋɑɣɑ ŋkɑ pɑ kɛɛkənɑ kpɑsɩ tɔ.

Ɩlɛ nɑtəlɩ tə kɑɑ mɑɣɑnɑ-ŋ.

10 Ɩsɑɣɑʋ wɛ wɑhɑlɑnɑɑ pɑɣɑlɛ tɑɑ kɛ́.

Ɩlɛnɑ Tɑcɑɑ nɑ́ɑ́ pələɣɩ kʋpɑntʋ kɛ wei

ɩ tʋɣɩ-ɩ nɑɑni tɔ.

11 Siɣisilɑɑ mɛ, ɩ́ yɔɔlənɑ Tɑcɑɑ nɑ ɩ́ ŋmɑɑlɩ.

Nɑ tɑmpɑnɑ təŋlɑɑ mɛ mə tənɑ

mɩɩ wilitinɑ lɑŋhʋlʋmlɛ.