1 ህንተ ታ ኤያተꬃ ጉꬃ ዳንዳይንቶ ሎአ። ሀያና ዳንዳይተ። 2 ጾሳይ ቃናትያዋዳን፥ ታንካ ህንተዉ ቃናታይ፤ አያዉ ጎፐ፥ ታን ህንተና እት አቱማዎ፥ ክርስቶሳዉ እማና ጋደ፥ አቱማዋ ኤረና ጌሻ ዎዶራቲዳን ጊግሳ ዎꬃድ።

3 ሽን ሾሻይ ባረ ማካላን ሄዋኖ ባለꬄዳዋዳን፥ ክርስቶሳዉ ህንተ እሜዳ ህንተ ሱረ ቆፋይ ባይቤናዌ ዎራ ባንዴሻ ጋደ ህርጋይ። ዶመꬃ 3:1-5 4 አያዉ ጎፐ፥ እት ኡራይ ዪደ፥ ኑን ህንተንቶ ኦዴዳ የሱሳፐ ሀራ የሱሳ ህንተንቶ ኦዶፐ፥ ዎይ ህንተ አኬዳ አያናፐነ ዎንጋላፐ ዱማ አያናነ ዎንጋላ ህንተ አኮፐ፥ ህንተ ኤኖ ጊደ አኬድታ ጉሳ።

5 የሱስ ኪቴዳ ሀ ዋናቱዋፐ ታን አያንካ ላፍያዋ ታዉ ማላተና። 6 ታን ሃሳይያ ሃሳያን ታማራቤና አሳ ግዶፐካ፥ ኤራተꬃን ግድከ፤ ሽን ኑን ህንተንቶ ሀ የዉዋ አሳ ኡባ ግዶን ኡባ ባጋና ቆንጭሴዶ።

7 ዎይ ታን ህንተና ሚሻ ኦቼናን፥ ጾሳ ምሽራቹዋ ቃላ ህንተንቶ ጮ ኦዴዳዌነ ህንተና ꬎቁ ኦꬃናዉ ታ ሁጲያ ቶቼዳዌ ታዉ ናጋራ ግዳንዴሻ? 8 ታን ህንተንቶ ኦꬃናዉ ሀራ አማንያ አሳፐ ሚሻ አኬዳዎ፥ ሄዋንታ ቦንቃድ። 9 ቃይ ታን ህንተናና ደእሽን፥ ታና መትና፥ ህንተፐ እት ኡራካ ዋይሳበይከ። አያዉ ጎፐ፥ ማቅዶንያፐ ዬዳ እሻቱ ታና ኮሼዳ ኡባባ ታዉ እሜድኖ፤ ታን ህንተና ዋይሰና ማላ፥ ካሰ ቶኮ ግዳቤናዋዳንካ ስንꬃዉካ ቶኮ ግድከ። 10 ክርስቶሳ ቱማተꬃይ ታናን ደእሽን፥ ሀ ታ ጬቁ አካይያ ጋድያን ሀቃንነ አተና። 11 ታን ሀዋ አያዉ ጋይታ? ህንተና ሲቀና ድራሴ? ታን ህንተና ሲቅያዋ ጾሳይ ኤሬ።

12 ሽን ሄ ባረንቱ ጬቀትያዋን ኑን ኦꬅያዋዳን ኦꬃናዉ ጋሶትያዋንቱ ጋሱዋ ድጋናዉ፥ ሀእ ታን ኦꬅያ ኦሱዋ ጉጃደ ኦꬃና። 13 አያዉ ጎፐ፥ ኡንቱንቱ የሱስ ኪትቤና ዎርዶ አሳቱዋ፤ ሄዋንቱ ማላ አሳቱ ክርስቶስ ኪቴዳዋንታ ማላታናዉ ባረንቱ ማላ ላመረꬅያ ኪተትቤና ዎርዳንቻቱዋነ ላባንቻ ኦሳንቻቱዋ። 14 ሄዌ ማላልስያዋ ግደና፤ አያዉ ጎፐ፥ ሴጻናይ ባረ ሁጰዉ ፖኡዋ ኪታንቻ ማላታናዉ ባረ ማላ ላሜ። 15 ሄዋ ድራዉ፥ ሴጻና ኦሳንቻቱ ጽሎተꬃ ኦሳንቻቱዋ ማላታናዉ ባረንቱ ማላ ላሞፐ፥ ሄዌ ዎልቃማባ ግደና፤ ኡንቱንቱ ዉርሰꬃን ባረንቱ ኦሱዋ ማላ አካና።

