1 Ye̱so ro m-arag, wu̱ hyanu̱ru̱ ne̱t-wu̱ a mate̱ ko-po̱ à. 2 Yan-neke̱-mo̱ u̱n wu̱ citu̱ru̱ wu̱, “Wa-u̱s-Nap, ¿wan wu̱ ne̱ no̱me̱ u̱r-ba'as a met ka ne̱t-wu̱ ko-po̱? ¿Wu̱ wu̱ o̱? ¿Ko̱ yan-mat-o̱ u̱n wu̱?”

3 Ye̱so shasu̱ru̱, “Remen ka ne̱t-wu̱, ko̱ tato u̱n wu̱ ye̱ no̱m u̱r-ba'as á, se̱ de̱ remen a kututé̱ hun-ne̱ nom-mo̱ Shir be-de u̱n wu̱. 4 Se̱ u̱m no̱mo̱g yo Tato re to̱mne̱ me̱ m-no̱m à, cin u̱r-ho̱ ne̱. Te̱t-m ro̱o̱n, da-o̱ ne̱t a hoks no̱m u̱n rii á. 5 Bo̱ u̱m ro̱ u̱n ho̱no o-dak à, me̱ wu̱ ro̱ cecas-mo̱ u̱n ho̱no o-dak.”*9:5 Hyen komo: Mati 5:14; Yoha 8:12.

6 Bo̱ wu̱ ru̱rte̱ kááne̱ à, wu̱ copsu̱ru̱ m-ta n-dak. Wu̱ wu̱rgu̱ru̱ m-hu, wu̱ suku̱ru̱ mo̱ ko-po̱ u̱n yish. 7 Wu̱ ze̱e̱ru̱ wu̱, “Neke̱, o sapt u̱n kaw-o̱ o-Sirom.” (Ka jin-de, de ro̱ a u̱n “tomonte̱.”) Ko̱m-de ka, wu̱ neku̱ru̱, wu̱ saptu̱ru̱, wu̱ mu̱u̱nu̱ru̱, wu̱ ro̱ u̱n hyan-o̱ u̱n wu̱ cas cas.

8 Yan-bo̱r-se u̱n wu̱, u̱n ye̱ nape̱ wu̱ ne̱ n-ga, wu̱ ze̱e̱ u̱s-ko̱n à, ye̱ ze̱e̱ru̱, “¿Ka ne̱t-wu̱ wu̱ ka ro'e̱ m-she'et u̱n co̱w, wu̱ ro u̱s-ko̱n á?”

9 Ye̱ ken ye̱ ze̱e̱ru̱, “Wu̱ wu̱.”

Ye̱ ken ye̱ zee, “Ay, se̱ de̱ wu̱ sha'ag wu̱.”

Wu̱ ne̱, wu̱ se̱ngu̱ru̱ m-ze̱e̱, “Me̱ wu̱.”

10 Ye̱ ze̱e̱ru̱, “¿Re o̱ no̱me̱ yish ru upsu̱te̱?”

11 Wu̱ shasu̱ru̱, “Ka ne̱t-wu̱, wu̱ a m-ze̱e̱ Ye̱so à, wu̱ wu̱ wu̱rge̱ hu-mo̱ n-dak, wu̱ suku̱ru̱ me̱ u̱n yish. Wu̱ zee u̱m neke̱ re̱e̱no̱ kaw-o̱ o-Sirom u̱m sapt. U̱m neku̱ru̱, u̱m saptu̱ru̱, u̱m kumu̱ru̱ o-hyan.”

12 Ye̱ ze̱e̱ru̱ wu̱, “¿Ke ne̱ o̱ wu̱ ro̱?”

Wu̱ ze̱e̱ru̱ ye̱, “Me̱ nap á.”

13 Ye̱ heetu̱ru̱ Parisa-ne̱ ne̱t-wu̱ a upse̱ yish à. 14 U̱n Ho̱-de u̱r-Wu̱we̱ de komo Ye̱so wu̱rge̱ m-hu, wu̱ upsu̱te̱ wu̱ yish. 15 Parisa-ne̱ citu̱ru̱ wu̱ bo̱ a no̱me̱ wu̱ kumut o-hyan à. Wu̱ ze̱e̱ru̱ ye̱, “Hu-mo̱ n-dak mo̱ wu̱ wu̱rge̱ à, mo̱ mo̱ wu̱ suke̱ me̱ u̱n yish. U̱m saptu̱ru̱, u̱m hyanu̱ru̱ cas.”

