Bo̱r-u̱s tet
Yan-gu̱t-de u̱n yan-dor Ye̱so
u̱n yan-m-se̱nge̱ ne̱
u̱n yan-m-se̱nge̱ ne̱
1 Hun-ne̱ ro̱ m-ze̱e̱, “U̱rege̱ ne̱t ro̱ u̱r-go̱p wu̱ waragte̱ ko-wan-gu̱t-de u̱n yan-dor Ye̱so, wu̱ no̱mo̱g go̱p-de u̱n kashi m-se̱nge̱.” Ka ma-to̱ nip-o̱. 2 Remen kaane̱, myet ne̱t-wu̱ co̱ne̱ wan-gu̱t-de u̱n yan-dor Ye̱so à, kaane̱ she'et-de u̱n wu̱ he m-ma'as:
U̱ntaase a kum gom-de u̱r-re̱e̱b be-de u̱n wu̱,
Wu̱ e̱se̱ be-de u̱n ne'a u̱n wu̱ cot à,
Wu̱ hokse̱ garamse̱ u̱n hi u̱n de u̱n wu̱ à,
Wan-barag-se u̱r-bon,
Hun-ne̱ ya'as wu̱ u̱t-go̱s, remen wu̱ she'ette̱ u̱r-bon ne̱,
Wa-m-was u̱n hamat-ne̱ ne̱ n-me̱ u̱n hur-o̱ u̱n wu̱,
Wu̱ he m-hoks u̱r-yoos à,
3 Ba ko-wa-m-swo̱ á,
Wu̱ ro̱ u̱n hoob-o̱ u̱t-ma á,
Amba yan-gwe̱gwe̱r-mo̱ u̱r-hi,
Wu̱ ro̱ u̱t-ween á,
Wu̱ ro̱tte̱ yish-ye̱ u̱n hwo̱r á,
4 Wu̱ ro̱ u̱n hoks m-garamse̱ u̱n hur-o̱ u̱n wu̱ u̱r-bon ne̱ à,
Wu̱ ro̱ m-rwo̱ u̱n yakar-ye̱ u̱n wu̱ ye̱ no̱mu̱ wu̱ o-do̱ro̱tte̱, ye̱ 'ye wu̱ u̱t-go̱s n-me̱ u̱n ko̱ yo ke rii-yo à. 5 (U̱rege̱ ne̱t hoks m-garamse̱ hur-o̱ u̱n wu̱ á, ¿re wu̱ he m-nom wu̱ hokste̱ gu̱t-de u̱n hun-ne̱ ye̱ Shir?)
6 Ba wu̱ go̱kse̱ Ye̱so ba m-go̱s á. (U̱n ya ka á, nu̱-mo̱ u̱r-hi a ru̱ wu̱ cu̱wu̱t swo̱ u̱r-ko̱o̱b u̱ntu̱n ko-Gwo̱mo-wu̱ u̱n ya-u̱t-ko̱t.)
7 Wu̱ ro̱tte̱ be-de u̱t-re̱e̱b á. Kaane̱ depe̱ komo hun-ne̱ ye̱ ro̱ yan-dor Ye̱so á, ye̱ ro̱ wu̱ m-tan u̱n jin-u̱r so̱-de. Wu̱ ma'as kaane̱ remen u̱ntaase wu̱ he̱'e̱be̱ n-me̱ u̱n ce̱e̱b-o̱ u̱n ko-Gwo̱mo-wu̱ u̱n ya-u̱t-ko̱t, wu̱ ho̱ge̱ m-'e̱.*3:2-7 Hyen komo: Titu 1:6-9.
Ya-m-gu ye̱ depe̱ se̱nge̱-mo̱ Shir à
8 Yan-m-se̱nge̱ be-de yan-dor u̱n ce u̱n ye̱, kaane̱ she'et-de u̱n ye̱ he m-ma'as:
Ye̱ hokse̱ garamse̱ u̱n hi u̱n de u̱n ye̱ à.
