kɛ wɑɑtʋ wei pə kələnɑ-ɩ

nɑ ɩ́ wiikinɑ Tɑcɑɑ tɔ.

2 Tɑcɑɑ nɩɩ mɑ wiinɑʋ nɑ

ń mʋ mɑ kʋsələmʋtʋ.

3 Tɑɑ yele mɑ tɔɔ kɛ́ nyənnɑʋ kɛ mɑ lɑŋwɑkəllɛ wɑɑtʋ.

Ke ŋkpɑŋʋɣʋ nɑ mɑ tɔɔ kɛ́ kʋyɑkʋ ŋku

mɑ yɑɑkɩ-ŋ sɩ ń wɑɑsɩ-m tɔ. Cɔ-m lɔŋ.

4 Pə tɑɣɑ pʋlʋ, mɑ kʋyɛɛŋ mʋkəɣɩ kɛ́ ɩsɩɩ nyɔɔsɩ

nɑ mɑ sɑɑlɩ yem ɩsɩɩ kɔkɔ nyɑkʋɣʋ tuputu tɔ.

5 Mɑ wʋlɑɑ kɛ́ ɩsɩɩ nyɩɩtʋ nti pɑ sɛtɑɑ tɔ.

Mɑ tɩɩ sɔɔkɩ mɑ tɔɣɔnɑɣɑ tɔɣɔʋ.

6 Mɔlɑ nɩɩ-m teu kɛ́,

nɑ mɑ́ tɛ́ tɑɑsɩ təkɔŋɔkɔŋɔ.

7 Mɑ nəɣəsənɑ kɛ́ ɩsɩɩ wʋlɑɣɑ tɛtʋ tɑɑ sumɑɣɑ.

Mɑ wɛɛ kɛ́ ɩsɩɩ ncɑɑ tɑɑ sumɑɣɑ.

8 Mɑ sʋʋkɩ mɑɑ tooki.

Mɑ wɛ kɛ́ ɩsɩɩ sumɑɣɑ ŋkɑ

kɑ wɛ kɑ tike kɛ lɔpʋtʋ tɔɔ tɔ.

9 Pɑɑ ɩfemle nte mɑ kolontunɑɑ tʋʋkɩ-m kɛ́,

nɑ pɑ tɑɑ kpɑɑnɑ-m nɑ pɑ́ yɔɣɔtəɣɩ

nɑ pɑ́ tuuki nɑ pɑ́ yɑɑkɩ mɑ hətɛ.

10 Tɛtʋ kɛ mɑ tɔkɩ tɔɣɔnɑɣɑ lonte

nɑ mɑ ɩsəlʋm pɑləɣɩ mɑ kʋnyɔnyɔɔm tɑɑ.

11 Nyɑ́ pɑ́ɑ́nɑ́ kpɑnɑ-m.

Nyɑ́ tɑɑ huunɑ-m nɑ ń kpɛsɩ-m nɑ ń lɔɣɔ pooluŋ.

12 Mɑ kʋyɛɛŋ tɔŋɑ tuusuɣu kɛ́ ɩsɩɩ ɩsotom tɛɛkʋɣʋ tɔ,

nɑ mɑ́ wʋləɣɩ ɩsɩɩ nyɩɩtʋ.

13 Amɑ Tɑcɑɑ, nyɑ́ tɔkənɑ kɑwulɑɣɑ kɛ tɑm tɔɔ.

Wɑɑlɩ lʋlʋŋ loosi tənɑ kɑ́ tɔɔsɩ nyɑ́ tɔɔ.

14 N kɑ́ kʋlɩ nyɑ́ nɑɑsɩ tɑɑ nɑ ń wii Siyɔŋ nyə́mɑ kʋnyɔŋ.

Pə tɑɣɑ pʋlʋ, wɑɑtʋ tɑlɑɑ kɛ́.

Kʋyɑkʋ ŋku n kɑ lɑ-wɛɣɛ pɛɛlɛɛ tɔ kʋ kɔmɑɣɑlɛ.