16 Remen kááne̱, ye̱ ken Parisa-ne̱ ye̱ ze̱e̱ru̱, “Ka ne̱t-wu̱, be-de Shir o̱ wu̱ ro̱ á, remen wu̱ ku ho̱-de Shir zette̱ a wu̱we̱ u̱n de á.”

Ye̱ ken ye̱ ze̱e̱ru̱, “¿Re ne̱ o̱ ko-wa-u̱r-ba'as he nap u̱n no̱m u̱n rem-se u̱t-hyat kááne̱?”

Ma-u̱t su̱nu̱tu̱ ye̱ o̱ ka.

17 Ye̱ ja'asu̱ru̱ m-cit u̱n ko-po̱, “Wo̱ ne̱, ¿ya o hyane̱ mo̱sse̱ u̱n wu̱ ne̱ wo̱ wu̱ a upse̱ yish à?”

Wu̱ ze̱e̱ru̱, “Wan-rwo̱r u̱n Ma-to̱ Shir wu̱.”

18 Se̱k-ye̱ be-de u̱n Yahuda-ne̱, ye̱ she̱r hur-de u̱n ye̱ u̱nze ko-po̱-wu̱ ro'e̱ n-ga á, komo ne̱ wu̱ kumu̱ru̱ o-hyan m-mo̱ka á, har ye̱ agbu̱ru̱ tat-ne̱ ye̱ u̱n wu̱. 19 Ye̱ citu̱ru̱ ye̱ mate̱ wu̱ à, “¿Wu̱ ka wà no̱ wu̱, wu̱ a zee u̱nze a u̱n mat wu̱ ko-po̱? ¿To̱, re o̱ ka u̱n ya wu̱ hyente̱ m-mo̱ka?”

20 Tat-ne̱ ye̱ u̱n wu̱ shasu̱ru̱, “Te̱ nak wu̱ ka wà te̱ wu̱ komo ko-po̱-wu̱ a mate̱ wu̱. 21 Amba bo̱ a no̱me̱ wu̱ kumut o-hyan à, te̱ nap á. Te̱ nap ma wu̱ upse̱ yish-ye̱ u̱n wu̱ á. Cit no̱ wu̱. Ai, wu̱ bo̱'o̱ssu̱te̱ m-rwo̱r u̱n hi u̱n de u̱n wu̱.” 22 Tat-ne̱ u̱n wu̱ u̱n rwo̱r kaane̱ remen gye̱r-o̱ u̱n Se̱k-ye̱ be-de u̱n Yahuda-ne̱. Remen n-ga ne̱, Se̱k-ye̱ be-de u̱n Yahuda-ne̱ ye̱ gekse̱ u̱nze kap bo̱n ne̱t-wu̱ ze̱e̱, “Ye̱so ro̱ Kiristi wu̱ Shir to̱mne̱ à,” a ruut wu̱ u̱n kuke̱-o̱ u̱n yoos u̱n Ma-to̱ Shir, wu̱a do m-mu̱u̱n á. 23 O̱ hante̱ tato u̱n wu̱ ne̱ zet, “Wu̱ bo̱'o̱ssu̱te̱. Cit no̱ wu̱.”

24 Se̱k-ye̱ u̱n Parisa-ne̱ ja'asu̱ru̱ agbe̱ u̱n ka ne̱t-wu̱ wu̱ ro u̱t-po̱ n-ga à. Ye̱ ze̱e̱ru̱ wu̱, “'Ya Shir m-se̱ps, o ru̱r o-nip.†9:24 'Ya Shir m-se̱ps = Ru̱ru̱ o-nip! Hyen: Josu 7:19. Te̱ de̱ te̱ nepste̱ ka ne̱t-wu̱ ko-ya-u̱r-ba'as-wu̱.”

25 Wu̱ ze̱e̱ru̱ ye̱, “Ko̱ ko-ya-u̱r-ba'as-wu̱, me̱ de̱ me̱ nap á. Rii gaan-yo u̱m nape̱ à, n-ga me̱ ko-po̱-wu̱, m-mo̱ka komo me̱ m-hyan.”

26 Ye̱ ze̱e̱ru̱ wu̱, “¿Ya wu̱ no̱mu̱ wo̱ ne̱? ¿Re o̱ wu̱ no̱me̱ wu̱ upsu̱tu̱ wo̱ yish?”

27 Ko-po̱ shasu̱ru̱ ye̱, “U̱m ru̱ssu̱te̱ no̱. No̱ ho̱ge̱ á. ¿Remen yan o̱ no̱ cu̱nte̱ m-ho̱ge̱ tomso? ¿Ko̱ no̱ u̱n cen no̱, no̱ u̱n co̱n o̱ no̱ warag yan-neke̱-mo̱ u̱n wu̱?”

