1 ጾሳ አሳ ግድያ ሙሴ ሀይቃናፐ ካሰቲደ፥ እስራኤልያ አሳ አንጄዳ አንጁዋ ቃላይ ሀዋ። 2 እ ሀዋዳን ያጌዳ፤ “መꬍና ጎዳይ ሲና ደርያፐ ዬዳ፤ ኤዶማፐ ኑ ቦላን ሃ ፖኤዳ፤ ፓራና ደርያፐ ባረ አሳዉ ፖኤዳ። ሻአን ፓይደትያ ኪታንቻቱ አናና ደኢኖ። አ ኡሸቻ ባጋና ታማ ላጩ ደኤ። 3 ጾሳዉ ኔን ነ አሳ ሲቃዳ። ጌሻቱ ኡባይ ነ ኩሽያን ደኢኖ፤ ነ ገድያ ጻጱዋን ጉልባቲደ ጎይኒኖ፤ ያቲደ ኔፐ አዛዙዋ አኪኖ። 4 ሙሴ እሜዳ ህጊ ያቆባ አሳዉ ላታ። 5 እስራኤልያ ዛራቱ ኡባይነ ይሹሩና ዛርያ ካፓቱ ሺቄዳ ዎደ፥ ጾሳይ ባረ አሳ፥ እስራኤልያ ቦላ ካተቴዳ።

6 “ሮቤል ሀይቆፖ፤ እ ፓጻ ደኦ። አ አሳይካ ፓይዱዋን ጮራቶ” ያጌዳ።

7 ሙሴ ይሁዳ ዛርያባ ሀዋዳን ያጌዳ፤ “አቤት መꬍና ጎዳዉ፥ ይሁዳ ዋሱዋ ስሳ፤ ሀራ ባረ ዳቦቱዋና ኡንቱንቱ ጋከታናዳን ኦꬃ። ኡንቱንቱ ኩሽያ ምንꬃ፤ ኡንቱንቱ ባረንቱ ሞርክያና ኦለትያ ዎደ፥ ኔን ኡንቱንታ ማዳ!” ያጌዳ።

8 ሙሴ ሌዊያ ዛርያባ ሀዋዳን ያጌዳ፤ ከሳ 17:7፤ 28:30፤ ፓይ. 20:13 “ነ ቱሚምነ ኡሪሚ ነ ዶሴዳ አሳሳ። ኔን ማሳሀን ፓጬዳ፥ ማሪባ ሃꬃን ፓሉመቴዳ አሳሳ። 9 ባረና የሌዳዋንቱፐ፥ ባረ እሻቱዋፐነ ባረንቱ ናናቱዋፐ አꬂደ፥ ኡንቱንቱ ነዉ አማነቴዳዌ አꬌ፤ ነ ጫቁዋ ቃላዉ ኡንቱንቱ አማነቴድኖ። 10 ኡንቱንቱ ነ ዎጋ ያቆባ፥ ነ ህግያካ እስራኤልያ ታማርሲኖ። ነ ስንꬃን እጻና ጩዋዪኖ፤ ነዉ ያርሽያሳን ኡባና ጹግያ ያርሹዋ ያርሺኖ። 11 አቤት መꬍና ጎዳዉ ኡንቱንቱ ኩሺ ኦꬄዳዋ አንጃ፤ ኡንቱንቱ ኦꬅያ ኡባባን ነ ናሸትያዋ ኡንቱንቶ ቆንጭሳ። ኡንቱንቱ ቦላ ደንድያዋ መንሬꬃ ኦላ፤ ኡንቱንቱ ሞርከቱዋ ላኤንꬆ ደንꬆፓ” ያጌዳ።

12 ቢንያማ ዛርያባ ሀዋዳን ያጌዳ፤ “መꬍና ጎዳይ ሲቄዳ አሳይ አን አማነቲደ ደኤ። ጋላሳ ኩመንꬃን ኡንቱንታ መꬍና ጎዳይ ናጌ፤ ባረ ሀሽያን ቶኪደ ሸምፕሴ” ያጌዳ።

