1 ታን አይለተꬃይ ባይና አሳ ግድክታ? የሱስ ኪቴዳዋ ግድክታ? ኑ ጎዳ የሱስ ክርስቶሳ በአበይክታ? ህንተንቱ ታን ጎዳዉ ኦꬄዳ ታ ኦሱዋፐ ቤቴዳዋንታ ግድክቴዬ? 2 ታን ሀራንቶ የሱስ ኪቴዳዋ ግዳና ꬋዮፐካ፥ ህንተንቶ የሱስ ኪቴዳዋ ግድያዌ ኤረቴዳዋ፤ አያዉ ጎፐ፥ ታን ጎዳን የሱስ ኪቴዳዋ ግድያዎ ህንተ ማርካ።

3 ታና ቦርያዋንቶ ታን እምያ ዛሩ ሀዋ። 4 ማናዉነ ኡሻናዉ ኑዉ ማት ባዌ? 5 የሱስ ኪቴዳ ሀራቱዋዳንነ ጎዳ እሻቱዋዳን፥ ጰጽሮሳዋዳን፥ ኤኖ ግያ ማቻቶ እትፐ አኪደ ባናዉ ኑዉ ማታይ ባዌ? 6 ዎይ ኑ ደኦ ኦꬂደ ባጸታናዉ በስያዌ ታናነ ባርናባሳ ጻላሌ? 7 አይ ዎደነ ባረ ሚሻ ሚደ፥ ዎታዳራተꬃ ኦꬅያዌ ኦኔ? ዎይ ዎይንያ ቱራ ቶኪደ፥ አ አይፍያ ሜናዌ ኦኔ? ዎይ ሚዛ ዉድያ ሄሚደ፥ ሄ ሚዛ ዉድያፐ ማꬃ ኡሸናዌ ኦኔ?

8 ታን ሀዋ አሳ ቆፋ ጻላላን ጋይታ? ዎይ ህጊ ቃይ ሀዋ ጌኔ? 9 አያዉ ጎፐ፥ ሙሴ ህግያን፥ “ካꬃ የꬍያ መህያ ዶና ቃቾፓ” ጌተቲደ ጻፈቴዳ። ጾሳይ መህያባ ቆፒደ ሀዋ ጊ?ዛረ. 25:4፤ 1 ጽሞ. 5:18 10 ዎይ እ ሄዋ ግያዌ ሙለካ ኑ ድራሳ ግደኔ? ቱማካ ኑ ድራዉ ጻፈቴዳ፤ ጎሽያ ብታኒካ ካꬃ ቡክያ ብታኒካ፥ “ታና ጋክያዋ አካና” ያጊደ ኦꬃናዉ በሴ። 11 ኑን ህንተ ግዶን አያና የዉዋ ዘሬዳዋንታ ግዲደ፥ ኑ አሾ ማዶ ግድያዋ ህንተንቱፐ ጫኮፐ ዳሮቤ? 12 ሀራቱ ሄዋ ህንተንቱፐ አካናዉ ኡንቱንቶ ማታይ ደኦፐ፥ ኑዉ ኡንቱንቱዋፐ አꬍያ ማታይ ባዌ?

ሽን ኑን ክርስቶሳ ምሽራቹዋ ቃላዉ ꬉቦ ግደናዳን፥ ኡባባ ገንጭያዋፐ አትን፥ ሄ ማታን ጎኤትበይኮ። 13 ጌሻ ጎልያን ኦꬅያ አሳቱ ባረንቱ ቁማ ጌሻ ጎልያፐ አክያዋ ኤርክቴ? ቃይ ያርሽያሳን ኦꬅያዋንቱ ያርሹዋፐ አክያዋ ኤርክቴ?ዛረ. 18:1 14 ሀዋዳንካ፥ ቃይ ምሽራቹዋ ቃላ ኦድያዋንቱ ባረንቱ ደኦ ኮሽያባ አፐ ደማናዳን፥ ጎዳይ አዛዜዳ።

