1 Niyaen, nepaenta na anghel ha nikan i karayan a ikabiyag na totolay. Madinnang ito a kona ha sarming a lumapos ha pagetnodan na Dios ken ni Kordero. 2 Ket bumulos ito ha lubuk na kalsada na ili. Maghen ha magkalipat ha karayan i kaykayo a ikabiyag na totolay. Magbunga hidi a kada bulan. Isu, esa pulo ket duwa i magani ha denday a kayo ha kada tawen. Ket pangpahusay ha ngamin a totolay i dodon na kaykayo aye. 3 Awan ha pakeenglan na Dios ha ide a ili. Ta atoy hito i paghariyan na Dios ken ni Kordero. Ket ha ide bila i pagdeyawan di ha nikuna na ngamin a tagatagabu na. 4 Maenta di i rupa na, ket mesurat i nagen na ha kidap di. 5 Awan manon ha kallap he, ket awan di masapul i pagsilawan onu disiyag na singgit, gipu ta Apo Dios a mismo i silaw di. Ket maghen hidi hito a kona ha harhari, a makipaghen hidi ha Dios ha magnanayon, a awan ha kahad na.

6 Niyaen, kinagi na ha nikan na anghel, “Tahod ken mapagtalkan idende a kakkagi. Ni Apo Dios a nangiyatad ha Espiritu na ha mahagpugto a hidi, hikuna i nagpaangay ha nikan a anghel na, penu ipaenta ko ha nikam a tagatagabu na i dandani a magimet.”

7 “Temanan moy!” kagi ni Jesus. “Dumematak ha sigida! Ket mahusay hidi a magtongpal ha dende a pugto, a nesurat ha libro aye,” kon ni Jesus.

8 Niyaen, hikan ni Juan. Nateman ko ken naenta ko i ngamin a nesurat ha ide a libro. Kobosan na pinnakateman ko ken pinnakaenta ko ha ngamin a ide, hinumakabak ha saguppang na anghel, penu magdeyawak mina ha nikuna. 9 Ngem kinagi na ha nikan, “Awan kas! Kakalan taka, a tagabu ak bila na Dios a kona ha nikaw, ken ngamin a kakabsat mo a mahagpugto, ken ngamin a umuseg ha kagi na ide a libro. Dios la i pagdeyawan mo!” 10 Ket intulos na, “Awan mo ilimid idende a pugto ha libro aye, gipu ta mabikan dan i tiyempo na panungpalan. 11 Awan magbabawi i madukas a hidi. Magtulos la hidi ha kinadukas di. Ngem ha nikam a mappiya, a nasakop na Dios a totolay na, masapul a magtulos kam a maggimet ha mappiya. Tumulos kamon a nadiosan.”

12 “Temanan moy,” kagi ni Jesus, “dumematak ha sigida! Itugan ko i panggungguna ko ha kada esa, ayun ha ginimet na. 13 Hikan i namarsuwa ha ngamin ken pagpatinggaan na ngamin; hikan i palungo ken i magdilokod, i pangrugiyan ken i panungpalan na ngamin a bagbagay.”

14 Mahusay i mangdalus a hidi ha tennon di. Ta maatdinan hidi ha kalintegan di a makasaddap ha ili na Dios, ken mangan ha bunga na kayo a ikabiyag na totolay. 15 Ngem mawarak ha lapos na ili i madukas a hidi, i mahagsalamangka a hidi, i mangibabbey ken mangilallaki a hidi, i mahagbuno a hidi, i magdeyaw a hidi ha didiosen, ken nagamin a magsileng gipu ha kagi di ken paggimet di.

16 “Hikan ni Jesus a nagpaangay ha anghel ko, penu ipakatandi na idende ha nikam a sakop ko a makipaggimong ha kapikapilya. Naggipu ak ha kaputotan ni Dabid. ‘Ni Kaldiwan’ i sangay ko,” kon ni Jesus.

17 “Umangay ka bi ihe!” kon na Espritu na Dios.

“Umangay ka bi ihe!” kon na nobya ni Kordero. Ket ha ngamin a magteman ha dende a kakkagi, ayagen di bila, a “Umangay ka bi ihe!” Isu, bumikan mina i maski nu heya a mawaw. Ket magiwat na i dinom a ikabiyag na totolay. Ket awan ha bayad na.

18 Niyaen, ha nikan a ni Juan, iwadan ko i maski nu heya a magteman ha dende a pugto, a nesurat ha libro aye, a nu atoy i mangnayon ha nesurat ha ide a libro, inayon na bila na Dios ha parusa na i peste a hidi a nesurat ha ide a libro. 19 Ket nu atoy i mangadya ha maski nu anya ha dende a pugto a nesurat ha ihe, adyan na bila na Dios i kalintegan na a mangan ha bunga na kayo a ikabiyag na totolay. Ket adyan na bila i kalintegan na a sumadap ha Ili na Dios, a nagkagiyan ko ha libro aye.

20 Niyaen, atoy i ipeta na esa a magpatahod ha ngamin a kakkagi aye. Ket ipeta na, “Tahod, a dumematak ha sigida!” kon ni Jesus.

Oni! Umangay ka bi, Apo Jesus!

21 Niyaen, atoy mina ha nikam ngamin i kagbi ni Apo Jesus. Oni ay!