34
Tɑcɑɑ wɑɑsɑ-m mɑ sɔɣɔntʋ tənɑ tɑɑ.
1 Tɑfiiti yontu kɛ wɑɑtʋ wei ɩ polɑ Filiisi nyə́mɑ
wulɑʋ Apimelɛkɩ tɛ nɑ ɩ́ pəsɩ ɩsɩɩ kʋmɛlɛŋ
nɑ ɩ́lɛ́ ɩ tɔɣɔnɩ-ɩ tɔ.
2 Mɑɑ sɑ Tɑcɑɑ kɛ pɑɑ wɑɑtʋ wei kɛ́.
Mɑ nɔɣɔ tɑɑ kɛ́ nyɑ́ sɑmtʋ kɑ wɛɛ tɑm.
3 Mɑɑ sɑ-ŋ mpi n lɑpɑ-m tɔ pə tɔɔ.
Kʋnyɔntɔɣɔlɑɑ ɩ́ nɩɩ nɑ ɩ́ yɔɔlɩ.
4 Tə kpɛntɩ nɑ tə́ tɑlɑ Ɩsɔ nɑ tə́ sɛɛ-ɩ.
5 Tɑcɑɑ, mɑ yɑɑ-ŋ ń cɔ-m,
nɑ ɩ́ wɑɑsɩ-m mɑ sɔɣɔntʋ tənɑ tɑɑ.
6 Ye yʋlʋ tekiɣi Tɑcɑɑ pʋntʋ ɩsɛntɑɑ hɛtəɣɩ kɛ́
nɑ fɛɛlɛ yɑ ɩ tokuɣu tɑɑ.
7 Ye wɑhɑlɑ tʋ ɩ́ wiinɑ Tɑcɑɑ,
ɩ nɩɩkɩ kɛ́ nɑ ɩ́ yɑpɩ-ɩ ɩ nəɣəsɛɛ tənɑ tɑɑ.
8 Ɩsɔtɑɑ tillu wɛ yəlɑɑ mpɑ pɑ nyɑŋnɑ
Tɑcɑɑ tɔ pɑ wɑɑlɩ kɛ́.
Nɑ ɩ́ ləsəɣɩ-wɛɣɛ ɑsolɑ tɑɑ.
9 Ɩ́ mɑɣɑsɩ nɑ ɩ́ nɑ́ ɩsənɑ
Tɑcɑɑ wɛ leleŋ tɔ.
Leleŋ nɩɩlʋ ntɛ́ yʋlʋ wei
ɩ tʋɣɩ Tɑcɑɑ kɛ kpʋlʋɣʋ tɔ.
10 Tɑcɑɑ nyə́mɑ mɛ, ɩ́ nyɑŋnɑ-ɩ.
Pʋlʋpʋ ɩɩ lɑŋəɣɩ mpʋ ɩnɩ pə lɑtɑɑ.
11 Hɑlɩ tɔɣɔlɑsɩ piyɑ mɑɣɑmɑɣɑ wiiki nyɔɣɔsɩ kɛ́.
Amɑ Tɑcɑɑ pɛɛkəlɑɑ nɑ́ɑ́ lɑŋəɣɩ kʋpɑntʋ.
12 Mɑ pəyɑlɑɑ ɩ́ nɩɩ mɑ tɔm nɑ
mɑ́ hʋlɩ-mɛɣɛ mpi pɑ yɑɑ Tɑcɑɑ sɔɣɔntʋ tɔ.
13 Mə tɑɑ nɔɣɔlʋ cɑɑ sɩ ɩ́ wɑɑ ɩ weesuɣu tɑɑ
nɑ ɩ pɩɩsɩ tɑɣɑlɩ nɑ ɩ́ nɩɩ leleŋ nɑ?
14 Pə wɛɛ sɩ ɩ́ kpɑ mə nɔɔsɩ
nɑ ɩ́ yele cɑɣɑnɑʋ nɑ kɑloolɑɣɑ.
15 Ɩ́ se ɩsɑɣɑtʋ nɑ ɩ́ lɑ kʋpɑntʋ.
Nɑ ɩ́ pɛɛkɩ mə nɑ lɛlɑɑ mə́ leleŋ
nɑ ɩsəlɛ kʋsɛɛmlɛ.
16 Tɑcɑɑ ɩsəlɛ wɛ siɣisilɑɑ tɔɔ kɛ́
nɑ ɩ́ kemɑ ŋkpɑŋʋɣʋ nɑ pɑ tɔɔ.
17 Ɩ hɑɑkɩ ɑsɑɣɑɑ kɛ siɣile kɛ́.
Nɑ ɩ́ kpiisi pɑ həlɑ mɑɣɑmɑɣɑ kɛ
tɛtʋ tɑɑ nɑ pɑ́ sɔɔ pɑ tɔɔ.
18 Ye siɣisilu ɩ́ wiiwɑ Tɑcɑɑ nɩɩkɩ kɛ́.
Nɑ ɩ́ wɑɑsɩ-ɩ ɩ nəɣəsɛɛ tənɑ tɑɑ.
19 Ye ɩ lɑŋlɛ wɑkəlɑɑ ɩ wɛ ɩ wɑɑləɣɩ.
Nɑ ye pə nɩɩ-ɩ ɩ wɑɑsɩ-ɩ.
20 Wɑhɑlɑnɑɑ pɑɣɑlɛ mɑkənɑ siɣisilu,
ɑmɑ Tɑcɑɑ wɑɑsəɣɩ-ɩ pɑ tənɑ pɑ tɑɑ.
21 Nɑ ɩ́ feŋiɣi ɩ tɔnʋɣʋ tənɑ tɔɔ sɩ
ɩ mʋwɑ tɑɑ nɑtəlɩ tə́ tɑɑ pɛlɩ.
22 Ɩsɑɣɑtʋ kʋɣʋnɑ tə tʋ.
Ɩlɛnɑ mpɑ pɑ cɑkɩ siɣisilu ɑcɑɣɑ tɔ
pɛlɛ pɑ́ nɑ́ pə nɑʋ.
23 Tɑcɑɑ yɑkɩ ɩ təmlɛ nyə́mɑ kɛ́.
Ɩlɛnɑ pɑ tənɑ mpɑ pɑ tʋɣɩ-ɩ kpʋlʋɣʋ tɔ
pɑ fitiɣi ŋkpɑŋʋɣʋ hɔm.