1 Ka da-de ne̱, Biratus ze̱e̱ru̱, “A neke̱ u̱n Ye̱so ne̱. A bu'u̱ru̱ wu̱ u̱s-so̱ro̱g de̱e̱n.” 2 Karma-ne̱ yeru̱ru̱ wu̱ go̱nd-o̱ u̱n yokor u̱r-hi. Ye̱ cu̱pu̱ru̱ wu̱ co̱p-o jaas-o̱ o̱ u̱t-gwo̱mo. 3 Ye̱ ze̱e̱ru̱ m-ha be-de u̱n wu̱, ye̱ ro̱ m-ze̱e̱, “Ho̱o̱g ru she'et, ko-Gwo̱mo-wu̱ u̱n Yahuda-ne̱!” Ye̱ ro wu̱ u̱n hwo̱o̱ge̱ u̱t-raag.

4 Biratus dooru̱ m-rwu̱u̱n, wu̱ ze̱e̱ru̱ ye̱, “Gwo̱t no̱, wu̱ ka u̱m he no̱ m-rwu̱nte̱ remen no̱ nept u̱nze me̱ kum wu̱ u̱n de ken ba'as-de ne̱ á.” 5 Ka da-de ne̱ Ye̱so rwu̱u̱nu̱ru̱ eso u̱n go̱nd-o̱ u̱n yokor ne̱ u̱n co̱p-o jaas-o̱ ne̱. Biratus ze̱e̱ru̱ ye̱, “To̱, wu̱ ka.”

6 Bo̱ Gwo̱mo-ne̱ ye̱ u̱n ko̱n-se Shir u̱n do̱ro̱g-ne̱ ne̱ yan-'er-de u̱n Pyo-o̱ Shir hyente̱ wu̱ à, ye̱ 'yonsu̱ru̱ u̱s-co̱r yo̱ko̱ko̱. Ye̱ ro̱ m-ze̱e̱, “A kem wu̱ o-kan! A kem wu̱ o-kan!”

Biratus ze̱e̱ru̱ ye̱, “Neke̱ no̱ u̱n hi u̱n no̱, no̱ he no̱ kem wu̱. Amba me̱ hyan wu̱ u̱n de ken ba'as-de ne̱ á!”

7 Yahuda-ne̱ shasu̱ru̱, “Ai, te̱ ro̱ o-karamsa ne̱. Ka karamsa-o̱ ne̱ depete̱ a ho wu̱ remen wu̱ muute̱ hi u̱n de u̱n wu̱ Wà-wu̱ Shir.”

8 Bo̱ Biratus ho̱gu̱te̱ ka ma-to̱ à, wu̱ ja'asu̱ru̱ ho̱ge̱ o-gye̱r. 9 Wu̱ wargu̱ru̱ m-co̱w u̱n pyo u̱n Ye̱so ne̱. Wu̱ ze̱e̱ru̱ Ye̱so, “¿Ke ne̱ o̱ ne̱ o rwu̱u̱n?” Amba Ye̱so shas wu̱ á. 10 Remen Ye̱so yagu̱te̱ wu̱ m-shas, Biratus ze̱e̱ru̱ Ye̱so, “¿Wo̱a shes me̱ u̱t-ma á? ¿Wo̱ nap u̱nze me̱ u̱r-be̱e̱b ne̱ de u̱n ho'os-m ru á, me̱ tomso ne̱ u̱r-be̱e̱b ne̱ de u̱n kam-m ru o-kan á?”

11 Ye̱so ze̱e̱ru̱ wu̱, “Wo̱tt de ken be̱e̱b-de be u̱n de á, yade̱ u̱rege̱ u̱nze Shir-ye̱ ya'anu̱ wo̱ de rwu̱u̱n-mo̱ n-to̱n á. Remen kááne̱ ne̱t-wu̱ hante̱ me̱ be u̱n du à, ba'as-de u̱n wu̱ jiishte̱ ba'as u̱n du.”

12 Bo̱ Biratus, ho̱ge̱ kááne̱ à, wu̱ ho̱o̱bu̱ru̱ co̱w-yo wu̱ ho'osté̱ wu̱. Yahuda-ne̱ ja'asu̱ru̱ 'yons u̱s-co̱r yo̱ko̱ko̱. Ye̱ ro̱ m-ze̱e̱, “U̱rege̱ de̱ o ho'oste̱ wu̱ ka, wo̱ co̱n ko-Gwo̱mo Sisar o̱ ka á. Ai, bo̱ u̱n wu̱ musse̱ hi u̱n de u̱n wu̱ ko-Gwo̱mo à, wu̱ yagu̱te̱ Sisar u̱t-yage̱ o̱ ka.”

