1 ስም ህንተንቱ ክርስቶሳና ሀይቁዋፐ ደንዴዳዋ ግዶፐ፥ ጾሳፐ ኡሸቻ ባጋና ኡቴዳ ክርስቶስ ደእያ ሳን ሳሉዋን ደእያዋ ምንስ ኮይተ። 2 ሳሉዋን ደእያዋ ህንተንቱ ቆፓናፐ አትን፥ ሳኣን ደእያዋ ቆፖፕተ። 3 አያዉ ጎፐ፥ ህንተንቱ ሀይቄድታ፤ ቃይ ህንተንቱ ሸምፑ ጾሳን ክርስቶሳና ጌሜዳ። 4 ህንተዉ ደኦ ግዴዳ ክርስቶስ ቆንጭያ ዎደ፥ ሄ ዎደ ህንተካ አናና ቦንቹዋን ቆንጫና።

5 ሄዋ ድራዉ፥ ህንተንቱን ደእያ ሀ ሳኣ አሞቱዋ ዎꬍተ፤ ሄዋንቱካ ዎሹምያዋ፥ ቱናተꬃ፥ ዎሹማናዉ ኮይያዋ፥ ኢታ አሙዋ፥ ሚሻ አሞትያዋ። ዮራንቻ ግዱሳይ ኤቃዉ ጎይንያዋፐ ዱማተና። 6 ሀዋንቱ ጋሱዋን፥ ጾሳይ አዛዘተና አሳቱዋ ሀንቀታናዋ። 7 ካሰ ህንተንቱ ሀ ኢታ ቆፋቱዋን ደእያ ዎደ ኡንቱንቱን ሞደቴድታ።

8 ሽን ሀእ ህንተንቱ ቃይ ሀንቁዋ፥ ይሉዋ፥ እጹዋ፥ ህንተንቱ ዶናፐ ከስያ ጫሻነ ዬላይያ ሃሳያ ሀዋንታ ኡባ ህንተፐ ꬋይስተ። 9 እቱ እቶ ዎርዶቶፕተ፤ አያዉ ጎፐ፥ ናጋራንቻ መታ አ ኦሱዋና ህንተፐ ꬋይስ ድጊደ፥ ኤፈ. 4:22 10 ጾሳይ፥ አ መꬌዳዌ፥ ባረና ማላትሳናዉነ ባረዉ ደእያ ኤራተꬃ ኡባ እማናዉ፥ ኡባ ዎደ ኦራꬅያ ኦራꬃ መታ ማዬድታ። ዶመꬃ 1:26፤ ኤፈ. 4:24 11 ሀ ኦራꬃ መታን፥ ግሪከ አሳ ዎይ አይሁዳ አሳ፥ ቃጻረቴዳዋ ዎይ ቃጻረትቤናዋ፥ እማꬃቱዋነ አይነ ታማርቤናዋ፥ አይልያ ዎይ ዎማኑዋ ጊደ ሻክያባይ ባዋ፤ ሁጰ አላሊ ክርስቶሳ፤ እ ኡባንካ ደኤ።

12 ሄዋ ድራዉ፥ ጾሳይ ዶሬዳዋንቱዳን፥ ጌሻነ ሲቅያዋንታ ግዲደ፥ ማሮተꬃ፥ ቃረታ፥ ኬካተꬃ፥ ህንተንቱ ሁጲያ ካዉሽያዋ፥ አሽከተꬃነ ዳንዳያ ማይተ። 13 እቱ እቱዋዋ ዳንዳይተ፤ ኦንነ ባረ ላግያ ቦላ ሀንቀቴዳዌ ደኦፐ፥ እቱ እቶ አቶ ያጎ። ክርስቶስ ህንተንቶ አቶ ጌዳዋዳን፥ ህንተካ አቶ ጊተ። 14 ሄዋ ኡባ ቦላ፥ ኡባባ እትፐ ሺሽ ቃችያ ሲቁዋ ማይተ። 15 ክርስቶስ እምያ ሳሮተꬃይ ህንተንታ ሞዶ፤ አያዉ ጎፐ፥ ጾሳይ ህንተንታ እት አሳ ኦꬂደ፥ ሄ ሳሮተꬃዉ ጼሴዳ ጾሳ ጋላትተ።

16 ክርስቶሳ ቃላይ ህንተንቱ ዎዛናን ኩሚደ ደኦ፤ ህንተንቶ ደእያ አꬌዳ ኤራተꬃ ኡባን እቱ እቱዋ ታማርስተነ ዞርተ፤ ህንተንቱ ዎዛናን ጾሳ ጋላቲደ፥ ዎሳነ ማዝሙርያ፥ ጾሳ ሱንꬃ ꬎቁ ኦꬅያ የꬃ የጽተ። ኤፈ. 5:19-20 17 ህንተ አይ ሃሳይያዋ ዎይ አይ ኦꬅያዋ ግዶፐካ፥ አዉዋ ጾሳ የሱሳ ባጋና ጋላቲደ፥ ኦꬅያዋ ኡባ ጎዳ የሱሳ ሱንꬃን ኦꬅተ።

18 ማቼቶ፥ አማንያ አሳዉ በስያዋዳን፥ ህንተንቱ አስናዉ ሞደትተ። ኤፈ. 5:22፤ 1 ጰጽ. 3:1

19 አቱማ አሳቶ፥ ህንተንቱ ማጫ አሳ ሲቅተ፤ ኡንቱንቱና ዎፑ ጊደ ደእተ። ኤፈ. 5:25፤ 1 ጰጽ. 3:7

20 ናቶ፥ ህንተንታ የሌዳዋንቶ ኡባባን አዛዘትተ። አያዉ ጎፐ፥ ህንተንቱ ኡንቱንቶ አዛዘትያዌ ጾሳ ዳሮ ናሸቼ። ኤፈ. 6:1

21 አዋቶ፥ ህንተንቱ ናናይ ዎዛና ባየና ማላ፥ ኡንቱንታ ይሎዮፕተ። ኤፈ. 6:4

22 አይለቶ፥ ሳኣን ህንተንቶ ጎዳ ግድያዋንቶ ኡባባን አዛዘትተ፤ ጎዳዉ ያዪደ፥ ሱረ ዎዛናን ኦꬅተፐ አትን፥ አሳ ናሸቻናዉነ አሳይ በኦ ግያዋን አዛዘትያዋንታ ግዶፕተ። ኤፈ. 6:5-8 23 ህንተ ኦꬅያ ኦሱ ኡባ አሳዉ ግደናን ጎዳዉ ኦꬅያዋዳን፥ ዎዛናፐ ኦꬅተ። 24 ጎዳ ክርስቶሳዉ ህንተንቱ ኦꬅያ ድራዉ፥ እ ባረዋንቶ እማናዉ ጊግስ ዎꬄዳዋ ህንተንቱ ላታናዋ አኬክተ። 25 ባላባ ኦꬄዳ ኡራይ ኦንነ፥ ባረ ኦꬄዳ ባላዳን ዎይታ አካና፤ አያዉ ጎፐ፥ ጾሳይ ፕርዲደ፥ ኦናነ ማደና። ዛረ. 10:17፤ ኤፈ. 6:9