1 ዮኣታመ ካተትያ ዎደ፥ ላይꬃይ አዉ ላታማነ እቼሻ፤ እ የሩሳላመን ታማነ ኡሱፑን ላይꬃ ካተቴዳ። አ ዳይ ሱንꬃይ ያሩሾ፤ እዛ ጻዶቃ ናቶ። 2 ባረ አዉ ኦዝያነ ኦꬄዳዋዳን፥ ዮኣታምካ መꬍና ጎዳ ስንꬃን ሱረባ ኦꬄዳ፤ ሽን እ አ አዉ መꬍና ጎዳ ጌሻ ጎልያ ገሌዳዋዳን ገልቤና። ግዶፐነ፥ አሳይ ናጋራ ኦꬅያዋ አግቤና።

3 ዮኣታመ መꬍና ጎዳ ጌሻ ጎልያ ገልያ ቆሞ ፐንግያ ዛረꬂደ ኦꬄዳ፤ ቃይ የሩሳላመ ካታማ ግምቢያን ኦፌላ ግያ ሳኣን ዳሮ ኪታ ኦꬄዳ። 4 ይሁዳ ገዝያን ካታማቱዋ ኬጼዳ፤ ዎራይ ዳርያ ደርያን ጌሱዋነ አዱሳ ግምቢያ ግምቤዳ።

5 ዮኣታመ አሞና ካትያና ኦለቲደ ጾኔዳ። አሞናቱ ሄ ላይꬅ ሄዙ ሻአነ ኦይዱ ጼቱ ኪሎ ግራመ ዴጽያ ብራ፥ ታሙ ሻአ ኮንታለ ግድያ ዛርጋነ ታሙ ሻአ ኮንታለ ግድያ ባንጋ አዉ ጊሬድኖ። አሞናቱ ላኤንꬆ ላይꬃይነ ሄዘንꬆ ላይꬃን ሄዋዳንካ አሂደ፥ አዉ ጊሬድኖ። 6 ዮኣታመ መꬍና ጎዳ ባረ ጾሳ ስንꬃን ሱረ ሄመቴዳ ድራዉ፥ ሎይꬅ ምኔዳ።

7 ዮኣታመ ሀኔዳ ሀራባይ፥ እ ኦለቴዳ ኦላባይ ኡባይነ እ ኦꬄዳባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ። 8 ዮኣታመ ካተትያ ዎደ፥ ላይꬃይ አዉ ላታማነ እቼሻ፤ እ የሩሳላመን ታማነ ኡሱፑን ላይꬃ ካተቴዳ። 9 ዮኣታመ ሀይቂደ፥ ባረ ማይዛን ጋከቴዳ። ኡንቱንቱ አ ዳዊታ ካታማን ሞጌድኖ። አ ሳኣን አ ናአይ አካዝ ካተቴዳ።