Mpi tɔ, n kɛ́ kʋpɑŋ,

nɑ nyɑ́ sɔɔlʋɣʋ wɛ tɑm tɔɔ.

2 Mpɑ Tɑcɑɑ n wɑɑsɑɑ tɔ pɑ́ yɔɣɔtɩ.

Mpɑ n yɑpɑ kolontu niŋ tɑɑ tɔ pɑ́ tɔ sɩ: Tɑcɑɑ kɛ́ kʋpɑŋ.

3 N ləsɑ-wɛɣɛ tɛtʋnɑɑ tənɑ tɑɑ kɛ́,

pə kpɑɣɑʋ ilim təlɩɩlɛ nɑ pə tətʋlɛ,

nɑ pə ntɔɣɔŋ nɑ pə mpətəŋ tɔ.

4 Pɑ tɑɑ lɛlɑɑ tɔŋɑɣɑ pɑ tike kɛ́.

Pɑ tooliɣi wʋlɑɣɑ tɛtʋ tɑɑ.

Pɑɑ nɑɑkɩ ɩcɑtɛ nte tə tɑɑ pɑɑ cɑɣɑ tɔ.

5 Nyɔɣɔsɩ nɑ lʋkɔtʋ kʋkɑɣɑ-wɛ nɑ pɑ ɑpɑlʋtʋ yɔɔləɣɩ.

6 Ḿpʋɣʋ pɑ wiinɑ Tɑcɑɑ nyɑɣɑ pɑ lɑŋwɑkəllɛ tɑɑ,

nɑ ń wɑɑsɩ-wɛɣɛ pɑ ɑpɑlʋtʋ yɔɔlʋɣʋ tɑɑ.

7 Mpɑɑʋ kʋpɑŋkʋ tɑɑ kɛ́ n tiikɑ-wɛ.

N tɑnɑ-wɛɣɛ ɩcɑtɛ nte tə tɑɑ pɑɑ cɑɣɑ tɔ.

8 Pɑ́ sɛɛ Tɑcɑɑ nyɑɣɑ nyɑ́ kʋpɑntʋ tɔɔ,

nɑ piti təmɑ wenɑ n lɑkɩ yəlɑɑ tɔ ɑ tɔɔ.

9 Mpi tɔ, n kʋwɑ lʋkɔtʋ nyə́mɑ lʋkɔtʋ

nɑ ń hɑɣɑsɩ nyɔɣɔtʋnɑɑ.

10 Mpɑ pɑɑ wɛ səkpɛtʋɣʋ nɑ səm nɔɣɔ tɑɑ tɔ.

Pɑɑ wɛ wɑhɑlɑ tɑɑ kɛ́ nɑ ɑlukpɑlɑ kɛ pɑ nɔɔhɛɛ tɑɑ.

11 Mpi tɔ, pɑɑ kisɑ Tɑcɑɑ nyɑ́ nyɑ́ tɔm kɛ́.

Pɑ footɑ ɩsɔtɑɑ Ɩsɔ sɔsɔ lɑɣɑtʋ tɑsʋɣʋ.

12 Wɑhɑlɑ kɛ n nyəkɑ-wɛ nɑ pɑ́ hotiɣi.

Nɔɣɔlʋ fɛɩ sɩ ɩ́ wɑɑsɩ-wɛ.

13 Ḿpʋɣʋ pɑ wiinɑ Tɑcɑɑ nyɑɣɑ pɑ lɑŋwɑkəllɛ tɑɑ.

Ɩlɛnɑ ń wɑɑsɩ-wɛɣɛ pɑ ɑpɑlʋtʋ yɔɔlʋɣʋ tɑɑ.

14 Nɑ ń ləsɩ-wɛɣɛ səkpɛtʋɣʋ nɑ səm nɔɣɔ tɑɑ,

nɑ ń cɛ́ pɑ kʋhɔkəm.

15 Pɑ́ sɛɛ Tɑcɑɑ nyɑɣɑ nyɑ́ kʋpɑntʋ tɔɔ,

nɑ piti təmɑ wenɑ n lɑkɩ yəlɑɑ tɔ ɑ tɔɔ.

16 N pɛlɑ nyəɣəlʋɣʋ kʋsɛɛmʋɣʋ kʋtəkʋɣʋ

nɑ ń wɑkəlɩ pə kʋkɑləsəŋ.

17 Kʋmɛlɛməŋ yɑɑsi kʋtɑkɛɛsʋɣʋ tɔɔ,

pɑ kɑwɑlɑɣɑ sʋsɑ-wɛɣɛ wɑhɑlɑ tɑɑ.

18 Tɔɣɔnɑsɩ tənɑ lɩɩ-wɛɣɛ sɔŋ

hɑlənɑ pə ponɑ-wɛɣɛ səm nɔɣɔ tɑɑ.

19 Mpʋɣʋlɛ pɑ wiinɑ Tɑcɑɑ nyɑɣɑ pɑ lɑŋwɑkəllɛ tɑɑ

nɑ ń wɑɑsɩ-wɛɣɛ pɑ ɑpɑlʋtʋ yɔɔlʋɣʋ tɑɑ.

20 Ɩlɛnɑ ń yɔɣɔtɩ nɑ pə́ wɑɑ-wɛ

nɑ ń fiti-wɛɣɛ səm tɑɑ.

21 Pɑ́ sɑ Tɑcɑɑ nyɑqɑ nyɑ kʋpɑntʋ tɔɔ

nɑ piti təmɑ wenɑ n lɑkɩ yəlɑɑ tɔ ɑ tɔɔ.

