1 ፕልስጼማቱ ጾሳ ታቦታ ኦሞዴዳዋፐ ጉይያን፥ ኤበንኤዜራፐ አሽዶዳ አፌድኖ። 2 ጾሳ ታቦታ አፊደ፥ ዳጎና ጌተትያ ኤቃ ጎልያ ገልሲደ፥ ዳጎና ማታን ኤሴድኖ። 3 አሽዶዳ አሳይ ዎንተꬃ ጋላስ ጉሪደ ደንዴዳ ዎደ፥ መꬍና ጎዳ ታቦታ ስንꬃን ዳጎን ባረ ዴሙዋን ቢታን ጉፋኔዳዋ በኤድኖ! ዳጎና ደንꬂደ፥ ካሰ ሳኣን ኤሴድኖ። 4 ቃይካ ዎንተꬃ ጋላስ ጉራና ደንዲ ዪደ፥ ኡንቱንቱ መꬍና ጎዳ ታቦታ ስንꬃን ዳጎን ባረ ዴሙዋን ቢታን ጉፋኔዳዋ በኤድኖ! ሄ ዎደ ዳጎና ሁጲያነ አ ላኡ ኩሺ መኤረቲደ፥ ፐንገ ጎጳን ደኤ፤ ህንኮ አሳተꬃይ አዌ ዱማ አቴዳ። 5 ሄዋ ድራዉ፥ ዳጎና ቄሳቱ ነ አሽዶዳን ደእያ ዳጎና ጎልያ ገልያ አሳቱ ኡባይ ዳጎና ፐንገ ጎጳ ሀቼ ጋካናስካ የꬍ ኤርክኖ።

6 አሽዶዳ ካታማ ቦላነ ሄዋ ሄራን ደእያ አሳ ቦላ መꬍና ጎዳ ኩሺ ዎልቃሜዳ፤ ጾሳይ ኡንቱንቱ ቦላን ቦሻ የዲደ፥ ጋፉዋ ሀርግያን ኡንቱንታ ሙሬዳ።

7 አሽዶዳ ካታማ አሳይ ሀኔዳባ በኤዳ ዎደ፥ “እስራኤልያ ጾሳ ኩሺ ኑ ቦላነ ኑ ጾሳ ዳጎና ቦላ ዎልቃሜዳ ድራዉ፥ እስራኤልያ ጾሳ ታቦታይ ኑ ማታን ጋምኦፖ” ያጌድኖ። 8 ፕልስጼማ ካፓቱዋ ኡባ ባረንቱኮ ጼስ ሺሺደ፥ “እስራኤልያ ጾሳ ታቦታ ዋታኔ?” ያጊደ ኦቼድኖ።

ሽን ካፓቱ፥ “እስራኤልያ ጾሳ ታቦታይ ጋተ ጌተትያ ካታማ ቦ” ያጊደ ዛሬድኖ። ያትና፥ እስራኤልያ ጾሳ ታቦታ ጋተ አፌድኖ።

9 ሽን ታቦታይ ጋተ ጋኬዳዋፐ ጉይያን፥ መꬍና ጎዳ ኩሺ ሄ ካታማ ቦላ ዎልቃሚደ፥ ሎይꬅ ዎልቃማ ዳጋንꬁዋ ዳጋንꬄዳ፤ ያቲደ ካታማን ደእያ አሳ ናናቱዋፐ ጭማ ጋካናዉ ጋፉዋ ሀርግያን ሾጬዳ። 10 ሄዋ ድራዉ፥ ጾሳ ታቦታ ኤቅሮና ካታማ የዴድኖ።

ጾሳ ታቦታይ ኤቅሮና ገልያ ዎደ፥ ኤቅሮና አሳቱ ሀዋዳን ያጊደ ዋሴድኖ፤ “ኑናነ ኑ አሳ ዎꬋናዉ እስራኤልያ ጾሳ ታቦታ ኑኮ አሄድኖ” ያጌድኖ። 11 ሄዋ ድራዉ፥ ፕልስጼማ ካፓቱዋ ጼስ ሺሺደ፥ “እስራኤልያ ጾሳ ታቦታ ሀዋፐ ድግተ፤ እ ጉየ ባረ ሳኣ ስሞ፤ ሄዌ ꬋዮፐ፥ ኑናነ ኑ አሳ ዎꬋና” ያጌድኖ። አያዉ ጎፐ፥ ካታማ ኡባን ሀይቁዋ ዳጋማይ ደኤ፤ ጾሳ ኩሺካ ካታማ ቦላ ዎልቃሜዳ። 12 ሀይቁዋፐ አቴዳ አሳቱ ጋፉዋ ሀርጌድኖ፤ ሄ ካታማ ዋሱነ ሳሉዋ ጋኬዳ።