ut-Hun New Testament Roma-ne̱ Bo̱r-u̱s o̱p

Bo̱r-u̱s o̱p

1 O̱r re ne̱, yo hur u̱n de jiishe̱ m-co̱n à, u̱n ko̱n-u̱s re ne̱ be-de Shir yo ro̱, Isra-ne̱ ye̱ kum gwu̱. 2 U̱m nepste̱ ye̱ ya'aste̱ hi u̱n de u̱n ye̱ de̱e̱n remen gu̱w-mo̱ Shir. Amba mo̱ ka gu̱w-mo̱ u̱n ye̱ mo̱ ba u̱n bu̱-yo u̱n nap-o nip-o̱ á. 3 Remen ye̱ nap bu̱-yo Shir ro̱tte̱ u̱n muut u̱n hun-ne̱ kashi be-de u̱n wu̱ á, o̱ rwo̱'e̱ ye̱ do̱ru̱te̱ barag-se u̱n hi u̱n de u̱n ye̱. Ye̱ se̱ngu̱ru̱ m-do̱re̱ u̱n bu̱-yo o-karamsa. 4 Kiristi, wu̱ ro̱ ko̱m-de o-karamsa, remen a waragté̱ kashi be-de Shir, se̱ a she̱re̱g be-de u̱n wu̱.

Gwu̱ remen hun-ne̱ o̱ myet

5 Mosa ze̱e̱g u̱nze ne̱t a hoks m-warag kashi be-de Shir n-me̱ u̱n do̱ro̱tte̱ o-karamsa. Wu̱ u̱n no̱m kaane̱ da-o̱ wu̱ ge̱ne̱ à, “U̱rege̱ o co̱no̱g o no̱m m-ho̱o̱g, se̱ o no̱mo̱g kap yo karamsa-o ze̱e̱ à.”* 6 Amba yo Ma-to̱ Shir ze̱e̱ à yo ka, u̱n bu̱-yo m-she̱r ne̱t he m-warag kashi. “Wo̱ zee u̱n hur u̱n du á, ‘¿Wa he m-da n-To̱n?’ ” (Remen wu̱ kyergu̱ntu̱té̱ Kiristi) 7 ko̱ ne̱ o zee, “¿Wa he m-co̱w u̱n ku̱s-o̱ o-dak?” (Wu̱ 'yonsu̱nte̱ Kiristi u̱t-marimar). 8 Yo Ma-to̱ Shir ze̱e̱ à, yo ka:

“Ma-to̱ Shir ro̱ yow yow u̱n wo̱ ne̱,

to̱ ro̱ u̱n nu ru, u̱n hur u̱n du ne̱.”†

Ka ma-to̱ ro̱ to̱m-o̱ m-she̱r o̱ te̱ m-ko̱'o̱t à. 9 U̱rege̱ o rwo̱ro̱g u̱n nu-o ru u̱nze Ye̱so wu̱ ro̱ Wan-Ko̱yan, o she̱re̱g komo u̱n hur u̱n du u̱nze Shir 'yonste̱ wu̱ u̱t-marimar, wo̱a kum gwu̱. 10 Nip-o̱ ka ma-to̱ remen n-te̱ u̱r-hur ne̱t ro̱ m-she̱r wu̱ waragté̱ ba u̱r-ba'as be-de Shir, komo o-nu ne̱t ro̱ m-ce̱p u̱nze Ye̱so wu̱ ro̱ Wan-Ko̱yan wu̱ kumut gwu̱. 11 Bo̱ Ma-to̱ Shir ze̱e̱ à, “Myet wu̱ she̱re̱ u̱n wu̱ à, wu̱a no̱m m-'e̱ á.”‡ 12 Shir ro̱tt m-koos á. Wu̱ ro̱ m-hyan ko-Yahuda u̱n wu̱ ro̱ ko-Yahuda á, gaan-to̱. Wu̱ ro̱ Wan-Ko̱yan be-de u̱n hun-ne̱ myet. Shir ro̱ m-'ya o-kwu̱m de̱e̱n u̱n myet ye̱ ha be-de u̱n wu̱ à. 13 Me̱ u̱n ze̱e̱ kaane̱ remen, “Myet wu̱ aage̱ u̱n jin-u̱r Yawe à, wu̱a kum gwu̱.”§

