1 ህዝቂያሰ ካተትያ ዎደ፥ ላይꬃይ አዉ ላታማነ እቼሻ፤ እ የሩሳላመን ላታማነ ኡዱፑን ላይꬃ ካተቴዳ። አ አት ሱንꬃይ አቢያ፤ አ ዛካራሳ ናቶ። 2 አ ማይዛ አዉ ዳዊተ ኦꬄዳዋዳን፥ ህዝቂያስካ መꬍና ጎዳ ስንꬃን ሱረባ ኦꬄዳ።

3 ህዝቂያሰ ባረ ካተቴዳ ኮይሮ ላይꬃን፥ ኮይሮ አግናን፥ መꬍና ጎዳ ጌሻ ጎልያ ፐንገቱዋ ዶዪደ ኦራꬄዳ። 4 ቄሳቱ ዋነ ሌዋቱዋ አህሲደ፥ ጌሻ ጎልያዉ አዋይ ዶልያ ባጋና ደእያ ዳባባን ሺሼዳ። 5 ሀዋዳን ያጌዳ፤ “ሌዋቶ፥ ታን ግያዋ ስስተ! ሀእ ህንተንቱ ሁጲያዉ ጌይተ፤ መꬍና ጎዳ ህንተንቱ አዎቱዋ ጾሳ ጌሻ ጎልያካ ጌሽተ። ጌሻ ጎልያ ቱንስያባ ኡባ ድግተ። 6 አያዉ ጎፐ፥ ካሰ ኑ አዎቱ አማነትበይክኖ፤ መꬍና ጎዳ ኑ ጾሳ ስንꬃን ኢታባ ኦꬄድኖ። ኡንቱንቱ መꬍና ጎዳ አጊደ፥ ጾሳይ ደእያ ሳኣፐ ባረንቱ ዴሙዋ ዎራ ዛሪደ፥ ባረንቱ ዞኪያ አኮ ዛሬድኖ። 7 ኡንቱንቱ ቃይ ጌሻ ጎልያ ፐንገቱዋ ጎርዴድኖ፤ ጾምፕያካ ቶይሴድኖ። ጌሻ ጎልያን እስራኤልያ ጾሳዉ እጻና ጩዋይበይክኖ፥ ዎይ ጹግያ ያርሹዋ ያርሽበይክኖ። 8 ሄዋ ድራዉ፥ መꬍና ጎዳ ሀንቁ ይሁዳ ቦላነ የሩሳላመ ቦላ ዎꬌዳ። ህንተንቱ አይፍያን ህንተንቱ በእያዋዳን፥ ጾሳይ ኡንቱንቱ ህንተንቶ ያሻ፥ ዳጋማነ ‘ፖራ!’ ግያዋ ኦꬄዳ። 9 ሄዋ ጋሱዋን ኑ አዎቱ ማሻን ሀይቄድኖ፤ ኑ አቱማ ናናይ፥ ኑ ማጫ ናናይነ ኑ ማቻቱ ኦሞደቴድኖ።

10 “መꬍና ጎዳ ሀንቁ ኤጽያዌ ኑ ቦላፐ ክቻና ማላ፥ ታን መꬍና ጎዳና፥ እስራኤልያ ጾሳና ቃላ ጫቁዋ ጫቀታናዉ ታ ዎዛናን ቆፓይ። 11 ታ ናቶ፥ ህንተንቱ መꬍና ጎዳ ስንꬃን ኤቂደ፥ አዉ ኦꬅያ ኦሳንቻ ግዲደ፥ እጻና ጩዋያናዳን ህንተንታ እ ዶሬዳ ድራዉ፥ ሸነኮ ጎፕተ” ያጌዳ።

