Yʋlʋ nyɑ́, nyɑ́ tɑɑ ɩ́ tɑɑ kpɑnɑ ɩsɑɣɑlɑtɑɑ yoo.

Tɑɑ tɩɩ nyɩɩlɩ pɑ kɑwɑɑɣɑ.

2 Pɑ kɔŋ lontiluɣu kɛ́ ɩsɩɩ nyɩɩtʋ,

nɑ pɑ́ wʋlɩ ɩsɩɩ nyɩɩtʋ kʋlɛkəlɛkətʋ wʋlʋɣʋ tɔ.

3 Hɑ nyɑ́ təɣɩ Tɑcɑɑ nɑ ń lɑkɩ kʋpɑntʋ,

ɩlɛ n kɑ́ cɑɣɑ mə tɛtʋ tɑɑ nɑ ɑlɑɑfəyɑ.

4 Yele nɑ Tɑcɑɑ pəsɩ nyɑ́ leleŋ təlɩɩlɛ,

ɩlɛ ɩ kɑ́ hɑ-ŋ mpi n nyɩɩləɣɩ tɔ.

5 Pɛtɩ-ɩ nyɑ́ weesuɣu nɑ ń nyənəɣɩ ɩ tike

ɩlɛ ɩ kɑ́ lɑ mpi pə wɛ lɑpʋ tɔ.

6 Ɩ kɑ́ yele nɑ nyɑ́ siɣisuɣu nɑ́ ɩsɩɩ nyɑɑləm

nɑ nyɑ́ tɑmpɑnɑ nɑ́ ɩsɩɩ ilim kɛ pə sikuɣu wɑɑtʋ.

7 Cɑɣɑ təpɑmm nɑ ń tɛɛləɣɩ Tɑcɑɑ nɑ suulu.

Tɑɑ mʋ pɑ́ɑ́nɑ́ nɑ mpɑ pɑ wɑɑkɩ pɑ ɩsɑɣɑtʋ tɑɑ tɔ.

8 Lɔ-yɛ, nɑ ń yele tɑɑ hɑŋɑɣɑ.

Tɑɑ kʋntɩ, ɩsɑɣɑtʋ kɛ pə lʋləɣɩ.

9 Pɩɩ kpiisi ɩsɑɣɑlɑtɑɑ kɛ́,

ɩlɛnɑ Tɑcɑɑ tɛɛllɑɑ nɑ́ɑ́ tɔɣɔ tɛtʋ.

10 Pəcɔɣɔ pə kɑɑsɑɑ nɑ ɩsɑɣɑʋ sɑɑlɩ yem.

N kɔŋ n nyənɩ ɩ lonte tɑɑ,

n kɑɑ nɑ ɩ ɩkpɑtɛ.

11 Amɑ təpɑsəlɑɑ kɑ́ tɔɣɔnɑ tɛtʋ

nɑ pɑ́ cɑɣɑnɑ pɑ tɩ təpɛlɛkɛtɛɛ.

12 Ɩsɑɣɑʋ cɑkɩ siɣisilu ɑcɑɣɑ kɛ́,

nɑ ɩ nyɑsəɣɩ ɩ təɣɩ kelɑ.

13 Amɑ Tɑcɑɑ nɑ́ woŋiɣi-ɩ kɛ́.

Mpi tɔ, ɩ nyəmɑ́ sɩ hʋʋlɛ kʋyɑkʋ kɑ́ kɔɔ.

14 Asɑɣɑɑ nɑ́ kpɛɛkɩ pɑ lɑɣɑlɛɛ kɛ́ nɑ pɑ́ pɑŋ pɑ tɔɔŋ

sɩ pɑ kʋɣɩ kʋnyɔntʋnɑɑ nɑ wɑhɑlɑ nyə́mɑ

mpɑ pɑ təŋəɣɩ mpɑɑʋ kʋsiɣisuɣu tɔ.

15 Amɑ pɑ mɑɣɑmɑɣɑ kɛ pɑ lɑɣɑlɛɛ kɑ́ sɔ

nɑ pɑ tɔɔŋ pɛlɩ.

16 Siɣisilu wɛnɑʋ pəciimɑɣɑ kəlɑ teu

kɛ ɑsɑɣɑɑ pɑɣɑlɛ nyəŋkʋ tuutuumɑ.

17 Mpi tɔ, Tɑcɑɑ n pɛləɣɩ pɑ niŋ kɛ́

ɩlɛnɑ ń pɑɑsəɣənɑ siɣisilɑɑ.

18 N nyəmɑ́ mpɑ pɑ tɔŋ ɩsɩɩ Ɩsɔ sɔɔlɑɑ tɔ pɑ tɔɔ kɛ́

nɑ mpi n kɑ́ hɑ-wɛ tɔ, pɩɩ pəsɩ pɑ nyəm kɛ tɑm tɔɔ.

19 Fɛɛlɛ kɑɑ tɔɣɔ-wɛɣɛ wɑhɑlɑ wɑɑtʋ tɑɑ.

N kɑ́ hɑ-wɛɣɛ hɑɣɑnɑɣɑ kɛ nyɔɣɔsɩ wɑɑtʋ.

20 Asɑɣɑɑ kɔŋ lepu kɛ́.

Tɑcɑɑ kolontunɑɑ kɑ́ sɑɑlɩ kɛ́

ɩsɩɩ nyɩɩtʋ hɛtʋ yɑɑ kɔkɔ nyɔɔsɩ.

21 Ɩsɑɣɑʋ kəntəɣɩ kɛ́ ɩɩ fɛləɣɩ.

