9
Ɩsɔ nɑ ɩ yǝlɑɑ kʋlǝsɑɑ pɑ tɔm
Tɑmpɑnɑ kɛ mɑ yɔɣɔtǝɣɩ, mɑɑ looliɣi, mɑ kɛ́ Kilisiti yʋlʋ tɔ pǝ tɔɔ. Mɑ lɑŋlɛ ɩɩ tɔɔ pɑɑ pǝcɔ mɑɣɑmɑɣɑ sɩ yɑɑ mɑ looliɣi. Mpi tɔ Ɩsɔ Feesuɣu Nɑŋŋtʋ hʋ́lǝ́ɣɩ́-m mpiɣi mɑ tɑɑ tɔɣɔ mɑ tǝŋǝɣɩ. Pǝ tɑɣɑ pʋlʋ tɔɔ, mɑ lɑŋlɛ wɑkǝlɑ sɔsɔm nɑ pǝ́ cɔɔsǝɣɩ-m tɑm. Hɑlɩ pǝ cɑɣɑ-m ɩsɩɩ pɩɩ kisɑɣɑ, Ɩsɔ kɑ kisɑ-m nɑ pǝ́ yɑsɩ mɑ́ nɑ Kilisiti, nɑ pǝ́ kpɑɣɑ mɑ tɛɛtʋnɑɑ nɑ pǝ́ mǝŋnɑ mɑ lonte. Mɑ piitim mɑɣɑmɑɣɑ nyǝ́mɑ tɔm kɛ mɑ tɔŋ. Pɑ kɛ́ Ɩsɛɣɛlɩ nyǝ́mɑ, nɑ Ɩsɔ lɑpɑ-wɛɣɛ ɩ pǝyɑlɑɑ, nɑ ɩ yelɑɑ nɑ pɑ́ nɑɑkɩ ɩ teeli. Ɩ́ nɑ-wɛ pɑ pɛɛlɑ nɔɣɔ, nɑ ɩ́ cɛlɛ-wɛɣɛ kʋsǝsɩɩtʋ. Nɑ ɩ́ hʋ́lɩ́-wɛɣɛ Ɩsɔ sɛɛtʋ, nɑ ɩ́ heeli-wɛɣɛ mpi mpi ɩ kɑ́ lɑ-wɛ tɔ. Pɑ kɛ́ tɑ́ kite cɑɑnɑɑ kʋlʋlɑɑ. Ye yʋlʋwɛɛtʋ tɔm tɑɑ ɩlɛ, Kilisiti kɛ́ pɑ piitim tʋ. Ɩnɩ ɩ ŋmɑkǝlǝnɑ pǝ tǝnɑ, ɩnɩ ɩ kɛnɑ Ɩsɔ wei pɑɑ sɑŋ tɑm tɔ. Ɩsɔ ɩ́ yele nɑ pǝ́ lɑ mpʋ.
Pǝ tɑɣɑ ɩsɩɩ mɑ yɔɣɔtǝɣɩ sɩ mpi Ɩsɔ tɔmɑ sɩ ɩ kɑ́ lɑ tɔ pǝ cotɑɑ. Pǝ tɑɣɑ Ɩsɛɣɛlɩ nyǝ́mɑ tǝnɑ kɛnɑ Ɩsɛɣɛlɩ nyǝ́mɑ. Pǝyele Apǝlɑhɑm kʋlʋlɑɑ tɑ kɛ Apǝlɑhɑm piyɑ mɑɣɑmɑɣɑ. Pǝ tɑɣɑ pʋlʋ tɔɔ, Ɩsɔ kɑ heelɑ-ɩ kɛ́ sɩ: Mpɑ pɑɑ lɩɩnɑ Ɩsɑɑkɑ tɑpʋɣʋ tɛɛ tɔ mpɛ pɑ tike tǝkoŋ kɛnɑ nyɑ́ piyɑ tǝsiɣisiɣi. Pǝ nyʋɣʋ ntɛ́ sɩ, pǝ tɑɣɑ mpɑ pɑ mɔlɑɑ nɑ pɑ́ lʋlɩ tǝfolo kɛ yem tɔ mpɛ pɑ kɛnɑ Ɩsɔ piyɑ. Amɑ mpɑ Ɩsɔ kɑ tɔmɑ sɩ ɩ kɑ hɑ-ɩ nɑ pɑ́ lʋlɩ-wɛ tɔ mpɛɣɛ pɑ nyǝnǝɣɩ ɩ kʋlʋlɑɑ tǝsiɣisiɣi. Wɑɑtʋ wei ɩ heelɑɣɑ-ɩ mpi ɩ kɑ lɑpɩ-ɩ tɔ ɩ tɔmɑɣɑ sɩ: Ye pǝ kɔmɑ nɑ pǝ́ tɑlɑɑ, mɑɑ mǝlɩ nɑ Sɑɑlɑ kɑ́ hiki ɑpɑlʋ pǝyɑɣɑ.