13 Bo̱ Biratus ho̱gu̱te̱ ka ma-to̱ à, wu̱ rwu̱u̱nu̱ru̱ u̱n Ye̱so ne̱. Wu̱ she'etu̱ru̱ u̱n kwu̱u̱r-o̱ u̱n piish u̱t-ma. Ka kwu̱u̱r-o̱ ro̱ n-to̱n u̱n “Gon o̱ a go̱ne̱ u̱t-ta'ar à,” o̱ ye̱ ro̱ m-ze̱e̱ o-Gabbata à, u̱n rem-de u̱t-Ibra à.*19:13 Ko̱: u̱t-Arameki. 14 Ka ho̱-de ne̱, ho̱-de m-zo̱nge̱ de remen Biki-o̱ m-Pas.†19:14 Biki-o̱ Yahuda-ne̱ ro̱tte̱ m-baks u̱n ho̱-de Shir ruute̱ ye̱ o-Masar à.

Ho̱-u̱r ro̱ u̱r-hi, wu̱ ze̱e̱ru̱ Yahuda-ne̱, “Ko-Gwo̱mo no̱ wu̱ ka!”

15 Ye̱ ja'asu̱ru̱ 'yons u̱s-kan yo̱ko̱ko̱. Ye̱ ro̱ m-ze̱e̱, “A nom u̱n wu̱ ne̱! A nom u̱n wu̱ ne̱! A kem wu̱ o-kan!”

Biratus ze̱e̱ru̱, “¿A kem ko-Gwo̱mo no̱ o-kan?”

Gwo̱mo-ne̱ ye̱ u̱n ko̱n-se Shir ye̱ ze̱e̱ru̱ wu̱, “Ai, te̱tt ko-Gwo̱mo á, se̱ Sisar.”

16 Ka da-de ne̱, wu̱ ya'asu̱ru̱ Ye̱so be-de u̱n ye̱, ye̱ kemet wu̱ o-kan.

17 Ye̱ neku̱ru̱ u̱n Ye̱so ne̱. Ye̱so de̱ku̱ru̱ kan-o̱ a hette̱ wu̱ m-kam à, ha-mo̱ u̱n be-de a m-ze̱e̱ Caar-o̱ u̱t-hi à (u̱t-Ibra‡19:17 Ko̱: u̱t-Arameki. ne̱ ye̱ ro̱ o̱ m-ze̱e̱, o-Gorogota). 18 Kane̱ o̱, ye̱ kame̱ wu̱ o-kan. A kamag ne̱n yoor tomso ne̱, Ye̱so dooru̱ ye̱ tet, wan-gaan u̱n kom-o̱ u̱r-kwanta, wan-gaan u̱n kom-o̱ u̱r-re̱. Ye̱so ro̱ u̱n te̱te̱-o̱ u̱n ye̱.

19 Biratus ge̱nu̱ru̱ m-ge̱n, wu̱ kamu̱ru̱ n-te̱ o-kan o̱ a kemte̱ Ye̱so à. Rii-yo wu̱ ge̱ne̱ à, yo ka u̱nze, “Ye̱so wu̱ o-Nazaret, ko-Gwo̱mo-wu̱ u̱n Yahuda-ne̱.” 20 Ka ge̱n-mo̱ a kemte̱ Ye̱so à, Yahuda-ne̱ karantu̱te̱ mo̱ de̱e̱n remen be-de a kame̱ Ye̱so à, yow yow o-bo̱ ne̱ o̱. A ge̱ne̱g to̱ u̱t-Ibra§19:20 Ko̱: u̱t-Arameki., u̱t-Roma ne̱, u̱t-Girik ne̱. 21 Gwo̱mo-ne̱ ye̱ u̱n ko̱n-se Shir haaru̱ be-u̱r Biratus. Ye̱ ze̱e̱ru̱ Biratus, “Tasse o gen ‘Ko-Gwo̱mo-wu̱ u̱n Yahuda-ne̱’ á, se̱ de̱ o gen ‘Kà ne̱t-wu̱ ze̱e̱g hi u̱n de u̱n wu̱ ko-Gwo̱mo-wu̱ u̱n Yahuda-ne̱.’ ”

