1 O̱r re ne̱, ba myet-m no̱ depe̱ ye̱ warag ya-u̱r-yoos á. Bo̱ no̱ nape̱ à, te̱ ya-u̱r-yoos, Shir a piishi te̱ u̱t-ma u̱s-nu̱ ne̱ arge̱ ko̱ wu̱ ke ne̱t-wu̱. 2 Myet-m na o-da de̱e̱n a m-ba'ase̱. Amba u̱rege̱ ne̱t ro̱ m-ba'ase̱ u̱n yo wu̱ ro̱ m-ze̱e̱ á, wu̱ ro̱ o̱ ka hond hond, komo wu̱ ro̱ m-hoks u̱n do̱ru̱tte̱ u̱n ho̱o̱g-mo̱ u̱n wu̱.

3 Gwo̱t no̱ o-jo̱k. A cu̱ne̱ jo̱k-yo nomo na o-do̱ro̱tte̱, a yo m-ru̱'e̱ o-hu̱ u̱n nu-o̱ u̱n yo, komo a yo m-hoks m-rwo̱ yo do̱re̱ so̱ a co̱ne̱ à.

4 Gwo̱t no̱ hat-to̱ m-sa no̱ hyen, ko̱ de to̱tte̱ u̱t-caari à, yo-mo̱ m-'wo̱ns mo̱ ro̱ to̱ m-nekette̱, myet u̱n kaane̱ ne̱ u̱n ko̱-o re̱k-yo atte̱-to̱ m-nak, wa-m-nak o-hat wu̱a hoks o̱ m-mus komo ko̱ ke co̱-se wu̱ co̱ne̱. 5 Kaane̱ o̱ rem-de u̱n ne̱t ro̱, u̱r-re̱k-de de ro̱ n-me̱ u̱n do̱k-to̱ u̱n wu̱r-o̱ u̱n ne̱t, myet u̱n kaane̱ ne̱ de ro̱ m-rwu̱nte̱ caari-to̱ u̱t-ma.

Gwo̱t no̱ bo̱ ra o-re̱k o̱ ro̱ u̱n hoks m-tu̱ks u̱n caari o-ko̱t hwiki à! 6 Ai rem-de u̱n ne̱t ra-o̱, shiishe̱ de ro̱ u̱n rem-u̱s yo̱-se! Ka rem-de ro̱ u̱n wu̱r-o na, komo de ro̱ u̱n naas u̱n ne̱t war war. U̱r-rem tomso ne̱, de ro̱ u̱n sabu̱rse̱ u̱n ne̱t u̱n myet co̱w-yo u̱n ho̱o̱g-mo̱ u̱n wu̱. Komo u̱n den-o̱ o-ra o̱ ba m-ryomse̱ a de m-puktune̱.

7 Ko-hun a hoks myet-mo̱ u̱t-gu̱t, u̱n no-ne̱, u̱n rii-ye̱ ro̱ u̱t-kurub, m-ja o-uub ne̱, u̱n jan ne̱, ye̱ nom yo wu̱ co̱ne̱ ye̱ no̱mo̱ wu̱ à. 8 Amba yatt ne̱t-wu̱ he hoks u̱n garamse̱ rem-de u̱n wu̱ á. U̱r-rem rii-de o-saa de rii-de ba u̱r-wu̱we̱, komo de ro̱ m-raab ne̱ mo̱ u̱r-ho̱.

9 U̱n rem-u̱r na atte̱ u̱n nome̱ u̱n Wan-Ko̱yan, Tato na wu̱ n-To̱n u̱r-bo̱ngo̱n. Komo u̱n rem-u̱r na, atte̱ u̱n ce̱p u̱n gom-to̱ u̱n ba u̱r-bon, be-to̱ u̱n hun-ne̱ ye̱ Shir nome̱ u̱ntu̱n wu̱ à.*3:9 Hyen komo: Taka 1:26. 10 U̱n nu-o gaan atte̱ u̱r-bo̱ngo̱n u̱n ka nu-o̱ komo atte̱ hun-ne̱ u̱t-re̱e̱b. O̱r re ne̱ yan-dor, yo ka rii-yo u̱r-bon yo á! 11 Haw-u̱r gaan a hoks rwu̱nte̱ ho̱-mo̱ m-re̱re̱m u̱n mo̱ u̱r-gaag ne̱ á. 12 O̱r re ne̱, 'yo-yo o-rum a hoks m-mat u̱n yakar-ye̱ u̱t-moore̱ á, ko̱ ne̱, 'yo-yo o-moore̱ met yakar-ye̱ o-rum á. Kaane̱ komo du-de ro̱ m-'ya u̱n ho̱-mo̱ m-po̱r à, dea rwu̱u̱nte̱ ho̱-mo̱ m-re̱re̱m á.

13 ¿Ko̱ ko-ya-u̱s-we̱e̱r u̱s-nap ne̱ ro̱ ko̱n be-u̱r no̱? Se̱ wu̱ kutu na be-de u̱n she'et-de u̱n wu̱ de u̱r-bon, komo u̱n se̱nge̱-mo̱ u̱r-bon ne̱ mo̱ wu̱ ro̱ m-no̱m à, n-me̱ u̱n gwu̱gwe̱r-mo̱ u̱r-hi, mo̱ a m-kum be-de we̱e̱r-se Shir à. 14 Amba u̱rege̱ u̱n hur-u̱r no̱, no̱ u̱r-shoob, u̱t-yage̱ ne̱, komo u̱n co̱n-to̱ u̱r-hi ne̱, to̱ yagu̱ no̱ u̱s-se̱s, no̱ m-ze̱e̱ no̱ u̱s-we̱e̱r ne̱. Taase no̱ yage̱ ma-to̱ o-nip. 15 Go̱n ka nap-se ba se ro̱ m-kergu̱ne̱ e̱s-mo̱ n-To̱n à se á, se u̱n ho̱no o-dak se. Komo se barag-se ma-hun se, amba se u̱n ko-Gwo̱mo-wu̱ u̱n ya-u̱t-ko̱t se. 16 Remen ko̱ kene̱ no̱ hyane̱ u̱r-shoob, u̱n co̱n-to̱ u̱r-hi ne̱, káne̱ komo no̱ he hyan m-dum, u̱n go̱n ko̱ se ke rem-u̱s yo̱-se ne̱.

17 Amba nap-se ro̱ m-rwu̱u̱n e̱s-mo̱ u̱n n-To̱n à, u̱n ho̱n se ro̱. Ne̱t-wu̱ ro̱ u̱n go̱n ka napse̱ ne̱ à, wu̱ ro̱tt u̱r-ba'as u̱n ho̱o̱g-mo̱ u̱n wu̱ á. Komo se ro̱ m-hante̱ she'et-de m-gwu̱gwu̱, u̱n ru̱s u̱r-hi ne̱, u̱n hi-de m-gwu̱gwe̱r ne̱ u̱n ho̱ge̱ u̱r-'wo̱n ne̱, m-yar-ne̱, koos-m ro̱ ko̱n á ko̱ o-she̱pe̱. 18 Bo̱ u̱n ye̱ go̱ u̱r-go u̱n gwu̱gwu̱-mo̱ u̱r-hur be-de hun-ne̱ à, ye̱a ce me̱n-u̱t pus-to̱ be-de u̱n Shir.