15 ሽን ታን ሀ ማታ ኡባን አይነ ጎኤታበይከ። ታን ሀዋ ጻፌዳዌ ሄዋ ማላ ማታይ ታዉ ደአናዉ በሴ ያግያዋና ግደና። አያዉ ጎፐ፥ ታ ጬቁዋ ኦንነ መላ ከስያዋፐ ሀይቂያዌ ታዉ ሎአ። 16 ምሽራቹዋ ቃላ ኦዳናዉ ታን አዛዘታ ኡቴዳ ድራዉ፥ አ ኦዶፐካ ታዉ ጬቀትያባይ ባዋ። ምሽራቹዋ ቃላ ኦደናን አጎፐ፥ ታዉ አየሮ። 17 አያዉ ጎፐ፥ ታን ሀዋ ዶሳደ ኦꬆፐ፥ ታዉ ዎይታይ ደኤ። ሽን ታን ዶሰናን እጾፐካ፥ ምሽራቹዋ ቃላ ድራዉ ሀዳራ ጾሳይ ታዉ እሜዳ። 18 ያትና፥ ታ ዎይታይ አዬ? ምሽራቹዋ ቃላ ኦዳደ፥ ታዉ ዎንጋላን ደእያ ኩመንꬃ ማታን ጎኤተናን፥ ምሽራቹዋ ቃላ ጮ ኦድያዋ።

19 ታን ኦስነ አይለ ግድከ ሽን፥ ጮራቱዋ ዛራናዉ ታና ኡባዉ አይለ ከሳድ። 20 ታን አይሁዳቱዋ ዛራናዉ ኡንቱንቱና ኡንቱንታ ግዳደ ደኣድ። ታ ሁጰዉ ህግያፐ ጋርሳና ደእከ። ሽን ህግያፐ ጋርሳና ደእያዋንታ ዛራናዉ ህግያፐ ጋርሳና ደእያ አሳ ማላ ግዳድ። 21 ታን ህጊ ባይና አሳቱዋና ደኣደ፥ ህጊ ባይና አሳዳን ሀናድ። ጾሳ ህጊ ꬋይና ግደና። ሽን ህጊ ባይናዋንታ ዛራናዉ፥ ክርስቶሳ ህግያፐ ጋርሳና ደኣድ። 22 ታን አማኑዋን ዳቡርያዋንታ ዛራናዉ፥ ኡንቱንቱ ማላ ግዳድ። ታን አይ ኦግያንነ አማሬዳ አሳቱዋ አሻናዉ፥ ኡባ አሳቱዋና ኡባባን ኡንቱንቱ ማላ ግዳድ። 23 ታን ምሽራቹዋ ቃላ አንጁዋ ሻካናዉ፥ ምሽራቹዋ ቃላ ድራዉ፥ ኡባባ ኦꬃይ።

24 ዎꬃን ጾናና ጊደ ዎጽያ ኡባይ እትፐ ዎጼ። ሽን እቱዋ ጻላላይ ዎይታ አክያዋ ኤርክቴ? ሀዋዳን ህንተንቱካ ዎይታ አካናዉ ዎጽተ። 25 ካሳዉ ባረና ጊግስያ ኦንነ ኡባባን ባረና ናጌ። አሳይ ሄዋ ዳቡርያዌ ጾኔዳዎ እመትያ ባይያ ካላቻ ደማናሳ። ሽን ኑን ዳቡርያዌ መꬍናዉ ደእያዋነ ባየና ካላቻ ደማናሳ። 26 ሄዋ ድራዉ፥ ታን ቆፍ ባይናን ዎጽያዋዳን ዎጽከ። ጫርኩዋ ይምፕያ አሳዳንካ ጮ ኦለትከ። 27 ሽን ታን ሀራንቶ ኦዴዳዋፐ ጉይያን፥ ታ ሁጰዉ ዎይታፐ አተና ማላ፥ ታ አሳተꬃ ናገታናዳን ኦꬃይ።