14 ¿Amba re ye̱ he m-aag u̱n wu̱ ye̱ she̱re̱ be-de u̱n wu̱ á? ¿Re ye̱ he m-she̱r u̱n wu̱ ye̱ ho̱ge̱ ma-to̱ u̱n wu̱ á? ¿Re ye̱ he m-ho̱ge̱ u̱rege̱ a kum wu̱ he ye̱ m-ko̱'o̱te̱ á? 15 ¿Re yan-ko̱'o̱t u̱n Ma-to̱ Shir he m-ko̱'o̱t a to̱m ye̱ á? Bo̱ to̱ ro̱ gense̱ u̱n Ma-to̱ Shir à u̱nze, “Wo̱o̱n-mo̱ u̱n yan-ko̱'o̱t u̱n Ma-to̱ m-Re̱re̱m rii-yo u̱r-bon yo de̱e̱n.”*

16 Amba yanze myet hun-ne̱ ye̱ o-Isra go̱kse̱ ka Ma-to̱ m-Re̱re̱m to̱ á. Bo̱ Ishaya ze̱e̱ à, “Yawe, ¿wa go̱kse̱ ma-u̱t na?”† 17 Remen kaane̱, she̱r-m ro̱ m-haan be u̱n na u̱n bu̱-yo u̱n ho̱ge̱ u̱n Ma-to̱ Shir, komo a m-ho̱ge̱ u̱n Ma-to̱ Shir u̱n bu̱-yo u̱n yan-ko̱'o̱t u̱n ma-u̱t Kiristi. 18 Amba me̱ o-cot ne̱, “¿Nip-o̱ ye̱ ho̱ge̱ á?” Ye̱ ho̱gu̱su̱te̱. Bo̱ to̱ ro̱ gense̱ u̱n Ma-to̱ Shir à:

“A ho̱gu̱su̱te̱ co̱r-se u̱n ye̱ ho̱no o-dak,

Ma-to̱ u̱n ye̱ woose̱ komo ko̱m-de o-dak.”‡

19 Man do m-cit, “¿Hun-ne̱ ye̱ o-Isra ye̱ nap o̱ á?” Mosa ba'e̱ m-shas, wu̱ zee, Shir ze̱e̱g:

“Man ru̱ Isra-ne̱ nom u̱r-shoob de

u̱n hun-ne̱ ye̱ o-hwaa.

Man ru̱ no̱ no̱m u̱s-ryaab remen hun-ne̱ ye̱

u̱n ba u̱s-we̱e̱r, ye̱ ro̱ Yahuda-ne̱ á.”§

20 Ishaya rwo̱ro̱g Ma-to̱ Shir u̱n jaab ne̱:

“Hun-ne̱ ye̱ ho̱o̱bu̱ me̱ á, ye̱ kumug me̱.

U̱m rwu̱ntu̱te̱ hi u̱n de cas be-de u̱n ye̱ cite̱

bo̱ ye̱ he me̱ m-kum á.”*

21 Amba mo̱sse̱ o-Isra-ne̱, Shir dooru̱ m-ze̱e̱,

“U̱r-ho̱ bi, u̱m co̱no̱g ye̱ m-hongse̱ u̱n me̱ ne̱,

u̱m barku̱te̱ yan-ko̱o̱b-de o-do̱ro̱tte̱

u̱n ya-u̱r-cikt ne̱.”†

*Bo̱r-u̱s o̱p:5 10:5 Hyen komo: Rewi 18:5.

†Bo̱r-u̱s o̱p:8 10:6-8 Hyen komo: Kara 30:12-14.

‡Bo̱r-u̱s o̱p:11 10:11 Hyen komo: Isha 28:16 (u̱t-Girik).

§Bo̱r-u̱s o̱p:13 10:13 Hyen komo: Jowe 2:32.

*Bo̱r-u̱s o̱p:15 10:15 Hyen komo: Isha 52:7.

†Bo̱r-u̱s o̱p:16 10:16 Hyen komo: Isha 53:1 (u̱t-Girik).

‡Bo̱r-u̱s o̱p:18 10:18 Hyen komo: Bo̱ng 19:4 (u̱t-Girik).

§Bo̱r-u̱s o̱p:19 10:19 Hyen komo: Kara 32:21.

*Bo̱r-u̱s o̱p:20 10:20 Hyen komo: Isha 65:1 (u̱t-Girik).

†Bo̱r-u̱s o̱p:21 10:21 Hyen komo: Isha 65:2 (u̱t-Girik).