22 Pɑ́ lɑ Tɑcɑɑ nyɑɣɑ sɛɛtʋ kɔtɑsɩ

nɑ pɑ́ kpɑɑlɩ nyɑ́ təmɑ nɑ kɑwilitɑsɩ.

23 Mpɑ pɑɑ wɛ teŋku tɑɑ kɛ kpɩɩləŋ tɑɑ

nɑ pɑ́ lɑkɩ pɑ tɑɑtəlɛ tɔ.

24 Pɛlɛ pɑ nɑwɑ mpi Tɑcɑɑ nyɑ́ n pəsəɣɩ lɑpʋ tɔ,

nɑ piti təmɑ nnɑ n lɑpɑ teŋku tɑɑ tɔ.

25 N yɔɣɔtɑ kʋyɔɣɔtʋ kɛ́ nɑ

kɑcuculɑɣɑ kʋsɩ teŋku holɑ.

26 Nɑ pə́ lɔɣɔ pɑ kpɩɩlʋɣʋ kɛ ɩsɔtɑɑ

nɑ pə́ tisi-kʋɣʋ lumɑŋ tɑɑ,

nɑ pə́ cɔɔsɩ-wɛɣɛ teu.

27 Pɑ ɩsɛ pilɑɑ ɩlɛnɑ pɑ́ sʋʋ seluɣu ɩsɩɩ sʋlʋnyɔɔlɑɑ

nɑ pɑ nyəm kɛ teŋku tənɑ sɑɑlɩ yem.

28 Mpʋɣʋlɛ pɑ wiinɑ Tɑcɑɑ nyɑɣɑ pɑ lɑŋwɑkəllɛ tɑɑ

nɑ ń wɑɑsɩ-wɛɣɛ pɑ sɔɣɔntʋ tɑɑ.

29 Ɩlɛnɑ ń səŋsɩ kɑcuculɑɣɑ

nɑ teŋku holɑ hɛɛ təli.

30 Pɑ lɑŋlɛ hɛɛnɑ teŋku hɛɛʋ mpɩ.

Ɩlɛnɑ Tɑcɑɑ tɛsənɑ-wɛ nɑ ɩ́ ponɑ-wɛɣɛ

timpi pɑ pukɑɣɑ tɔ.

31 Pɑ́ sɛɛ Tɑcɑɑ nyɑɣɑ nyɑ́ kʋpɑntʋ tɔɔ,

nɑ piti təmɑ wenɑ n lɑkɩ yəlɑɑ tɔ ɑ tɔɔ.

32 Pɑ́ sɑ-ŋ timpi yəlɑɑ kpeɣelɑɑ tɔ

nɑ pɑ́ pʋɣʋlɩ-ŋ sɔsɑɑ kotuɣu tɑɑ.

33 Nyɑ́ yekinɑ nɑ pusi nyɔɔkɩ,

nɑ sɛɛlɑɑ nɑ́ɑ́ wʋləɣɩ.

34 Nɑ ń pəsəɣɩ mʋsʋŋ tɛtʋ kɛ tɛsəpɑɣɑ

kɛ tə yəlɑɑ kɑwɑlɑɣɑ tɔɔ.

35 N lɑkɩ nɑ wʋlɑɣɑ tɛtʋ pəsɩ lɩɩlɛ

nɑ lʋm sɛɛlɑɑ wɛɛ timpi lʋm nyɔɣɔsɩ wɛɛ tɔ.

36 Nɑ ń sɩɩ lɑŋlɑɑ kɛ tənɑ

nɑ pɛlɛ pɑ́ ŋmɑ́ ɩcɑtɛ nte tə tɑɑ pɑɑ cɑɣɑ tɔ.

37 Nɑ pɑ́ tuu tɑwɑ nɑ pɑ́ sɔ tɩɩŋ wei

pɑ yɑɑ sɩ lɛsɛŋnɑɑ tɔ nɑ ɩ́ lʋlɩ pee kɛ sɔsɔm.

38 Tɑcɑɑ n kooliɣi-wɛɣɛ kʋpɑntʋ kɛ́ nɑ pɑ́ hukiɣi sɔsɔm,

n tɑ pɑsɑ pɑ tɔlɑ.

39 Ɩlɛnɑ lɑŋʋɣʋ nɑ wɑhɑlɑ nɑ kʋnyɔntɔɣɔlɛ

nyəkɩ lɛlɑɑ nɑ pə́ pɑsɑ-wɛ.

40 Tɑcɑɑ n yeki nɑ pɑ́ footiɣi kɑsɑɣɑmpiyɑ.

N yeki nɑ pɑ cɔɔkɩ wʋlɑɣɑ tɛtʋ tɑɑ, pɑ fɛɩ tɛ́.

41 Amɑ n wɑɑsəɣɩ kʋnyɔntʋnɑɑ kɛ wɑhɑlɑ tɑɑ,

nɑ pɑ tɛɛsɩ huki ɩsɩɩ kɑləkəŋ.

42 Yəlɑɑ kʋpɑmɑ nɑɑkɩ Tɑcɑɑ nɑ pɑ́ ŋmɑɑləɣɩ.

Amɑ ɩsɑɣɑtʋ təkəɣɩ nɔɔsɩ.

43 Yʋlʋ ləmɑɣɑsɛɛ tʋ ɩ́ lɑ lɑɑkɑlɩ nɑ yɑɑsinɑɑ mpɛ

nɑ ɩ́ pɛɛkɩ sɩ ɩ́ cɛkənɑ Tɑcɑɑ kʋpɑntʋnɑɑ.