22 Biratus shasu̱ru̱, “Ai, rii-yo u̱m ge̱ne̱ à, u̱m ge̱ne̱g o̱ ká.”

23 Bo̱ karma-ne̱ komte̱ kam u̱n Ye̱so o-kan à, ye̱ wongu̱ru̱ co̱p-to̱ u̱n wu̱r-o̱ u̱n wu̱. Ye̱ coogu̱ru̱ to̱ kwu̱ku̱r-u̱t nass. Ko̱ wu̱ ke ko-karma-wu̱, wu̱ de̱ku̱ru̱ kwu̱ku̱r-u̱r gaan. Ye̱ de̱ku̱ru̱ matuku-de u̱n wu̱. Ka matuku-de ne̱ komo, de u̱n wa-u̱r-gaan de u̱n ho̱n-de u̱n de.

24 Ye̱ ze̱e̱ru̱ hi u̱n de u̱n ye̱, “Taase a yoog-de, se̱ de̱ a nom no̱ o-gwambe̱, a gu̱t ne̱t-wu̱ he de m-re̱ à. Wu̱ re̱ ne̱ à, wu̱ wu̱ ro̱ wa-u̱r-matuku.” An no̱m kááne̱ remen a shoosté̱ rii-yo a ge̱ne̱ n-me̱ Ma-to̱ Shir à, u̱nze,

25 To̱, yow yow u̱n be-de a kame̱ Ye̱so o-kan à, inu Ye̱so u̱n hen-ne̱ inu u̱n wu̱ ne̱, Meri ne̱ ne'a Kiro̱go̱s, Meri Magu̱darin wu̱, ye̱ ro eso eso. 26 Bo̱ Ye̱so hyente̱ inu u̱n wu̱ káne̱ à, u̱n wan-gaan ne̱ be-de yan-neke̱-mo̱ u̱n wu̱, u̱n wu̱ wu̱ ro m-co̱n ne̱ à, yow yow u̱n wu̱ ne̱. Wu̱ ze̱e̱ru̱ inu-o u̱n wu̱, “Inu, wu̱ ka waragte̱ caane̱ wà ru.” 27 Ka da-de ne̱, wu̱ ze̱e̱ru̱ wan-neke̱-mo̱ u̱n wu̱, “Wu̱ ro̱ inu ru.” Cin bo̱ u̱n ka da-de ne̱, ka wan-neke̱-mo̱ u̱n wu̱ wu̱ de̱ku̱ru̱ wu̱, wu̱ jitu̱ru̱ wu̱ u̱n hur-o̱ u̱n wu̱.

28 Bo̱ u̱n rwo̱r u̱n ka ma-to̱ Ye̱so nepse̱ a komoste̱ ko̱yan, se̱ de̱ remen a shoosté̱ ma-to̱ a ge̱ne̱ be-de u̱n Ma-to̱ Shir à, ka da-de ne̱, wu̱ ze̱e̱ru̱, “Me̱ u̱n ho̱ge̱ o-swo̱o̱t o̱ m-ho̱.”†19:28 Hyen komo: Bo̱ng 69:21; 22:15. 29 De ken gora-de ro kon shoosse̱ u̱n ho̱-mo̱ o-zambo ne̱ káne̱. Ye̱ mu̱su̱ru̱ o-po̱o̱g u̱n ho̱-mo̱ o-zambo, ye̱ co̱pu̱ru̱ ka po̱o̱g-o̱ n-te̱ o-kang, ye̱ tabbu̱ru̱ u̱n nu-o̱ u̱n wu̱. 30 Bo̱ Ye̱so su̱u̱te̱ ka ho̱-mo̱ o-zambo mo̱ à, wu̱ ze̱e̱ru̱, “A komoste̱ ko̱yan.” Ka da-de ne̱, wu̱ kwu̱msu̱ru̱ u̱r-hi n-dak, wu̱ argu̱ m-mar.