Ye̱ warag yan-ma-u̱t gaan.
Ye̱ ro̱ m-swo̱ á.
Ye̱ ro̱tte̱ su̱u̱b-o̱ u̱n hwo̱r á.
9 Komo ye̱ bu̱p she̱r-mo̱ u̱n ye̱ u̱n hur-u̱r gaan.
10 Rii-yo no̱ de̱gt ne̱t ko-wan-m-se̱nge̱ se̱ a me'este̱ wu̱, no̱ hyane̱ wu̱ ro̱tt be-de u̱t-re̱e̱b á, ka da-de wu̱a hoks m-no̱m u̱n se̱nge̱-mo̱ u̱n yan-m-se̱nge̱.
11 Kaane̱ komo ne'a-ne̱ ye̱ u̱n ye̱ warag kashi u̱n ne'a-ne̱ ye̱ u̱n ba u̱r-re̱e̱b, ba komo ya-u̱t-we̱ á. Amba ye̱ hokse̱ she'et-de u̱n ye̱ à. Hun-ne̱ ro̱ ye̱ m-'wo̱s u̱n ma-u̱t gaan ne̱ ko̱yanda.
12 Ko-wan-m-se̱nge̱ n-me̱ u̱n den-o̱ Shir, ko̱ wu̱ ke wu̱ e̱s be-de u̱n ne'a u̱n wu̱ cot. Komo wu̱ hoks garamse̱ u̱n hur-o̱ u̱n wu̱ u̱n yakar-ye̱ u̱n wu̱ ne̱ u̱r-bon ne̱. 13 Hun-ne̱ ro̱ m-'ya u̱n yan-m-se̱nge̱-ye̱ no̱me̱ se̱nge̱-mo̱ u̱r-bon à m-se̱k. Remen kaane̱, ka yan-m-se̱nge̱-ye̱, ye̱a hoks ru̱re̱ u̱n hun-ne̱ ma-to̱ m-she̱r be-u̱r Kiristi Ye̱so, ba o-gye̱r.
Ma-to̱ ro̱ wukusse̱
n-me̱ yan-dor Ye̱so à
n-me̱ yan-dor Ye̱so à
14 Da-o̱ me̱ wo̱ u̱n gene̱ u̱n kà taku̱rda-o̱ à, me̱ o-sakto̱ o̱ m-habe̱ u̱m hyenet wo̱ ba m-go̱s. 15 Amba me̱ nome̱ m-it, kà taku̱rda-o̱ he wo̱ m-kute̱ bo̱ hun-ne̱ he m-she'et à be-de yan-dor o-Shir. Hun-ne̱ ye̱ Shir ye̱ ro̱ u̱n den-o̱ Shir wan-ho̱o̱g à. Kà hun-ne̱ ye̱, ye̱ ro̱ u̱ntu̱n caar-yo o-cin u̱n 'wu̱n-de o-nip ne̱. 16 Nip-o̱, m-she̱r be-de Shir ro̱ m-'wo̱ns ne̱ ko̱ de nomte̱ se ken rem-se ro̱ko̱n wukusse̱ à:
Ye̱so haante̱ n-me̱ o-wu̱r u̱ntu̱n o̱ ma na,
Ku̱kt-o̱ Shir kutute̱ na wu̱ kashi u̱n ne̱t-wu̱.
Yan-to̱m-ye̱ Shir ye̱ hyanag wu̱.
Yan-dor Ye̱so ko̱'o̱te̱ ma-to̱ u̱n wu̱
be-de hun-ne̱ kap ho̱no o-dak.
Hun-ne̱ go̱kste̱ kà ko̱'o̱t-o̱ be-u̱t-be ho̱no o-dak kap.
Shir de̱ku̱ wu̱ ha-m o̱ n-To̱n be-de m-se̱ps.