Amɑ siɣisilu nɑ́ hɑɑkənɑ luɣu kʋlʋmʋɣʋ.

22 Mpɑ Tɑcɑɑ kooliɣi kʋpɑntʋ tɔ

mpɛ pɑ tənnɑ tɛtʋ.

Ɩlɛnɑ pə́ kpiisiɣi mpɑ ɩ təŋsəɣɩ mpusi tɔ.

23 Ye ɩ lɑŋlɛ hɛɛnɑ yʋlʋ tɔntɛ,

ɩ hɑsəɣɩ ɩ nɔɔhɛɛ tɛɛ kɛ́.

24 Pɑɑ ɩ tɩɩ hotɑɑ ɩɩ sɑɑləɣɩ ɑtɛ.

Ɩ tɔkəɣɩ ɩ niŋ tɑɑ kɛ́ nɑ ɩ kʋsɩ-ɩ.

25 Too mɑ kʋlʋɣʋ tɔ,

hɑlənɑ mɑ kpɑtəlɑɣɑ,

mɑ tɑ nɑtɑ pə lɔwɑ siɣisilu,

yɑɑ pə sʋsɑ ɩ piyɑ kɛ tɔɣɔnɑɣɑ sələmʋɣʋ tɑɑ.

26 Ɩ hɑɑkənɑ luɣu kʋlʋmʋɣʋ kɛ tɑm kɛ́

nɑ Ɩsɔ kooliɣi ɩ piyɑ kɛ kʋpɑntʋ.

27 Kisi ɩsɑɣɑtʋ nɑ ń lɑkɩ kʋpɑntʋ

ɩlɛ nyɑ́ piitim kɑ́ wɛɛ tɛtʋ tɑɑ kɛ́ tɑm.

28 Mpi tɔ, siɣisuɣu kɛ Tɑcɑɑ n sɔɔlɑɑ.

Pəyele nn lɔɔkɩ nyɑ́ yəlɑɑ.

N kentiɣi pɑ tɔɔ kɛ́ tɑm kɛ́.

Amɑ n kɑ́ kpiisi ɑsɑɣɑɑ piitim.

29 Siɣisilɑɑ kɑ́ tɔɣɔnɑ tɛtʋ

nɑ pɑ́ cɑɣɑ tə tɑɑ kɛ́ tɑm.

30 Ləmɑɣɑsɛɛ tɔm kɛ siɣisilɑɑ yɔɣɔtəɣɩ

nɑ pɑ́ kpɑɑləɣɩ tɑmpɑnɑ təŋʋɣʋ.

31 Pɑ Ɩsɔ kiiŋ wɛ pɑ lotu tɑɑ kɛ́,

pɩɩ cɛŋləɣɩ-wɛ.

32 Ɩsɑɣɑʋ cɛŋəɣɩ siɣisilu kɛ́

nɑ ɩ́ pɛɛkəɣɩ ɩ kʋɣʋ.

33 Amɑ Tɑcɑɑ ɩɩ yeki sɩ ɩsɑɣɑʋ ɩ́ kpɑ siɣisilu kɛ ɩ səkpɑŋ tɑɑ.

Yɑɑ siɣisilu tɔm ɩ́ sɩ təhʋʋlɛ tɑɑ.

34 Tɛɛlɩ Tɑcɑɑ nɑ ń təŋəɣɩ ɩ mpɑɑʋ.

Ɩ kɑ kʋsɩ nyɑ́ nyʋɣʋ nɑ ń tɔɣɔ tɛtʋ

nɑ ɩ́ kpiisi ɑsɑɣɑɑ nɑ ń nɑ́.

35 Mɑɑ nɑwɑ ɩsɑɣɑʋ nɑ ɩ́ ŋmɑkələɣɩ.

Nɑ ɩ́ pɩɩ sɔsɔm ɩsɩɩ tʋɣʋ kɛ Lipɑŋ

tɛtʋ kʋpɑntʋ tɑɑ.

36 Amɑ mɑ məlɑ tənɑ ɩlɛ mɑɑ tɑsəɣɩ-ɩ nɑʋ,

nɑ mɑ́ pɛɛkɩ nɑ mɑ́ wɩɩ pɑɣɑ.

37 Nyənnɑ mpɑ pɑ tɔŋ ɩsɩɩ Ɩsɔ sɔɔlɑɑ

nɑ pɑ́ təŋəɣɩ tɑmpɑnɑ tɔ.

Wei ɩ cɑɑkɩ ɩ́ nɑ lɛlɑɑ pɑ leleŋ tɔ,

ɩ wɛɛkənɑ lʋlʋɣʋ nyə́mɑ kɛ́.

38 Pɩɩ wɑkəlɩ ɩsɑɣɑlɑtɑɑ tənɑɣɑ,

nɑ pə kpiisi pɑ lʋlʋŋ.

39 Tɑcɑɑ yɑkənɑ siɣisilɑɑ.

Nɑ ɩ́ kentiɣi pɑ tɔɔ kɛ́ wɑhɑlɑnɑɑ wɑɑtʋ.

40 Ɩnɩ ɩ wɑɑsəɣənɑ-wɛ nɑ ɩ́ teŋ-wɛ.

Nɑ ɩ́ fitiɣi-wɛɣɛ ɑsɑɣɑɑ niŋ tɑɑ nɑ ɩ́ yɑkɩ-wɛ.

Mpi tɔ, ɩnəɣɩ pɑ tʋ kpʋlʋɣʋ.