69
Sɔɔlʋɣʋ ŋku mɑ sɔɔlənɑ Ɩsɔ təsɛɛlɛ tɔ
1 Tɑfiiti yontu nti tə wɛ yonyoolɑɑ nyʋɣʋ tʋ
yontunɑɑ tɑɑ nɑ pɑ yookinɑ cəmʋɣʋ*fɑ* tɔɣɔlɔ. ɑcəmʋɣʋ: Lɛlɑɑ hʋʋkɩ sɩ pɑ yoonɑ yontu luɣu ŋku pɑ yɑɑ sɩ hɛtʋɣʋ tɔ.
2 Hɑɩ, Ɩsɔ, wɑɑsɩ-m,
lʋm sɩɩnɑ mɑ luɣu tɛɛ kɛ́.
3 Pə tisɑ-m kɑtɑntɑmɑɣɑ tɑɑ kɛ́, pɩɩ səŋəɣɩ.
Mɑ hotɑ lʋm lumɑŋ tɑɑ kɛ́ nɑ pə holɑ tɛɛkənɑ-m.
4 Mɑ kiisɑɑ nɑ mɑ luɣu tɛɛ wʋlɩ, nɑ mɑ́ kɑ́.
Mɑ tekɑ mɑ Ɩsɔ nɑ mɑ ɩsɛ cɑŋ ɑ pɔɣɔlʋŋ tɑɑ.
5 Mpɑ pɑ tɑɑ kpɑɑnɑ-m mʋsʋŋ tɔ pɑ kəlɑ
mɑ nyʋɣʋ tɑɑ nyɔɔsɩ kɛ pɑɣɑlɛ.
Mpɑ pɑ cɑɑ sɩ mɑ́ lɑ yem tɔ pɑ kɛ́ toŋtʋnɑɑ kɛ́,
mɑ kolontunɑɑ mpɛ pɑ fɛɩnɑ tɑmpɑnɑ.
Mpi mɑ tɑ kpɑɣɑ tɔ mpəɣɩ pə wɛɛ sɩ mɑ́ məŋnɑ.
6 Hɑɩ, Ɩsɔ, n nyəmɑ́ mɑ kʋmɛlɛntʋ,
nɑ mɑ kʋlɑpəlɛ ɩsɑɣɑlɛ fɛɩ-ŋ ŋmɛsɑɣɑ.
7 Mɑ tɔm ɩ́ tɑɑ kpɑ mpɑ pɑ tʋ-ŋ nɑɑni tɔɣɔ fɛɛlɛ.
Hɑɩ, Ɩsɛɣɛlɩ nyə́mɑ Ɩsɔ Tɑcɑɑ,
mɑ tɔm ɩ́ tɑɑ liɣiti mpɑ pɑ pɛɛkəɣɩ-ŋ tɔ.
8 Mpi tɔ, nyɑ́ tɔɔ kɛ́ pɑ tʋʋkɩ-m,
nɑ fɛɛlɛ wɛ mɑ ɩsɛntɑɑ.
9 Mɑ pəsɑ ɩsɩɩ mʋʋlʋ kɛ mɑ newɑɑ,
yɑɑ kpɑɩtʋ kɛ mɑ təyɑɣɑ nyə́mɑ.
10 Mpi tɔ, mɑ ɩsəlɛ sɛɛnɑ nyɑ́ təyɑɣɑ
təmlɛ kɛ́ ɩsɩɩ yem nɑ kpɛtɛ.
Nɑ nyɑ́ kʋtʋɣʋ pəsɩ mɑ nyəŋkʋ.
11 Mɑ ɩsəlʋm lukiɣi yem kɛ́ nɑ mɑ́ hɔkəɣɩ nɔɣɔ,
pɑɑ nɑ mpʋ kʋtʋɣʋ kɛ pə kɔŋnɑ-m.
12 Pɑɑ mɑ suu ləyɑɣɑ wontu,
mɑ pəsɑ wei pɑ tuliɣi ntompee tɔɣɔ.
13 Mɑ tɔm kɛ pɑ yɔɣɔtəɣɩ kʋyɛɛŋ tɑɑ,
nɑ sʋlʋnyɔɔlɑɑ nɑ́ɑ́ yooki-təɣɩ yontu.
14 Hɑɩ, Tɑcɑɑ, nyɑɣɑ mɑ tekiɣi mɑ sələmʋɣʋ tɑɑ,
hʋlʋ-m suulu nɑ ń mʋ.
Cɔ-m nyɑ́ kʋpɑntʋ tɔɔ, nɑ ń yɑ mɑ nyʋɣʋ.
Mpi tɔ, nyɑ́ nyʋɣʋ yɑpʋ wɛ nɑɑni kɛ́.
15 Kpɛɛ-m ɑfəlɑ tɑɑ, ɑ́ tɑɑ tɑsɑ-m lipu.
Yɑ-m lʋm lumɑŋ sɔsɔɔŋ nɑ mɑ kolontunɑɑ
mpɑ pɑɑ cɑɑ-m tɔ pɑ niŋ tɑɑ.
16 Lʋm holɑ ɩ́ tɑɑ tɛɛnɑ-m,
pə́cɔ lʋhəyɑɣɑ ɩ́ tɑɑ li-m.
Tɑɑ yele nɑ pəlɑɑʋ suli mɑ tɔɔ.
17 Tɑcɑɑ, cɔ-m, mpi tɔ, nyɑ́ kʋpɑntʋ tɔɔwɑ sɔsɔm kɛ́.
Kɛɛsɩ nyɑ́ ɩsɛ nɑ mɑ tɔɔ kɛ́ nyɑ́ suulu sɔsɔ tɔɔ.
