Bo̱r-u̱s o̱p u̱s-eer
He̱-de u̱n bo̱-o̱ o-Babira
1 Bo̱ u̱n arag-mo̱ u̱n to̱ ka, u̱m hyanu̱ru̱ wu̱ ken wan-to̱m-wu̱ Shir wu̱ m-kergu̱ne̱ rwu̱u̱n-mo̱ n-To̱n shir. Wu̱ ro̱ u̱t-gwo̱mo ne̱ u̱t-go̱s ne̱, komo mo̱k-o̱ u̱n wu̱ caragsu̱ru̱ ho̱no o-dak. 2 Wu̱ aagu̱ru̱ u̱n co̱r-o go̱s-o̱, wu̱ zee,
“Babira-o hyeeste̱!
Shir to̱k ka caari-o̱ o-bo̱ o̱ ba'as-to̱ u̱n o̱!
O̱ waragte̱ be-de u̱r-she'et de ya-u̱t-ko̱t
u̱n ho̱n u̱n yan-dak-ye̱ rim-ye̱ ne̱
u̱n go̱ u̱n ko̱ yo ke no-yo u̱n hu yo ne̱.*18:2 Hyen komo: Isha 21:9; Irmi 51:8; Hyan 14:8; Isha 13:21; Irmi 50:39.
3 Remen kap hun-ne̱ ye̱ u̱t-dak ye̱ swo̱o̱g m-ke̱
mo̱ u̱n ka bo̱-o̱ mo̱ o-ás.
Gwo̱mo-ne̱ ye̱ u̱n ho̱no o-dak no̱mo̱g o-ás u̱n o̱ ne̱.
Remen hun-ne̱ co̱no̱g she'et-de u̱n ho̱ge̱ m-re̱re̱m,
ya-m-o̱, u̱t-baab ne̱
ye̱ u̱n ho̱no o-dak kumug o-kwu̱m.”†18:3 Hyen komo: Isha 23:17; Irmi 51:7.
4 U̱m ho̱gu̱ru̱ o̱ ken co̱r-o̱ rwu̱u̱n-mo̱ n-To̱n o̱ shir o̱ ze̱e̱g,
“Hun-ne̱ re o̱, rwu̱u̱n no̱ n-me̱ u̱n o̱!
U̱rege̱ no̱ m-no̱m u̱r-ba'as bo̱ ye̱ m-no̱m à,
Man 'ye no̱ u̱r-ko̱o̱b bo̱ u̱m he ye̱ m-'ya à.‡18:4 Hyen komo: Isha 48:20; Irmi 50:8; 51:6,45.
5 Remen a mo̱ro̱gsu̱te̱ ba'as-to̱ u̱n o̱ be-u̱r gaan,
to̱ nomog m-se̱e̱b to̱ wo̱o̱g To̱n-o shir.
Komo Shir bakste̱ me̱n-u̱t jaas-to̱ to̱ u̱n o̱.§18:5 Hyen komo: Taka 18:20-21; Irmi 51:9.
6 No̱mu̱ no̱ ka bo̱-o̱ hond hond bo̱ o̱ no̱mu̱ no̱ à,
kap bo̱ u̱n rem-se o̱ no̱mu̱ no̱ à muutu̱ no̱ o̱ o-yoor.
Ko̱k-de o̱ bu̱ru̱tu̱ no̱ ho̱-mo̱ m-ke̱ à
bu̱ru̱ no̱ o̱ u̱n de o-yoor.*18:6 Hyen komo: Bo̱ng 137:8; Irmi 50:29.
7 O̱ she'ette̱ she'et-de m-se̱ps o-zak ne̱,
remen kaane̱ no̱mu̱ no̱ o̱ m-zo̱m ryaab-u̱s u̱s-ryaab.
O̱ ro̱ u̱s-se̱s m-ze̱e̱,
‘Me̱, ko-saraki-wu̱, u̱n de̱e̱g u̱n de u̱m ro̱ tara!
Me̱ ne'a-wu̱ campo̱ u̱n wu̱ mare̱ à wu̱ wu̱ á.
Komo a wo̱s me̱ u̱n tu̱k-mo̱ u̱t-me̱n á!’
8 Remen kaane̱, ho̱-u̱r gaan a he wu̱ m-hante̱
u̱n tu̱k-mo̱ u̱t-me̱n, m-mar, u̱n me̱r ne̱.
