Tɑɑ tʋ-tʋ yoo.

Amɑ tʋ teeli kɛ nyɑ́ hətɛ.

Mpi tɔ, n kɛ́ kʋpɑŋ nɑ tɑmpɑnɑ tʋ.

2 Pepe tɔɔ kɛ́ piitimnɑɑ pɔɔsəɣɩ sɩ:

Leɣe mə Ɩsɔ ɩnɩ ɩ wɛɛ?

3 Tɑ Ɩsɔ wɛ ɩsɔtɑɑ kɛ́.

Ɩ lɑkɩ mpi ɩ sɔɔlɑɑ tɔ.

4 Amɑ mpɛ pɑ tɩɩŋ kɛ wʋlɑnɑɑ nɑ liɣitee

nnɑ yəlɑɑ niŋ lupɑ tɔɣɔ.

5 Pɑ tɩɩŋ ɩnɩ ɩ wɛnɑ nɔɔsɩ, ɩlɛ ɩɩ yɔɣɔtəɣɩ nɑtəlɩ.

Pə́cɔ ɩ wɛnɑ ɩsɛ, ɩɩ nɑɑkɩ pʋlʋ.

6 Ɩ wɛnɑ ŋkpɑŋŋ, ɩɩ nɩɩkɩ nɑtəlɩ.

Pə́cɔ ɩ wɛnɑ mɩɩnɑ, ɩɩ nɩɩkɩ sɔŋ.

7 Ɩ wɛnɑ niŋ, ɩɩ pəsəɣɩ nɑ ɩ́ tokinɑ pʋlʋ.

Pə́cɔ ɩ wɛnɑ nɔɔhɛɛ, ɩɩ tɔŋ.

Pəyele ɩɩ tɩɩ mʋtəɣɩ ɩ luɣu tɛɛ kɛ́ mʋtʋɣʋ mɑɣɑmɑɣɑ.

8 Mpɑ pɑ luki tɩɩŋ ɩnɩ nɑ pɑ́ tʋɣʋ-ɩ nɑɑni tɔ,

pɑ́ wɛɛ ɩsɩɩ tɩɩŋ ɩnɩ.

9 Ɩsɛɣɛlɩ nyə́mɑ, ɩ́ pɛtɩ mə təɣɩ Tɑcɑɑ,

ɩnɩ ɩ teŋnɑ-mɛ nɑ ɩ́ kentiɣi mə tɔɔ.

10 Alɔŋ təyɑɣɑ nyə́mɑ mɛ ɩ́ pɛtɩ mə təɣɩ Tɑcɑɑ,

ɩnɩ ɩ teŋnɑ-mɛ nɑ ɩ́ kentiɣi mə tɔɔ.

11 Mpɑ mɛ ɩ́ nyɑŋnɑ Tɑcɑɑ tɔ, ɩ́ pɛtɩ-ɩ mə tɩ.

Ɩnɩ ɩ teŋnɑ-mɛ, nɑ ɩ́ kentiɣi-mɛ.

12 Tɑcɑɑ ɩɩ sɔɔkɩ tɑ́ tɔm kɛ pɑɑ pəcɔ.

Ɩ kɑ́ kooli tɑ́ tənɑɣɑ kʋpɑntʋ kɛ́.

Ɩ kɑ́ kooli Ɩsɛɣɛlɩ nyə́mɑ kɛ kʋpɑntʋ.

Ɩ kɑ́ kooli Alɔŋ nyə́mɑ kɛ pɑ nyəntʋ.

13 Ɩ kɑ́ kooli kʋpɑntʋ kɛ mpɑ pɑ nɩɩkənɑ-ɩ tɔ,

pɑɑ sɔsɑɑ pɑɑ piyɑ.

14 Tɑcɑɑ ɩ́ yele nɑ mə lʋlʋŋ huki.

Ɩ́ lɑ nɑ mə nɑ mə piyɑ ɩ́ wɛɛ pɑɣɑlɛ.

15 Tɑcɑɑ wei ɩ lɑpɑ ɩsɔtɔnʋɣʋ

nɑ ɑtɛ tɔ ɩ́ kooli-mɛɣɛ kʋpɑntʋ.

16 Tɑcɑɑ tike tənnɑ ɩsɔtɔnʋɣʋ

ɩlɛnɑ ɩ hɑ yəlɑɑ kɛ tɛtʋ.

17 Sətɑɑ ɩɩ pəsəɣɩ nɑ pɑ́ sɛɛ Tɑcɑɑ.

Mpɑ pɑ wɛ ɑtɛtəlɛ tɑɑ timpi sumɑ tiɣitiɣi tɔ

Pɑɑ pəsəɣɩ nɑ pɑ́ sɛɛ Ɩsɔ.

18 Amɑ tɑ́ɑ́ sɑ Tɑcɑɑ kɛ pə kpɑɣɑʋ nɔɔnɔɔ tɔ,

hɑlənɑ tɑm tɔɔ.

Ɩ́ sɑ Tɑcɑɑ.