Yosɑlɛm ɩcɑtɛ yǝlɑɑ mpɑ mɛ

ɩ́ lɑkɩ ɩsɑɣɑtʋ tɔ.

Ɩ́ ŋmɑkǝlǝɣɩ lɛlɑɑ,

pǝyele ɩ́ kʋlǝɣɩ Tɑcɑɑ tɔɔ tɔ.

Mpusi wɛ mǝ tɔɔ kɛ́.

2 Mpi tɔ, ɩ́ tɑ nɩɩ Tɑcɑɑ tɔm.

Ɩ́ kisɑ ɩ kpɑɑlʋɣʋ mpi ɩ kpɑɑlɑ-mɛ tɔ.

Pǝyele ɩ́ tɑ́ tʋ-ɩ nɑɑni,

ɩ́ tɑ́ pɛɛkɩ sɩ Ɩsɔ ɩ́ sǝnɑ-mɛ.

3 Mǝ nyʋɣʋ nyǝ́mɑ wɛ kɛ́ ɩsɩɩ

tɔɣɔlɑsɩ nsi sɩ mʋ pɑ́ɑ́nɑ́ tɔ.

Mǝ hʋʋlɑɑ nɑ́ wɛ ɩsɩɩ sʋnsʋmǝŋ

likuɣu nɑ ɩɩ tɔɔsǝɣɩ cele tɔɔ tɔ.

4 Mǝ Ɩsɔ kʋyɔɣɔtʋtʋ tɛlǝsǝlɑɑ ɩɩ pɑɑsǝɣǝnɑ pɑ tǝmlɛ.

Pɑ kooki yem nɑ pɑ́ kisiɣi pɑ tilitu.

Mǝ kɔtǝlɑɑ nɑ́ nyǝnǝɣɩ Ɩsɔ nyǝm kɛ yem kɛ́

nɑ pɑ́ yɔkǝɣɩ ɩ kiiu.

5 Tɑcɑɑ wɛ ɩcɑtɛ tɑɑ kɛ́,

nɑ ɩ́ tɔkɩ kɑwulɑɣɑ nɑ siɣisuɣu.

Ɩɩ lɑkɩ ɩsɑɣɑtʋ.

Ɩ tǝŋǝɣɩ tɑmpɑnɑ kɛ́,

nɑ ɩ́ hʋʋkǝnɑ pɑɑ tɑnɑŋ ŋku.

Pɑɑ nɑ mpʋ tɔ, ɑsɑɣɑɑ fɛɩ fɛɛlɛ.

6 Ḿpʋ́ɣʋ́ Tɑcɑɑ yɔɣɔtɑɑ sɩ:

Mɑ tɛmɑ piitimnɑɑ tǝcu kɛ́ ḿpʋ́ɣʋ́ kpiisuɣu.

Mɑ yɔkɑ pɑ koloosi ɑcɑlɛɛ.

Mɑ wɑkǝlɑ pɑ hɑpɛɛ.

Tɔntɑɑ mɑɣɑmɑɣɑ fɛɩ tɔtɔ.

Pɩɩ kpiisi pɑ ɑcɑlɛɛ,

nɔɣɔlʋ kɑɑ wɛɛ.

7 Mɑ tɔŋɑɣɑ sɩ,

Yosɑlɛm nyǝ́mɑ mɛ ɩ́ kɑ́ nyɑnɑ-m,

ɩ́ kɑ́ nɩɩ mɑ kpɑɑlʋɣʋ.

Ɩlɛ mɑ kɑɑ yɔkɩ mǝ tǝcɑɣɑlɛ ɩsɩɩ mɑɑ kɑlǝnɑ-mɛ tɔ.

Amɑ mǝ mǝlɑɑ kɛ́ nɑ ɩ́ tɛlǝsǝɣɩ mpǝle.

8 Ɩ tɑŋ kʋyɑkʋ ŋku mɑɑ kɔɔ mǝ wɑɑlɩ ɩsɩɩ tɔɣɔlɑɣɑ tɔ.

Mɑ tʋ mɑ tɑɑ sɩ,

mɑ kotiɣi piitimnɑɑ nɑ kɑwulɑsɩ.

Mɑɑ yele nɑ mɑ pɑ́ɑ́nɑ́ nyɑɣɑ pɑ nɑ

ɑntulinyɑ tǝnɑ ɩsɩɩ kɔkɔ.

9 Ḿpʋ́ɣʋ́ Tɑcɑɑ yɔɣɔtɑɑ sɩ:

Mɑɑ lɑɣɑsɩ yǝlɑɑ,

mɑɑ nyɑɑlɩ mǝ ɩsɑɣɑtʋ.

Ɩlɛnɑ ɩ́ sɛɛ-m nɑ lotu kʋlʋmtʋ.