Komo a tu̱ks wu̱ o-ra.
Remen Wan-Ko̱yan Shir wu̱ ro̱ Wa-u̱r-Be̱e̱b,
komo wu̱ he wu̱ piishe̱ u̱t-ma.†18:7-8 Hyen komo: Isha 47:7-9.
9 “N-ga, gwo̱mo-ne̱ ye̱ u̱n ho̱no o-dak ye̱ no̱mo̱g o-ás u̱n wu̱ ne̱ komo ye̱ ho̱gu̱te̱ m-re̱re̱m u̱n saw-to̱ u̱n hwo̱r to̱ u̱n wu̱. Amba da-o̱ ye̱ hyane̱ hye-de o-ra de u̱n tu̱k-mo̱ u̱n wu̱ à, ye̱a 'u̱n-u̱s-'wo̱n u̱n u̱s-kan ne̱ de̱e̱n remen wu̱. 10 Ye̱a es u̱r-hew ne̱ remen ye̱ u̱n ho̱ge̱ o-gye̱r o̱ u̱n swo̱ u̱r-ko̱o̱b de wu̱ ro̱ m-swo̱ à. Ye̱a se̱nge̱ m-ze̱e̱,
“ ‘Wo̱ rii-yo u̱r-'wo̱n yo! Wo̱ rii-yo u̱r-'wo̱n yo,
caari-o̱ o-bo̱ o̱ o-Babira, bo̱-o̱ u̱r-'wo̱n!
Shir piishitu̱ wo̱ u̱t-ma da-o gaan!’‡18:9-10 Hyen komo: Izik 26:16-17.
11 “Ya-u̱t-baab m-o̱ ne̱ ye̱ u̱n ho̱no o-dak ye̱a 'u̱n u̱n tu̱k-mo̱ u̱t-me̱n, remen yatt-ye̱ kuse̱ m-o̱ u̱n saw-to̱ u̱n ye̱ komo á.§18:11 Hyen komo: Izik 27:31,36. 12 Wu̱ o̱o̱g u̱t-saw de̱e̱n to̱ u̱n zinariya u̱n to̱ u̱n azorpa ne̱, u̱n ta'ar-ye̱ o-mo̱k ne̱, u̱s-rwu̱u̱mb se u̱n hwo̱r ne̱, komo u̱n gund-to̱ u̱n ye̱ ne̱ to̱ u̱r-bon, u̱t-gund ne̱ to̱ m-de̱ke̱r, u̱n gund-u̱t jaas-to̱ ne̱, u̱s-'yo ne̱ se u̱n wú̱s m-shi'igin go̱-u̱s u̱s-go̱, u̱n saw-to̱ u̱n yin-ye̱ u̱n rwo̱o̱g-ne̱, u̱n kap o̱ u̱n saw-to̱ u̱n hwo̱r ne̱ to̱ a shabe̱ u̱s-'yo à, u̱n rem-se a zwo̱ ne̱ u̱n kwo̱m-u̱t jaas-to̱ à, u̱n rem-se u̱t-kwo̱m ne̱, m-ta'ar ne̱. 13 Komo wu̱ o̱o̱g saw-to̱ u̱n rem-se u̱s-co̱, u̱n rii-yo m-shi'igin ne̱, u̱n no̱w-mo̱ m-shi'igin ne̱, u̱n o-mur, u̱n rii-yo m-shi'igin ne̱ to̱ a m-aag o-parakanse à, m-ke̱ ne̱, u̱n no̱w-mo̱ o-ze̱tun ne̱, u̱n hyò-mo̱ u̱n arkama-ne̱, u̱n su̱w-ye̱ u̱n arkama-ne̱, u̱n na-ne̱, u̱n ca-ne̱, u̱n jo̱k-ne̱, u̱n ke̱ke̱-to̱ u̱n jo̱k-ne̱, komo u̱n hun-ne̱ ne̱ remen wu̱ muute̱ ye̱ gu̱w-ne̱.*18:12-13 Hyen komo: Izik 27:12-13,22.
