Lɛɛtʋlʋ Ɩsɔ, hʋlɩ nyɑ́ tɩ.

2 Antulinyɑ hʋʋlʋ nyɑ́, kʋlɩ

nɑ ń lɛɛtɩ kɑlɑmpɑɑnɩ nyə́mɑ kɛ pɑ kʋlɑpʋtʋ.

3 Hɑɩ, Tɑcɑɑ, ɑsɑɣɑɑ mpɛ pɑɑ wɛɛ mpʋɣʋlɛ?

Mpɛ pɑɑ wɛɛkənɑ ntɛɣɛ ɑkɑnɑɑ kɛ mpʋ?

4 Pɑ yɔɣɔtəɣɩ tɔm kɛ́ nɑ kɑlɑmpɑɑnɩ

nɑ pɑ́ pɛɛkəɣɩ lɛlɑɑ wɑkəlʋɣʋ.

5 Tɑcɑɑ, pɑ ŋmɑkələɣɩ nyɑ́ yəlɑɑ kɛ́,

nɑ pɑ́ muɣuliɣi mpɑ pɑ kɛ́ nyɑ́ nyə́mɑ tɔ.

6 Pɑ lɛntəɣɩ mʋsʋŋ kɛ leelɑɑ nɑ mʋʋlɑɑ

nɑ pɑ́ kʋɣɩ suluwɑɑ.

7 Nɑ pɑ́ tɔŋ sɩ Tɑcɑɑ ɩɩ nɑɑkɩ,

Yɑkɔpʋ Ɩsɔ ɩɩ pɑɑsəɣənɑ.

8 Kʋmɛlɛməŋ mɛ ɩ́ lɑ lɑɑkɑlɩ,

ləmɑɣɑsɛɛ fɛɩnɑɑ mɛ,

pəlee kɛ́ ɩ́ kɑ́ hii lɑɣɑtʋ?

9 Tɑcɑɑ wei ɩ tʋ yəlɑɑ kɛ ŋkpɑŋŋ tɔ, ɩ nɩɩkɩ kɛ́.

Ɩsənɑɣɑ ɩ kɑ́ tʋ ɩsəlɛ nɑ ɩɩ nɑɑkɩ?

10 Ɩsənɑɣɑ ɩ nɑɑsəɣɩ piitimnɑɑ

nɑ ɩ́ kɑɑ hɔ ɑsɑɣɑɑ ŋkpɑŋŋ?

Ɩnɩ ɩ sɛɣɛsəɣənɑ yəlɑɑ,

ɩlɛ ɩsənɑɣɑ ɩ kɑ́ lɑŋ nyəm?

11 Tɑcɑɑ nyəmɑ́ yʋlʋ hʋwɛɛ kɛ

teu sɩ ɑ wɛ kpɛtɛ.

12 Hɑɩ, Tɑcɑɑ, nyʋleleŋ tʋ ntɛ́ wei n sɛɣɛsəɣɩ

nyɑ́ kiiu nɑ ń hɔŋ ɩ ŋkpɑŋʋɣʋ tɔ.

13 Ɩ kɑ́ cɑɣɑ təpɑmm kɛ kʋyɛɛŋ ɩsɑɣɑŋ tɑɑ,

hɑlənɑ pɑ́ huli ɑsɑɣɑɑ pɔɔŋ.

14 Pə tɑɣɑ pʋlʋ, Tɑcɑɑ ɩɩ lɔɔkɩ ɩ yəlɑɑ.

Ɩ kɑɑ yele mpɑ pɑ kɛ́ ɩ nyə́mɑ tɔ.

15 Mpi tɔ, pɑɑ hʋʋnɑ kɛ́ nɑ pə́ kɛɛsənɑ tɑmpɑnɑ təŋʋɣʋ.

Pɑ tənɑ mpɑ pɑ təŋəɣɩ tɑmpɑnɑ tɔ pɑ lɑŋɑ kɑ hɛɛnɑ-tɩ.

16 Awe kɑ́ sɛɛnɑ mɑ tɔɔ kɛ́ ɑsɑɣɑɑ mpɛ pɑ tɔm tɑɑ?

Awe kɑ́ sənɑ-m mpɑ pɑ lɑkɩ ɩsɑɣɑtʋ tɔ pɑ tɔm tɑɑ?

17 Ye Tɑcɑɑ tɑɑ wɑɑsɩ-m,

ɩsəntɔ mɑɑ tɛmɑ wɛɛʋ kɛ

timpi pə sumɑ tətiɣitiɣi tɔ.

18 Pɑɑ wɑɑtʋ wei kɛ mɑ tɔmɑ sɩ mɑ cɑɑ hotuɣu,

Tɑcɑɑ nyɑ́ kʋpɑntʋ teŋi-m kɛ́.

19 Sɑɑ wei nəɣəsɛɛ pɩɩ mɑ lotu tɔ,

nyɑ́ hɛɛsənɑ mɑ lɑŋlɛ nɑ ń hʋləsɩ-tɛ.

20 Nyɑnɑ hʋʋlɑɑ ɑsɑɣɑɑ mpɑ pɑ wɑkələɣɩ kiiŋ

nɑ pɑ́ kɔŋnɑ wɑhɑlɑ tɔ ɩ́ kɑɑwɑɣɑ?

21 Siɣisilɑɑ kɛ pɑ wɑkələɣɩ

nɑ pɑ́ kʋɣɩ mpɑ pɑ tɑ lɑ pʋlʋ tɔ pɑ tɔm.

22 Amɑ Tɑcɑɑ kɛlɛ kʋkpɑmʋɣʋ

ŋku mɑ cɔɔsəɣənɑ tɔ.

23 Pɑ mɑɣɑmɑɣɑ pɑ ɩsɑɣɑtʋ kɛ ɩ kɑ́ məŋnɑ pɑ nyɔɔŋ tɑɑ,

nɑ ɩ́ wɑkəlɩ-wɛ nɑ kʋlʋmtʋ ntɩ.