nyʋɣʋ tʋ yontunɑɑ tɑɑ tɔɣɔlɔ.

Hɑɩ, Ɩsɔ, kpɑɩ nyə́mɑ wɑtɑ nyɑ́ tɛ,

nɑ pɑ́ wɑkələɣɩ nyɑ́ təsɛɛlɛ nɑŋŋ nyəntɛ.

Pɑ pəsɑ Yosɑlɛm kɛ ncɑɑlɛ kɑŋmɑɑɣɑ.

2 Pɑ kʋ nyɑ́ təmlɛ nyə́mɑ nɑ pɑ́ pɛtɩ

kpeliŋ nɑ tɑɑlɛ wontu.

3 Nɑ nyɑ́ yəlɑɑ kʋpɑmɑ cɑləm kpé nɑ pə́ cɔɔnɑ Yosɑlɛm ɩcɑtɛ,

nɔɣɔlʋ tɑ kɔɔ sɩ ɩ́ pi-wɛ.

4 Tə pəsɑ mpusi pʋlʋɣʋ tɑ́ cɔlɔ nyə́mɑ kɛ́,

nɑ mpɑ pɑ cɔɔnɑ-tʋ tɔ pɑ woŋiɣi-tʋ

nɑ pɑ́ tuliɣi-tʋɣʋ ntompee.

5 Hɑɩ, Tɑcɑɑ, pəlee kɛ́ nyɑ́ tɑ́ɑ́ kɑ́ hɛɛsɩ-tʋɣʋ kpɑnɑʋ

nɑ nyɑ́ pɑ́ɑ́nɑ́ yele-tʋɣʋ nyɑɣɑʋ ɩsɩɩ kɔkɔ?

6 Piitimnɑɑ nɑ kɑwulɑsɩ nsi sɩ tɑ nyɩ-ŋ

nɑ sɩɩ sɛɛkɩ-ŋ tɔ, nsəɣɩ pɩɩ wɛɛ sɩ ń mʋnɑ pɑ́ɑ́nɑ́.

7 Mpi tɔ, pɑ kuu Ɩsɛɣɛlɩ nyə́mɑ wontu,

nɑ pɑ́ wɑkəlɩ pɑ təcɑɣɑlɛ.

8 Tɑɑ tɔɔsɩ tɑ́ ɩsɑɣɑtʋ kʋpəntʋ tɔɔ.

Amɑ nyənɩ tɑ́ pətɔɔtəlɛ nɑ ń kɔɔ tɑ́ kiŋ kɛ lɔŋ.

Mpi tɔ, tə wɛ wɑhɑlɑ tɑɑ kɛ́.

9 Hɑɩ, wɑɑsɩ-tʋ, tɑ́ nyʋɣʋ Yɑ́tʋ Ɩsɔ,

nɑ pə́ tʋ nyɑ́ hətɛ kɛ teeli.

Yɑ-tʋ nɑ ń kpiisi tɑ́ ɩsɑɣɑtʋ kɛ nyɑ́ hətɛ tɔɔ.

10 Pepe tɔɔ kɛ́ piitimnɑɑ kɑ́ pɔɔsəɣɩ sɩ:

Leɣe pɑ Ɩsɔ ɩnɩ ɩ mələnɑɑ?

Pə wɛɛ kɛ́ sɩ ń lɛɛtɩ-wɛɣɛ

nyɑ́ təmlɛ nyə́mɑ səm kɛ tɑ́ ɩsɛntɑɑ nɑ pɑ́ nɑ́.

11 Ke ŋkpɑŋŋ nɑ ń nɩɩ sɑləkɑtʋnɑɑ wulɑ,

nɑ ń yɑ́ mpɑ pɑ kʋɣʋ pəlɛ pɑ tʋwɑ tɔ nɑ nyɑ́ toŋ sɔsɔɔŋ.

12 Tɑcɑɑ, fɛlɩ tɑ́ cɔlɔ nyə́mɑ kɛ kʋtʋɣʋ ŋku

pɑ tʋʋ-ŋ tɔɣɔ tɔm nɑɑtosompɔɣɔlɑɣɑ.

13 Amɑ tɑ́ kɛ́ nyɑ́ yəlɑɑ kɛ́.

Tɑɣɑlɛ kɑləkʋ nɑ nyɑɣɑlɛ tiikilu.

Tɩɩ sɛɛkɩ-ŋ tɑm tɔɔ kɛ́ nɑ tə́ sɑŋɩ-ŋ.