1 Ka da-de u̱m ho̱gu̱ru̱ o̱ ken co̱r-o̱ o̱ u̱r-be̱e̱b o̱ ro̱ m-rwu̱u̱n n-me̱ u̱n Pyo-o̱ Shir, ka co̱r-o̱ ro̱ u̱n ru̱re̱ u̱n yan-to̱m-ye̱ Shir ta'yoor. O̱ zee, “Habe̱ no̱, no̱ duusbe̱ ho̱no o-dak ká sheend-u̱t ta'yoor-to̱, to̱ u̱n ryaab-se Shir.” 2 Wan-to̱m-wu̱ Shir wu̱ u̱r-takan, wu̱ haaru̱ wu̱ duusbu̱ru̱ ho̱no o-dak rii-yo ro̱ u̱n sheend-o̱ u̱n wu̱ à. To̱ ken nat-to̱ rwu̱u̱nu̱ru̱ to̱ m-yo̱ m-hoog ne̱ de̱e̱n u̱n wu̱r-to̱ u̱n ka hun-ne̱ ye̱ ro̱ u̱n napa-o̱ u̱n ka nem-yo ne̱ à, komo u̱n ye̱ kwu̱kte̱ sha-mo̱ u̱n yo ne̱ à.*16:2 Hyen komo: Rwu̱u̱ 9:10.

3 Wan-to̱m-wu̱ Shir ayoore̱-wu̱ duusbu̱ru̱ rii-yo ro n-me̱ u̱n sheend-o̱ u̱n wu̱ à n-me̱ m-sa. Ho̱-m barmu̱ru̱, mo̱ wargu̱ru̱ u̱ntu̱n hyó-mo̱ u̱n ne̱t-wu̱ mare̱ à, kap o̱ u̱n rii-ye̱ u̱n ho̱o̱g-ye̱ ro n-me̱ u̱n ká sa-mo̱ à ye̱ maru̱ru̱.

4 Wan-to̱m-wu̱ Shir atette̱-wu̱ duusbu̱ru̱ rii-yo ro̱ u̱n sheend-o̱ u̱n wu̱ à n-me̱ u̱t-ro̱o̱g u̱n yish-to̱ m-ho̱ ne̱, to̱ argu̱ m-warag m-hyó.†16:4 Hyen komo: Rwu̱u̱ 7:17-21; Bo̱ng 78:44. 5 U̱m ho̱gu̱ru̱ wan-to̱m-wu̱ Shir go̱s-wu̱ wu̱ m-ho̱ ze̱e̱g Shir,

8 Ka da-de wan-to̱m-wu̱ Shir anasse̱-wu̱ duusbu̱ru̱ rii-yo ro̱ u̱n sheend-o̱ u̱n wu̱ à n-me̱ u̱r-ho̱. Komo a ya'ag de de tu̱ks hun-ne̱ u̱n hund-o̱ ra. 9 Hund-o̱ u̱n ka o-ra o̱ tu̱ksu̱ hun-ne̱, har ye̱ pyapu̱ jin-de Shir, wu̱ ro̱ Wa-u̱r-Be̱e̱b be-de u̱n ka re̱ u̱r-ko̱o̱b o̱ à. Amba ye̱ waktu̱ne̱ ye̱ se̱ke̱mse̱ jin-de u̱n wu̱ á.

10 Wan-to̱m-wu̱ Shir ataane̱-wu̱ duusbu̱ru̱ rii-yo ro u̱n sheend-o̱ u̱n wu̱ à n-te̱ u̱n kwu̱u̱r-o̱ u̱n gwo̱mo-to̱ u̱n ka nem-yo. Comb-o argu̱ ho̱k u̱n gwo̱mo-to̱ u̱n ka nem-yo, komo hun-ne̱ ye̱ u̱n wu̱ hewru̱ru̱ rem-to̱ u̱n ye̱ remen m-reeten.‡16:10 Hyen komo: Rwu̱u̱ 10:21. 11 Ye̱ agu̱ Shir o̱ n-To̱n u̱n jin-u̱r yo̱-de remen m-reeten mo̱ u̱t-nat mo̱ ye̱ m-swo̱ à. Amba ye̱ waktu̱ne̱ be-de u̱n ba'as-de u̱n ye̱ á.