10 Pǝ tɑɣɑ pǝ tǝnɑɣɑlɛ. Lɛpɛkɑ piyɑ nsɩ sɩ nɑɑlɛ sɩ kɑɑ cɑɑ kɛ́. Ɩnǝɣǝlɛ tɑ́ piitim cɑɑ sɔsɔ Ɩsɑɑkɑ. 11 Ɩsɔ lǝsʋɣʋʋ yǝlɑɑ tɔ, pǝ tɑɣɑ sɩ ɩ nyǝnǝɣǝnɑ mpi pɑ lɑkɩ tɔ, ɑmɑ ɩ mɑɣɑmɑɣɑ ɩ nɔkʋɣʋ kiŋ kɛ pǝ wɛɛ. 12 Ɩsɔ heelɑ Lɛpɛkɑ nɑ ɩ́ tɑ tɩɩ lʋlǝtɑ ɩ piyɑ sɩ: Wɑɑlɩ nyǝŋkɑ kɑ́ tɔɣɔnɑ sɔsɔɔntʋ. Piyɑ nsɩ sɩ tɑ nyǝntɑ kʋpɑntʋ nɑ ɩsɑɣɑtʋ. Ɩsɔ lɑpɑ mpʋ sɩ ɩ́ hʋ́lɩ́ sɩ mpi ɩ sɩɩwɑ tɔ, mpǝɣɩ ɩ tǝŋǝɣɩ. 13 Hɑlɩ pɑ ŋmɑɑwɑ ḿpʋ́ɣʋ́ Ɩsɔ Tɔm tɑɑ sɩ:
Mɑ luɣu lɑpɑ Yɑkɔpʋ nɑ mɑ́ kisi Ɩsɑʋ.
14 Suweɣelɛ tɩɩ yɔɣɔtɩ ɩlɛ, Ɩsɔ ɩɩ tǝŋǝɣɩ tɑmpɑnɑ yɑɑ ɩsǝnɑ? Aɑɩ, pǝ tɑɣɑ mpʋ se, pɑɑ pǝcɔ. 15 Ɩsɔ kɑ heelɑ Moisi sɩ: Mɑ́ nɔkɑ wei ɩ pǝtɔɔtǝlɛ wiiu mɑ wii, mɑ́ nɔkɑ wei kɛ́ suulu hʋ́lʋ́ɣʋ́ mɑ hʋ́lɩ́-ɩ.
16 Ye mpʋ ɩlɛ pǝ tɑɣɑ yʋlʋ nɔkʋɣʋ yɑɑ ɩ lʋpʋ tɔɔ. Amɑ Ɩsɔ wei ɩ wiiki pǝtɔɔtǝlɛ tɔ ɩ kiŋ tike kɛ́ tǝkoŋ. 17 Pɑ tɔmɑ Ɩsɔ Tɔm tɑɑ sɩ Ɩsɔ tɔmɑ Icipiti wulɑʋ sɔsɔ tǝfoo sɩ: Mpi pǝ mɑɣɑmɑɣɑ pǝ nyʋɣʋ tɔɔ mɑ tʋ-ŋ kɑwulɑɣɑ tɔɣɔlɛ sɩ yǝlɑɑ ɩ́ nɑnɑ mɑ tomɑ kɛ nyɑ́ kiŋ, nɑ mɑ hǝtɛ yɑɑ ɑntulinyɑ tǝnɑ tɑɑ. 18 Mpʋ tɔ, wei Ɩsɔ nɔkɑɑ tɔ pʋntʋ pǝtɔɔtǝlɛ kɛ ɩ wiiki. Ye ɩ nɔkɑ wei kɛ́ kɑŋkɑntɛ tʋɣʋ ɩ tʋ ɩ́lɛ́.
Ɩsɔ pɑ́ɑ́nɑ́ nɑ ɩ pǝtɔɔtǝlɛ pǝ tɔm
19 Ntɑnyɩ mǝ tɑɑ nɔɣɔlʋ nɑ́ tɔŋ sɩ: Ye pǝ wɛ mpʋ ɩlɛ, pepe tɔɔ kɛ́ Ɩsɔ tɑsǝɣɩ sɩ yǝlɑɑ lɑpɑ tɑɑlɩ? Awe pǝsǝɣɩ nɑ ɩ́ kɑɣɑtɩ-ɩ sɩ ɩ́ tɑɑ lɑ ɩ luɣu nyǝntʋ? 20 Yʋlʋ nyɑ́, ɑwe kɛ-ŋ nɑ ń kpɛɛsǝnɑ Ɩsɔ? Cʋɣʋ nyǝnɑɣɑ pǝsǝɣɩ nɑ kɑ́ pɔɔsɩ kɑ ŋmɑlʋ sɩ pepe tɔɔ kɛ́ n ŋmɑ-m nɑ mɑ́ wɛ ɩsǝntɔ? 21 Tiisi ŋmɑlʋ ɩ́ sɔɔlǝnɑ cʋɣʋ kɛ ɩsǝnɑ ḿpʋ́ɣʋ́ ɩ lɑkɩ-kʋ. Ɩ pǝsǝɣɩ nɑ ɩ́ cosi cʋɣʋ ŋkʋ, nɑ ɩ́ sɔɔlɑɑ ɩ ŋmɑnɑ puluku, nɑ pǝ́ kɑɑsɩ nɑ ɩ́ ŋmɑnɑ ntoole.