16 ታን ላኤንꬁዋካ ጋይ፤ ታና ኦንነ ኤያ ጊደ ቆፖፖ፤ ሽን ህንተ ታና፥ እ ኤያ ጎፐካ፥ ታን ጉꬃ ጬቀታናዳን፥ ታና ኤያ ጊተ። 17 ታን ሀዋዳን ጻላደ ጬቀታደ ሃሳይያዌ፥ ኤያተꬃ ሃሳያፐ አትን፥ ታና ጎዳይ አዛዝና ግደና። 18 ዳሮ አሳይ ሀ ሳኣባን ጬቀትያ ድራዉ፥ ታንካ ጬቀታና። 19 ህንተ አꬌዳ ኤራንቻ ግድያ ድራዉ፥ ኤያ አሳዋ ናሸቻን ዳንዳዪታ። 20 አያዉ ጎፐ፥ ኦንነ ህንተና አይለዮፐ፥ ዎይ ህንተዋ ሞፐ፥ ዎይ ህንተዋ ቦንቆፐ፥ ህንተ ቦላ ኦቶረቶፐ፥ ዎይ ህንተ ሻይያ ባቆፐ፥ ዳንዳዪታ። 21 ኑን ሄዋ ኦꬃናዉ ዳሮ ዳቡራንቻ ግዴዳዋ ታን ዬላታደ ኦዳይ።

ሽን ኦንነ እትባን ጻሊደ ጬቀቶፐ፥ ታንካ ጬቀታናዉ ጻላይ፤ ታን ኤያ አሳዳን ሃሳያይ። 22 ኡንቱንቱ እብራዌ? ታንካ እብራዌ። ኡንቱንቱ እስራኤልያ አሴ? ታንካ እስራኤልያ አሳ። ኡንቱንቱ አብራሃመ ዛረ? ታንካ ቃይ አብራሃማ ዛረ። 23 ኡንቱንቱ ክርስቶሳ ቆማቴ? ታንካ ኡንቱንቱፐ አꬍያ ቆማ፤ ታን ጎይያ አሳዳን ሃሳያይ፤ ታን ዳሮ ኦꬃ ዳቡራድ፤ ዳሮ ዎድያ ቃሸታድነ ልሱዋን ሾጨታድ፤ ቃይ ዳሮ ዎድያ ሀይቃደ አታድ። 24 አይሁዳቱ ታና እቼሹ ገደ፥ ሀታማነ ኡዱፑኑዋ ልሱዋን ሾጬድኖ። ዛረ. 25:3 25 ሮመ አሳይ ታና ሄዙ ገደ ጻምኣን ሾጬዳ፤ እት ጋላስ ሹቻን ጫድ ጫዲደ አጌዳ፤ ማርካቢ ሄዙ ገደ መእና፥ አባ ግዶን እት ቃማነ እት ጋላሳ አቃደ ፔሻድ። 26 ታን ዳሮ ኦግያ ሀመታድ፤ ታና ኩንꬆ ሃꬃይነ ቦንቃንቻቱ ቦንቂ ድጊደ አሼዳ፤ ቃይ ታ ቢታ አሳይነ አይሁዳ ግደና አሳይ ቦንቂ ድጊደ አሼድኖ። ቃይካ ካታማይ፥ ባዙ፥ አባይ፥ ታና ያሽሴዳ፤ ዎርዱዋ ዳባቱካ ታና ቦንቂ ድጊደ አሼድኖ። 27 ታን ዳቡራድነ መቶታድ። ዳሮ ገደ ገምእሹዋ ꬋያድ፤ ኮሻታድ፤ ሳመታድ። ዳሮ ገደ ጾማድ፤ ቃይ ሜገታድነ ካሎታድ።

28 ሀራባ ኡባፐካ ኡባ ጋላስ ታዉ ቶኩዋ ግዴዳባይ፥ ዎሳ ጎልያ ኡባዉ ህርግያዋ። 29 ዳቡርያዌ ኦኔ? ታን ዳቡርክታዬ? ናጋራን ገልያዌ ኦኔ? ታን ኡንኤታደ አዉ ቃረትክታዬ?

30 ታን ጬቀታናዉ ኮሽያዋ ግዶፐ፥ ታን ዳቡራንቻ ግድያዋ ኤርስያዋን ጬቀታና። 31 መꬍናዉ አንጀቴዳ ጾሳይ፥ ኑ ጎዳ የሱስ ክርስቶሳ አዉ፥ ታን ዎርዶተናዋ ኤሬ። 32 ዳማስቆ ካታማን አረታሳ ግያ ካትያፐ ጋርሳና ጋድያ ሞድያዌ፥ ታና ኦይꬃናዉ ዳማስቆ ካታማ ናግሴ። 33 ሽን ካታማ ግምቢያ ድርሳ ማስኮትያና ታና ቁንኣን ዱገ ዎꬅና፥ አፐ ከሳ አካድ።