ut-Hun New Testament U̱t-Hyangan Bo̱r-u̱s ta'yoor

Bo̱r-u̱s ta'yoor

Hun-ne̱ dugu-u̱s zungu u̱n
kwo̱o̱z-u̱t yoor u̱s-nass [144,000]

1 Ka da-de u̱m hyanu̱ru̱ yan-to̱m-ye̱ Shir nass eso eso u̱n pa'aso-u̱t nass-to̱ u̱n ho̱no o-dak. Ye̱ we̱nu̱ru̱ m-yo mo̱ u̱n ko̱ de ke kwu̱ss-de m-hund n-to̱n o-dak. Ye̱ bo̱pu̱ru̱ yo-mo̱ u̱n kwu̱ss-u̱t nass taase mo̱ hund o-dak ko̱ n-to̱n m-sa ko̱ u̱n yo ken 'yo-yo.* 2 Komo u̱m hyanu̱ru̱ wu̱ ken wan-to̱m-wu̱ Shir wu̱ ro̱ m-rwu̱u̱n so̱ u̱r-ho̱ran. Wu̱ ro̱ u̱n reke̱-de Shir ne̱ wan-ho̱o̱g. Komo wu̱ kangsu̱ru̱ ka yan-to̱m-ye̱ Shir ye̱ nass ka ye̱ a ya'e̱ gwo̱mo-to̱ ye̱ ho̱gu̱sse̱ o-dak m-sa ne̱ m-hoog à. 3 Wu̱ ze̱e̱ru̱ ye̱, “Wasu̱ no̱! No̱ ho̱gu̱sse̱ o-dak ko̱ m-sa u̱s-'yo ne̱ m-hoog á se̱ a kemeste̱ ka reke̱-de Shir de u̱n zwo̱n-to̱ u̱n yan-gu̱w-mo̱ u̱n wu̱.”† 4 Ka da-de wan-to̱m-wu̱ Shir u̱n o̱r u̱n wu̱ ne̱ yan-to̱m ye̱ Shir, keme̱te̱ myet-mo̱ gu̱w-ne̱ ye̱ Shir. U̱m ho̱gu̱ru̱ mo̱o̱r-to̱ hun-ne̱ ye̱ ka yan-to̱m ye̱ keme̱ o-napa remen ye̱ ro̱ gu̱w-ne̱ ye̱ Shir à dugu-u̱s zungu u̱n kwo̱o̱z-u̱t yoor u̱s-nass [144,000] ka ye̱ a keme̱ ka napa-de à ye̱ e̱s mo̱ baag-to̱ u̱n Isra-ne̱ kap.

5 Ka yan-to̱m ye̱ keme̱ o-napa:

So̱ u̱n baag-o Yahuda dugu-u̱s o̱p u̱s-yoor [12,000],

So̱ u̱n baag-o Ruben dugu-u̱s o̱p u̱s-yoor [12,000],

So̱ u̱n baag-o Gad dugu-u̱s o̱p u̱s-yoor [12,000],

6 So̱ u̱n baag-o Asher dugu-u̱s o̱p u̱s-yoor [12,000],

So̱ u̱n baag-o Napari dugu-u̱s o̱p u̱s-yoor [12,000],

So̱ u̱n baag-o Manase dugu-u̱s o̱p u̱s-yoor [12,000],

7 So̱ u̱n baag-o Simo̱n dugu-u̱s o̱p u̱s-yoor [12,000],

So̱ u̱n baag-o Rewi dugu-u̱s o̱p u̱s-yoor [12,000],

So̱ u̱n baag-o Issakar dugu-u̱s o̱p u̱s-yoor [12,000],

8 So̱ u̱n baag-o Zeburun dugu-u̱s o̱p u̱s-yoor [12,000],

So̱ u̱n baag-o Yusuhu dugu-u̱s o̱p u̱s-yoor [12,000],

So̱ u̱n baag-o Banyamin dugu-u̱s o̱p u̱s-yoor [12,000].

9 Bo̱ to̱ ka aragte̱ à, u̱m gwo̱tu̱ru̱ u̱m 'wo̱s de ken caari-de u̱r-mo̱ro̱g de u̱n yan-ba-m-ku̱ko̱p u̱t-mo̱o̱r ne̱ ye̱ arge̱ m-o̱o̱g à. Ye̱ rwu̱u̱nte̱ so̱ u̱n ko̱ to̱ ke dak-to̱, u̱n ko̱ to̱ ke baag-to̱ ne̱, u̱n ko̱ ye̱ ke hun-ne̱ ye̱ ne̱, u̱n ko̱ de ke rem-de ne̱. Ye̱ ro̱ eso eso he̱r-o̱ u̱n ká kwu̱u̱r-o̱ u̱n co-o̱ u̱n ká Ca-yo. Ye̱ cu̱pste̱ matuku-u̱t se̱e̱b-to̱ u̱t-pus to̱, ye̱ bu̱ps jet-se o-do̱bino̱ u̱n kom-to̱ u̱n ye̱. 10 Ye̱ 'yonsu̱ u̱s-co̱r de̱e̱n ye̱ ze̱e̱ru̱,

“Gwu̱ rwu̱u̱nte̱ be-de u̱n Shir na,

wu̱ ro̱ tara u̱n kwu̱u̱r-o̱ u̱t-gwo̱mo à,

u̱n ká Ca-yo ne̱!”

