Bo̱r-u̱s cind
1 To̱ remen kaane̱, no̱ ma'as bo̱ u̱n yoos-de a yoosu̱ no̱ da-de no̱ waktu̱ne̱ be-de Shir á. De̱k no̱ yoos-de no̱ hette̱ m-bo̱'o̱se̱ à.
No̱ yage̱ muut u̱n rem-se o-hwaa se ro̱ u̱n hante̱ m-mar à,
She̱r no̱ be-de Shir. 2 No̱ nepste̱ ma-to̱ u̱n:
Yo'os u̱n ne̱t n-te̱ m-ho̱ ne̱, u̱n
Hwo̱ u̱t-kom ne̱ u̱n hi-de u̱n ne̱t, u̱n
Ine̱-mo̱ margan-ne̱ ne̱, u̱n
Piish u̱t-ma ne̱ to̱ ba m-ta.
3 Yage̱ a bo'osu̱tu̱ no̱, u̱rege̱ Shir ze̱e̱g.
4-6 Ka ye̱ she̱re̱ be-de Shir à, ka da-de ye̱ 'yaru̱ru̱ yo Ye̱so no̱mu̱ ye̱ à n-to̱n o-kan, ye̱a ho̱ks m-waktu̱ne̱ be-de Shir komo á, ra no̱me̱ á.
Ka ye̱ nape̱ nip-o̱ Shir à,
Ka ye̱ rake̱ yar-mo̱ u̱n To̱n-o shir n-me̱ u̱n Ma-to̱ u̱n Shir à,
Komo ye̱ go̱kste̱ wo̱ng-de u̱n ye̱ de Ku̱kt-o Shir, u̱n be̱e̱b-de a he ye̱ m-'ya à, n-me̱ u̱n ho̱o̱g-o̱ ro̱o̱ne̱ à,
ye̱a hoks m-waktu̱ne̱ be-de Shir komo á. Ye̱a hoks m-waktu̱ne̱ komo á, remen ye̱ 'yarag Ye̱so u̱r-seke̱ de u̱n wu̱ ne̱. Ye̱ ro̱ u̱ntu̱n ká hun-ne̱, ye̱ kame̱ Ye̱so to̱n-o ce à. Ye̱ ro̱ u̱ntu̱n ká hun-ne̱, ye̱ yo'oge̱ Ye̱so be-de hun-ne̱ komo à.
7 Kem-o̱ a m-he̱ hond hond à, o̱ ro̱ m-mu̱se̱ o-dak, yan-to̱m go̱o̱ru̱ u̱r-go. Ye̱ gwo̱wu̱ru̱ to̱m, a kumu̱ru̱ rii-yo m-re̱ be-de u̱n wu̱ gwo̱we̱ o-kat à. Shir ro̱ m-rwu̱nte̱ o-kwu̱m u̱n ka kat-o̱.
8 Amba u̱rege̱ dak-o ro̱ m-po̱t u̱n yokor u̱n to̱-to̱ u̱n wo̱ ne̱, yatt rii-yo o he m-kum be-de u̱n o̱ á. Shir ro̱ u̱n ma-to̱ u̱n hu̱u̱ ka kat-o̱ nu-o yo̱-o̱. U̱r-ko̱m, komo tu̱ks-mo̱ a he o̱.* 6:8 Hyen komo: Taka 3:17-18.
9 O̱r re ne̱, ko̱ te̱ ru̱ru̱ no̱ u̱t-ma u̱ntu̱n to̱ kà, te̱ nepste̱ no̱ m-no̱m u̱n ka rem-se u̱r-bon se hun-ne̱ ro̱ m-no̱m à da-o̱ ye̱ kume̱ gwu̱-o̱ Shir. 10 Taase no̱ zee Shir ro̱ m-was u̱n se̱nge̱-m no̱ ne̱ á. Wu̱ ro̱ m-was u̱n mo̱ ne̱. Wu̱a top ko̱ wu̱ ke ne̱t-wu̱ se̱nge̱-mo̱ u̱n wu̱. No̱ ye̱ ro̱ m-was u̱n wu̱ ne̱ à, no̱ ye̱ kutu̱ wu̱ m-was be-de u̱n yan-dor ye̱ u̱n wu̱ à. Har m-mo̱ka no̱ ro̱ ye̱ m-gu. 11 Rii-yo te̱ co̱ne̱ à, ko̱ wu̱ ke wan-gaan no̱ wu̱, wu̱ se̱nge̱ go̱ u̱n ká se̱nge̱-mo̱ har a woot ho̱-de Shir. A kum rii-yo a o-sakto̱ à be-de wu̱. 12 No̱ no̱m m-zar á. Do̱ru̱ no̱ bu̱-yo u̱n ye̱ bo̱pe̱ Ma-to̱ Shir à. Bo̱ ye̱ bo̱pe̱ to̱ à, ye̱ mo̱'u̱ru̱ u̱r-hur be-de u̱n wu̱, har wu̱ shoosu̱ru̱ ye̱ rii-yo wu̱ zee ye̱ à.