14 “Ya-u̱t-baab ze̱e̱ru̱ ka ne'a-wu̱, ‘Kap o̱ u̱n ka rem-se u̱r-bon se o she̱re̱ yish à se egu̱ssu̱te̱ komo kap o̱ u̱n kwu̱m-o ru u̱n saw-u̱t ru ne̱ to̱ m-co̱p to̱ egu̱ssu̱te̱. Wo̱a do to̱ m-kum komo á!’ 15 Ya-u̱t-baab ye̱ kume̱ o-kwu̱m u̱n saw-to̱ ye̱ ro̱ wu̱ m-bebe̱ à, ye̱a e̱se̱n u̱r-hew ne̱, remen ye̱ o-gye̱r o̱ u̱n ká zo̱m-mo̱ a m-nome̱ u̱n ka ne'a-wu̱ à. Ye̱ u̱s-kan, ye̱ u̱n tu̱k-mo̱ u̱t-me̱n.†18:15 Hyen komo: Izik 27:31,36. 16 Ye̱ m-ze̱e̱,
“ ‘Rii-yo u̱r-'wo̱n!
Rii-yo u̱r-'wo̱n yo ka caari-o̱ o-bo̱ o̱!
O̱ ro n-ga u̱n co̱p u̱n gund-to̱ u̱r-bon to̱ m-gwu̱gwe̱r à,
u̱r-matuku ne̱ de u̱n ho̱-mo̱ u̱n o-garura,
komo u̱r-matuku ne̱ de u̱n ho̱-m jaas-mo̱ záá,
komo o̱ ro u̱n no̱m u̱t-duk u̱n saw-to̱ u̱n zinariya,
u̱n ta'ar ne̱ ye̱ u̱n hwo̱r komo
u̱n rwu̱u̱mb-se u̱n hwo̱r ne̱!
17 Amba da-o gaan kap o̱ u̱n kwu̱m-o̱ u̱n o̱ tae̱!’
“Myet-o̱ u̱n yan-hat-to̱ m-ho̱ u̱n yan-da-mo̱ u̱n to̱ ne̱, u̱n ya-m-nak ne̱ komo u̱n kap o̱ u̱n bo̱ u̱n ye̱ ro̱ m-kum u̱n ya-m-o̱ u̱t-baab ne̱ be-de m-sa à, ye̱a e̱s u̱r-hew ne̱.‡18:17 Hyen komo: Isha 23:14; Izik 27:26-30. 18 Ye̱a 'u̱n, da-o̱ ye̱ ro m-hyan u̱n hye-de u̱n ka ra-o̱ ro̱ m-da n-to̱n à. Ye̱a zee, ‘A tak u̱n m-hyan o-bo̱ u̱ntu̱n o̱ ka á!’§18:18 Hyen komo: Izik 27:32. 19 Ye̱a 'u̱n ye̱ zo̱r m-hu a nept tu̱k-mo̱ u̱t-me̱n ho̱o̱g ye̱. Komo ye̱a zee,
“ ‘Rii-yo u̱r-'wo̱n, rii-yo u̱r-'wo̱n, kà bo̱-o caari-o̱!
Remen ká bo̱-o̱, yan-hat-o̱ m-ho̱
ye̱ kamaste̱ hwo̱r de̱e̱n u̱n bu̱-yo baab-to̱
u̱n rem-se hun-ne̱ ye̱ u̱n ká bo̱-o̱ m-no̱m à.
Amba da-o gaan ko̱yan sabre̱!*18:19 Hyen komo: Izik 27:30-34.
20 No̱m no̱ o-zak, no̱ ye̱ ro̱ u̱r-she'et n-To̱n shir à,
no̱m no̱ o-zak no̱ yan-ba-m-ku̱ko̱p, yan-To̱m Ye̱so,
u̱n yan-Rwo̱r u̱n Ma-to̱ Shir ne̱.
U̱r-ko̱m Shir piishite̱ o-Babira u̱t-ma
remen rii-yo o̱ no̱mu̱ no̱ à!’ ”†18:20 Hyen komo: Kara 32:43; Irmi 51:48.
21 Ka da-de wu̱ ken ko-be̱e̱b-wu̱ u̱n wan-to̱m-wu̱ Shir wu̱ kepsu̱ o̱ ken ta'ar-o̱ o-go̱s o̱ o̱ woose̱ ta'ar-de u̱n u̱r-na à. Wu̱ jorbu̱ o̱ n-me̱ m-sa, wu̱ ze̱e̱ru̱,
“O-nip kaane̱
a jorbe̱ o-Babira caari-o̱ o-bo̱,
o̱ m-'wo̱ns, bo̱ u̱m jorbe̱ ka ta'ar-o̱ à,
komo a do o-Babira m-hyan á.‡18:21 Hyen komo: Irmi 51:63,64; Izik 26:21.
