Bo̱r-u̱s tet
Ye̱so jiishte̱ Mosa
1 Remen kaane̱, tu no̱ yish be-u̱r Ye̱so, wu̱ Shir to̱mne̱, wu̱ waragte̱ na ko-Gwo̱mo-wu̱ u̱n ko̱n-se Shir u̱n ru̱ru̱ u̱n ye̱ ken ye̱ ne̱ u̱n yo te̱ she̱rte̱ à. 2 Ye̱so no̱mo̱g o-nip be-de Shir wu̱ daage̱ wu̱ à, u̱n ko̱ yo ke rii-yo, yo Shir zee wu̱ nom à, bo̱ Mosa no̱me̱ o-nip be-de u̱n se̱nge̱-mo̱ Shir à, be-de u̱n hur-o Shir.* 3:2 Hyen komo: O̱o̱g 12:7. 3 A 'wo̱ste̱ se̱k-m Ye̱so aragte̱ mo̱ ma Mosa, bo̱ a ro̱ u̱n bo̱m u̱n ko-yan-mà-to̱ o-hur, arge̱ hur-o̱ wu̱ ma'e̱ à. 4 Ko̱ o̱ ke hur-o̱, o̱ ro̱ u̱n wu̱ ma o̱ ne̱ à. Amba Shir no̱me̱ ko̱ yo ke rii-yo. 5 Mosa no̱mo̱g o-nip u̱n gu̱w-mo̱ u̱n hur-o̱ Shir kap, komo wu̱ ro̱ u̱n ru̱re̱ hun-ne̱ rii-yo Shir he m-ze̱e̱ u̱ co à. 6 Amba Kiristi† 3:6 Wu̱ Shir daagne̱ à. no̱mo̱g o-nip bo̱ wu̱ ro̱ Wà u̱n hur-o̱ Shir à. Shir ro̱ m-she̱r u̱n wu̱ u̱n gwo̱mo-to̱ u̱n hun-ne̱ ye̱ Shir. Komo a ro̱ ká hun-ne̱ ye̱, u̱rege̱ a ro̱ u̱n jaab-o̱ u̱t-me̱n ne̱, komo a nom u̱s-se̱s u̱n sakto̱-o na ne̱, ka o̱ ro̱ n-me̱ Kiristi.
A nak yan-ko̱o̱b-de m-she̱r u̱t-to̱
7 To̱, yo Ku̱kt-o̱ Shir zee à, yo ro̱:
“Caane̱, u̱rege̱ no̱ ho̱gu̱te̱ co̱r-o̱ Shir,
8 no̱ jar-o jar no̱ nom cikt-de u̱r-hur
bo̱ tat-ne̱ no̱ ne̱ ine̱ me̱ zang,
da-de ye̱ megre̱ me̱ o-dákár á.
9 Re̱e̱no̱ o̱ ya-n-ga-ye̱ no̱ megre̱ me̱,
Ko̱ de ye̱ hyente̱ se̱nge̱-mo̱ u̱m no̱me̱ à, mo̱ u̱t-hyat 10 u̱s-hak u̱r-kwo̱o̱z u̱t-yoor [40].
O̱ rwo̱'e̱ u̱m nomot u̱s-ryaab u̱n ká zaman-yo ne̱, u̱m zee:
‘Ko̱yanda ye̱ e̱ste̱ hur-de u̱n ye̱ u̱r-hew ne̱ u̱n me̱ ne̱,
ye̱ nap komo co̱w-u̱s re á.’
11 O̱ rwo̱'e̱ u̱m to̱ndu̱tu̱ ye̱ u̱n ryaab-u̱s re.
‘Ye̱a tu̱w be-de u̱n wu̱we̱ u̱n de á,
de u̱m ro zo̱ngsu̱tu̱ ye̱, ye̱ wu̱wu̱te̱ á.’ ”‡ 3:7-11 Hyen komo: Bo̱ng 95:7-11 (u̱t-Girik).
12 No̱m no̱ ce̱e̱n, o̱r re ne̱, taase ko̱ wan-gaan be u̱n no̱ wu̱ no̱m barag-u̱s 'yo-se u̱n hur-de u̱n wu̱, ko̱ ne̱ ko̱o̱b-de m-she̱r, wu̱ tuke̱ Shir o̱ u̱n ho̱o̱g o-cin. 13 Se̱ngu̱ no̱ do ye̱ u̱n o̱r no̱ ne̱ jaab-o̱ u̱t-me̱n ko̱ de ke ho̱-de, no̱ se̱nge̱ m-no̱m kaane̱ no̱ kume̱ u̱r-ke̱e̱r. Taase ba'as-de raks wu̱ ken be u̱n no̱, wu̱ no̱m u̱r-cikt. 14 Remen a se̱ngu̱tu̱ no̱ m-she̱r gu̱ng gu̱ng be-de Shir bo̱ a ro m-no̱m u̱r-takan à, har u̱r-ko̱m, bo̱ a he m-warag kang-o gaan u̱n Kiristi ne̱ à. 15 A ge̱ne̱g be-de u̱n Ma-to̱ Shir, a zee,
“Caane̱, u̱rege̱ no̱ ho̱gu̱te̱ co̱r-o̱ Shir,
no̱ jar-o jar no̱ nom cikt-de u̱r-hur,
bo̱ tat-ne̱ no̱ ne̱ ine̱ me̱ zang á.”§ 3:15 Hyen komo: Bo̱ng 95:7-8 (u̱t-Girik).
16 Barag no̱ u̱r-bon ne̱ ne̱ ma-to̱ u̱n ká hun-ne̱ ye̱: Ka hun-ne̱ ye̱ ho̱gu̱te̱ Ma-to̱ Shir, ye̱ hyanag rem-se u̱t-hyat da-o̱ Mosa rwu̱ntu̱ ye̱ dak-o̱ o-Masar à, myet u̱n kaane̱ ne̱, ye̱ tuku to̱ o-cin. 17 Shir no̱mo̱g u̱s-ryaab u̱n ye̱ ne̱ hak-u̱r kwo̱o̱z-u̱t yoor [40], komo ye̱ nomu̱te̱ wu̱ ko̱o̱b-de o-do̱ro̱tte̱ ye̱ maru̱ru̱ n-te̱ o-dákár. 18 Ká hun-ne̱ ye̱ yage̱ Ma-to̱ Shir remen ko̱o̱b-de o-do̱ro̱tte̱, Shir to̱ndu̱tu̱ ye̱ u̱n ryaab-u̱s u̱n wu̱. Ye̱a tu̱w be-de u̱n wu̱we̱-de u̱n wu̱ á.* 3:16-18 Hyen komo: O̱o̱g 14:1-35. 19 Te̱ nepste̱ ká hun-ne̱ ye̱ kum m-co̱w be-de u̱n ká wu̱we̱-de á, remen ko̱o̱b-de u̱n she̱r-mo̱ u̱n ye̱ be-de Shir.
*Bo̱r-u̱s tet:2 3:2 Hyen komo: O̱o̱g 12:7.
†Bo̱r-u̱s tet:6 3:6 Wu̱ Shir daagne̱ à.
‡Bo̱r-u̱s tet:11 3:7-11 Hyen komo: Bo̱ng 95:7-11 (u̱t-Girik).
§Bo̱r-u̱s tet:15 3:15 Hyen komo: Bo̱ng 95:7-8 (u̱t-Girik).
*Bo̱r-u̱s tet:18 3:16-18 Hyen komo: O̱o̱g 14:1-35.