12 ሄ ሳኣን ደእያ ሌዋቱ ሀዋፐ ካሊደ ጻፈቴዳዋንታ፦

ቃሃታ ያራፐ አማሳያ ናኣ ማሃታነ አዛርያሳ ናኣ ዩኤላ።

ማራራ ያራፐ አብድ ናኣ ቂሳነ ይሃልኤላ ናኣ አዛርያሳ።

ገርሾና ያራፐ ዚማ ናኣ ዮኣሀነ ዮኣሀ ናኣ ኤዴና።

13 ኤልጻፋና ያራፐ ሺምራነ ይኡኤላ።

አሳፋ ያራፐ ዛካራሳነ ማታንያ።

14 ሄማና ያራፐ ይህኤላነ ሽምአ።

ይዱቱና ያራፐ ሻማእያነ ኡዝኤላ።

15 ኡንቱንቱ ባረንቱ ዳቦቱዋ፥ ሌዋቱዋ፥ ሺሽና፥ ኡንቱንቱ ኡባይካ ባረንቱ ሁጲያዉ ጌዬድኖ። ካቲ ኡንቱንታ አዛዝና፥ መꬍና ጎዳ ህግያን ጻፈቴዳዋዳን ኡንቱንቱ መꬍና ጎዳ ጌሻ ጎልያ ጌሹሳ ዶሜድኖ። 16 ሄዋ ድራዉ፥ ቄሳቱ መꬍና ጎዳ ጌሻ ጎልያ ጌሻናዉ ግዶ ገሌድኖ፤ መꬍና ጎዳ ጌሻ ጎልያ ግዶን ደእያ ቱናባ ኡባ ከሲደ፥ መꬍና ጎዳ ጌሻ ጎልያ ዳባባ አሄድኖ። ሌዋቱ አኪደ፥ ቀድሮና ዛንጋራን ኦሌድኖ። 17 ኡንቱንቱ ኮይሮ አግናን፥ ኮይሮ ጋላስ ጌሻ ጎልያ ጌሽያዋ ዶሜድኖ፤ ሄ አግናዉ ሆስፑንꬃ ጋላስ መꬍና ጎዳ ባራንዳ ጋኬድኖ። ሀራ ሆስፑን ጋላሳን መꬍና ጎዳ ጌሻ ጎልያ ጌሼድኖ። ኮይሮ አግናዉ ታማነ ኡሱፑንꬃ ጋላስ ኡንቱንቱ ሄ ኦሱዋ ፖሌድኖ።

18 ሄዋፐ ጉይያን፥ ኡንቱንቱ ካትያ ህዝቂያሳኮ ገሊደ፥ “ኑን መꬍና ጎዳ ጌሻ ጎልያ ኡባ፥ ጹግያ ያርሹዋ ያርሽያ ሳነ ሄ ያርሽያ ሳኣን ጎኤትያ ሻሉዋ ኡባ፥ ኡክꬃ ጻራጴዛነ ሄ ጻርጴዛን ደእያ ሚሻቱዋ ኡባ ጌሼዶ። 19 ቃይ ካቲ አካዝ ካተቲደ ደእያ ዎደ፥ ጾሳዉ አማነተናን አጊደ፥ አፌዳ ሻሉዋ ኡባ ኑን ዛሪደ ጌሼዶ። በአ፥ ኑን ጌሼዳ ሚሻይ ኡባይ መꬍና ጎዳዉ ያርሹዋ ያርሽያ ሳኣ ስንꬃን ደኤ” ያጌድኖ።

20 ካቲ ህዝቂያሰ ዎንተꬃ ጋላስ ጉራን ደንዲደ፥ ካታማ ካፓቱዋ ሺሺደ፥ ኡንቱንቱና እትፐ መꬍና ጎዳዉ ጌሻ ጎልያ ቤዳ። 21 ኡንቱንቱ ካዉተꬃ ድራዉ፥ ጌሻ ጎልያ ድራዉነ ይሁዳ አሳ ድራዉ፥ ላፑን ኮሩማቱዋ፥ ላፑን ዶርሳ ኦርገቱዋ፥ ላፑን ዶርሳ ማራቱዋነ ቃይ ላፑን ዴሻ ኦርገቱዋ ናጋራ ያርሾ አሄድኖ። አሮና ዘረꬃ ግድያ ቄሳቱ፥ መꬍና ጎዳዉ ያርሹዋ ያርሽያ ሳኣን ሄዋንታ ያርሻናዳን ካቲ አዛዜዳ። 22 ቄሳቱ ኮሩማቱዋ ሹኪደ፥ ኡንቱንቱ ሱꬃ ያርሽያ ሳኣ ቦላ ጫጫፌድኖ። ቃይ ዶርሳ ኦርገቱዋ ሹኪደ፥ ኡንቱንቱ ሱꬃ ያርሽያ ሳኣ ቦላ ጫጫፌድኖ። ቃይካ ዶርሳ ማራቱዋ ሹኪደ፥ ኡንቱንቱ ሱꬃ ያርሽያ ሳኣ ቦላ ጫጫፌድኖ። 23 ናጋራ ያርሾ ሀንያ ዴሻ ኦርገቱዋ ካትያ ስንꬃነ ሺቄዳ አሳ ስንꬃ አሄድኖ፤ አህና ኡንቱንቱ ኡባይ ባረንቱ ኩሽያ ዴሻቱዋ ቦላ ዎꬄድኖ። 24 ቄሳቱ ዴሻቱዋ ሹኪደ፥ እስራኤልያ አሳ ኡባ ናጋራይ አቶ ጌተታናዋ ማላ፥ ኡንቱንቱ ሱꬃ ያርሽያ ሳኣ ቦላ ያርሼድኖ። አያዉ ጎፐ፥ ካቲ ኡንቱንቱ ጹግያ ያርሹዋነ ናጋራ ያርሹዋ ያርሻናዳን አዛዜዳ ድራሳ።