22 Hun-ne̱ a do m-ho̱ge̱ n-me̱ o-Babira ras-o̱ o-moro,
u̱n ya-u̱t-se̱p ne̱, u̱n yan-hwu̱hwu̱ru̱g ne̱,
u̱n yan-hur u̱s-sherewa ne̱ n-me̱ u̱n o-Babira á.
Komo a do hyan u̱n wan-ce̱
kane̱ ko̱ wan-gaan á.
Komo a do ho̱ge̱ u̱n ras-o̱ u̱r-na n-me̱ o-Babira á.§18:22 Hyen komo: Izik 26:13; Isha 24:8.
23 Hun-ne̱ do hyan ra-o̱ u̱r-pitirra n-me̱ o-Babira á.
Komo co̱r-se o-zak u̱n yan-rew-to̱ u̱n ge-u̱t pu̱-to̱ ne̱
a do se m-ho̱ge̱ u̱n ka bo̱-o̱ á.
Ya-u̱t-baab ye̱ o-Babira ye̱ ro caari-ne̱,
ye̱ ro jiishte̱ ya-u̱t-baab ye̱ u̱n ho̱no o-dak kap à,
komo u̱n myot-u̱s ru o̱ o e̱gu̱sse̱ myet-o̱ u̱t-dak!*18:22-23 Hyen komo: Irmi 7:34; 25:10.
24 U̱n co̱w-se u̱n ka bo̱-o̱ kane̱ a wu̱u̱se̱ hyó-mo̱
u̱n yan-Rwo̱r u̱n Ma-to̱ Shir ye̱ u̱r-takan
u̱n yan-ba-m-ku̱ko̱p ne̱.
Kane̱ komo a ho̱ hun-ne̱ u̱n ho̱no o-dak.”†18:24 Hyen komo: Irmi 51:49.
*Bo̱r-u̱s o̱p u̱s-eer:2 18:2 Hyen komo: Isha 21:9; Irmi 51:8; Hyan 14:8; Isha 13:21; Irmi 50:39.
†Bo̱r-u̱s o̱p u̱s-eer:3 18:3 Hyen komo: Isha 23:17; Irmi 51:7.
‡Bo̱r-u̱s o̱p u̱s-eer:4 18:4 Hyen komo: Isha 48:20; Irmi 50:8; 51:6,45.
§Bo̱r-u̱s o̱p u̱s-eer:5 18:5 Hyen komo: Taka 18:20-21; Irmi 51:9.
*Bo̱r-u̱s o̱p u̱s-eer:6 18:6 Hyen komo: Bo̱ng 137:8; Irmi 50:29.
†Bo̱r-u̱s o̱p u̱s-eer:8 18:7-8 Hyen komo: Isha 47:7-9.
‡Bo̱r-u̱s o̱p u̱s-eer:10 18:9-10 Hyen komo: Izik 26:16-17.
§Bo̱r-u̱s o̱p u̱s-eer:11 18:11 Hyen komo: Izik 27:31,36.
*Bo̱r-u̱s o̱p u̱s-eer:13 18:12-13 Hyen komo: Izik 27:12-13,22.
†Bo̱r-u̱s o̱p u̱s-eer:15 18:15 Hyen komo: Izik 27:31,36.
‡Bo̱r-u̱s o̱p u̱s-eer:17 18:17 Hyen komo: Isha 23:14; Izik 27:26-30.
§Bo̱r-u̱s o̱p u̱s-eer:18 18:18 Hyen komo: Izik 27:32.
*Bo̱r-u̱s o̱p u̱s-eer:19 18:19 Hyen komo: Izik 27:30-34.
†Bo̱r-u̱s o̱p u̱s-eer:20 18:20 Hyen komo: Kara 32:43; Irmi 51:48.
‡Bo̱r-u̱s o̱p u̱s-eer:21 18:21 Hyen komo: Irmi 51:63,64; Izik 26:21.
§Bo̱r-u̱s o̱p u̱s-eer:22 18:22 Hyen komo: Izik 26:13; Isha 24:8.
*Bo̱r-u̱s o̱p u̱s-eer:23 18:22-23 Hyen komo: Irmi 7:34; 25:10.
†Bo̱r-u̱s o̱p u̱s-eer:24 18:24 Hyen komo: Irmi 51:49.