15 Nyɑ́ təmlɛ nyə́mɑ tɑ, tə sɔɔlɑ nyɑ́ ɩcɑtɛ kɛ́.

Tə wɑkəlɑɑ, tə ncɑɑ wɛ-tʋɣʋ pətɔɔtəlɛ.

16 Piitimnɑɑ kɑ́ nyɑnɑ Tɑcɑɑ hətɛ

nɑ tɛtʋ tɑɑ ɑwulɑɑ tənɑ nyɑnɑ ɩ teeli.

17 Tɑcɑɑ tɑɣɑnɩ Siyɔŋ ɩcɑtɛ kɛ ŋmɑʋ,

nɑ ń hʋlɩ nyɑ́ teeli kɛ tə tɑɑ.

18 Tɑcɑɑ keŋ ŋkpɑŋʋɣʋ nɑ kʋnyɔntɔɣɔlʋ kʋsələmətʋ kɛ́.

Ɩɩ kisiɣi ɩ sələmʋɣʋ.

19 Pɑ́ ŋmɑɑ-təɣɩ wɑɑlɩ lʋlʋŋ tɔɔ.

Yəlɑɑ mpɑ pɩɩ ŋmɑ tɔ, pɑɑ sɑ Tɑcɑɑ.

20 Tɑcɑɑ wɛ ɩ tənɑŋŋ təcɑɣɑlɛ kɛ́ nɑ ɩ nyənəɣɩ.

Hɑtoo ɩsɔtɑɑ kɛ́ ɩ wɛɛ nɑ ɩ́ nyənəɣɩ tɛtʋ tɔɔ.

21 Sɩ ɩ nɩɩkɩ sɑləkɑtʋnɑɑ wulɑ.

Sɩ ɩ wɑɑsəɣɩ mpɑ pɑɑ kʋ tɔ.

22 Ɩlɛnɑ yəlɑɑ kpɑɑlɩ Tɑcɑɑ hətɛ kɛ Siyɔŋ tɑɑ

nɑ pɑ́ sɑmɩ-ɩ Yosɑlɛm tɑɑ.

23 Yəlɑɑ tənɑ kɑ́ koti təntəmlɛ.

Piitimnɑɑ kɑ́ koti nɑ pɑ́ luŋ Tɑcɑɑ.

24 Ɩ yɔkɑ mɑ toŋ kɛ mpɑɑʋ tɑɑ kɛ́

nɑ ɩ́ pɑsɑ mɑ kʋyɛɛŋ.

25 Mɑ tɔmɑ sɩ: Mɑ Ɩsɔ nyɑ́ wei n wɛ tɑm tɔɔ tɔ,

tɑɑ kɔɔlɩ-m mɑ kʋyɛɛŋ hɛkʋ tɑɑ.

26 Hɑtoo lɔŋtɑɑ kɛ́ n sɩɩ tɛtʋ kite,

ɩsɔtɔnʋɣʋ kɛ́ nyɑ́ niŋ kʋlɑpəm kɛ́.

27 Nyɑ́ wɛ tɑm tɔɔ kɛ́.

Amɑ pəlɛ pɩɩ sɑɑlɩ yem.

Pə kɔŋ tɛm kɛ́ ɩsɩɩ wontu kʋsusuutu,

nɑ ń lɑɣɑsɩ-wɩ ɩsɩɩ toko, ɩlɛnɑ pə lɑɣɑsɩ-wɩ.

28 Tɑcɑɑ nyɑ́ wɛ tɑm tɔɔ kɛ́ ḿpʋɣʋ,

nyɑ́ pɩɩsɩ fɛɩnɑ tənɑɣɑ.

29 Nyɑ́ təmlɛ nyə́mɑ tɑ́,

tɑ́ piyɑ kɑ́ tɔɣɔnɑ tɛtʋ,

nɑ pɑ lʋlʋŋ nyə́mɑ toŋ sɔɔsəɣɩ nyɑ́ ɩsɛntɑɑ.