25 ሄዋፐ ጉይያን፥ መꬍና ጎዳይ ካትያዉ ናብያ ጋደ ባጋናነ ትምቢትያ ኦድያ ናታና ባጋና ካትያ ዳዊታ አዛዜዳ አዛዙዋ ህዝቂያሰ ካሊደ፥ ሌዋቱዋ ዳላ፥ ዲꬃነ ማስንቁዋ ኦይꬂደ፥ መꬍና ጎዳ ጌሻ ጎልያን ኤሴዳ። 26 ሌዋቱ ዳዊተ ካሰ የꬃ የጼዳ ሚሻቱዋ ኦይቂና፥ ቄሳቱ ቃይ ጹሩምባቱዋ ኦይቂደ ኤቄድኖ። 27 ሄ ዎደ ኡንቱንቱ ጹግያ ያርሹዋ ያርሻናዳን ህዝቂያሰ አዛዜዳ። ጹግያ ያርሹዋ ያርሽያዌ ዶመቴዳ ዎደ፥ ጹሩምባቱዋንነ እስራኤልያ ካትያ ዳዊታ የꬃ ሚሻቱዋን መꬍና ጎዳዉ የꬃይ ዶመቴዳ። 28 ጹግያ ያርሹዋ ያርሽያዌ ፖለታና ጋካናዉ፥ ኩመንꬃ ያአይ ጾሳዉ ጎይኔ፤ የꬃ የጽያዋንቱካ የጺኖ፤ ጹሩምባ ፑንያዋንቱካ ፑኒኖ። 29 ቄሳቱ ያርሹዋ ያርሽያዋ ፖሌዳ ዎደ፥ ካቲነ አናና ደእያ አሳይ ኡባይ ጉልባቲደ ጎይኔድኖ። 30 ካቲ ዳዊተነ ትምቢትያ ኦድያ አሳፈ ጻፌዳ ጋላታ ማዝሙርያ መꬍና ጎዳዉ የጻናዳን ካቲ ህዝቂያስነ ካፓቱ ሌዋቱዋ አዛዜድኖ፤ ሌዋቱ ናሸቻን ጋላቲደ፥ ጉልባቲደ ጎይኔድኖ።

31 ሄዋፐ ጉይያን፥ ህዝቂያሰ አሳ፥ “ሀእ ህንተንቱ ህንተንታ መꬍና ጎዳዉ ዱማዬድታ። ህንተንቱ ሺቂደ፥ ያርሹዋነ ጋላታ ያርሹዋ መꬍና ጎዳ ጌሻ ጎልያ አህተ” ያጌዳ። ሄዋፐ ጉየ ሺቄዳ አሳይ ያርሹዋነ ጋላታ ያርሹዋ አሄድኖ፤ ቃይ ኮዬዳ አሳቱ ጹግያ ያርሹዋ አሄድኖ። 32 ሄ ሺቄዳ አሳይ አሄዳ ጹግያ ያርሹዋ ፓይዱ ላፑን ታሙ ኮሩማቱዋ፥ ጼቱ ዶርሳ ኦርገቱዋነ ላኡ ጼቱ ዶርሳ ማራቱዋ፤ ሄዋንቱ ኡባይ መꬍና ጎዳዉ ጹግያ ያርሾቱዋ። 33 ቃይ እትፐተꬃ ያርሾቱ ኡሱፑን ጼቱ ኮሩማቱዋነ ሄዙ ሻአ ዶርሳቱዋ። 34 ሽን ጹግያ ያርሹዋ ኡባ ሹኪደ፥ ጋልባ ቃራናዉ ደእያ ቄሳቱ ፓይዱዋን ሎይꬅ ጉꬃ። ሄዋ ድራዉ፥ ኪታይ ዉራና ጋካናዉነ ሀራ ቄሳቱ ባረንቱ ሁጲያዉ ጌያና ጋካናዉ፥ ኡንቱንቱ ዳቦቱ፥ ሌዋቱ ኡንቱንታ ማዴድኖ። (ባረንቱ ሁጲያዉ ጌይያዋን ሌዋቱ ቄሳቱ ዋፐ አꬊደ አማነቲኖ።) 35 ጹግያ ያርሹዋ፥ እትፐተꬃ ያርሹዋ ሀንዳነ ጹግያ ያርሹዋና እትፐ ያርሸትያ ኡሻ ያርሹዋ ኡባ ኡንቱንቱ ያርሺኖ።

ሄዋዳን ሀኒደ፥ መꬍና ጎዳ ጌሻ ጎልያ ኪታይ ላኤንꬁዋ ዶሜዳ። 36 ሄዋፐ ጉይያን፥ ህዝቂያስነ አሳይ ኡባይ ሄ ኦሱዋ ኤለካ ፖላናዳን ጾሳይ ኡንቱንታ ማዴዳ ድራዉ፥ ሎይꬅ ናሸቴድኖ።