13 ዮሴፎ ዛርያባ ሀዋዳን ያጌዳ፤ “መꬍና ጎዳይ እራ እምያዋን፥ ጋድያፐ ሃꬃ ፑልትስያዋን፥ ኡንቱንቱ ቢታ አንጆ። 14 አዋይ ካꬅያ ዶረቴዳ አይፍያንነ ዎድያን ዎድያን ካእያ አይፍያን አንጀቶ። 15 በንፐ ደእያ ኡንቱንቱ ደረቱነ ዞዜቱ ሎኦ አይፍያን አንጀትኖ። 16 ኡንቱንቱ ቢታይ ሎኦባ ጻላላ ኩሜዳዋ ግዶ፤ ቡራን ኤጽያ ታማ ግዶን ሃሳዬዳ፥ ጾሳፐ ቤትያ አንጆ ጻላላን ኩሜዳዋ ግዶ። ሀ አንጆቱ ኡባይ ዮሴፎ ዛርያ ጋክኖ፤ አያዉ ጎፐ፥ እ ባረ እሻንቱ ግዶን ካፑዋ። 17 ዮሴፎ ኮይሮ የለቴዳ ኮሩማዳን ምኖ፤ አ ካጨቱ መንꬃ ካጭያዳን ምኖ። አ ካጨቱ ሻአን ፓይደትያ ምናሰ ዛራቱዋ፤ ታሙ ሻአን ፓይደትያ ኤፍሬማ ዛራቱዋ። ሄ ካጨቱዋን እ ካዉተꬃቱዋ ቃይጫና፤ ቢታ ጋጻ ጋካናዉ ኡንቱንታ እ ሱጋና” ያጌዳ።

18 ዛብሎና ዛርያባ ሀዋዳን ያጌዳ፤ “ኔኖ ዛብሎና፥ ኔን ነ ከሳን ናሸታ፤ ይሳኮራ፥ ኔንካ ነ ዱንካንያን ናሸታ። 19 ኡንቱንቱ ካረ ጋደ አሳ ባረንቱ ደርያኮ ጼሳና፤ ሄዋን ኡንቱንቱ ጌሻተꬃ ያርሹዋ ያርሻና። ባረ አቁዋነ ባረንቱ ዱረተꬃ፥ አባፐነ አባ ማታ ሻፍያፐ ደማና” ያጌዳ።

20 ጋዳ ዛርያባ ሀዋዳን ያጌዳ፤ “ኡንቱንቱ ቢታ አሴዳ ጾሳይ ጋላተቶ፤ ጋድ ሞርክያ ሶምኡዋ መንꬃናዉ፥ ጋሙዋዳን ሻንካቴ። 21 ካፓቶ ጌዳ ሎኦ ቢታ ኡንቱንቱ አኬድኖ፤ እስራኤልያ ካፓቱ ሺቄዳ ዎደ፥ ኡንቱንቱ መꬍና ጎዳ ሸንያን ጌሻ ፕርዳ ፕርዴድኖ” ያጌዳ።

22 ዳነ ዛርያባ ሀዋዳን ያጌዳ፤ “ዳን ዎዳላ ጋሙዋ ማላ፤ እ ባሳነፐ ጉፒደ ከሳና” ያጌዳ።

23 ንፍታሌማ ዛርያባ ሀዋዳን ያጌዳ፤ “ንፍታሌም መꬍና ጎዳ አꬎ ኬካተꬃንነ አንጁዋን ዱረቴዳ፤ ኡንቱንቱ ቢታይ ጋሊላ አባፐ ቢደ ገድሳ ባጋ ጋኬ” ያጌዳ።

24 አሴራ ዛርያባ ሀዋዳን ያጌዳ፤ “አሴር ሀራ ዛራቱ ኡባፐ አꬊደ አንጀቴዳዋ። ባረ እሻቱዋንካ ዶሰቴዳዋ ግዶ። አ ቢታይ ዛይትያን ዱረቶ። 25 ኡንቱንቱ ካታማቱካ ብራታ ካርያን ጎርደቲደ ናገትኖ፤ ባረ ላይꬃ ኡባን እ ዎልቃማ ግድኖ።

26 “ኔኖ ይሽሩና፥ ሳሉዋፐ ህንተና ማዳናዉ፥ ባረ ግታተꬃን ሻራን ሀመትያ ህንተ ጾሳ ማላ ጾስ ባዋ። 27 መꬍና ጾሳይ ህንተንቶ ደኡዋ፤ አ መꬍና ኩሸቱ ህንተፐ ጋርሳና ደኢኖ። እ ህንተ ስንꬃፐ ህንተ ሞርከቱዋ የደርሴዳ፤ ህንተ ኡንቱንታ ዉርስ ꬋይሳናዳን ህንተንቶ ኦዴዳ። 28 ሄዋ ድራዉ፥ እስራኤልያ አሳይ፥ ቦችያዌ ባይናን ሳሮተꬃን ደአና፤ ያቆባ ፑልቱ ቁማይነ ዎይንያ ኤሳይ ኩሜዳ ጋድያን ደአና፥ ሳሉዋ እራይ ቡክያሳን ደአና። 29 ህንተኖ እስራኤልያ አሳዉ! ህንተ ዎት አንጀቴድቴ! መꬍና ጎዳይ አሼዳ ህንተ ማላይ ኦኔ? እ ህንተንቶ ጎንዳለነ ህንተና ማድያዋ፤ አን ህንተ ጾንያ ማሻ። ህንተ ሞርከቱ ህንተ ስንꬃን ጉፋናና፤ ህንተካ ኡንቱንቱ ጌሱዋ ላላና” ያጌዳ።