12 Wan-to̱m-wu̱ Shir acinde̱-wu̱ duusu̱ru̱ ryaab-se Shir se ro u̱n sheend-o̱ u̱n wu̱ à n-me̱ u̱n ro̱o̱g-o̱ o-Yupireti. Ho̱-mo̱ u̱n o̱ hwo̱'u̱ru̱ kap. U̱n kaane̱, gwo̱mo-ne̱ ye̱ u̱n dak-to̱ u̱r-ho̱ran a hoks m-pas ha-mo̱ u̱r-ho̱rim u̱n karma-ne̱ ye̱ u̱n ye̱ ne̱.§16:12 Hyen komo: Isha 11:15. 13 Ka da-de u̱m hyambu̱ yan-dak-ye̱ rim-ye̱ ne̱n tet u̱ntu̱n ye̱ge̱-ku̱. Ye̱ rwu̱u̱nte̱ u̱n nu-o̱ u̱n ka hwo̱-yo, u̱n nu-o̱ u̱n ka nem-yo ne̱, u̱n nu-o̱ u̱n ka wan-rwo̱r u̱n Ma-to̱ Shir to̱, to̱ u̱t-bo̱. 14 Ye̱ ya-u̱t-ko̱t ye̱, yan-no̱m u̱t-hyat, ye̱ haag be-de u̱n gwo̱mo-ne̱ ye̱ u̱n ho̱no o-dak kap, ye̱ kargu̱nsu̱ ye̱ be-u̱r gaan remen a gu̱n-u̱t u̱r-gu̱n u̱n Wan-Ko̱yan ne̱ u̱n ho̱-u̱r go̱s-de de u̱n piish u̱t-ma to̱ Shir Wa-u̱t-Gwo̱mo kap.

15 U̱m ho̱gu̱te̱ Ye̱so m-ze̱e̱, “War no̱: u̱m ro̱be̱ ba u̱n hwo̱ o-da u̱ntu̱n ko-hyow! Shir ya'ag ye̱ u̱r-ho̱ ye̱ ro̱ ero à, ye̱ e̱sse̱ matuku-to̱ u̱n ye̱ zo̱ngse̱ à, taase ye̱ neke̱ u̱r-kor, ye̱ ho̱ge̱ m-'e̱ n-me̱ u̱n hun-ne̱!”*16:15 Hyen komo: Mati 24:43-44; Ruka 12:39-40; Hyan 3:3.

16 Ka yan-dak-ye̱ rim-ye̱ ye̱ kargu̱nsu̱ gwo̱mo-ne̱ u̱n karma-ne̱ ne̱ u̱n ye̱ ne̱ be-u̱r gaan, u̱n de ken be-de a m-ze̱e̱ Armagedon à u̱n rem-de u̱t-Ibra.†16:16 Hyen komo: 2Gwm 23:29; Ze̱ka 12:11.

17 Ka da-de wan-to̱m-wu̱ Shir ata'yoore̱-wu̱ duusbu̱ru̱ rii-yo ro u̱n sheend-o̱ u̱n wu̱ à u̱n yo-mo̱ u̱n ku̱s-o̱ u̱n n-to̱n. O̱ ken co̱r-o̱ u̱r-be̱e̱b o̱ rwu̱u̱nu̱ru̱ be-de u̱n ká kwu̱u̱r-o̱ n-me̱ u̱n Pyo-o̱ Shir, o̱ ro̱ m-ze̱e̱, “A ko̱mo̱g!” 18 A no̱mu̱ o-myakt, o-zaaz ne̱ de̱e̱n, u̱t-dàkàr ne̱, u̱n mo̱ ken nukte̱-mo̱ o-dak mo̱ ne̱ mo̱ u̱n ba u̱r-bon mo̱ a take̱ m-no̱m á cin da-o̱ a no̱me̱ ne̱t à. Ka caari-mo̱ u̱n nukte̱-mo̱ o-dak mo̱ komo de̱e̱n mo̱ no̱me̱.‡16:18 Hyen komo: Hyan 8:5; 11:13,19. 19 Ka caari-o̱ o-bo̱ o̱ o-Babira o̱ pu̱rgu̱ be-u̱t tet, bo̱-to̱ u̱n ho̱n u̱t-dak kap to̱ he̱e̱ru̱. Shir baksu̱ ba'as-de o-Babira wu̱ rwo̱'u̱ o̱ swo̱ u̱n ka ibitte̱-de de u̱n ryaab-se u̱n wu̱ se m-yo̱.§16:19 Hyen komo: Isha 51:17. 20 Ko̱ o̱ ke dak-o̱ o̱ ro̱ n-te̱te̱ de m-sa à o̱ e̱gu̱ru̱, myet-o̱ u̱n caari-to̱ u̱t-haag komo a do to̱ m-hyan á.*16:20 Hyen komo: Hyan 6:14. 21 Caari-to̱ u̱n ta'ar-to̱ u̱n kem, nu̱-se u̱n to̱ me'es-de o-kiro̱ kwo̱o̱z-u̱t yoor [40], to̱ he'emenu̱ru̱ n-to̱n hun-ne̱ rwu̱u̱n-mo̱ n-To̱n shir. Har hun-ne̱ pyep Shir remen rii-yo ko̱ru̱ ye̱ u̱n ka ta'ar-ye̱ u̱n kem ye̱ à, no̱ng de̱e̱n!†16:21 Hyen komo: Rwu̱u̱ 9:23; Hyan 11:19.