28 Ye̱ he̱'e̱nu̱ru̱ wu̱ u̱t-re̱e̱b. Ye̱ ro̱ wu̱ m-ze̱e̱, “Wo̱ wu̱ de̱ ro̱ wan-dor-o̱ u̱n ka ne̱t-wu̱, te̱ yan-dor Mosa ye̱. 29 Te̱ nepse̱ Shir no̱mo̱g u̱t-ma u̱n Mosa ne̱, amba wu̱ ka, te̱ nap be-de wu̱ rwu̱u̱ne̱ á.”

30 Ka ne̱t-wu̱ shasu̱ru̱ ye̱, “Caane̱ hyat-to̱ ka! No̱ nap be-de wu̱ rwu̱u̱ne̱ á, amba ne̱ wu̱ upsu̱ssu̱te̱ me̱ yish! 31 A nepste̱, Shir ro̱ u̱n rege̱ u̱n ya-u̱t-ba'as u̱t-to̱ á. Amba kap wu̱ ho̱ge̱ gye̱r-o̱ Shir à, wu̱ ro̱ u̱n no̱m u̱n rii-yo Shir ze̱e̱ à, Shir ro̱ wu̱ m-ho̱ge̱. 32 Cin da-o̱ Shir takne̱ no̱m u̱n ho̱no o-dak à, a tak m-ho̱ge̱ ne̱t-wu̱ upse̱ yish-ye̱ u̱n ne̱t-wu̱ a mate̱ ko-po̱ á. 33 A rotte̱ u̱nze ka ne̱t-wu̱, be-de Shir o̱ wu̱ rwu̱u̱ne̱ á, yatt-yo wu̱ roa hoks m-no̱m á.”

34 Ye̱ shasu̱ru̱ wu̱, “Wo̱ wu̱ a mate̱ n-me̱ u̱n comb-o̱ u̱t-ba'as à, ¿yan yo ne̱ o he na m-ru̱re̱?” Ye̱ yanu̱ru̱ wu̱ be-de u̱n ye̱.

35 Bo̱ Ye̱so ho̱gu̱te̱ u̱nze ye̱ yanag ka wu̱ a upse̱ yish à, wu̱ hyanu̱ru̱ wu̱. Wu̱ ze̱e̱ru̱, “¿O she̱re̱g hur u̱n du u̱n Wà-wu̱ u̱n ne̱t ko̱?”

36 Wu̱ shasu̱ru̱ wu̱, “Go̱s-wu̱, ru̱ru̱ me̱ wu̱, wu̱ ro̱ à, u̱m she̱re̱t hur u̱n de be-de u̱n wu̱.”

37 Ye̱so ze̱e̱ru̱ wu̱, “Ai, o hyanag wu̱. Wu̱ wu̱ ro̱ u̱t-ma u̱n wo̱ ne̱.”

38 Wu̱ ze̱e̱ru̱, “Wan-Ko̱yan, u̱m she̱re̱g hur u̱n de be-de u̱n du.” Wu̱ kwu̱ktu̱ru̱ u̱n co-o̱ u̱n wu̱.

39 Ye̱so ze̱e̱ru̱, “Me̱ u̱n co̱wo̱n u̱n ho̱no o-dak, remen u̱m piishté̱ hun-ne̱ ye̱ u̱n ho̱no o-dak u̱t-ma. U̱m haante̱ remen ye̱ ro̱ m-hyan á, ye̱ hyenet, komo ye̱ ro̱ m-hyanu̱ ne̱ à, ye̱ waragté̱ po̱-ne̱.”

40 Ye̱ ken Parisa-ne̱ ye̱ ro mo̱sse̱ u̱n wu̱ ne̱. Bo̱ ye̱ ho̱gu̱te̱ kááne̱ à, ye̱ ze̱e̱ru̱, “¿Wata po̱-ne̱ ye̱ te̱ ro̱'e̱?”

41 Ye̱so ze̱e̱ru̱ ye̱, “Ai, u̱ rotte̱ u̱nze po̱-ne̱ ye̱ no̱ ro̱, ba'as-u̱t no̱ roa ma'as be-u̱r no̱ á. Amba bo̱ no̱ ze̱e̱ no̱ m-hyan à to̱, ba'as-u̱t no̱ ro̱ kane̱ timb.”