18 Tɑɑ kisi nyənʋɣʋ nɑ nyɑ́ təmlɛ tʋ mɑ́ mɑ tɔɔ.
Hɑɩ, cɔ-m lɔŋ, mɑ wɛ lɑŋwɑkəllɛ tɑɑ kɛ́.
19 Kpətənɑ-m, wɑɑsɩ-m,
yɑ-m mɑ kolontunɑɑ tɔɔ.
20 N nyəmɑ́ mɑ fɛɛlɛ nɑ ɩsənɑ pə pɑsɑ-m tɔ.
N nɑɑkɩ mɑ kolontunɑɑ tənɑɣɑ.
21 Kʋtʋɣʋ wɑkəlɑ mɑ lɑŋlɛ kɛ́ nɑ pə́ tʋ-m kʋtɔŋ.
Mɑ tɑŋɑɑ sɩ pɑ́ nyənɩ mɑ pətɔɔtəlɛ
yɑɑ pɑ́ puɣusi-m mɑ tɑ nɑ.
22 Pɑ sitiɣi sɔtʋ kɛ mɑ tɔɣɔnɑɣɑ tɑɑ.
Nɑ pɑ́ hɑɑkɩ-m lʋm kʋnyəŋəm sɩ mɑ́ nyɔɔ nɑ mɑ lʋkɔtʋ sɩ́.
23 Pɑ ɑcimɑ nɑ pɑ kɔtɑsɩ tɔɣɔnɑɣɑ ɩ́ pəsɩ-wɛɣɛ
kɑtɔkɑ ŋkɑ kɑɑ kpɑ-wɛ tɔ.
24 Pɑ ɩsɛntɔɔ ɩ́ nyɑlɑ təkpɑm nɑ pɑ́ tɑɑ tɑsɑ nɑʋ,
pɑ sɑləməɣənɑ wɑhɑlɑ kɛ tɑm.
25 Mʋ-wɛ nɑ nyɑ́ pɑ́ɑ́nɑ́ sɔsɔɔnɑ nɑ ɑ kɔkɔ tɑlɑ-wɛ.
26 Pə́ kpiisi pɑ təcɑɣɑlɛ.
Nɔɣɔlʋ ɩ́ tɑɑ wɛɛ pɑ tɛɛsɩ tɑɑ.
27 Wei ɩ ŋkpɑŋʋɣʋ n hɔmɑ tɔɣɔ mpɛ pɑ tʋ kʋnyɔŋ,
nɑ pɑ́ yɔɣɔtəɣɩ mpɑ Ɩsɔ nyɑ́ n kɑ tʋwɑ kʋnyɔŋ tɔ pɑ wɑhɑlɑ tɔm.
28 Lɛɛtɩ-wɛɣɛ pɑ ɩsɑɣɑtʋ,
tɑɑ hʋlɩ-wɛɣɛ nyɑ́ suulu.
29 Pə́ hɩɩsɩ pɑ həlɑ kɛ weesuɣu tɑkəlɑɣɑ tɑɑ,
pɑ́ tɑɑ ŋmɑɑ pɑ həlɑ kɛ siɣisilɑɑ nyənɑ tɑɑ.
30 Mɑ kɛ́ kʋnyɔntʋ kɛ́ nɑ mɑ́ tɔkɩ wɑhɑlɑ.
Hɑɩ, Ɩsɔ nyɑ́ yɑpʋ kɑ́ kenti mɑ tɔɔ.
31 Hɑɩ, Ɩsɔ, mɑɑ sɑ nyɑ́ hətɛ nɑ yontu,
nɑ mɑ́ pʋɣʋlɩ nyɑ́ sɔsɔɔntʋ kɛ mɑ sɑmtʋ tɑɑ.
32 Tɑcɑɑ pəlɛ pə kəlɑ-ŋ teu kɛ mɑ hɑ-ŋ nɑʋ,
yɑɑ lɑtəcɛ ɑlɑɑfəyɑ nyəŋ.
33 Mpɑ pɑ pɑsəɣɩ pɑ tɩ tɔ,
pɑɑ nɑ́ mɑ yɑpʋ nɑ pɑ lɑŋɑ hʋlʋmɩ.
Ɩsɔ wɑɑsʋɣʋ pɛɛkəlɑɑ mɛ,
mə weesuɣu ɩ́ tɑɣɑlɩ.
34 Mpi tɔ, Tɑcɑɑ nɩɩkɩ kʋnyɔntʋnɑɑ nɔɔsɩ kɛ́.
Ɩɩ lɑkɩ ɑwusɑ kɛ ɩ yəlɑɑ kʋpɑmɑ mpɑ pɑ wɛ sɑləkɑ tɑɑ tɔ.
35 Ɩsɔtɑɑ nɑ ɑtɛ ɩ́ sɑmɩ-ɩ,
nɑ teŋkunɑɑ nɑ pə tɑɑ nyəmnɑɑ pʋɣʋlɩ-ɩ.
36 Tɑcɑɑ kɑ wɑɑsɩ Siyɔŋ ɩcɑtɛ,
nɑ ɩ́ tɑɣɑnɩ Yutɑ ɑcɑlɛɛ kɛ ŋmɑʋ,
ɩ yəlɑɑ kɑ́ mʋ-yɛ nɑ ɑ́ pəsɩ pɑ nyənɑ.
37 A kɑ pəsɩ ɩ təmlɛ nyə́mɑ piyɑ kpɑncoou,
nɑ mpɑ pɑ sɔɔlɑ ɩ hətɛ tɔ pɑ cɑɣɑ ɑ tɑɑ.