1 ሽን ኑናዳን ጾሳ ካልያዋንቶ፥ ሀ የዋቱ አዉደ ሀናነንቶ፥ ዎድያነ አገና ህንተንቶ ጻፋናዉ ኮሸና። 2 አያዉ ጎፐ፥ ጎዳ ጋላሳይ ካይሱ ቃማ ይያዋዳን ያናዋ ህንተንቱ ሎይꬅ ኤሪታ። 3 አሳይ፥ “ኡባባይ ሳራ፤ አያይካ ሀነና” ጊሽን፥ ማጫ አሳ የሉ ኦይቂያዋዳን፥ ባሻይ ኡንቱንቱ ቆፐናን ኡንቱንቱ ቦላ ያና። ኡንቱንቱ ሙለካ ከስ አክክኖ።

4 ሽን ኑናዳን ጾሳ ካልያዋንቶ፥ ሄ ጋላሳይ ህንተንቶ ካይሱ ይያዋዳን ያናዉ ህንተንቱ ꬉማን ደእክታ። 5 ህንተ ኡባይ ፖኡዋ አሳነ ጋላሳ አሳ፤ ኑን ቃማ አሳ ዎይ ꬉማ አሳ ግዶኮ። 6 ሄዋ ድራዉ፥ ኑን ሀራቱ ገምእሽያዋዳን ገምእሻናዉ በሰና። ኑን ቤጎታናዉነ ዎጋን ደአናዉ በሴ። 7 አያዉ ጎፐ፥ ገምእሽያዋንቱ ቃማ ገምእሺኖ፤ ማꬆትያዋንቱካ ቃማ ማꬆቲኖ። 8 ሽን ኑን ጋላሳ አሳ ግድያዋንቱ ዎጋን ደአናዉ በሴ። ኑን አማኑዋነ ሲቁዋ ትራን ዎꬅያ ኦላ ሚሻዳን ኦይቂደ፥ ኑን ህዶታን ናግያ አቶተꬃ፥ ብራታ ቆብያዳን፥ ሁጲያን ዎꬃናዉ በሴ። ኢሳ. 59:17፤ ኤፈ. 6:13-17 9 አያዉ ጎፐ፥ ጾሳይ ኑና ኑ ጎዳ የሱስ ክርስቶሳ ባጋና አቶተꬃ ደማናዉ ዶሬዳዋፐ አትን፥ አ ሀንቁዋ አካናዉ ዶርቤና። 10 ኑን ፓጻ ግድና ዎይ ሀይቄዳዋንታ ግድና፥ ክርስቶሳና እትፐ ደአና ማላ፥ ክርስቶስ ኑ ድራዉ ሀይቄዳ። 11 ሄዋ ድራዉ፥ ህንተንቱ ቃይ ሀእ ኦꬅያዋዳን፥ ሀራቱዋ መንꬅተነ እቱ እቱዋ ድችተ።

12 ኑናዳን ጾሳ ካልያዋንቶ፥ ህንተንቱ ግዶን ኦꬅያዋንታ፥ ህንተና አማኑዋ ኦግያን ካለꬅያዋንታነ ዞርያዋንታ፥ ህንተንቱ ቦንቻና ማላ፥ ህንተና ዎሴቶ። 13 ኡንቱንቱ ኦꬅያ ኦሱዋ ድራዉ፥ ኡንቱንታ ሎይꬅ ቦንችተነ ሲቅተ። እቱ እቱዋና ሳሮተꬃን ደእተ።

14 ኑናዳን ጾሳ ካልያዋንቶ፥ ኑን ህንተና ዞሬቶ፤ ማራይ ባይና ደኡዋ ደእያዋንታ ሴርተ። ያይያዋንታ መንꬅተ። ዎልቂ ባይናዋንታ ማድተ። አሳ ኡባ ዳንዳይተ። 15 ኦንነ ኢታ ድራዉ ኢታ ዛረና ማላ ናገትተ፤ ሽን ኡባ ዎደ፥ እቱ እቶነ ቃይ አሳ ኡባዉ ሎኦባ ኦꬃናዉ ምንተ።

16 ኡባ ዎደ ናሸትተ። 17 ኡባ ዎደ ቃንጸናን ጾሳ ዎስተ። 18 ኡባባን ጋላትተ። አያዉ ጎፐ፥ ክርስቶሳ የሱሳ ባጋና ጾሳይ ህንተፐ ኮይያዌ ሄዋ።

19 ጌሻ አያና ታማ ቶይሶፕተ። 20 ትምቢትያ ቃላ ካꬎፕተ። 21 ኡባባካ ፓጭተ። ሎኦባ ኦይቂተ። 22 ኢታ ኦሱዋ ኡባፐ ሃክተ።

23 ሳሮተꬃ ጾሳይ ባረ ሁጰዉ ህንተና ኡባባን ፖሎ ጌሾ፤ ቃይ ኑ ጎዳይ የሱስ ክርስቶስ ይያ ዎደ፥ ጾሳይ ህንተንቱ አያና፥ ሸምፑዋነ አሳተꬃ እትፐ ቦረተናዋነ ፖሎ ኦꬂደ ናጎ። 24 ህንተና ጼስያዌ አማነቴዳዋ፤ ቃይ ሄዋ እ ፖላና።

25 ኑናዳን ጾሳ ካልያዋንቶ፥ ኑዉ ጾሳ ዎስተ።

26 እሻቱዋ ኡባ ጌሻ የሩዋ የሪደ ሳሮትተ።

27 ህንተ ሀ ዳብዳቢያ ጌሻ እሻቱዋ ኡባዉ ናባባናዳን፥ ጎዳ ሱንꬃን ህንተና ዎሳይ።

28 ኑ ጎዳ የሱስ ክርስቶሳ አꬎ ኬካተꬃይ ህንተናና እትፐ ግዶ።