31 U̱ntu̱ ro ka ho̱-de, ho̱-de m-zo̱nge̱ remen Biki-o̱ m-Pas de komo ne̱ taase a yage̱ u-to̱ u̱n ye̱ n-te̱ o-kan kemo Ho̱-de u̱r-Wu̱we̱ à, remen ka Ho̱-de u̱r-Wu̱we̱ de ho̱-u̱r go̱s-de de. Yahuda-ne̱ ko̱nu̱ru̱ Biratus a jetem na-se u̱n ye̱, ye̱ meret ho̱r-m-ho̱r a ju̱kt ye̱. 32 Karma-ne̱ haanu̱ru̱, ye̱ jetemsu̱ru̱ na-se u̱n ka ne̱n yoor-ye̱ ye̱ a kame̱ u̱n Ye̱so ne̱ à. 33 Bo̱ ye̱ wo̱o̱nte̱ be-u̱r Ye̱so à, ye̱ 'wo̱ss wu̱ be'essu̱te̱ wu̱ mereste̱. Ye̱ jet na-se u̱n wu̱ á. 34 Se̱ de̱ wan-gaan be-de u̱n ka karma-ne̱ ye̱, wu̱ duuru̱ wu̱ o-tak n-te̱ n-ge̱n. Hyó-m rwu̱u̱nu̱ru̱ m-ho̱ ne̱. 35 (Ne̱t-wu̱ hyane̱ à, wu̱ no̱mu̱ru̱ swo̱-se u̱n ka ma-to̱ remen no̱ sheret u̱n ce u̱n no̱ ne̱. Ka swo̱-se ne̱ nip-o̱. Wu̱ nepste̱ komo ne̱ nip-o̱ wu̱ ro̱ m-rwo̱r.) 36 An no̱m kááne̱, remen a shoosté̱ Ma-to̱ Shir u̱nze, “Ko̱ caar-yo u̱n wu̱ o-gaan a he de yo m-jet á.”‡19:36 Hyen komo: Rwu̱u̱ 12:46; O̱o̱g 9:12; Bo̱ng 34:20. 37 N-me̱ u̱n de ken be-de u̱n Ma-to̱ Shir to̱ ze̱e̱g, “Ka ne̱t-wu̱ wu̱ ye̱ duu à, ye̱a gwo̱t wu̱.”§19:37 Hyen komo: Ze̱ka 12:10; Hyan 1:7.

38 Ka da-de ne̱, Yusuhu wu̱ o-Aramatiya wu̱ ro wan-neke̱-m Ye̱so wukusse̱ remen gye̱r-o̱ u̱n Yahuda-ne̱ à, wu̱ ko̱nu̱ru̱ Biratus co̱w-yo wu̱ dekt u-u̱r Ye̱so. Biratus ya'u̱ru̱ wu̱ o-co̱w. Wu̱ de̱ku̱ru̱ u-u̱r Ye̱so. 39 Neko̱dimu komo ne̱, ne̱t-wu̱ haane̱ haan-mo̱ u̱r-takan m-te̱t be-u̱r Ye̱so à. Wu̱ haanu̱ru̱ u̱t-po̱'o̱g ne̱ to̱ u̱n 'yo-se m-shi'igin se a m-aag u̱s-mur à, u̱n to̱ ken to̱ ne̱ to̱ a m-aag arro à, ku̱tu̱kse̱ u̱n rigiza-o gaan.*19:39 u̱t-Girik: Nu̱-se u̱n ka rigiza-o̱ wo̱o̱se̱ kirogu̱ram-u̱t u̱r-kwo̱o̱z u̱n o̱p-u̱t taan [35].†19:39 Hyen komo: Yoha 3:1-2. 40 Ye̱ de̱ku̱ru̱ u-u̱r Ye̱so, ye̱ yeru̱ru̱ de u̱n gund-u̱r pus-de mo̱sse̱ u̱n ka rii-yo m-shi'igin to̱ ne̱ bo̱ Yahuda-ne̱ ro̱ m-no̱m da-o̱ u̱n du̱k à. 41 Be-de a kame̱ Ye̱so o-kan à, de ken wak-de u̱s-'yo de ro kon, yo hun-ne̱ ro̱tte̱ m-hur m-yo à. Ka wak-de ne̱ saag ro kon kane̱ o-pu̱ o̱, o̱ a take̱ he̱'e̱dbe̱ u̱n ne̱t u̱n o̱ á. Pak-o̱ o-ta'ar o̱. O̱ wooste̱ kuke̱-u̱r re̱k-de de o-kur. 42 U̱ntu̱ ro ho̱-de u̱t-zo̱nge̱ de remen Biki-o̱ m-Pas o̱ u̱n Yahuda-ne̱ de à, komo ne̱ saag ro yow yow u̱n káne̱ ne̱ u̱n ka be-de a kemte̱ Ye̱so ne̱ o-kan à, ye̱ neksu̱ru̱ Ye̱so káne̱.