11 Kap o̱ u̱n yan-to̱m-ye̱ u̱n Shir komo ye̱ rigu̱msu̱ru̱ ká kwu̱u̱r-o̱ eso eso, u̱n ka se̱k-ye̱ ne̱, komo u̱n ká rii-ye̱ u̱n ho̱o̱g nass-ye̱ ne̱. Ye̱ kwu̱ktu̱ru̱ u̱n he̱r-o̱ u̱n ká kwu̱u̱r-o̱, o-co n-dak ye̱ nomoru̱ Shir u̱r-bo̱ngo̱n. 12 Ye̱ se̱ngu̱ru̱ m-ze̱e̱,

“Amin! U̱r-bo̱ngo̱n, m-se̱ps ne̱, u̱s-nap ne̱,

u̱n 'ya m-yar ne̱, u̱t-go̱s ne̱,

u̱t-gwo̱mo ne̱, m-'wo̱ns ne̱ kap ro̱ be-de Shir na

ba m-ta har ya nomot! Amin!”

13 Ka da-o̱ wan-gaan be-de u̱n ká se̱k-ye̱ ye̱ u̱r-kwo̱o̱z u̱n nass [24] citu̱ me̱, wu̱ zee, “¿Wan ne̱ ye̱ ya u̱n matuku-u̱t se̱e̱b-to̱ u̱t-pus to̱? ¿Komo ke so̱-o̱ ye̱ rwu̱u̱ne̱?”

14 U̱m ze̱e̱ru̱ wu̱, “Go̱s-wu̱, o nepste̱.”

Ka da-de wu̱ ze̱e̱ru̱ me̱, “Ye̱ ka ye̱ ro̱ hun-ne̱ ye̱ possu̱ne̱ be-de u̱n re̱ u̱r-ko̱o̱b u̱r-go̱s-de à. Ye̱ u̱n so'os matuku-u̱t se̱e̱b-to̱ to̱ u̱n ye̱ u̱n hyó-mo̱ u̱n ká Ca-yo, ye̱ mustu̱ to̱ u̱t-pus to̱.‡

15 “O̱ hante̱ ye̱ est u̱n he̱r-o̱

u̱n kwu̱u̱r-o̱ u̱t-gwo̱mo to̱ Shir,

komo ye̱ u̱n no̱m m-se̱nge̱

m-te̱t, m-ho̱w ne̱ n-me̱ u̱n Pyo-o̱ u̱n wu̱.

Komo ka wu̱ ro̱ tara u̱n ka kwu̱u̱r-o̱ u̱t-gwo̱mo à

wu̱a she'et be-u̱r gaan u̱n ye̱ ne̱ komo wu̱ 'er ye̱.

16 Ye̱a do ho̱ge̱ m-me̱r á, ye̱a do ho̱ge̱ o-swo̱o̱t á,

ye̱a do hyan n-no̱o̱nho̱-o̱ u̱r-ho̱ á ko̱ o̱ ken hund-o̱ á.§

17 To̱ ka a kor remen ká Ca-yo ro̱ u̱n te̱te̱-de

u̱n ka kwu̱u̱r-o̱ à yo he ye̱ m-'er.

Komo yo a do̱ru̱tte̱ ye̱ ha-mo̱ u̱n yish-to̱

u̱n ho̱-mo̱ u̱n ho̱o̱g.

Komo Shir a pe̱'e̱g yish-mo̱ u̱n ye̱ kap.”*

*Bo̱r-u̱s ta'yoor:1 7:1 Hyen komo: Irmi 49:36; Dane 7:2; Ze̱ka 6:5.

†Bo̱r-u̱s ta'yoor:3 7:3 Hyen komo: Izik 9:4,6.

‡Bo̱r-u̱s ta'yoor:14 7:14 Hyen komo: Dane 12:1; Mati 24:21; Mark 13:19.

§Bo̱r-u̱s ta'yoor:16 7:16 Hyen komo: Isha 49:10.

*Bo̱r-u̱s ta'yoor:17 7:17 Hyen komo: Bo̱ng 23:1; Izik 34:23; Bo̱ng 23:2; Isha 49:10; Isha 25:8.