10 Pɑɑ mɑ yǝlɑɑ mpɑ mɛ ɩ́ yɑwɑ nɑ

ɩ́ tɛɛ Ɩtiyopii tɔɔ tǝcɑɣɑcɑɣɑ tɔ.

Ɩ́ kɑ́ kɔɔ nɑ ɩ́ lɑ-m kɔtɑsɩ.

11 Kʋyɑŋku tɔ mɑ yǝlɑɑ kɑɑ wɛɛnɑ

ɩsǝnɑ pɑɑ pǝntǝnɑ-m tɔ pǝ fɛɛlɛ.

Mɑɑ lǝsɩ mpi pǝ lɑkɩ-mɛɣɛ kɑlɑmpɑɑnɩ nyǝ́mɑ tɔ.

Ɩlɛnɑ ɩ́ yele mǝ tǝɣɩ hɔm kɛ mɑ pʋɣʋ nɑŋŋ nyǝŋkʋ tɔɔ.

12 Mɑɑ kenti mǝ tɑɑ mpɑ pɑ pɑsǝɣɩ pɑ tɩ tɔ

nɑ kʋnyɔntʋnɑɑ mpɑ pɑ tɛɛlǝɣɩ-m tɔ pɑ tɔɔ.

13 Ɩsɛɣɛlɩ nyǝ́mɑ mɛ mǝ kɑkɑɑsɑɣɑ

kɑɑ tɑsɑ mpi pǝ tɑ siɣisi tɔɣɔ lɑpʋ.

Pǝyele ɩ́ kɑɑ looli,

yɑɑ ɩ́ tʋsɩ nɔɣɔlʋ.

Ɩ́ kɑ tɔkɩ kɛ́ nɑ ɩ́ hɛɛsɩ,

nɔɣɔlʋ kɑɑ nyɑɑsɩ-mɛ.

14 Yosɑlɛm ɩcɑtɛ yǝlɑɑ,

nɑ Ɩsɛɣɛlɩ nyǝ́mɑ mɛ,

mǝ tǝnɑ mǝ lɑŋɑ ɩ́ hʋlʋmɩ,

Ɩ́ yɔɔlǝnɑ mǝ lotu tǝnɑ.

15 Tɑcɑɑ yelɑ mǝ ŋkpɑŋʋɣʋ kɛ hɔm.

Ɩ tɔɣɔnɑ mǝ kolontunɑɑ.

Ɩsɛɣɛlɩ nyǝ́mɑ wulɑʋ Tɑcɑɑ wɛ mǝ wɑɑlɩ kɛ́.

Pǝ fɛɩ sɩ ɩ́ nyɑnɑ wɑhɑlɑ nɔɣɔlʋ.

16 Kʋyɑkʋ ŋkʋɣʋ yǝlɑɑ kɑ́ tɔ sɩ:

Yosɑlɛm nyǝ́mɑ mɛ,

ɩ́ tɑɑ nyɑ́,

mǝ ɑpɑlʋtʋ ɩ́ tɑɑ le.

17 Tɑcɑɑ mǝ Ɩsɔ wɛ mǝ wɑɑlɩ,

nɑ ɩ toŋ.

Ɩ kɑ́ yele nɑ ɩ́ lɑ ɑkɑnɑɑ.

Mǝ tɔɔ kɛ́ ɩ lɑŋlɛ hʋlʋmɑɑ.

Ɩ sɔɔlɑ-mɛɣɛ nɑ ɩ́ hɑɑkɩ-mɛɣɛ weesuɣu kʋfɑlʋɣʋ.

18 Ḿpʋ́ɣʋ́ Tɑcɑɑ yɔɣɔtɑɑ sɩ:

Yosɑlɛm yǝlɑɑ mpɑ mɛ ɩ́ hɑtǝlǝnɑ ɑcimɑ,

nɑ mǝ lɑŋlɛ wɑkǝlɑɑ tɔ.

Mɑɑ kpeɣeli-mɛ nɑ mɑ́ kɛɛlɩ mǝ fɛɛlɛ.

19 Wɑɑtʋ ɩnǝɣɩ mɑɑ hɔ mǝ muɣullɑɑ ŋkpɑŋŋ.

Mɑɑ lɑ kɔɔlɛ kɛ mpɑ pǝ kʋwɑ tɔ.

Mɑɑ mǝŋnɑ mǝ yǝlɑɑ mpɑ pɑ kpɑwɑ yomle tɔ.

Mɑɑ yele nɑ mǝ kʋtʋɣʋ pǝsɩ ɩsɑntɛ.

20 Ɩlɛnɑ mɑ́ kpeɣeli-mɛ nɑ mɑ́ kɔnɑ.

Mɑɑ tʋ-mɛɣɛ teeli nɑ mɑ́ kʋsɩ mǝ nyʋɣʋ

kɛ ɑtɛ yǝlɑɑ tǝnɑ tɑɑ.

Tɑcɑɑ mɑ́ mɑ yɔɣɔtǝnɑ mpʋ.