Shir a shoos yo wu̱ zee à
13 Yatt-wu̱ jiishe̱ Shir á, u̱n kaane̱ wu̱ swo̱re̱ o-nu u̱n Ibrahi. Wu̱ to̱ndu̱ru̱ u̱n jin-de u̱n wu̱, 14 bo̱ wu̱ zee Ibrahi, “Me̱, Shir, jip man hu̱u̱ wo̱ nu so̱-ye̱. U̱m 'ye wo̱ yakar de̱e̱n.”† 6:14 Hyen komo: Taka 22:16-17. 15 Kaane̱ o̱, bo̱ Ibrahi mo̱'e̱ hur-de u̱n wu̱ à, Shir ya'asu̱ru̱ wu̱ yo wu̱ swo̱re̱ o-nu wu̱a kum à.
16 U̱rege̱ wu̱ ken co̱no̱g wu̱ hongse̱ su̱ne̱-mo̱ u̱t-ma, ye̱ ro̱ m-to̱nd u̱n jin-de u̱n wu̱ jiishe̱ ye̱ à. 17 Ka ye̱ roa go̱ks yo wu̱ swo̱re̱ o-nu à, Shir u̱n co̱n ye̱ nept u̱nze wu̱ à kuse̱ á, remen kaane̱ wu̱ do̱o̱ru̱ m-to̱nd u̱n ka swo̱'ru̱ nu-o̱. 18 Shir ro̱ m-rwo̱r u̱t-bo̱ á! Remen kaane̱ to̱nd-o̱ u̱n wu̱ u̱n swo̱o̱ru̱ nu-o̱ u̱n wu̱ ne̱ yatt-wu̱ he to̱ m-shakt á. A teere̱ o-rek ha-mo̱ be-de Shir Wan-Gwu̱ à. M-mo̱ka to̱nd-o̱ u̱n wu̱ u̱n swo̱o̱ru̱ nu-o̱ u̱n wu̱ ne̱, a 'ye na jaab-o̱ u̱t-me̱n a bu̱pt ka sakto̱-o̱, o̱ ro̱ be-u̱r na à. 19 Ka sakto̱-o̱ ya o̱ ro̱ u̱ntu̱n kashi o-hu̱, yo u̱r-be̱e̱b, komo o̱ na m-co̱w n-me̱ u̱r-hur. Sakto̱-o na caate̱ ka gund-o̱ sane̱ de̱pi-o̱ Shir à, har o̱ heet na n-me̱ u̱n be-de jiishe̱ ba m-ku̱ko̱p à.‡ 6:19 Hyen komo: Rewi 16:2. 20 Ye̱so be'estu̱ na m-wo̱ kane̱, komo wu̱ u̱n co̱w u̱n su̱ge̱-u̱r na. Wu̱ ro̱ komo ko-Gwo̱mo-wu̱ u̱n ko̱n-se Shir wu̱ u̱n ba m-ta u̱ntu̱n Markisadik.§ 6:20 Hyen komo: Bo̱ng 110:4.
*Bo̱r-u̱s cind:8 6:8 Hyen komo: Taka 3:17-18.
†Bo̱r-u̱s cind:14 6:14 Hyen komo: Taka 22:16-17.
‡Bo̱r-u̱s cind:19 6:19 Hyen komo: Rewi 16:2.
§Bo̱r-u̱s cind:20 6:20 Hyen komo: Bo̱ng 110:4.